Gima hi mwalo honga

1-2. a) Khu ginani hi yedego gu tiyisega gu khethu hi mwalo honga tepo hi tshanganago ni sigaradzo? b) Hi na bhula khu ginani avba nya ndrima yeyi?

TEPO hi tshanganago ni sigaradzo, ethu hi nga dzipwa na hi romo honga vbakari nya likhabi nya likhongolo, nya mba yiti ndziya nyo duge khiyo. Ganiolu, hi mwalo honga. Papayi wathu wa ndzadzini a ngu wona sigaradzo sathu nigu a ngu hi tumbisa gu hi phasa. Jehovha a gu tumbisa sithumi saye nyo tumbege gu khuye: ‘Nyi na mi phasa.’ — Isa. 41:10.

² Avba nya ndrima yeyi, hi na bhula khedzi Jehovha a hi phasago khidzo 1) khu gu hi thangeya, 2) khu gu hi ninga esi hi si vbwetago, 3) gu hi vhikeya ni gu 4) hi thaveleya. Jehovha a ngu hi tiyisegisa gu khuye ambari ha gu tshangana ni gevbini gigaradzo womini wathu, uye gima kha na nga hi divala. Uye gima kha na nga hi diga. Khu kharato, gima hi mwalo honga.

JEHOVHA A NGU HI THANGEYA

3-4. Jehovha a gu hi thangeya kharini? (Ndzimo 48:14)

³ Leri Ndzimo 48:14. Jehovha a ngu dziti gu khuye kha hi si kodzi gu dzi thangeya habune nigu hi ngu vbweta giphaso gyaye. Uye a gu thangeya kharini vakhozeyi vaye nyo tumbege muhuno? Mweyo nya ndziya a girago khidzo isoso khu gu thumisa Bhibhiliya. (Ndzi. 119:105) Jehovha a gu thumisa Bhibhiliya gasi gu hi phasa gu hunga makungo nya yadi ni gu pimedzeya edzi a pimisago khidzo ni gu gira khidzo silo. Tepo hi engisago esi a hi hevbudzago omu nya Bhibhiliya, hi na tsaka olu nigu hi na manega ni gutumba nya gu vbanye kala gupindruga.a Khu giyeyedzo, uye a ngu hi hevbudza gasi hi si vegi giviti, hi tumbega ga silo satshavbo ni gu haladza vambe khu monyo wathu watshavbo. (Ndzi. 37:8; Hebh. 13:18; 1 Ped. 1:22) Tepo hi girago silo khu ndziya yeyi, hi na khala dzipari nya dzadi, vavelegi nya vadi ni dzipari nya dzadi nya wugadzi.

⁴ Omu nya Bhibhiliya, Jehovha patide siyeyedzo nya vathu va nga tshangana ni sigaradzo nya nga esi sathu. (1 Kor. 10:13; Jak. 5:17) Tepo hi lerigo maningano ni womi nya vathu vovo hi bwe hi thumisa esi hi hevbulago, hi ngu wuyedwa khu dzindziya dzimbili. Nyo pheye, hi yede gu pwisisa gu khethu khandri ethu honga hi tshanganago ni sigaradzo womini. Vambe va ngu tshangana ni sigaradzo sasimweso nigu va ngu si kodza gu si timiseya khu gu phaswa khu Jehovha. (1 Ped. 5:9) Nigu nya wuvili, hi ngu hevbula esi si na hi phasago gu timiseya sigaradzo sathu ni gu simama na hi tsakide. — Rom. 15:4.

5. Jehovha a gu thumisa mani gasi gu hi thangeya muhuno?

⁵ Jehovha gambe a gu thumisa vandriyathu gasi gu hi thangeya.b Khu giyeyedzo, vawoneleyi nya sirkwitu tepo yatshavbo va ngu wuseya mabandla gasi gu ma tiyisa. Dziganelo dzawe dzi ngu tiyisa gukhodwa gwathu ni gu hi phasa gu manega ni wumowo. (Mith. 15:40–16:5) Madhota nayo ma ngu dzi garadzeya gu phasa moyo ni moyo wathu gu simama vbafuvbi ga Jehovha. (1 Ped. 5:2, 3) Vavelegi va ngu hevbudza sanana sawe gu haladza Jehovha, va si phasa gu hunga makungo khu wugengeyi ni gu manega ni siolovedzo nya sadi. (Mav. 22:6) Vandriyathu nya vanyamayi va vidzidwego va ngu phasa vandriyathu nya vaphya khu gu va ninga giyeyedzo nya gyadi, gu va ninga wusingalagadzi wu phasago ni gu va tiyisa. — Tit. 2:3-5.

6. Hi nga wuyedwa kharini khu wuthangeyi wa Jehovha?

⁶ Jehovha a hi ningide satshavbo hi si vbwetago gasi gu hi hunga makungo ni gu tsaka womini. Hi nga yeyedza kharini gu khethu hi ngu ninga lisima esi a hi giredego? Mavingu 3:5, 6 wari, khuye: “Tumba Pfhumu Nungungulu khu monyo wago watshavbo, u nga tumbi basi wugengeli wago.” Ha gu gira isoso “uye a na lulamisa dzindzila [dzathu],” si thulago gu khiso uye a na hi ninga tshivba hi yi vbwetago gasi hi pala sigaradzo nya singi ni gu tsaka womini. Ethu hi ngu bonga ngudzu kholu Jehovha a hi tigo gwadi ni gu hi haladza avbo nya gu a hi ninga sigengedzo tepo hi si vbwetago. — Ndzi. 32:8.

JEHOVHA A NGU HI NINGA ESI HI SI VBWETAGO

7. Khu dzevbini dzindziya edzi Jehovha a hi phasago khidzo? (Vafilipi 4:19)

⁷ Leri Vafilipi 4:19. Vbavbandze nya gu hi thangeye khu liphuvboni basi, uye a ngu hi ninga gilo nyo hodze, sombo nya gu ambale ni wulanga nya gu khale. (Mat. 6:33; 2 Tes. 3:12) Si olovelegide gu hi garadzega khu kotani nya silo hi si vbwetago khu nyamani, ganiolu Jehovha a ngu hi kutsa gu mba garadzega khu silo soso. Khu ginani? Kholu Jehovha gima kha na nga hi diga. (Mat. 6:8; Hebh. 13:5) Ethu hi nga mu tumba tepo a ganeyago gu khuye a na hi phasa.

8. Ginani egi Jehovha a giredego Dhavhidhe?

⁸ Wona edzi Jehovha a phasidego khidzo Dhavhidhe. Tepo Dhavhidhe a nga ba a tutuma Pfhumu Sawule, Jehovha a mu ningide esi uye ni vathu vaye va nga ba va si vbweta gasi gu vbanya. Na gu dundrugeya khedzi Jehovha a mu phasidego khidzo khu myaga nya yingi, Dhavhidhe lovide gu khuye: “Nyi diri lidzaha, olu nyi gumbide, aholu gima nyi si gu woni muthu nya gululame na digidwe, mwendro livelego laye na Ii gu lomba silo nya guhodze.” (Ndzi. 37:25) Gu fana ni Dhavhidhe, adzina u wonide dzindziya edzi Jehovha a dzi thumisidego gasi gu phasa vandriyathu dziteponi nya sigaradzo.

9. Jehovha a gu phasa kharini vathu vaye muhuno tepo yi dugeleyago mhango? (Wona dzifotu.)

⁹ Jehovha a ngu phasa gambe vathu vaye dziteponi nya dzimhango nya tumbunugo. Khu giyeyedzo, tepo yi nga manega ndzala Jerusalema ga lizana myaga nya gupheye, Makristo ma nga ba ma vbanya ga mayigo nya gu hambane ma di rumeya giphaso ga vandriyawe va nga ba va vbweta giphaso. (Mith. 11:27-30; Rom. 15:25, 26) Vathu va Jehovha muhuno, va ngu phasa vandriyawe tepo va vbwetago giphaso. Tepo dzi manegago dzimhango, khu lihaladzo, Jehovha a ngu thumisa vathu vaye gasi gu ninga silo nya nga gu hodza, mati, sombo ni mirendre ga vale va thegedwego khu dzimhango. Mitsawa nya gu vbahe yi ngu vbahedza dzinyumba ni Dzisalawu nya Mufumo. Nigu sithumi sa Jehovha si ngu vbiredzeya gu ninga giphaso gya liphuvboni ni gu tiyisa vale va luzidego dzinyumba dzawe mwendro sigodwa sawe.c

10-11. Ginani hi gi hevbulago khu giyeyedzo gya Borys?

¹⁰ Jehovha a ngu phasa gambe vale va gu mba mu khozeya. Khu ndziya nya gu fane, ethu ha gu vbwetedzeya mathomo gasi gu yeyedza wuwadi vale va gu mba thumeya Jehovha. (Gal. 6:10) Tepo hi girago isoso, ethu ha gu ninga wufakazi nya wadi. Wona giyeyedzo gya Borys, a gu dhiretori nya xikola nyo khaguri ya Ucrânia. Ambari olu Borys a nga ba a siri Fakazi ya Jehovha, uye a di gu phara sihevbuli si gu Dzifakazi khu ndziya nya yadi ni gu yeyedza githawo esi si si khodwago. Tepo Borys a nga hunga gu tutuma nyimbi avba a nga ba a khala avbo, uye a di hongola gumbe wulanga avba a nga phaswa khu vandriyathu. Khu landreya, Borys a di hongola Gidundrugisotuno nya gufe ga Jesu. Tepo a dundrugeyago khu satshavbo esi vandriyathu va mu giredego, uye a gu ganeya gu khuye: “Dzifakazi dza Jehovha dzi nyi yeyedzide wuwadi dzi bwe dzi nyi khataleya. Nyi ngu dzi bonga ngudzu Dzifakazi dza Jehovha.”

¹¹ Anethu hi nga pimedzeya wuhindzi wa Papayi wathu wa dzandzini khu gu yeyedza lihaladzo vale va li vbwetago, na si si khatadzisegi gu Dzifakazi mwendro ne. (Luka 6:31, 36) Hi ngu tumba gu khethu lihaladzo hi yeyedzago vathu li na va kutsa gu hevbula nya singi khu Jehovha ni gu pheya gu mu thumeya. (1 Ped. 2:12) Gani va ngu hatha gu thumeya Jehovha mwendro ne, ethu hi na ‘tsaka khu gu ninga.’ — Mith. 20:35.

JEHOVHA A NGU HI VHIKEYA

12. Jehovha a gu tumbisa gu vhikeya kharini vathu vaye? (Ndzimo 91:1, 2, 14)

¹² Leri Ndzimo 91:1, 2, 14. Jehovha, muhuno a gu tumbisa gu vhikeya vathu vaye ga gevbini gi vegago wupari wawe naye mhangoni. Uye gima kha na nga dzumeleya Sathane a emisa vathu vaye gu mu khozeya khu ndziya a yi vbwetago. (Joh. 17:15) Nigu ndrani “nya tshanisa nya yikhongolo,” hi nga tiyisega gu khethu Jehovha a na tadzisa situmbiso saye maningano ni gu vhikeya vathu vaye nasiri basi khu liphuvboni ganiolu khu nyamani gambe. — Gutu. 7:9, 14.

13. Jehovha a gu hi vhikeya khu ndziya muni?

¹³ Jehovha a gu vhikeya kharini moyo ni moyo wathu? Jehovha a hi ningide Bhibhiliya gasi guti esi nya yadi ni esi nya mba sadi. (Hebh. 5:14) Tepo hi thumisago esi hi hevbulago omu nya Bhibhiliya, ethu ha gu vhikeya wupari wathu ni Nungungulu hi bwe hi hunga makungo nya yadi ma hi phasago gu tsaka ni gu mana womi nya wadi. (Ndzi. 91:4) Jehovha gambe a ngu hi ninga libandla li hi phasago gu simama gu tumbega gwaye. (Isa. 32:1, 2) Ha gu manega ni wupari ni vale va haladzago Jehovha hi bwe hi vbanya khu milayo yaye, hi ngu tiyiswa nigu hi nga si kodza gu pala mikutsedzelo nya mba yadi. — Mav. 13:20.

14. a) Khu ginani Nungungulu a gu mba hi vhikeya ga dzatshavbo dzimhango? b) Ndzimo 9:10 a gu hi tiyisegisa ginani? (Wona tshamuselo wa vbavbatshi.)

¹⁴ Jehovha dzimbe dzitepo a vhikede vakhozeyi vaye ga dzimhango, gale. Ganiolu, uye kha nga ba a gira isoso tepo yatshavbo. Bhibhiliya ya gu hi hevbudza gu khiyo hatshavbo hi nga tshangana ni sigaradzo hi gu mba si vireya. (Muh. 9:11) Nigu gambe Jehovha dzumelede gu khuye sithumi saye si tshangana ni sigaradzo si bwe sifa gasi gu yeyedza gu khiso Sathane muliphi. (Joba 2:4-6; Mat. 23:34) Si ngu fana ni muhuno. Ambari olu Jehovha a gu mba dusa satshavbo sigaradzo sathu, hi nga tiyisega gu khethu Jehovha gima kha na nga diga vale va mu haladzago.d — Ndzi. 9:10.

JEHOVHA A NGU HI THAVELEYA

15. Hi nga thaveledwa kharini khu gu gira nombelo, Lito la Nungungulu ni vandriyathu? (2 Vakorinto 1:3, 4)

¹⁵ Leri 2 Vakorinto 1:3, 4. Dzimbe dzitepo, hi ngu garadzega ni gu vbisega. Adzina saye wa gu tshangana ni giemo nyo garadze gi gu girago u dzipwa wenga. Ina womo a pwisisago gudzipwa gwago? Jehovha a ngu gu pwisisa. Uye khapwi basi guvbisa hi gu pwago, ganiolu ‘a ngu hi thaveleya sigaradzoni sathu satshavbo.’ Khu ndziya muni? Tepo hi gombeyago ga Jehovha, uye a ngu hi ninga “gurula ga Nungungulu, gu vbindrago gupwisisa gwatshavbo.” (Filp. 4:6, 7) Hi ngu thaveledwa tepo hi lerigo malito ya Jehovha omu nya Bhibhiliya. Umo nya lito laye, Jehovha a ngu hi embeya edzi a hi haladzago khidzo, gu hi ninga guti ni gu hi ninga gutumba. Nigu mitshangano nya libandla yi ngu thaveleya ni gu hi tiyisa khu gu thumisa Bhibhiliya.

16. Ginani u gi hevbulago khu giyeyedzo gya Nathan ni Priscilla?

¹⁶ Gasi gu wona edzi Jehovha a hi thaveleyago khidzo ni gu hi tiyisa khu gu thumisa Bhibhiliya, wona giyeyedzo gya Nathan ni Priscilla, va vbanyago Estados Unidos. Myaga hwane, avo va di hunga gu hongola umo gu nga ba gu vbwetega giphaso nya vahuweleyi. Nathan wari, khuye: “Hi di gu tumba gu khethu Jehovha a di hadzi gu kategisa gudzigaradza gwathu.” Hwane nya gu ba va vbohide ga thumo wawe nya wuphya, va di tshangana ni gigaradzo nya madwali ni dzitsapawu. Khu kharato, patwa wowo wu di yede gu bweleya gaya nigu va simamide gu emisana ni gigaradzo nya dzitsapawu. Nathan a gu ganeya gu khuye: “Nyi di gu dzi wudzisa gu kheni khu ginani Nungungulu a nga mba hi kategisa nga edzi hi nga ba hi pimisa khidzo. Nyi di pheya gu dzi wudzisa gu kheni ina gyomo gilo nyo khaguri nyi nga ghoha.” Khu gu gimbiya nya tepo, Nathan ni Priscilla va di pwisisa gu khavo Nungungulu gima kha va diga tepo va nga ba va vbweta giphaso. Nathan a gu engedza gu khuye: “Ndrani nya tepo yeyi nyo garadze, Bhibhiliya yi khade pari yi hi tiyisago ni gu hi ninga sileletelo. Gu vega gupima ga edzi Jehovha a hi phasidego khidzo gu timiseya wulangani nya gu vege gupima avba nya sigaradzo sathu, si hi phaside gu tiyisega gu khethu Jehovha a na simama gu hi phasa mindru wa tshigu.”

17. Ndriyathu nyo pwani khu Helga a thaveledwe khu ndziya muni? (Wona fotu.)

¹⁷ Vandriyathu va nga hi thaveleya khu yimbe ndziya. Khu ndziya muni? Wona giyeyedzo gya Helga a vbanyago Hungria. Khu myaga nya yingi, uye a tshanganide ni sigaradzo si nga mu gira a garadzega ni gu dzipwa na si phasi gilo. Ganiolu, a gu khedza hwane a gu wona edzi Jehovha a mu thaveledego khidzo khu gu thumisa libandla. Uye a gu lova gu khuye: “Jehovha tepo yatshavbo a nyi phaside tepo a nga wona gu khuye nyi di gu vbede tshivba khu kotani nya thumo wangu, khu gu ba nyi khataleya gyanana gyangu gi dwalago ni tepo nyi nga ba nyi tshangana ni simbe sigaradzo. Tshigu ni tshigu ndrani nya 30 myaga yi vbindridego, uye a simamide gu tadzisa gitumbiso gyaye nya gu nyi thaveleye. Dzitepo nya dzingi, uye a di gu nyi thaveleya khu gu thumisa mihlamulo nyo mbure yi tiyisago yi ningedwago khu vandriyathu. Dzitepo nya dzingi nyi di gu hakha lidangaliya, mesaji mwendro malito nyo zundzwi tepo nyi nga ba nyi si vbweta.”

18. Hi nga tiyisa kharini vambe?

¹⁸ Hi na ni lithomo nyo pimedzeye Nungungulu wathu khu gu thaveleya vambe. Hi nga gira kharini isoso? Hi nga laphisa monyo tepo hi va engiseyago, hi va thaveleya khu malito yathu ni gu va phasa khu dzimbe dzindziya. (Mav. 3:27) Hi ngu dzigaradzeya gu thaveleya vatshavbo va tshanisekago, gu pata ni vale va gu mba thumeya Nungungulu. Tepo ava va vbanyago vbafuvbi gwathu va garadzegago, gu emisana ni madwali mwendro gu swihala, ethu ha gu va wuseya, gu va engiseya gwadi ni gu va tiyisa khu gu thumisa Bhibhiliya. Tepo hi pimedzeyago Jehovha, “Nungungulu nya guthaveleye gwatshavbo,” kha hi na nga phasa basi vandriyathu, ganiolu hi na phasa gambe vale va gu mba thumeya Jehovha gu hevbula nya singi khuye. — Mat. 5:16.

JEHOVHA TEPO YATSHAVBO A NA HI PHASA

19. Silo muni esi Jehovha a hi gireyago, nigu hi nga mu pimedzeya kharini?

¹⁹ Jehovha a ngu khatala ngudzu khu vale va mu haladzago. Uye kha hi digi tepo hi tshanganago ni sigaradzo. Gu fana ni muvelegi a khataleyago gyanana gyaye khu lihaladzo, Jehovha a ngu khataleya vakhozeyi vaye nyo tumbege. Uye a ngu hi thangeya, gu hi ninga esi hi si vbwetago, gu hi vhikeya ni gu hi thaveleya. Ethu ha gu pimedzeya Papayi wathu wa dzandzini tepo hi phasago ni gu tiyisa vambe va tshanganago ni sigaradzo. Mafuni momu, hi na tshangana ni sigaradzo, ganiolu hi nga tiyisega gu khethu Jehovha a na ni ethu. Kholu a tumbiside gu khuye: “U nga khali hwanga, kholu eni nyi nago.” (Isa. 41:10) Gitumbiso gegi gya gu hi tiyisegisa gu khigyo gima hi mwalo honga.