Ina u dongide gasi gu dzi hendzeledza ga Jehovha?

1-2. Ginani u yedego gu gira na wu si bhabhatiswi?

NDRANI nya 5 myaga hwane, dzimiliyoni nya vathu va bhabhatisidwe kha nga Dzifakazi dza Jehovha. Gu fana ni mupizane wa lizana myaga nyo pheye, Thimoti, nya vangi vakone va hevbude lisine na va ‘ngari sanana.’ (2 Thim. 3:14, 15) Vambe va hevbude maningano khu Jehovha na vari va khongolo mwendro na va dandride khu tanga. Nyamayi moyo a nga ba a hevbude Bhibhiliya ni Dzifakazi dza Jehovha a di bhabhatiswa nari ni 97 myaga!

² Wa gu ba uri gihevbuli nya Bhibhiliya mwendro wa gu ba u dandriswa khu vavelegi va gu Dzifakazi dza Jehovha, ina wa gu dogoreya gu bhabhatiswa? Iyoyo misuwo nya yadi. Na wu si gu bhabhatiswe u yede gu dzi hendzeledza ga Jehovha. Ndrima yeyi, yi na tshamuseya esi si pategago avba nya gu dzi hendzeledze. Iyo yi na gu phasa gambe gu wona gu khuwe khu ginani u gu mba yela gu thava gu hendzeledza womi wago ga Jehovha u bwe u bhabhatiswa wa gu ba u dzi emisede gu gira isoso.

SO THULA GINANI GU DZI HENDZELEDZA?

3. Ninga siyeyedzo si gomogo omu nya Bhibhiliya nya vathu va hendzeledzidwego ga Jehovha.

³ Omu nya Bhibhiliya, muthu a hendzeledzidwego ga Jehovha a di hathwa. Vaisrayeli va di gu hendzeledzidwe ga Jehovha. Ganiolu, vambe vbakari gwawe va di gu hendzeledzidwe ga Jehovha khu ndziya nyo hathege. Khu giyeyedzo, Aroni a di gu ambala “gitambo nya guage,” a gu gihugu gi nga ba giri ni libhareti mwendro lamina nya oru vbagiwombotuno. Libhareti lolo nya oru, li di gu yeyedza gu khilo a di gu hathidwe gasi gu thumeya Jehovha khu ndziya nyo hathege, a gu gu thuma kha nga muphasi nya khongolo nya mhamba wa Israyeli. (Levhi 8:9) Vanaziri navo va di gu hendzeledzidwe ga Jehovha khu ndziya nyo hathege. Lito “Munaziri,” litago khavbo nya lito nya Gihebheru nazir’ lo thula “gu hambaniswa” mwendro “gu hendzeledzwa.” Vanaziri va di yede gu engisa sileletelo va ningidwego khu Nayo wa Mosi.— Mite. 6:2-8.

4. a) Tepo u hendzeledzago womi wago ga Jehovha, ginani gi girago gu makungo yago ma khala nyo hathege? b) So thula ginani gu “dzi diga”? (Wona fotu.)

⁴ Tepo u dzi hendzeledzago ga Jehovha, wa gu hatha gu khala mupizane wa Jesu Kristo u bwe u gira gugola ga Nungungulu, a gu gilo nya lisima womini gwago. Gu dzi hendzeledza sa gu pata ginani? Jesu a di khuye: “Oyu a vbwetago gu nyi landreya, a na dzi dige.” (Mat. 16:24) Lito nya Gigreki li gu khilo “dzi dige” li nga tshamuseya gambe “gu mba dzi vbanyeya.” Kha nga olu u gu githumi gi dzi hendzeledzidego ga Jehovha, dzimbe dzitepo si na lomba gu u bomba ni gevbini gi gu mba gimbeleyana ni gugola ga Jehovha. (2 Kor. 5:14, 15) Isoso sa gu pata gu bomba “mithumo nya nyama,” nya nga wubhayi. (Gal. 5:19-21; 1 Kor. 6:18) Gu landrisa sileletelo soso, ina si na lemedzisa womi wago? Wa gu ba u haladza Jehovha ni gu tiyisega gu khuwe milayo yaye khyadi, khu lisine kha wu na nga pimisa khu ndziya yoyo. (Ndzi. 119:97; Isa. 48:17, 18) Ndriyathu nyo pwani khu Nicholas wari, khuye: “Wa gu mba si pwisisa gwadi, u nga wona milayo ya Jehovha nga lipaso li gu himbedzeyago gu gira ni gevbini u gi vbwetago mwendro nga dzisimbi dzile dzi himbedzeyago ngala gu duga khomu yi khothedwego.”

5. a) Wa gu dzi hendzeledza kharini ga Jehovha? b) Gu hambana muni gu gomogo avba nya gu dzi hendzeledze ni gu bhabhatiswa? (Wona fotu.)

⁵ Wa gu dzi hendzeledza kharini ga Jehovha? Wa gu mu tumbisa omu nya nombelo gu khuwe u na khozeya uye basi u bwe u thangisa gugola gwaye womini gwago. Khu lisine, wa gu tumbisa Jehovha gu khuwe u na mu haladza “khu monyo wago watshavbo, khu hefemulo wago watshavbo ni mapimo yago yatshavbo ni tshivba yago yatshavbo.” (Marko 12:30) Gu dzi hendzeledza gilo u girago na wuri wenga, nari uwe ni Jehovha basi. Gu hambana ni gu dzi hendzeledza, gu bhabhatiswa gilo u girago na wu gu wonwa khu vatshavbo. Si yeyedzago gu khiso u dzi hendzeledzide ga Jehovha. Gu dzi hendzeledza gilo nya lisima ngudzu. U yede gu manega ni makungo nya gu tadzise gitumbiso gyago nigu khiso Jehovha a vireyago gu khuye u gira. — Muh. 5:4, 5.

KHU GINANI U HENDZELEDZAGO WOMI WAGO GA JEHOVHA?

6. Gighelo muni nya lisima gi gu kutsago gu dzi hendzeledza ga Jehovha?

⁶ Gighelo nya lisima gi gu girago u dzi hendzeledza ga Jehovha kholu u mu haladzago. Lihaladzo lolo kha li dzi seketeyi basi ga edzi u dzipwago khidzo. Ilo gambe la gu dzi seketeya avba nya “guti nya lisine” ni “gupwisisa hi ningwago khu liphuvbo la Nungungulu,” a gu silo u hevbudego maningano khu Jehovha si nga gira lihaladzo u gu nalo khuye li dandra. (Kol. 1:9) Tepo u nga hevbula Bhibhiliya u tiyisegide gu khuwe 1) Jehovha womo, 2) Bhibhiliya Lito laye nigu 3) a gu thumisa hengeledzano yaye gasi gu gira gugola gwaye.

7. Na hi si dzi hendzeledzi ga Nungungulu ginani hi yedego gu gira?

⁷ Vale va hendzeledzago womi wawe ga Jehovha va yede guti sihevbudzo nya litshina si gomogo omu nya Bhibhiliya va bwe va vbanya khu milayo ya Nungungulu. Avo va gu gira satshavbo va si kodzago gasi gu bhuleya vambe khesi va si hevbudego. (Mat. 28:19, 20) Lihaladzo lawe khu Jehovha li dandride, nigu va gu vbweta gu khozeya uye basi. Khandridzo saye ni uwe? Wa gu ba u haladza Jehovha khu monyo wago watshavbo, kha wu na nga dzi hendzeledza ni gu bhabhatiswa gasi gu tsakisa muhevbudzi wago ni vavelegi vago mwendro kholu dzipari dzago dzi girago sasimweso.

8. Gubonga gu nga gu phasa kharini gu hedzeledza womi wago ga Jehovha? (Ndzimo 116:12-14)

⁸ Tepo u dundrugeyago khu satshavbo Jehovha a gu giredego, u na mu bonga u bwe u hendzeledza womi wago gwaye. (Leri Ndzimo 116:12-14.) Bhibhiliya ya gu rana Jehovha nga Muningi nya “satshavbo silo nya sadi ni satshavbo siningwa nyo vbeleye.” (Jak. 1:17) Gimwegyo nya siningwa soso dzegiso wa Gyanana gyaye, Jesu Kristo. Nga dundrugeya khu giningwa gyogyo nyo hlamadzise! Dzegiso wu gu tulede ndziya nya gu gire wupari ni Jehovha. Nigu wu gu ningide lithomo nya gu vbanye kala gupindruga. (1 Joh. 4:9, 10, 19) Gu dzi hendzeledza ga Jehovha mweyo nya dzindziya nya gu yeyedze gubonga khu lihaladzo a gu yeyedzidego ni makategwa yatshavbo a gu ningidego. (Dhet. 16:17; 2 Kor. 5:15) Gubonga gogo gu tshingisidwe omu nya gihevbulo 46, pontu 4 nya libhuku Vbanya nu tsakide kala gupindruga! yi gu na ni vhidhyu nya 3 dzimeneti yi gu khiyo: Siningwa muni hi nga mu ningago Nungungulu?.

INA U DONGIDE GASI GU DZI HENDZELEDZA NI GU BHABHATISWA?

9. Khu ginani u gu mba yela gudzipwa na wu gu gurumedzwa gu dzi hendzeledza?

⁹ Adzina u nga dzipwa na wa sa dzi dongiseya gasi gu dzi hendzeledza ni gu bhabhatiswa. Adzina si nga gu vbwetega gu vbindrugedza silo nyo khaguri womini wago gasi gu tsakisa Jehovha mwendro gu dzi ninga tepo gasi gu tiyisa gukhodwa gwago. (Kol. 2:6, 7) Khandri satshavbo sihevbuli nya Bhibhiliya si dandrago khu liphuvboni khu tepo yayimweyo, nigu khandri vatshavbo vaphya va dongidego gasi gu dzi hendzeledza ni gu bhabhatiswa khu tanga nyo fane. Zama gu wona esi u yedego gu tshukwadzisa ni gu si gira, nasiri gu dzi fananisa ni vambe. — Gal. 6:4, 5.

10. Ginani u yedego gu gira wa gu tugula gu khuwe u si dzi dongiseyi gasi gu dzi hendzeledza ni gu bhabhatiswa? (Wona kwadru “Vale va dandrisidwego khu Dzifakazi dza Jehovha.”)

¹⁰ Wa gu tugula gu khuwe u si dzi dongiseyi gasi gu dzi hendzeledza ga Jehovha, simama gu wona isoso nga misuwo u yedego gu yi vboheya. Lomba Jehovha a gu phasa gasi gu gira guvbindrugedza gu vbwetegago womini gwago. (Filp. 2:13; 3:16) Tiyisega gu khuwe a na engiseya ni gu hlamula nombelo wago. — 1 Joh. 5:14.

KHU GINANI VAMBE VA KANAKANAGO GU DZI HENDZELEDZA NI GU BHABHATISWA?

11. Jehovha a na hi phasa kharini gu simama na hi tumbegide gwaye?

¹¹ Vambe va dongide gu dzi hendzeledza va bwe va bhabhatiswa, ganiolu va ngo kanakana gu gira isoso. Vambe adzina va gu thava gu gira gighoho nya gikhongolo va bwe va duswa libandlani hwane nya gu ba va bhabhatisidwe. Wa gu ba u thava gu gira isoso, tiyisega gu khuwe Jehovha a na gu ninga satshavbo u si vbwetago gasi gu “gimbiya khu ndziya yi [mu] tsakisago.” (Kol. 1:10) Uye gambe a na gu ninga tshivba gasi gu gira silo nya sadi. Nigu uye phaside vathu nya vangi gu gira silo nya sadi. (1 Kor. 10:13) Egi gimwegyo nya sighelo gi girago gu va si duswi vathu nya vangi libandlani. Jehovha a ngu phasa vathu vaye gu simama na va tumbegide.

12. Hi nga potsa kharini gu gira sighoho nya sikhongolo?

¹² Kha nga olu hi gu vathu nya mba vbeleya, dzimbe dzitepo hi nga gira sihoso. (Jak. 1:14) Ambari ulolo, u yede gu hatha esi u na girago wa gu lingwa. Khu lisine, uwe khuwe u yedego gu hunga edzi u na vbanyago khidzo. Vambe vathu va nga ganeya gu khavo kha si kodzegi gu woneleya gudzipwa gwathu ni esi hi girago, ganiolu isoso malipha. U nga hevbuleya gu woneleya gudogoreya gwago nya mba gwadi. Khu kharato, ambari wa gu lingwa, u nga hatha gu mba gira silo nya mba sadi. Gasi u si kodza gu gira isoso, gombeya tshigu ni tshigu. Simama ni longoloko nya gu leri Lito la Nungungulu avba nya gihevbulo nya muthu enga. Manega mitshanganoni yathu. Bhuleya vambe khu gukhodwa gwago. Gu gira silo sesi, si na gu ninga tshivba gasi gu simama na wu tumbegide ga Jehovha. Nigu gima u nga divali gu khuwe Jehovha a na gu phasa gu gira isoso. — Gal. 5:16.

13. Giyeyedzo muni nya gyadi Josefa a hi vegedego?

¹³ Si na gu vbevbugeya gu simama na wu tumbegide ga Jehovha wa gu hunga gu gira gilogyo wa gu tshuka u lingwa. Bhibhiliya yi ngu ganeya khu vathu nya vangi va nga gira isoso, ambari olu anavo va nga ba vari vathu nya mba vbeleya. Khu giyeyedzo, ngadza Potifari zamide gu kutsedzeya Josefa gu lala naye khu dzitepo nya dzingi. Ganiolu, Josefa a di gu siti esi a nga ba a yede gu gira. Bhibhiliya ya gu hi embeya gu khiyo uye “a di bomba” a bwe a ganeya gu khuye: “Nyi ngu dzi kodza kharini eni gu gira gihoso nya gikhongolo nya kharato, nyi ghohela Nungungulu, na?” (Gen. 39:8-10) Somo guagani gu khiso Josefa a di gu giti gilo nyo gire na nga si lingwi khu ngadza Potifari. Isoso si mu vbevbugede tepo a nga emisana ni gilingo gyogyo.

14. Hi nga hevbuleya kharini gu potsa silo nya mba sadi?

¹⁴ U nga pimedzeya kharini Josefa u bwe u simama na wu tumbegide tepo u lingwago? U nga hunga olu esi u na girago wa gu tshuka u lingwa. U nga hevbuleya gu potsa esi Jehovha a si nyenyago ambari wa gu kutsedzedwa gu gira silo soso. (Ndzi. 97:10; 119:165) Khu ndziya yoyo, kha wu na nga ghoha wa gu lingwa. U na ba u siti esi nyo hlamule mwendro nyo gire.

15. U nga yeyedza kharini gu khuwe u ngu ‘vbwetedzeya Jehovha khu lisine’? (Vahebheru 11:6)

¹⁵ Adzina saye, u ngu dziti gu khuwe u li manide lisine nigu wa gu vbweta gu thumeya Jehovha khu monyo wago watshavbo, ganiolu u si dzipwi na wu dongide gasi gu dzi hendzeledza ni gu bhabhatiswa. U nga gira esi Pfhumu Dhavhidhe a giridego. U nga lomba Jehovha gu khuwe: “Nyi khedzise gwadi, uwe Nungungulu; nyi linge uti mapimo yangu; u wona mwendro nyi ngu gimbila khu ndzila nya guvivbe u nyi gimbidzisa khu ndzila nya gupindruge.” (Ndzi. 139:23, 24) Jehovha o kategisa vale “va mu vbwetedzeyago khu lisine.” Gudzigaradza u gu girago gasi gu vboheya misuwo yago nya gu dzi hendzeledzi ni gu bhabhatiswa, gwa gu yeyedza Jehovha gu khugo wa gu mu vbwetedzeya khu lisine. — Leri Vahebheru 11:6.

SIMAMA GU HIDZIMEYA GA JEHOVHA

16-17. Vale vavelegi vawe va gu Dzifakazi dza Jehovha va gu ndridredzedwa kharini khu Jehovha? (Johane 6:44)

¹⁶ Jesu a di ganeya gu khuye vapizane vaye va gu ndridredzedwa khu Jehovha. (Leri Johane 6:44.) Dundrugeya khedzi isoso si hlamadzisago khidzo ni edzi si thumago khidzo avbo gwago. Jehovha a gu wona gilo nya gyadi ga moyo ni moyo a mu ndridredzeyago. Uye a gu hi wona nga “vathu vaye.” (Dhet. 7:6) Khidzo a gu wonago khidzo nuwe.

¹⁷ Adzina saye vavelegi vago Dzifakazi dza Jehovha. U nga dzipwa nga khatshi wa gu thumeya Jehovha khu kotani ya vavelegi vago nasiri kholu Jehovha a gu ndridredzedego. Bhibhiliya yari khiyo: “Hidzimeyani ga Nungungulu, uye a na hidzimeya gwanu.” (Jak. 4:8; 1 Dzik. 28:9) Tepo u pheyago khuwe gu hidzimeya ga Jehovha, uye a gu gu hlamula khu gu gu hidzimeleya. Jehovha kha gu woni basi nga muthu a girago gipandre nya tsawa nyo khaguri. Uye a gu ndridredzeya moyo ni moyo wathu, gupata ava va dandredego lisineni. Tepo muthu nyo khaguri a pheyago khuye gu hidzimeya ga Jehovha, Uye a gu mu hlamula, kha nga edzi si khumbugwago omu ga Jakobe 4:8. — Fananisa 2 Vatesalonika 2:13.

18. Ginani hi na bhulago khigyo ga ndrima yi landreyago? (Ndzimo 40:8)

¹⁸ Tepo u dzi hendzeledzago ga Jehovha u bwe u bhabhatiswa, wa gu pimedzeya Jesu. Uye a dzi hendzeledzide ga Papayi waye gasi gu gira satshavbo a na mu lombago. (Leri Ndzimo 40:8; Hebh. 10:7) Ga ndrima yi landreyago, hi na bhula khegi gi na gu phasago gu simama gu thumeya Jehovha khu gu tumbega hwane nya gu ba u bhabhatisidwe.