Mana litsako li reswago khu gu ningeya

1-2. Ha gu wuyedwa kharini khu gu ba Jehovha a hi giride ni makodzelo nyo tsake khu gu ningeya nasiri khu gu hakha?

TEPO Jehovha a nga gira vathu, a va giride ni makodzelo nyo mani litsako khu gu ninga gu vbindra gu hakha. (Mith. 20:35) Ina isoso sa gu thula gu khiso kha hi mani litsako khu gu hakha? Ahihi. Hatshavbo hi ngu tsaka tepo hi hakhago giningwa nyo khaguri, ganiolu hi ngu mana litsako nya likhongolo tepo hi ningago gilo nyo khaguri vambe. Khu lisine, khyadi ngudzu gu ba Jehovha a hi giride khu ndziya yeyi. Khu ginani?

² Khu gu ba Jehovha a hi giride khu ndziya yeyi, uye a hi ningide lithomo nya gu ethu hi tsaka. Ethu hi ngu mana litsako tepo hi pimisago dzindziya nya gu ninge vambe ni gu dzi garadzeya gu gira isoso. Ina kha si hlamadzisi khu gu ba Jehovha a hi giride khu ndziya yeyi? — Ndzi. 139:14.

3. Khu ginani Jehovha a tshamusedwago kha nga “Nungungulu nyo tsake”?

³ Milowo ya gu hi tiyisegisa gu khiyo gu ningeya gu ngu resa litsako, khu kharato kha hi hlamali tepo khiyo Bhibhiliya yi ganeyago gu khiyo Jehovha, “Nungungulu nyo tsake.” (1 Thim. 1:11) Khuye muthu nyo pheye gu ningeya silo vambe, nigu mwalo muthu a ningedego silo nya singi vambe gu vbindra Jehovha. Jehovha a hi ningide womi, nigu khu kotani nya womi wowo “hi ngu gimbiya nigu hi ngu vbanya.” (Mith. 17:28) Khu lisine, “satshavbo silo nya sadi ni satshavbo siningwa nyo vbeleye” sa guta khiyo ga Jehovha. — Jak. 1:17.

4. Ginani gi na hi phasago gu engedzeya gutsaka?

⁴ Hatshavbo hi ngu tsakeya gupwa litsako hi li manago khu gu ningeya gu vbindra gu hakha. Hi nga gira isoso khu gu hi pimedzeya wuwadi wa Jehovha. (Efes. 5:1) Ga ndrima yeyi, hi na hevbula khu siyeyedzo nya gu ninge ni gu gambe hi na wona esi hi nga girago va gu tshuka vambe va si yeyedzi gubonga khesi hi va gireyago. Siyeyedzo sesi, si na hi phasa gu ninga vambe ni gu mana litsako tepo hi ningeyago.

PIMEDZEYA WUWADI WA JEHOVHA

5. Khu sevbini silo sa nyamani esi Jehovha a hi ningago?

⁵ Khu dzevbini dzimbe dzindziya edzi Jehovha a yeyedzago khidzo wuwadi? Wona siyeyedzo nyo khaguri. Jehovha a ngu hi ninga esi hi si vbwetago khu nyamani. Ethu kha ha ghanya ngudzu, ganiolu Jehovha a ngu hi ninga esi hi si vbwetago gasi gu vbanya. Khu giyeyedzo, uye a ngu gira gu hi mana gilo nyo hodze, gilo nyo ambale ni wulanga nyo lale. (Ndzi. 4:8; Mat. 6:31-33; 1 Thim. 6:6-8) Ina Jehovha a gu hi ninga satshavbo sesi hi si vbwetago khu nyamani kholu hi mu gurumedzago? Ahihi! Khu ginani Jehovha a hi gireyago isoso?

6. Ginani hi gi hevbulago omu ga Matewu 6:25, 26?

⁶ Khu lisine, Jehovha a gu hi ninga esi hi si vbwetago khu nyamani kholu a hi haladzago. Wona esi Jesu a ganedego omu ga Matewu 6:25, 26. (Leri.) Jesu thumiside siyeyedzo nya sivangwa. Na gu ganeya khu sinyoni, Jesu a di khuye: “Iso kha si yali, ne kha si vbweri nigu kha si hengeledzeyi gilo gisangalani.” Khu kharato, wona esi a nga ganeya khu gu landreya, uye a di khuye: “Papayi wanu a gomogo ndzadzini a ngu si hodzisa.” Hwane nya isoso Jesu a di wudzisa gu khuye: “Ina enu mu mwalo lisima guvbindra sinyoni?” Ginani hi gi hevbulago? Sithumi nyo tumbege sa Jehovha si na ni lisima ngudzu gu vbindra sirengo. Abari gu Jehovha a ngu khataleya sirengo, hi nga tiyisega gu khethu uye a na hi khataleya. Gu fana ni papayi a khataleyago gwadi ndranga yaye, Jehovha a ngu hi khataleya khu lihaladzo. — Ndzi. 145:16; Mat. 6:32.

7. Khu yevbini mweyo nya ndziya hi nga yi thumisago gasi gu pimedzeya wuwadi wa Jehovha? (Wona fotu.)

⁷ Gu fana ni Jehovha, anethu hi nga ninga vambe silo sa nyamani kholu hi va haladzago. Khu giyeyedzo, u nguti ndriyathu nyo khaguri a hamugago gilo nya gu hodze mwendro gilo nya gu ambale? Jehovha a nga gu thumisa gasi gu phasa ndriyathu yoyo. Vathu va Jehovha va gu tidwa kha nga vathu nya gu yeyedze wuwadi tepo dzi dugeleyago dzimhango nya tumbunugo. Khu giyeyedzo, ndrani nya tungo nya COVID-19, vandriyathu va kabanide guhodza, sombo nya gu ambale, ni simbe silo esi vandriyathu va nga ba va si vbweta. Hi nga yeyedza gambe wuwadi khu gu gira miningelo yi seketeyago thumo nya gu vbahe mafuni gwatshavbo. Isoso si na phasa vandriyathu va thegedwego khu dzimhango mafuni gwatshavbo. Vandriyathu vava va yeyedzago wuwadi va gu kutswa khu malito ma gu romo omu ga Vahebheru 13:16, ma gu khayo: “Mu nga divali gu gira esi nya sadi ni gu kabana esi mu gu naso ni vambe kholu Nungungulu a ngu tsakiswa khu miphaso yoyo.”

8. Ha gu wuyedwa khu tshivba ya Jehovha khu dzindziya muni? (Vafilipi 2:13)

⁸ Jehovha a ngu hi ninga tshivba. Jehovha a gu tsaka khu gu ninga tshivba sithumi saye. (Leri Vafilipi 2:13.) Ina u di nga gombeya ga Jehovha u lomba tshivba gasi gu timiseya gigaradzo nyo khaguri? Mwendro adzina saye u di nga gombeya u lomba tshivba gasi gu gira mithumo yago ya tshigu ni tshigu? Khu kharato, tepo nombelo wago wu nga hlamudwa, u dzipwide nga Mupostoli Pawulo a nga khuye: “Nyi ngu kodza gu gira silo satshavbo khu kotani ya Nungungulu a nyi ningago tshivba.” — Filp. 4:13.

9. Hi nga pimedzeya kharini wuwadi wa Jehovha khu gu thumisa tshivba yathu? (Wona fotu.)

⁹ Ambari olu hi gu vathu nya mba vbeleya, hi nga pimedzeya wuwadi wa Jehovha khu gu thumisa tshivba yathu. Kha hi na nga si kodza gu dzega tshivba yathu hi ninga vambe. Ganiolu, hi nga thumisa tshivba yathu gasi hi phasa vambe. Khu giyeyedzo, hi nga phasa vandriyathu va dandridego khu tanga gu khataleya dzinyumba dzawe mwendro gu va phasa khu simbe silo. Siemo sathu sa gu ba si hi dzumeleya, hi nga dzi ningedzeya gasi gu phasa gu agisa ni gu lungisa Dzisalawu dzathu nya Mufumo. Ha gu thumisa tshivba yathu khu ndziya yeyi, hi na phasa vambe gu khozeya Jehovha.

10. Hi nga tiyisa kharini vambe khesi hi ganeyago?

¹⁰ U nga divali gambe gu khuwe malito yago ma na ni tshivba. U nguti muthu nyo khaguri a na tiyiswago wa gu mu zundza? U nguti muthu nyo khaguri a vbwetago gu thaveledwa? Abari gu ina, gira gilogyo gi na girago muthu yoyo a tiyisega gu khuye u ngu khathala khuye. Uwe u nga wuseya muthu yoyo, u mu ligareya khu telefoni, gu mu rumeleya lidangaliya, gu mu rumeleya email ni gu mu rumeleya mesaji. Uwe u nga garadzegi ngudzu khesi u na ganeyago. Malito nya madugwana ma khugeyago monyoni khaya ndriyago a ma vbwetago gasi a simama na tumbegide ni gu dzipwa gwadi ga gigaradzo a tshanganago nagyo. — Mav. 12:25; Efes. 4:29.

11. Jehovha a gu thumisa wuti waye khu ndziya muni?

¹¹ Jehovha a ngu hi ninga wuti. Mupostoli Johane ganede gu khuye: “A gu ba a romo moyo wanu a vbwetago wugengeyi, a na simame gu gu lomba ga Nungungulu, kholu uye a ngu ninga wugengeyi vatshavbo khu wuhindzi nya mba vbwetedzeya gihoso gwawe.” (Jak. 1:5) Malito yaya, ma gu yeyedza gu khayo Jehovha kha gundreyi wuti waye. Khu wuwadi, uye a ngu ninga wuti waye vathu vatshavbo. Wona gu khuwe Jakobe ganede gu khuye Jehovha a ngu ninga wuti nya mba “vbwetedzeya gihoso.” Uye gima kha vbweti gu khuye ethu hi dzipwa nandru khu gu lomba giphaso gyaye. Wulangani nya isoso, uye a gu vbweta gu khuye ethu hi lomba wuti avbo gwaye. — Mav. 2:1-6.

12. Khu yavbini mathomo hi gu nawo nya gu bhuleye wuti hi gu nawo?

¹² Ahati ethu? Ina hi nga pimedzeya Jehovha khu gu hi bhuleya vambe guti hi gu nago? (Ndzi. 32:8) Vathu va Jehovha va na ni mathomo nya mangi nya gu bhuleye vathu esi va si hevbudego. Khu giyeyedzo, tepo hi trenarigo muthu nyo khaguri thumoni nya gu tshumayele. Madhota khu gu laphisa-monyo ma ngu phasa vaphasedzeyi nya libandla ni vandriyathu va bhabhatisidwego gu wona edzi va nga girago khidzo gwadi mithumo va ningwago libandlani. Nigu vandriyathu va kodzago gu vbaha ni gu lungisa silo nyo khaguri, va ngu phasa gu trenari vambe gasi gu vbaha dzinyumba dzi thumiswago thumoni ga Jehovha.

13. Hi nga pimedzeya kharini ndziya eyi Jehovha a hevbudzago khiyo vambe?

¹³ Zama gu pimedzeya Jehovha tepo u trenarigo vambe. Dundruga gu khuwe khu wuwadi, Jehovha a ngu ninga wuti. Khu ndziya nyo fane, anethu hi tshulegide gu hevbudza vambe esi hi si hevbulago. Kha hi yeli gu diga gu hevbudza vambe khu gu thava gu khethu va na hi dzegeya thumo wathu. Dzimbe dzitepo, vathu va ngu pimisa gu khavo: ‘Kha nga olu va nga mba trenarwi khu muthu, avo kha va na nga trenari vambe.’ Sithumi satshavbo sa Jehovha kha si yeli gu pimisa khu ndziya yeyi. Wulangani nya isoso, hi ngu tsaka khu gu bhuleya vambe esi hi sitigo ni gu gira satshavbo hi si kodzago gasi gu trenari vambe. (1 Tes. 2:8) Ethu ha gu vbweta gu khethu ‘anavo va kodza gu hevbudza vambe.’ (2 Thim. 2: 1, 2) Khu wuwadi, ha gu hevbudza esi hi sitigo vambe, hatshavbo hi na mana wuti ni gu tsaka.

TEPO VATHU VA GU MBA YEYEDZA GUBONGA

14. Ginani vathu nya vangi va girago tepo hi va yeyedzago wuwadi?

¹⁴ Tepo hi ningago mwendro gu gireya gilo mumbe muthu, ngudzu-ngudzu vandriyathu, avo va ngu yeyedza gubonga. Avo adzina saye va nga hi rumeleya lidangaliya na va gu bonga mwendro gu yeyedza gubonga gwawe khu yimbe ndziya. (Kol. 3:15) Tepo hi wonago vandriyathu na va gu yeyedza gubonga, isoso so engedzeya gutsaka gwathu.

15. Ginani hi yedego gu gi dundruga tepo vambe va gu mba yeyedza gubonga?

¹⁵ Ganiolu, dzimbe dzitepo vathu nyo khaguri kha va yeyedzi gubonga tepo hi va gireyago wuwadi. Ga simbe siemo, so wonegisa gu khatshi vathu kha va ninge lisima satshavbo hi giridego gasi gu va phasa, nya nga tepo yathu, tshivba yathu ambari ni dzithomba dzathu. Sa gu tshuka si girega isoso, hi nga potsa kharini gu vbeledwa khu litsako? Dundruga malito ma gomogo omu ga Mithumo 20:35, a gu aya ma khumbugidwego avba nya lowo nya litshina nya ndrima yeyi. Litsako hi li manago khu gu ninga, khandri la gu seketedwa avba nya hlamulo hi wu manago. Hi nga dzi emiseya gu simama gu ningeya ambari vambe va gu mba yeyedza gubonga. Khu ndziya muni? Wona dzindziya nyo khaguri.

16. Ginani gi na hi phasago gu phasa vambe khu gu tsaka?

¹⁶ Dundruga gu khuwe tepo u phasago vambe wa gu pimedzeya Jehovha. Uye a ngu ninga silo nya sadi vathu, gani va ngu yeyedza gubonga mwendro ne. (Mat. 5:43-48) Jehovha a gu tumbisa gu khuye ha gu ninga gilo “nya mba vireya gu livbwa, . . . tshatshazelo [wathu] wu na ba wuri wukhongolo.” (Luka 6:35) Khu kharato, kha hi yeli gu garadzega tepo vathu va gu mba yeyedza gubonga. Dundruga gu khuwe Jehovha a na gu tshatshazeya khu satshavbo u girago gasi gu phasa vambe u bwe u dundruga gu khuwe u “muthu a ningeyago khu gutsaka.” — Mav. 19:17; 2 Kor. 9:7.

17. Gighelo muni nya lisima gi yedego gu hi kutsa gu phasa vambe? (Luka 14:12-14)

¹⁷ Yimbe ndziya hi nga pimedzeyago khiyo Jehovha tepo hi gireyago wuwadi vambe, khu gu thumisa wusingalagadzi wa Jesu wu gu romo omu ga Luka 14:12-14. (Leri.) Kha sa vivba gu kovhidhari muthu gaya gwathu mwendro gu mu yeyedza wuwadi ambari na hi dziti gu khethu uye a na hi gireya sasimweso. Ganiolu, ginani hi yedego gu gira ha gu tugula gu khethu ha gu ningeya khu gu vireya gu hakha gilogyo? Abari kharato, zama gu gira esi Jesu a ganedego. Hi nga yeyedza wuwadi ga wule hi dzitigo gu khethu kha na nga si kodza gu gira sasimweso. Khu ndziya yoyo, hi na tsaka khu gu pimedzeya giyeyedzo gya Jehovha. Ethu dzitepo dzatshavbo hi nga tsaka khu gu gireya wuwadi vambe ambari ha gu mba bongwa.

18. Ginani hi yedego gu tiyisega khigyo gu khethu kha hi giri, nigu khu ginani?

¹⁸ Kha hi yeli gu pimisa gu khethu vambe kha va yeyedzi gubonga. (1 Kor. 13:7) A gu tshuka muthu nyo khaguri a si yeyedzi gubonga dzi wudzise gu khuwe: ‘Ina uye muthu nya mba bonga mwendro adzina saye a di divala gu ganeya gu khuye nyi bongide?’ Adzina gyomo gighelo nyo khaguri gi nga mu gira a si yeyedzi gubonga. Vambe va nga bonga ngudzu khu monyoni, ganiolu si va garadzeya gu ganeya. Vambe adzina va ngapwa dzitshoni kholu va nga ningwa giphaso, ngudzu-ngudzu abari gu avo gale va di gu oloveya ngudzu gu phasa vambe. Ganiolu, lihaladzo nya lisine hi gu nalo khu vandriyathu, kha li na nga hi gira hi pimisa silo nyo vivbe khavo nigu hi na simama gu tsaka navo. — Efes. 4:2.

19-20. Gu laphisa-monyo gwa gu hi phasa kharini tepo hi gireyago wuwadi vambe? (Wona fotu.)

¹⁹ Laphisa-monyo. Pfhumu Solomoni lovide esi maningano khu gu yeyedza wuwadi: “Rinya guhodza gwago vbatshani nya mati; kholu khu hwane nya matshigu nya gutale u na bwelo khavbo u gu mana nyaluphye.” (Muh. 11:1) Malito yaya ma gu hi hevbudza gu khayo, dzimbe dzitepo vathu va nga yeyedza gubonga “hwane nya matshigu nya mangi.” Khiso si giregedego ndriyathu nyo khaguri nya nyamayi.

²⁰ Hwane nya myaga nyo khaguri, mwangadzi wa muwoneleyi nya sirkwitu a di loveya lidangaliya nyo tiyise ndriyathu nya nyamayi a nga ba ari gu bhabhatiswa. Omu nya lidangaliya laye, a di tshingisa lisima nya gu simame gu tumbega ga Jehovha. Hwane nya 8 myaga ndriyathu yoyo a di hlamula lidangaliya a rumedwego, khuye: “Nyi di yede gu gu loveya lidangaliya gasi gu gu embeya edzi malito yago ma nyi phasidego khidzo myaga yatshavbo yeyi. U thumiside malito ma yeyedzago wuwadi, nigu gima kha nyi na nga divala lowo u wu khumbugidego.”a Hwane nya gu ba a tshamusede sigaradzo a tshanganidego naso, uye a di ganeya gu khuye: “Dzimbe dzitepo nyi di gu pimisa gu tsukula satshavbo, nyi vbweta gu ema gu thumeya Jehovha ni mithumo nyi nga ba nyiri nayo. Ganiolu, lowo wule u lovidego omu nya lidangaliya u nga nyi rumeya, wu nyi ningide tshivba gasi nyi simama gu thumeya Jehovha.” Uye a di ganeya gambe gu khuye: “Ga 8 myaga yi vbindridego gimwalo gi nga nyi tiyisa guvbindra lowo u lovidego omu nya lidangaliya lago.” Nga dundrugeya khu gutsaka a gupwidego mwangadzi wa muwoneleyi nya sirkwitu tepo a nga hakha lidangaliya leli “hwane nya matshigu nya mangi!” Anethu hi nga bongwa hwane nya gu ba hi girede wuwadi muthu nyo khaguri ambari na yi gu vbindride tepo nyo laphe.

21. Khu ginani u dzi emisedego gu pimedzeya wuwadi wa Jehovha?

²¹ Kha nga hi bhudego khiso, Jehovha a hi vangide ni makodzelo nyo hathege. Ambari olu hi tsakago khu gu hakha, hi ngu mana litsako nya likhongolo tepo hi ningago silo nyo khaguri vambe. Hi ngu dzipwa gwadi tepo hi dzi emiseyago gu phasa vandriyathu. Nigu hi ngu tsaka tepo va yeyedzago gubonga. Khu lisine, gani hi ngu bongwa mwendro kha hi bongwi, ethu hi nga tsaka khu gu gira silo nya sadi. Gima u nga divali gu khuwe ni gevbini u hungago, “[Jehovha] a naso nya singi nya gu gu ninge nya guvbindre isoso.” (2 Dzik. 25:9) Lisine gu a mwalo muthu a ningeyago nya singi ni silo nya sadi guvbindra Jehovha! Nigu gu tshatshazedwa khu Jehovha si ngu hi ninga litsako nya likhongolo ngudzu. Khu kharato, hongoleni hi dzi emiseya gu pimedzeya Papayi wathu nya wuwadi wa ndzadzini.