Simama gu tiyisa gutumba gwago nya Wukristo

1. Gutumba muni Jehovha a hi ningago?

JEHOVHA a ngu hi ninga gutumba nyo tsakise a gu womi nya mba vbeya. Vambe va na ni gutumba nya gu vbanye ndzadzini kha nga sivangwa nya liphuvbo nya mbafa. (1 Kor. 15:50, 53) Ganiolu, nya vangi va na ni gutumba nya guvbanye mafuni na vari ni womi nyo vbeleye ni gu tsakisa. (Gutu. 21:3, 4) Gani u a ni gutumba nya gu vbanye ndzadzini mwendro mafuni, gutumba hi gu nago khwa lisima gwathu.

2. Gutumba gwathu gwa gu dzi seketeya ga ginani, nigu khu ginani hi nga ganeyago isoso?

² Omu nya Bhibhiliya, lito “gutumba” la gu tshamuseya “gu vireya silo nya sadi si na giregago.” Ethu hi ngu tiyisega gu khethu gutumba gwathu khu wumindru gu na tadzisega kholu gwa guta khiyo ga Jehovha. (Rom. 15:13) Ethu hi ngu siti esi uye a hi tumbisidego ni gu hi ngu dziti gu khethu uye tepo yatshavbo a ngu tadzisa esi a tumbisago. (Mite. 23:19) Ethu hi ngu tiyisega gu khethu Jehovha a na ni gudogoreya ni tshivba nya gu tadzisi satshavbo esi a ganeyago gu khuye a na gira. Gutumba gwathu kha gu dzi seketeyi avba nya esi hi si pimisago mwendro esi hi si vbwetago gu khethu si girega. Gutumba gwathu gwa gu dzi seketeya avba nya esi hi sitigo gu khethu lisine.

3. Ginani hi na bhulago khigyo avba nya ndrima yeyi? (Ndzimo 27:14)

³ Papayi wathu wa ndzadzini a ngu hi haladza nigu o vbweta gu khuye hi mu tumba. (Leri Ndzimo 27:14.) Tepo gutumba gwathu ga Jehovha gu tiyago ethu hi na si kodza gu timiseya sigaradzo hi bwe hi tsaka ambari gya gu dugeleya ginani. Hongoleni hi wona edzi gutumba gwathu gu hi vhikeyago khidzo. Gupheya hongoleni hi wona edzi gutumba gu fanago khidzo ni girikiso ni gihugo (capacete). Khavbovbo, hi na bhula khedzi hi nga tiyisago khidzo gutumba gwathu.

GUTUMBA GWATHU GU NGA FANA NI GIRIKISO

4. Gutumba gwa gu fana kharini ni girikiso? (Vahebheru 6:19)

⁴ Omu nya lidangaliya laye ga Vahebheru, mupostoli Pawulo fananiside gutumba gwathu ni girikiso. (Leri Vahebheru 6:19.) Uye a di gu gola gu endra khu gu thumisa ngalava. Khu kharato, Pawulo a di gu dziti gu khuye girikiso gi di gu thumiswa gasi gu emisa ngalava. Ga giemo nyo khaguri na gu endra umo nya ngalava gi di girega gingulo nya gikhongolo ngudzu. Tepo gi nga ba gi girega gingulo gyogyo uye a di wona vamarinyeru na va gu rinya girikiso matini, gasi ngalava yi si ndrindrwi khu phuvbo yi rika masiwindrini. (Mith. 27:29, 39-41) Kha nga girikiso gi thumiswago gasi gu emisa ngalava, gutumba gwathu gu na hi phasa gu simama vbafuvbi ga Jehovha gasi hi si ndrindrwi tepo hi tshanganago ni sigaradzo si fanago ni singulo nya sikhongolo. Gutumba gwathu gu na hi phasa gurula tepo hi tshanganago ni sigaradzo, kholu hi ngu khodwa gu khethu dzitepo nya dzadi dzi ngo guta. Dundruga gu khuwe Jesu hi gengedzide gu khuye hi di hadzi gu tshaniswa. (Joh. 15:20) Khu kharato, gu dundrugeya khesi Jehovha a hi tumbisago si na hi phasa gu simama gu mu thumeya.

5. Gutumba gu phaside kharini Jesu tepo a nga vbweta gu songwa?

⁵ Litshigu limwedo khu Pentekosta nya 33 matshigoni yathu, mupostoli Pawulo a khumbugide giprofeto gi gomogo umo ga ndzimo gi ganeyago khedzi Jesu a simamidego khidzo gurula. Uye a di khuye: ‘Nyi na hefemula khu gutumba, kholu khu na nga diga hefemulo wangu kovani nya lufu gambe khu na nga dzumedzisa gihathwa gyago gi wona guhina . . . U na nyi tadzisa khu gutsaka nya guwone khovbe yago.’ (Mith. 2:25-28; Ndzi. 16:8-11) Ambari olu Jesu a nga ba adziti gu khuye a di hadzi gu songwa, uye simamide gutumba gu khuye Nungungulu a di hadzi gu mu wusa nigu khuye a di hadzi gu tsaka khu guya tshangana gambe ni Papayi waye wa Ndzadzini. — Hebh. 12:2, 3.

6. Ginani egi ndriyathu moyo a ganedego khu gutumba?

⁶ Gutumba gwathu nya Wukristo gu phaside vandriyathu gu timiseya. Wona giyeyedzo gya Leonard Chinn, ndriyathu nyo tumbege a vbanyidego Inglaterra. Ndrani nya Nyimbi nyo Pheye ya Mafuni gwatshavbo, uye a di khothedwa khu gu bomba gu beya wusotshwatunu. Uye a di khothedwa migima mivili enga, khu gu landreya uye a di gurumedzwa gu gira thumo nyo garadze ngudzu. Uye a di lova gu khuye: “Esi nyi tshanganidego naso si nyi phaside gu tugula gu kheni gutumba gu na ni lisima gasi hi si kodza gu timiseya. Ethu hi na ni giyeyedzo gya Jesu, gya vapostoli, nya vaprofeti, nigu hi na ni situmbiso nya lisima si gomogo umo nya Bhibhiliya. Siyeyedzo satshavbo sesi, si ngu hi ninga gutumba khu wumindru ni gu si ngu hi tiyisa gasi hi si kodza gu timiseya.” Leonard a di gu wona gutumba kha nga girikiso, anethu hi nga wona gutumba khu ndziya yayimweyo.

7. Sigaradzo hi tshanganago naso sa gu tiyisa kharini gutumba gwathu? (Varoma 5:3-5; Jakobe 1:12)

⁷ Tepo hi timiseyago sigaradzo ni gu wona edzi Jehovha a hi phasago khidzo, ha gu tugula gu khethu hi ngu tsakedwa khuye nigu isoso sa gu tiyisa gutumba gwathu. (Leri Varoma 5:3-5; Jakobe 1:12.) Gutumba gwathu gu tiyide ngudzu olu guvbindra tepo nyo pheye hi ngapwa mahungu nya yadi. Sathane o vbweta gu khuye sigaradzo sathu si hi vbedza tshivba, ganiolu khu gu phaswa khu Jehovha hi na si kodza gu si timiseya gimwegyo khu gimwegyo.

GUTUMBA GWATHU GU NGA FANA NI GIHUGO

8. Gutumba gwa gu fana kharini ni gihugo? (1 Vatesalonika 5:8)

⁸ Bhibhiliya yi ngu fananisa gambe gutumba gwathu ni gihugo. (Leri 1 Vatesalonika 5:8.) Lisotshwa la gu ambala gihugo gasi li si bayiswi hungoni khu valala vawe. Avbo nya nyimbi yathu ni sathane, ethu ha gu vhikeya mapimo yathu ga milaphwi yaye. Uye a gu thumisa silo nyo hambane-hambane gasi gu hi linga ni gu ghoha mapimo yathu. Gufana ni gihugo gi vhikeyago hungo nya lisotshwa, gutumba gwathu gu na vhikeya mapimo yathu gasi hi simama na hi tumbegide ga Jehovha.

9. Ginani gi giregeyago vale va gu mwalo gutumba?

⁹ Gutumba hi gu nago nyo vbanye kala gupindruga gu na hi phasa gu hunga silo khu wugengeyi. Ganiolu, gutumba gwathu gwa gu vbola hi bwe hi dzumeya mipimiso nya mba yadi yi ghoha mapimo yathu, hi nga divaledwa khu gutumba hi gu nago nya womi nya mba vbeya. Wona esi si dugeledego Makristo nyo khaguri ma nga ba ma vbanya Korinto wa gale. Ayo ma di luza gu tumba avbo nya situmbiso sa Nungungulu, a gu gutumba nya gu wuswe ga vale vafudego. (1 Kor. 15:12) Pawulo lovide gu khuye vale va gu mba khodwa avbo nya gitumbiso nya gu wuswe ga ava vafudego, avo vo vbanya basi gasi gu dzi tsakisa. (1 Kor. 15:32) Muhuno, nya vangi va gu mwalo gutumba avbo nya situmbiso sa Nungungulu, avo vo gira ni gevbini gilo gasi gu manega ni womi nyo tsakise olu, nya mba dundrugeya khu situmbiso sa Nungungulu. Ganiolu, ethu hi hambanide navo kholu ethu hi ngu tumba situmbiso sa Nungungulu khu wumindru. Gutumba gwathu gu nga fana ni gihugo khu ndziya nya gu fananise, kholu ugo gu ngu vhikeya mapimo yathu nigu gu ngu hi phasa gu mba pimisa basi khethu vamune a gu gilo gi nga hadzi gu vega mhangoni wupari wathu ni Jehovha. — 1 Kor. 15:33, 34.

10. Gutumba gu nga hi vhikeya kharini avbo nya mapimo nya gu vivbe?

¹⁰ Gutumba gwathu gu na hi vhikeya gu pimisa gu khethu kha hi na nga si kodza gu tsakisa Jehovha. Khu giyeyedzo, muthu nyo khaguri a nga pimisa esi: ‘Eni kha nyi na nga si kodza gu manega ni vale va na manago womi nya mba vbeya. Eni khu lisine kha nyiri muthu nya wadi. Eni gima kha nyi na nga si kodza gu vbanya khu milayo ya Nungungulu.’ Dundruga gu khuwe muthaveleyi nyo pfhadzedzeye Elifazi thumiside mapimiselo nyo fane avbo ga Joba. Elifazi a di khuye: “Khuye mani muthu, nya gukala a dzipwa na lulamide?” Uye a di engedza gambe khuye: “Ambari Nungungulu kha tumbi sihathwa saye; ambari ndzadzini kha gu woni na gululamide.” (Joba 15:14, 15) Khu lisine, aya ma diri malipha! Dundruga gu khuwe Sathane a gu vbweta gu u pimisa khu ndziya yeyi. Uye a ngu dziti gu khuye wa simama gu pimisa khu ndziya yeyi, uwe u na pheya gu luza gutumba gwago. Khu kharato, bomba malipha u bwe u vega gupima avba nya situmbiso sa Jehovha. Gima u nga kanakani gu khuwe uye o vbweta gu khuye u vbanya kala gupindruga nigu a na gu phasa gu vboheya misuwo yoyo. — 1 Thim. 2:3, 4.

SIMAMA GU TIYISA GUTUMBA GWAGO

11. Khu ginani hi yedego gu laphisa monyo tepo hi vireyago gu khethu gutumba gwathu gu tadzisega?

¹¹ Khandri tepo yatshavbo si vbevbugago gu simama gu tiyisa gutumba gwathu. Ethu adzina kha hi na nga si kodza gu laphisa monyo tepo hi vireyago Nungungulu a tadzisa situmbiso saye. Ganiolu, khu kotani nya olu Jehovha a gu Nungungulu nya gupindruge, Uye a gu wona tepo khu ndziya nya gu hambane ni ethu. (2 Ped. 3:8, 9) Uye a na gira esi a si tumbisidego khu ndziya nya yadi, ganiolu Uye adzina kha na nga gira silo soso khu tepo hi yi pimisago. Ginani gi nga hi phasago gu simama gu tiyisa gutumba gwathu tepo hi vireyago khu gu laphisa monyo gu tadzisega nya situmbiso sa Nungungulu? — Jak. 5:7, 8.

12. Guya khu Vahebheru 11:1, 6, gutumba gwa gu yelana kharini ni gu khodwa?

¹² Ethu hi na simama gu tiyisa gutumba gwathu ha gu simama vbafuvbi ni Jehovha, kholu Uye khuye a na girago gutumba gwathu gu tadzisega. Khu kharato, gasi gu hi manega ni gutumba hi yede gu khodwa gu khethu Jehovha womo nigu uye a na “tshatshazela avo va mu vbwetago.” (Leri Vahebheru 11:1, 6.) Ha gu khodwa khu lisine gu khethu Jehovha womo ethu hi na si kodza gutumba gu khethu uye a na gira satshavbo esi a hi tumbisidego. Olu hongoleni hi wona dzindziya dzi na hi phasago gu tiyisa wupari wathu ni Jehovha ni gu simama gu tiyisa gutumba gwathu.

13. Hi nga hidzimeya kharini ga Nungungulu?

¹³ Gombeya ga Jehovha u bwe u leri Lito laye. Ambari olu hi gu mba si kodza gu wona Jehovha hi nga hidzimeya vbafuvbi gwaye. Hi nga ganeya naye khu gu thumisa nombelo na hi gu tiyisega gu khethu uye a na hi engiseya. (Jer. 29:11, 12) Hi nga engiseya Nungungulu khu gu leri Lito laye hi bwe hi dundrugeya khilo. Tepo hi lerigo maningano khedzi Jehovha a khathaledego khidzo vale va tumbegidego gwaye gale, gutumba gwathu gu na engedzeya gu tiya. Satshavbo si lovidwego omu nya Lito la Nungungulu “si lovedwe gu khala gihevbudzo gwathu, gasi hi mane gutumba khu kotani nya gutimisele hi gu manago umo nya Milowo nya Guage.” — Rom. 15:4.

14. Khu ginani hi yedego gu dundrugeya khesi Jehovha a giredego vambe?

¹⁴ Dundrugeya khedzi Jehovha a tadzisago khidzo situmbiso saye. Wona esi Nungungulu a giredego Abrahama ni Sara. Avo va diri ga tanga nya gu kha sa nga ba si kodzega gu va velega sanana. Ambari ulolo, Jehovha a va tumbiside gu khuye va di hadzi gu velega gyanana. (Gen. 18:10) A dzipwide kharini Abrahama? Bhibhiliya yari khiyo: “Khu gukhodwa gwaye khade babe nya mayigo nya mangi.” (Rom. 4:18) Ambari olu Abrahama a nga ba a si dziti gu khuye Nungungulu a di hadzi tadzisa kharini gitumbiso gyaye, uye a di gu khodwa gu khuye Jehovha a na tadzisa gitumbiso gyaye. Esi mwama yoyu a nga ba a si virede si tadzisegide. (Rom. 4:19-21) Esi sa gu hi hevbudza gu khiso hi nga tumba gu khethu Jehovha tepo yatshavbo a ngu tadzisa situmbiso saye ambari tepo hi si wonago nga khatshi kha si na nga kodzega.

15. Khu ginani hi yedego gu dundrugeya khesi Nungungulu a hi gireyago?

¹⁵ Dundrugeya khesi Jehovha a gu giredego. Dundrugeya khedzi u wuyedwego khidzo khu wona gu tadzisega nya situmbiso si gomogo umo nya Lito la Nungungulu. Khu giyeyedzo, Jesu tumbiside gu khuye Papayi waye a na gu ninga esi u si vbwetago gasi gu vbanya. (Mat. 6:32, 33) Jesu gambe a ngu gu tiyisegisa gu khuye Jehovha a na gu ninga liphuvbo nya guage wa gu mu lomba. (Luka 11:13) Jehovha a ngu simama gu tadzisa situmbiso sesi. Adzina saye, u nga dundrugeya khu simbe situmbiso a gireyago uwe kamo. Khu giyeyedzo, uye a ngu gutumbisa gu gu divaleya, gu gu thaveleya nigu gu ninga esi u si vbwetago gasi gu simama vbafuvbi gwaye. (Mat. 6:14; 24:45; 2 Kor. 1:3) Tepo u dundrugeyago khesi Nungungulu a gu giredego tepo yatshavbo, u na tiyisa gutumba gwago nya esi a na gu gireyago mindru watshigu.

TSAKA KHU GUTUMBA U GU NAGO

16. Khu ginani gutumba gu gu giningwa nya lisima?

¹⁶ Gutumba hi gu nago nya gu vbanye kala gupindruga giningwa nya lisima gitago khiyo ga Nungungulu. Ethu ha gu vireya khu maho nyo fuviye wumindru wowo nyo tsakise, owu hi tiyisegago gu khethu wu na girega. Ugo gwa gufana ni girikiso, gu hi phasago gu emisana ni sigaradzo, gu timiseya gu tshaniswa, ambari a gu emisana ni gufa. Ugo gambe gu ngu fana ni gihugo gi vhikeyago mapimo yathu gasi hi bomba silo nya gu vivbe hi bwe hi gira esi nya sadi. Gutumba hi gu manago omu nya Bhibhiliya gu ngu hi phasa guti gwadi Nungungulu, nigu gu ngu yeyedza edzi uye a hi haladzago khidzo. Ethu hi na wuyedwa ngudzu ha gu simama gu tiyisa gutumba gwathu.

17. Khu ginani gutumba gu hi girago hi tsaka?

¹⁷ Umo nya lidangaliya laye ga Varoma, mupostoli Pawulo a va tiyiside khu gu ganeya gu khuye: “Nengelani gutumbani.” (Rom. 12:12) Pawulo a di hadzi tsaka kholu uye a di gu tiyisega gu khuye a gu simama na tumbegide, uye a di hadzi gu vbanya kala gupindruga ndzadzini. Ethu nethu hi nga tsaka khu gutumba hi gu nago kholu ethu hi ngu tiyisega gu khethu Jehovha a na simama gu tadzisa situmbiso saye. Muembi nya dzindzimo a di lova gu khuye: “Kategide uye, . . . a vegago gitumbo ga PFHUMU Nungungulu waye . . . a tumbegidego gikhati gyatshavbo.” — Ndzi. 146:5, 6.