‘Simama gu landreya’ Jesu hwane nya gu ba u bhabhatisidwe

1-2. Makategwa muni u na ma manago hwane nya gu ba u bhabhatisidwe?

ETHU hi ngu tsaka tepo hi bhabhatiswago hi bwe hi gira gipandre nya ndranga ya Jehovha. Lithomo nya likhongolo ngudzu gu manega ni wupari nyo tiye ni Jehovha. Ethu hi ngu dzumeleyana ni muembi nya dzindzimo Dhavhidhe, tepo a nga ganeya gu khuye: “Kategide muthu u mu hathago a hidzimela vbafuvbi gwago, gasi guta vbanya nyumbani gwago.” — Ndzi. 65:4.

² Jehovha kha hathi ni wevbini muthu gasi guta nyumbani gwaye. Kha nga hi hevbudego ga ndrima yi nga vbindra, uye a gu ndridredzeya vale va vbwetago gu manega ni wupari nyo tiye naye. (Jak. 4:8) Tepo u dzi hendzeledzago ga Jehovha u bwe u bhabhatiswa, wa gu hidzimeya ga Jehovha khu ndziya nyo hathege. Tiyisega gu khuwe hwane nya gu ba u bhabhatisidwe uye “a na [gu] guhuleya makategwa kala [u] si keneledwi khu gilo.” — Mal. 3:10, NM; Jer. 17:7, 8.

3. Makristo ma nga dzi hendzeledza ni gu bhabhatiswa, gilo muni nya lisima ma yedego gu gira? (Muhevbudzi 5:4, 5)

³ Tepo u bhabhatiswago, wa gu pheya womi nya wuphya thumoni ga Jehovha. Hwane nya gu ba u bhabhatisidwe, u na gira satshavbo u si kodzago gasi gu simama ni gitumbiso gyago nya gu thumeye Jehovha ni gu simama na wu tumbegide gwaye ambari wa gu lingwa gu gira silo nyo vivbe mwendro gu tshangana ni sigaradzo. (Leri Muhevbudzi 5:4, 5.) Kha nga mupizane wa Jesu, u na pimedzeya giyeyedzo gyaye ni gu landrisa sileletelo saye. (Mat. 28:19, 20; 1 Ped. 2:21) Ndrima yeyi, yi na gu phasa gu gira isoso.

‘SIMAMA GU LANDREYA’ JESU AMBARI WA GU TSHANGANA NI SIGARADZO NI SILINGO

4. Vapizane va Jesu va gu rwala “simbo nya tshanisa” khu ndziya muni? (Luka 9:23)

⁴ Hwane nya gu ba u bhabhatisidwe u na simama gu tshangana ni sigaradzo. Jesu si vegide vbaguagani gu khuye vapizane vaye va di hadzi gu “rwala simbo . . . nya tshanisa.” Khu lisine, va di hadzi gu gira isoso “tshigu ni tshigu.” (Leri Luka 9:23.) Ina Jesu a di gu vbweta gu ganeya gu khuye valandreyi vaye tepo yatshavbo va na tshaniseka? Ahihi. Uye a di tshamuseya gu khuye wulangani nya makategwa va nga hadzi gu ma mana, avo va di hadzi tshangana ni sigaradzo. Simbe nya sigaradzo soso si di hadzi gu vbisa ngudzu. — 2 Thim. 3:12.

5. Makategwa muni Jesu a tumbisidego vale va dzi hiyago silo nyo khaguri?

⁵ Adzina saye u wugedwe khu sivbango nya ndranga yago mwendro gu dzi hiya silo nyo khaguri gasi gu thangisa Mufumu wa Nungungulu womini gwago. (Mat. 6:33) Abari kharato, tiyisega gu khuwe Jehovha a wonide satshavbo u nga mu gireya. (Hebh. 6:10) Adzina saye u wonide malito ya Jesu na ma gu tadzisega, ma gu khayo: “Mwalo a nga diga ndranga, vandriyaye nya vama, vandriyaye nya vanyamayi, mamayi, papayi, sanana ni mathembwe khu kotani yangu ni mahungu nya yadi a na gu mba hakha guvbindra 100 dzitepo olu, dzinyumba, vandriye nya vama ni vandriye nya vanyamayi, vamamayi, sanana ni mathembwe gumogo ni dzitshanisa ni womi nya gupindruge tepo yi tago.” (Marko 10:29, 30) Khu lisine, makategwa u nga ma hakha makhongolo ngudzu guvbindra ni gevbini u nga dzi hiya.— Ndzi. 37:4.

6. Khu ginani u yedego gu simama gu dwana ni “gudogoreya nya nyama” hwane nyo ba u bhabhatisidwe?

⁶ U yede gu dwana ni “gudogoreya nya nyama” hwane nya gu ba u bhabhatisidwe. (1 Joh. 2:16) U na simama gu gira isoso kholu uwe kha wa vbeleya. Dzimbe dzitepo, u na dzipwa nga edzi mupostoli Pawulo a dzipwidego khidzo. Uye a di lova gu khuye: “Khu lisine, eni nyi ngu wu gola ngudzu nayo wa Nungungulu. Ganiolu nyi ngu wona givilini gyangu wumbe nayo wu dwanago ni nayo wu gomogo omu nya mapimo yangu nigu uwo wa gu nyi gira gibotshwa nya nayo nya gighoho wu gomogo givilini gwangu.” (Rom. 7:22, 23) Dzimbe dzitepo, u nga dzipwa na wu vbede tshivba khu kotani nya olu u dwanago ni gudogoreya nyo vivbe. Ambari ulolo, tepo u tshanganago ni sigaradzo, gitumbiso u giredego Jehovha tepo u nga dzi hendzeledza gwaye gi na gu phasa gu vbevbugisa womi wago. Khu ndziya muni?

7. Gu dzi hendzeledza ga Jehovha si na gu phasa kharini gu simama gu tumbega gwaye?

⁷ Tepo u dzi hendzeledzago ga Jehovha, wa gu dzi diga. Iso si thulago gu khiso wa gu hunga gu potsa gudogoreya nya mba gwadi ni silo si gu mba tsakisa Jehovha. (Mat. 16:24) Khu kharato, tepo u lingwago mwendro u tshanganago ni sigaradzo, kha wu na nga vbedza tepo na wu gu pimisa esi u na girago. U na ba u hungide esi u na girago, a gu gu simama na wu tumbegide ga Jehovha. Nigu gambe u na ba u hungide gu simama gu tsakisa Jehovha. Ga giemo gegi u na ba u gira esi si giridwego khu Joba. Ambari olu a nga tshangana ni sigaradzo uye a di ganeya gu khuye: “Nyi na kala nyi yafa na nyi nga gu tumbegide.”— Joba 27:5, NM.

8. Wa gu dundrugeya khu nombelo nya gu dzi hendzeledze wu na gu phasa kharini gu pala sigaradzo?

⁸ Wa gu dundrugeya khu nombelo u nga gira na wu gu tumbisa Jehovha gu khuwe u na gira gugola gwaye, u na mana tshivba nya gu timiseye sigaradzo. Khu giyeyedzo, ina u di hadzi gu pheya gu haladzana ni muthu na wu si mu vbweti? Khu lisine, ahihi! Uwe u tumbiside Jehovha gu mba gira silo nya nga isoso. Wa gu mba dzumeleya gudogoreya nya mba gwadi gu dandra monyoni gwago, kha si na nga vbwetega gu mindru watshigu u dwana nago gasi u gu pala. Uwe u na “gimbilela hwindzo” ni “va nya guvivbedwa khu monyo.” — Mav. 4:14, 15.

9. Gu dundrugeya khu nombelo nya gu dzi hendzeledze u giridego wu na gu phasa kharini gu thangisa Jehovha womini gwago?

⁹ Ahati wa gu ningwa thumo wu na gu girago u luza mitshangano nyo khaguri? Uwe u nati gilo nyo gire. Na wu si ningwi thumo wowo, u di gu hungide gu mba dzumeya mithumo yi nga hadzi gu gu himbedzeya gu manega mitshanganoni. Khu kharato, kha wu na nga dzumeya mithumo yoyo u bwe u zama gu vbwetedzeya dzindziya gasi gu thangisa Jehovha womini gwago. Gu dundrugeya khu giyeyedzo gya Jesu si na gu phasa. Uye a di gu dzi emisede gu tsakisa Papayi waye. Gu fana ni Jesu, dzegeya gu potsa ni gevbini gi na zangarisago Nungungulu, oyu u hendzelidzidego womi wago gwaye. — Mat. 4:10; Joh. 8:29.

10. Jehovha a na gu phasa kharini gu ‘simama gu landreya’ Jesu hwane nya gu ba u bhabhatisidwe?

¹⁰ Khu lisine, sigaradzo ni silingo sa gu gu ninga lithomo nya gu yeyedze gu khuwe u dzi emisede gu ‘simama gu landreya’ Jesu. Nigu u nga tiyisega gu khuwe Jehovha a na gu phasa gu gira isoso. Bhibhiliya yari khiyo: “Nungungulu tumbegide. Kha na nga dzumeleya gu khuye mu tshangana ni silingo mu na tandregago gu si timiseya. Mwa gu lingwa, Nungungulu a na mi ninga makodzelo nyo timiseye gilingo gyogyo.”— 1 Kor. 10:13.

GINANI U YEDEGO GU GIRA GASI GU SIMAMA GU LANDREYA JESU

11. Khu yevbini mweyo nya dzindziya yi nga hi phasago gu simama gu landreya Jesu? (Wona fotu.)

¹¹ Jesu a di gu thumeya Jehovha khu monyo waye watshavbo, nigu simamide vbafuvbi ga Jehovha khu gu gombeya. (Luka 6:12) Khu lisine, ndziya nya yadi gasi gu simama gu landreya Jesu hwane nya gu ba u bhabhatisidwe gu simama gu gira silo si na gu phasago gu hidzimeya vbafuvbi ga Jehovha. Bhibhiliya yari khiyo: “Ni gwevbini gutshunguhedza hi gu giridego hongoleni hi simamani gu gimbiya ndziyani yoyo.” (Filp. 3:16) Ga dzitepo nyo khaguri, u napwa matshango ya vandriyathu va nga dzi hiya silo nya singi gasi gu andrisa thumo wa Jehovha. Adzina saye va pategide avba nya Xikola nya vavhangeli nya Mufumo mwendro va hongode omu gu nga ba gu vbwetega giphaso. Wa gu dzi vegeya misuwo nya nga eyi, u na gira satshavbo gasi gu yi vboheya. Vathu va Jehovha va virede khu maho nyo fuviye gu andrisa thumo nyo tshumayele. (Mith. 16:9) Ganiolu, ahati wa gu mba si kodza gu gira silo soso olu? U nga pimisi gu khuwe kha wu phasi gilo wa gu dzi fananisa ni vale va si kodzago gu gira silo soso. Egi gi gu na ni lisima khu gu u simama gu timiseya. (Mat. 10:22) U nga divali gu khuwe Jehovha a ngu tsaka ngudzu tepo u girago esi u si kodzago guya khu giemo gyago. Eyi ndziya nya lisima gasi u simama gu landreya Jesu hwane nya gu ba u bhabhatisidwe. — Ndzi. 26:1.

12-13. Ginani u yedego gu gira wa gupheya gu vbeledwa khu sighingi? (1 Vakorinto 9:16, 17) (Wona kwadru yi gu khiyo: “Simama gu tutuma.”)

¹² Ginani u yedego gu gira wa gu wona gu khuwe kha wu gombeyi gambe khu monyo wago watshavbo mwendro kha wu tsaki khu thumo wago nyo tshumayele nga gale? Nigu ahati wa gu ba u si tsakiswi khu gu leri Bhibhiliya nga gale? Wa gu dzipwa khu ndziya yeyi hwane nya gu ba u bhabhatisidwe, u nga pimisi gu khuwe u mwalo gambe liphuvbo la Jehovha. Kha nga olu hi nga mba vbeleya, edzi hi dzipwago khidzo, dzimbe dzitepo gu nga tshuka guvbindrugedza. Wa gupheya gu vbeledwa khu sighingi, dundrugeya khu giyeyedzo gya mupostoli Pawulo. Ambari olu a nga ba a zama gu pimedzeya Jesu, Pawulo a di gu dziti gu khuye dzimbe dzitepo kha na nga manega ni gudogoreya nya gukhongolo nyo gire esi a si vbwetago. (Leri 1 Vakorinto 9:16, 17.) Uye a di khuye: “Ambari nyo si gira na nyi si dzini, eni nyi ningidwe thumo nya lisima.” Khu mambe malito, Pawulo a di gu dzi emisede gu tadzisa thumo waye nyo tshumayele ambari dzimbe dzitepo a gu dzipwa na ghodhode.

¹³ Khu ndziya nyo fane, u nga hungi makungo khu gu kutswa khedzi u dzipwago khidzo basi. Dzi emiseye gu gira esi nya sadi ambari na wu si dzini gu gira silo soso. Wa gu gira silo nya sadi, gudzipwa gwago gu nga tshuka gu vbindrugedza. Khu kharato, wa gu simama ni longoloko wago nya wadi wa liphuvboni, wu na gu phasa gu landreya Jesu hwane nya gu ba u bhabhatisidwe. Tepo vandriyathu va gu wonago na wu gu timiseya thumoni ga Jehovha, avo va gu dzipwa na va gu tiyiswa. — 1 Tes. 5:11.

“SIMAMANI GU DZI KAMBEYA . . . SIMAMANI GU DZI KHEDZANI GWADI”

14. Ginani u yedego gu gi kambeya tepo yatshavbo nigu khu ginani? (2 Vakorinto 13:5)

¹⁴ Hwane nya gu ba u bhabhatisidwe, si na ni lisima gu dzi kambeya tepo yatshavbo. (Leri 2 Vakorinto 13:5.) Dzimbe dzitepo, si na ba siri sadi gu wona gu khuwe u ngu gombeya tshigu ni tshigu, u ngu leri ni gu hevbula Bhibhiliya, u ngu patega mitshanganoni ni thumoni nyo tshumayele. Vbwetedzeya dzindziya nya gu dzi buze ni gu wuyedwa khu mithumo yeyi. Khu giyeyedzo, u nga dzi wudzisa gu khuwe: ‘Ina nyi nga tshamuseya sihevbudzo nya litshina nya Bhibhiliya vambe? Ina dzomo dzindziya nya gu gire thumo wangu nyo tshumayele wu tsakisa? Ina nyi ngu gira milombelo nyo kongome nigu iyo yi ngu yeyedza gu khiyo nyi ngu tumba Jehovha khu gu vbeleya? Ina nyi ngu patega tepo yatshavbo mitshanganoni nya Wukristo? Nyi nga si kodza kharini gu tshukwadzisa edzi nyi vegago khidzo gupima ni edzi nyi pategago khidzo mitshanganoni?’

15-16. Ginani u gi hevbulago khu matimo ya ndriyathu nya mwama a padego gilingo?

¹⁵ Si na ni lisima gambe guti silo si hi garadzeyago gu emisana naso. Ndriyathu nya mwama nyo pwani khu Robert a gu ganeya khu pontu yeyi omu nya matshango yaye. Uye wari, khuye: “Tepo nyi nga ba nyi ri ni 20 myaga, nyi di gu thuma metadu nya litshigu thumoni gwangu. Litshigu limwedo, hwane nya thumo, githumi khwathu gi di nyi kovhidhari gasi gu hongola gaya gwagyo. Igyo gi di nyi embeya gu khigyo hi na ba hiri honga nigu hi na ya ‘hagana ngudzu.’ Gupheyani, kha nya si kodza gu mu embeya gu kheni ahihi, ganiolu khu gu hegisa nyi mu embede nyi bwe nyi mu tshamuseya gu kheni khu ginani.” Robert a si kodzide gu pala gilingo gyogyo, nigu isoso si ngu zundzega. Khu gu landreya, a di dundrugeya khesi si nga girega a bwe a tugula gu khuye a di yede gu ganeya ni githumi gyogyo khu gu kongoma ni gu tiya. Uye a gu ganeya gu khuye: “Kha nya ganeya khu gu tiya tepo nyi nga bomba kovhinte yagyo mwendro kha nya gira esi Josefa a giridego tepo a nga tutuma ngadza Potifari. (Gen. 39:7-9) Khu lisine, nyi hlamadzisidwe khedzi si nga nyi garadzeya khidzo gu bomba kovhinte yaye. Esi si nga girega si nyi phaside gu wona gu kheni nyi di yede gu engedzeya gu tiyisa wupari wangu ni Jehovha.”

¹⁶ U na wuyedwa wa gu dzi kambeya gufana ni esi Robert a giridego. Ambari wa gu si kodza gu pala gilingo nyo khaguri dzi wudzise gu khuwe: ‘Tepo muni nyi vbedzidego gasi gu ganeya gu kheni ahihi?’ Wa gu dzipwa gu khuwe somo u yedego gu tshukwadzisa, u nga vbeyi tshivba. Tsaka khu gu dziti gu khuwe gomo omu u yedego gu tshukwadzisa. Gombeya ga Jehovha maningano khegi u vbwetago gu tshukwadzisa u bwe u gira silo si na engedzeyago gudogoreya gwago nya gu mu engise. — Ndzi. 139:23, 24.

17. Lina la Jehovha li pategide kharini omu nya matshango ya Robert?

¹⁷ Gyomo gimbe gilo hi gi hevbulago avba nya matshango ya Robert. Uye a gu simama gu ganeya gu khuye: “Hwane nya gu ba nyi bombide kovhinte ya githumi khwathu, igyo gi di ganeya gu khiyo: ‘Bayi kamu u paside!’ Nyi di gi wudzisa gu kheni wa gu vbweta gu ganeya ginani khu isoso? Igyo gi di tshamuseya gu khigyo pari yagyo yi nga diga lisine yi di mu embeya gu khuye vaphya vatshavbo nya Dzifakazi dza Jehovha va gu vbanya miwomi mivili va gu mana lithomo. Khu kharato, gi di embeya pari yagyo gu khigyo gi na tugula gu nyi ngu fana ni vaphya vovo va nga bhula khavo. Khu kharato, nyi di tsaka khu gu dziti gu kheni nyi di gu zundzide lina la Jehovha.”

18. Ginani u dzi emisedego gu gira hwane nya gu ba u bhabhatisidwe? (Wona kwadru yi gu khiyo: “Dzindrima dzimbili dzi na gu tsakisago.”)

¹⁸ Tepo u dzi hendzeledzago ga Jehovha u bwe u bhabhatiswa, wa gu yeyedza gu khuwe wa gu vbweta gu agisa lina laye ambari gya gu dugeleya ginani. Nigu u nga tiyisega gu khuwe Jehovha a ngu siti sigaradzo u tshanganago naso ni silingo u emisananago naso. Uye a na gu kategisa wa gu simama na wu tumbegide. Tiyisega gu khuwe khu gu thumisa liphuvbo laye nya guage, uye a na gu ninga tshivba gasi gu gira isoso. (Luka 11:11-13) Khu gu phaswa khu Jehovha, u na si kodza gu simama gu landreya Jesu hwane nya gu ba u bhabhatisidwe.