Ina Dzifakazi dza Jehovha dzi di vbindrugedza Bhibhiliya gasi yi pwanana ni esi va si khodwago?
Ahihi. Wulangani nya isoso, tepo hi tugulago gu khethu esi hi si khodwago kha si gimbileyani ni esi Bhibhiliya yi ganeyago, ethu ha gu vbindrugedza esi hi si khodwago.
Na hi si giri Tradução do Novo Mundo das Escrituras khu 1950, hi di gu gevesisa Bhibhiliya. Hi di gu thumisa ni wevbini wuvbindrugedzeyi nya Bhibhiliya nigu guya khesi hi nga ba hi leri hi di hunga esi hi si khodwago. Wona silo nyo khaguri esi Dzifakazi dza Jehovha va si khodwago gukhugeya gale u bwe u hunga gu si ngu pwanana ni Bhibhiliya mwendro ne.
Esi hi si khodwago: Nungungulu khandri vararu. Revhista Zion’s Watch Tower (A Torre de Vigia de Sião) nya Julho nya 1882 yi di gu ganeya gu khiyo: “Valeri vathu va di tugula gu khavo tepo hi khodwago ga Jehovha, ga Jesu ni liphuvbo nya guage, ha gu bomba, kha nga silo nya mba seketedwa khu Bhibhiliya, gihevbudzo gi gu khigyo Vanungungulu vararu muthu moyo mwendro kha nga edzi vambe va ganeyago, Nungungulu moyo ga vathu vararu.”
Esi Bhibhiliya yi ganeyago: “[Jehovha] Nungungulu wathu, khuye basi a gu [Nungungulu].” (Dhewuteronome 6:4, The Holy Bible, by Robert Young) “Gwathu gu na ni Nungungulu moyo basi, a gu Papayi, oyu silo satshavbo si tago khiyo gwaye nigu ethu ha gu vbanyeya uye. Nigu gwathu gu na ni Pfhumu mweyo basi, a gu Jesu Kristo, oyu silo satshavbo si dzudego khu gu thumiswa uye, nigu khu kotani yaye ethu hi na ni womi.” (1 Vakorinto 8:6, American Bible Union Version) Jesu a di khuye: “Papayi khongolo guvbindra eni.” — Johane 14:28, Douay-Rheims Version.
Esi hi si khodwago: Limwalo liphala nya nilo mwendro wulanga gu tshaniswago avbo vathu. Varoma 6:23 na gu khumbuga King James Version (Versão Rei Jaime), Zion’s Watch Tower, khu Gingiza nya Junho nya 1882, yi diri ni hungo nya mahungu wu gu khuwo: “Handro nya gighoho gufa.” Ndrima yoyo yi di gu ganeya gu khiyo: “Malito yaya ma vbevbugide. Ganiolu, kha si pwali gu vathu va khodwago Bhibhiliya, a gu Lito la Nungungulu va ganeya silo nyo hambane khu malito yaya nya yadi, va ganeya gu khavo Bhibhiliya ya gu hevbudza gu khiyo handro nya gighoho womi nya mba vbeya omu nya nilo na va gu tshaniswa.”
Esi Bhibhiliya yi ganeyago: “Wule a nga ghohago khuye a nafago.” (Ezekiyeli 18:4, 20, King James Version) Mahegiso ya vale va girago silo nyo vivbe khandri gu tshaniswa kala gupindruga, ganiolu “gufuviswa nya gupindruge.” — 2 Vatesalonika 1:9, King James Version.
Esi hi si khodwago: Mufumo wa Nungungulu mufumo nya lisine nasiri gilo gi gu romo monyoni. Na yi gu ganeya khu Mufumo wa Nungungulu, Zion’s Watch Tower nya Dezembro nya 1881 yi di khiyo: “Gu fuma nya Mufumo wowu si na gira gu yatshavbo mifumo yi gomogo mafuni momu yi fuviswa.”
Esi Bhibhiliya yi ganeyago: “Khu matshiguni ya vafumeli vovo, Nungungulu wa ndzadzini a na emisa wumbe mufumo nya gu gima kha wu na khoziswa khu mambe mafumbu. A na pfhungumula ni gu mbembisa mifumo yatshavbo ya vafumeli vale, mufumo waye wu na tiya kala gupindruga.” — Dhaniyeli 2:44, King James Version.
Ina Dzifakazi dza Jehovha dza gu thumisa basi Tradução do Novo Mundo gasi yi emeya esi va si khodwago?
Ahihi, kholu hi ngo gu thumisa wuvbindrugedzeyi nya Bhibhiliya nyo hambane-hambane thumoni nyo tshumayele. Kha nga gipandre nya longoloko wathu nya gu hevbudze vambe Bhibhiliya mahala, hi ngu ninga oyu a tsakeyago kopiya nya Tradução do Novo Mundo, ganiolu hi ngu tsaka gambe khu gu hevbula ni muthu a hungidego gu thumisa wumbe wuvbindrugedzeyi nya Bhibhiliya.