Tiyisega gu khuwe Jehovha a na gu thaveleya

1. Tshamuseya giemo gya Vajudha va nga ba va romo wugumbini Bhabhiloni.

DUNDRUGEYA edzi Vajudha va nga ba va romo wugumbini Bhabhiloni va dzipwidego khidzo. Avo va wonide litigo lawe na li gu tshungunudwa. Khu kotani nya sighoho sawe ni sighoho sa vakokwe vawe, va dusidwe khu tigoni gwawe nya mavelego va bwe va rumedwa Bhabhiloni. (2 Dzik. 36:15, 16, 20, 21) Lisine gu Bhabhiloni va di tshulegide gasi gu khathaleya womi wawe. (Jer. 29:4-7) Ambari ulolo, womi wawe kha wa nga ba wu vbevbugide, nigu va di hadzi gu mba hatha gu vbanya khu ndziya yoyo. Va dzipwide kharini khu giemo gyawe? Moyo wakone a nga ba ari gumbi a ganede gu khuye: “Bambe nya mitsongo ya Bhabhiloni, hi di khala hi lila khu gu dundruga lidhoropa la Siyoni.” (Ndzi. 137:1) Vajudha va di vbweta gu thaveledwa, ganiolu khu mani a nga hadzi gu gira isoso?

2-3. a) Ginani egi Jehovha a giredego Vajudha va nga ba va romo wugumbini? b) Ginani hi na bhulago khigyo avba nya ndrima yeyi?

² Jehovha, “Nungungulu nya guthaveleye gwatshavbo.” (2 Kor. 1:3) Jehovha a ngu haladza sithumi saye, nigu a ngu dzina gu si thaveleya. Jehovha a di gu dziti gu khuye vambe va nga ba va romo wugumbini va di hadzi dzumeya sileletelo saye va bwe va mu khozeya. (Isa. 59:20) 100 myaga hwane Vajudha na va si hongoli wugumbini, muprofeti Isaya a lovide mahungu ma ganedego khu Vajudha omu nya libhuku li gu na ni lina laye. Libhuku la Isaya li di hadzi gu va phasa kharini? Isaya a di khuye “‘Thaveleyanani, thaveleyanani vathu vangu’ a ngu ganeya Nungungulu wanu.” (Isa. 40:1, NM) Khu lisine, khu gu thumisa milowo ya muprofeti Isaya Jehovha a thavelede Vajudha va nga ba va romo wugumbini.

³ Gufana ni Vajudha vale va nga ba va romo wugumbini, anethu dzimbe dzitepo hi ngu vbweta gu thaveledwa. Avba nya ndrima yeyi, hi na bhula khu dzindziya dziraru edzi Jehovha a dzi thumisidego gasi gu thaveleya Vajudha. 1) A tumbiside gu khuye a na divaleya sighoho sa vale va dzi layidego, 2) a ningide gutumba vathu vaye ni 3) a va phaside gu mba thava. Hi na bhula gambe khedzi Jehovha a hi thaveleyago khidzo khu ndziya yayimweyo muhuno.

JEHOVHA A NGU HI DIVALEYA

4. Jehovha a yeyedzide kharini gu khuye a tade khu wuhindzi? (Isaya 55:7)

⁴ Jehovha “Papayi a tadego khu wuhindzi.” (2 Kor. 1:3) Uye a yeyedzide likhalelo leli tepo a nga tumbisa gu divaleya Vajudha va dzi layidego va nga ba va romo wugumbini. (Leri Isaya 55:7.) Uye a di khuye: “Khu wuhindzi nya gupindruge nyi na gu pwela gisiro.” (Isa. 54:8) Jehovha a nga hi yeyedza kharini wuhindzi? Ambari olu Vajudha va nga ba va tshaniseka khu kotani nya silo nya guvivbe va giridego, Jehovha a va tumbiside gu khuye kha va na nga simama Bhabhiloni kala gupindruga. Avo va di hadzi gu simama nari dzigumbi khu tepo nyo khaguri. (Isa. 40:2) Malito yaya ma thavelede ngudzu Vajudha va nga ba va dzi layide ni gu vbweta gu tsakisa Jehovha.

5. Gu vbindra Vajudha va nga ba va romo Bhabhiloni, khu ginani hi gu na ni sighelo nya singi gasi gu tiyisega gu khethu Jehovha a na hi divaleya?

⁵ Ginani hi gi hevbulago? Jehovha a dzi emisede gu divaleya sithumi saye khu gu vbeleya. Guvbindra Vajudha va nga ba va romo Bhabhiloni, ethu hi na ni sighelo nya singi gasi hi tiyisega gu khethu Jehovha a na hi divaleya. Khu ndziya muni? Kholu ethu hi ngu pwisisa esi Jehovha a giridego gasi gu divaleya sighoho sathu. Hwane nya myaga nya yingi Isaya na profetide, Jehovha rumede Gyanana gyaye mafuni gasi gu ta dzegisa sighohi satshavbo si dzi layidego. Khu kotani nya olu Jesu a nga hi feya, Jehovha a nga divaleya sighoho sathu khu gu vbeleya. (Mith. 3:19; Isa. 1:18; Efes. 1:7) Khu lisine, ethu ha gu thumeya Nungungulu nya wuhindzi!

6. Hi nga wuyedwa kharini khu gu vega gupima avbo nya wuhindzi wa Jehovha? (Wona fotu.)

⁶ Malito ya Jehovha hi ma manago umo ga Isaya 55:7 ma nga hi thaveleya ha gu ba hi dzipwa nandru. Vambe gwathu va nga simama gu dzipwa nandru khu sighoho va giridego gale ambari na va gu dzi layide. Adzina hi nga simama gu dzipwa nandru khu gu ba hi tshaniseka khu kotani nya mihandro nya mba yadi hi yi manidego. Khu lisine, ha gu ba hi dawulede sighoho sathu ni gu ba hi dzi layide, hi nga tiyisega gu khethu Jehovha a hi divalede. Nigu tepo Jehovha a hi divaleyago uye a gu hatha gu mba dundruga gighoho gyathu. (Fananisa ni Jeremiya 31:34.) Olu Jehovha a gu mba dundruga sighoho hi giridego gale, anethu kha hi yeli gu simama gu dundrugeya khiso. Esi si gu na ni lisima ga Jehovha khesi hi mu gireyago olu nasiri sighoho hi giridego gale. (Ezek. 33:14-16) Nigu nya mba hweya, Papayi wathu a tadego khu wuhindzi a na ta hi tshula ga mihandro nya mba yadi hi yi manago khu kotani nya sighoho sathu.

7. Ginani gi na hi kutsago gu bhula ni madhota ha gu ba hi giride gighoho nya gikhongolo?

⁷ Ginani hi yedego gu gira ha gu dzipwa nandru khu gu ba hi giride gighoho nya gikhongolo hi bwe hi siheya vambe? Bhibhiliya ya gu hi kutsa gu lomba giphaso madhota. (Jak. 5:14, 15) Ambari ulolo, kha si vbevbugi gu dzumeya gu khethu hi ghohide. Ganiolu, hi yede gu dundruga gu khethu Jehovha a gu thumisa vama vovo gasi gu hi phasa, nigu avo va na hi yeyedza lihaladzo ni wuhindzi nga edzi Jehovha a girago khidzo. Ha gu dundruga isoso hi bwe hi dzi laya, hi na dzi emiseya gu bhula navo. Wona edzi wuhindzi wa Jehovha wu thaveledego khidzo ndriyathu nyo pwani khu Arthur,a oyu a nga ba a garadzwa khu livhalo laye. Arthur wari, khuye: “Tanga nya mwaga mowo eni nyi di gu wona ponografiya, ganiolu hwane nya gu ba nyi pwide na gu ganedwa khu livhalo, eni nyi di embeya mwangadzi wangu ni madhota khu gighoho nyi giridego. Hwane nya isoso, nyi di dzipwa gwadi. Ganiolu, nyi di gu simama gu garadzega khesi nyi giridego. Madhota ma di nyi dundrugisa gu khayo Jehovha gima kha nyi tsukula. Uye a gu hi kawuka kholu a hi haladzago. Malito yaye ma kuhide monyo wangu nigu ma nyi phaside gu dzi wona nga edzi Jehovha a nyi wonago khidzo.” Muhuno, Arthur a gu thuma kha nga piyoneru nya tepo yatshavbo nigu muphasedzeyi nya libandla. Si ngu thaveleya gu dziti gu khethu Jehovha a ngu yeyedza wuhindzi vale va dzi layidego.

JEHOVHA A NGU HI NINGA GUTUMBA

8. a) Gutumba muni ogu Jehovha a ningidego Vajudha? b) Guya khu Isaya 40:29-31, gutumba gu di hadzi gu kuha kharini Vajudha va dzi layidego?

⁸ Guya khu mawonelo nya vathu, Vajudha va nga ba va romo wugumbini kha sa nga ba si kodzega gu va bweleya tigoni gwawe nya mavelego. Vabhabhiloni kha va nga ba va dzumeya gu khavo dzigumbi dzi bweleya tigoni gwadzo. (Isa. 14:17) Ganiolu, Jehovha a ningide gutumba vathu vaye. A tumbiside gu khuye a na tshula vathu vaye, nigu gimwalo gi na mu himbedzeyago. (Isa. 44:26; 55:12) Mahoni ga Jehovha, litigo la Bhabhiloni li di gu fana ni kudzudzwani wu vbuvbago. (Isa. 40:15) Tepo khiyo phuvbo yi vetago, kudzudzwani wa gu vbuvba. Khu ndziya nya gu fane, si di hadzi vbevbugeya Jehovha gu tshula vathu vaye khu Bhabhiloni. Gitumbiso gegi gi phaside kharini Vajudha? Igyo gi di hadzi gu va thaveleya, ganiolu igyo gi di hadzi gambe gu gira nya singi. Isaya a di lova gu khuye: “Vale va tumbago Pfhumu Nungungulu, va na wusedzwa tshivba yawe.” (Leri Isaya 40:29-31.) Avo va di hadzi fana ni maghama ma vbuvbago, kholu gutumba gu di hadzi gu va ninga gambe tshivba.

9. Sighelo muni si giridego Vajudha va tumba gu khavo Jehovha a na tadzisa situmbiso saye?

⁹ Jehovha ningide gambe Vajudha va nga ba va romo wugumbini gighelo nya gu tumbi situmbiso saye. Khu ndziya muni? Khu gu dundrugeya siprofeto va nga ba va dziti gu khavo si tadzisegide. Khu giyeyedzo, avo va di gu dziti gu khavo Asiriya a di gu wandride mufumo wa Norte wa Israyeli ni gu dzega vathu a va yisa wugumbini. (Isa. 8:4) Avo va wonide Bhabhiloni na gu tshungunula Jerusalema va bwe va dzegwa va hongola wugumbini. (Isa. 39:5-7) Avo va di gu vbanya tepo khiyo Pfhumu Zedhekiya a nga khala gikhumo a bwe a yiswa Bhabhiloni. (Jer. 39:7; Ezek. 12:12, 13) Satshavbo esi Jehovha a ganedego si tadzisegide. (Isa. 42:9; 46:10) Satshavbo sesi si tiyiside gukhodwa gwawe nya gu khawe gitumbiso gya Jehovha gi ganeyago khu gu va tshudzisa gi na tadzisega!

10. Ginani gi nga hi phasago gu simama ni gutumba nya gutiye matshigoni yaya nya hegise?

¹⁰ Ginani hi gi hevbulago? Tepo hi dzipwago na hi vbede tshivba, gutumba gu nga hi thaveleya ni gu hi ninga tshivba. Ha gu vbanya dziteponi nya sigaradzo nigu hi ngu emisana ni valala nya tshivba, ambari ulolo ethu kha hi vbeyi tshivba. Jehovha a hi ningide gutumba nya gu hlamadzise, a gu gu vbanya kala gupindruga na hiri ni gurula nya lisine ni gu vhikelega. Hi yede gu simama gu haguleya gutumba gogu myonyoni yathu ni mapimoni gwathu. Ha gu mba gira isoso, gutumba gwathu gu na fana ni gu ba hi wona jardim nya gu mbure yi guromo vbavbandzi, ganiolu nari ha gu yi wona khavbo nya janela yi nga kuneya khu ndzilo. Hi nga “limpari kharini mavhidru nya janela yathu” mwendro hi nga simama kharini ni gutumba nya gutiye. Hi nga gira isoso, khu gu tepo yatshavbo hi dzi ninga tepo nya gu dundrugeye khedzi womi wu na khalago khidzo mafuni nya maphya. Hi nga hevbula dzindrima nyo khaguri, hi sixitiri dzivhidhyu, hi engiseya dzindzimo dzi ganeyago khu gutumba gwathu. Nigu hi nga embeya Jehovha omu nya milombelo yathu, satshavbo situmbiso hi si vireyago gu si tadzisega.

11. Ginani gi phasidego ndriyathu a gu na ni madwali, gu wusedza tshivba yaye?

¹¹ Wona edzi gutumba gu thaveledego ni gu tiyisa khidzo ndriyathu nya nyamayi nya gupwani khu Joy, oyu a gu na ni madwali nya makhongolo. Uye wari, khuye: “Tepo sigaradzo sangu si nyi vbedzago tshivba nya gu embeya Jehovha edzi nyi dzipwago khidzo, nigu eni nyi ngu dziti gu kheni a ngu nyi pwisisa. Ga dzitepo dzodzo, Jehovha a gu nyi ninga ‘tshivba nya yikhongolo.’” (2 Kor. 4:7) Nigu uye a gu dzi dundrugeya mafuni nya maphya omu gu na ba guri “mwalo ni moyo muvbanyi wa Jerusalema a na gukhuye: ‘Eni nyi ngu dwala.’” (Isa. 33:24) Ha gu tuleya monyo wathu Jehovha hi bwe hi vega gupima avbo nya gutumba gwathu hi na mana tshivba.

12. Khu sevbini sighelo hi gu naso gasi gutumba situmbiso sa Jehovha? (Wona fotu.)

¹² Gufana ni esi a giredego Vajudha, Jehovha a hi ningide sighelo nya singi gasi gu tumba situmbiso saye. Dundrugeya khu siprofeto hi si wonago na si gu tadzisega. Khu giyeyedzo hi ngu wona gu khethu Anglo-Americana a gu mufumo nya tshivba, wu na ni gipandre gi nga tiya ni gimbe gipandre gi nga vbevbuga. (Dhan. 2:42, 43) Ethu hi ngupwa gambe na gu ganedwa khu “sirevareva malangani nya gu hambane-hambane.” Nigu ethu hi ngu tshumayela mahungu nya yadi “mafuni gwatshavbo.” (Mat. 24:7, 14) Siprofeto sesi ni simbi si ngu tiyisa gukhodwa gwathu nya gu khethu esi Jehovha a si tumbisago si na tadzisega.

JEHOVHA A NGU HI PHASA GU MBA KHALA HWANGA

13. a) Sigaradzo muni Vajudha va nga hadzi tshangana naso tepo va nga hadzi tshudziswa? b) Kha nga si khumbugidwego ga Isaya 41:10-13, Jehovha thavelede kharini Vajudha va nga ba va romo wugumbini?

¹³ Ambari olu Jehovha a nga ba a thavelede Vajudha khu gutumba nya gu tsakise, uye a di gu dziti gu khuye avo va di hadzi gu tshangana ni sigaradzo tepo va na tshudziswago. Jehovha ganede gu khuye pfhumu nya tshivba yi di hadzi gu wugeya yi bwe yi fuma mayigo ma gomogo vbafuvbi ni Bhabhiloni nigu khu gu hegisa yi wugeya Bhabhiloni. (Isa. 41:2-5) Ina Vajudha va manegide ni hwanga? Na si si gu giregi isoso, Jehovha a di gu thavelede vathu vaye khu gu ganeya gu khuye u nga khale hwanga kholu eni nyi nago. U nga vbeyi tshivba kholu eni nyi Nungungulu wago. (Leri Isaya 41:10-13.) Ginani a nga vbweta gu ganeya tepo a nga khuye “eni kheni Nungungulu wago”? Uye kha nga ba a dundrugisa Vajudha gasi gu mu khozeya kholu avo va di gu siti esi va nga ba va yede gu gira. Wulangani nya isoso, uye a di gu va dundrugisa gu khuye uye a na ba ari navo. — Ndzi. 118:6.

14. Ginani gambe egi Jehovha a nga gira gasi gu thaveleya Vajudha va nga ba va romo wugumbini?

¹⁴ Jehovha a thavelede gambe Vajudha va nga ba va romo wugumbini, khu gu va dundrugisa khu tshivba yaye ni guti gwaye gu gu mba hegedwa. Uye a embede Vajudha gasi va khedza dzinyeledzi ndzadzini. Uye a di va embeya gu khuye khandri a di gira basi dzinyeledzi, ganiolu uye gambe a nguti malina yadzo khu mweyo ni mweyo. (Isa. 40:25-28) Abari gu Jehovha a nguti malina nya nyeledzi ni nyeledzi, nya mba kanakana uye a nguti malina nya sithumi saye. Abari gu Jehovha a na ni tshivba nya gu gire dzinyeledzi, nya mba kanakana uye a na ni tshivba nya gu phase vathu vaye. Khu lisine, Vajudha va diri mwalo gighelo nya gu garadzegi mwendro gu thava.

15. Ginani egi Jehovha a embedego Vajudha gu gira tepo khiyo va nga hadzi tshudziswa?

¹⁵ Jehovha gambe embede vathu vaye esi va nga ba va yede gu gira tepo va nga hadzi gu tshudziswa. Umo nya gipandre nyo khaguri nya libhuku la Isaya Nungungulu a di embela vathu vaye khuye: “Belani dzinyumbani gwanu mu dzi segela malimba, mu sihala umo gikhatinyana kala li bose likhulo laye.” (Isa. 26:20) Malito yaya adzina ma phede gu tadzisega tepo Bhabhiloni wu nga wandrwa khu Kiro. Mwama nyo khaguri a di ganeya gu khuye tepo Pfhumu Kiro a nga beya Bhabhiloni, uye “a di embeya [masotshwa yaye] gasi gu songa vatshavbo va nga ba va romo vbavbandzi.” Dundrugeya edzi vavbanyi va Bhabhiloni vapwidego khidzo hwanga, ganiolu Vajudha vatshavbo va vbulugide kholu va di gu engiside sileletelo sa Jehovha.

16. Khu ginani hi gu mba yela gu garadzega khesi si na giregago avbo nya tshanisa nya yikhongolo? (Wona fotu.)

¹⁶ Ginani hi gi hevbulago? Nya mba hweya hi na tshangana ni tshanisa nya yikhongolo nya gu gima yi si gu girege. Tepo yi na pheyago, vathu nya mayigo va na dzuwega mapimo va bwe va tala khu hwanga. Ganiolu, vathu va Jehovha kha va na nga thava. Ethu hi ngu dziti gu khethu Jehovha khuye Nungungulu wathu. Hi ngu tiyisega gu khethu “gutshudziswa [gwathu] gomo vbafuvbi.” (Luka 21:28) Ambari tepo dzihengeledzano nya mafu yatshavbo dzi na hi wugeyago, ethu hi na simama gutumba Jehovha. Jehovha a na rumeya dzingilozi dzi ta hi vhikeya, nigu a na hi ninga sileletelo si na hi phasago gu vbulugisa womi wathu. A na hi ninga kharini sileletelo soso? Kala olu hi si gu siti, ambari ulolo adzina saye hi nga hakha sileletelo soso mabandlani gwathu. Adzina saye ayo ma na khala ‘dzinyumba dzathu’ umo hi na manago gu vhikelega. Hi nga dzi dongiseya kharini ga silo si ngo gutago? Hi yede gu gira wupari ni vandriyathu, hi landriseya sileletelo nya hengeledzano hi bwe hi tiyisega gu khethu Jehovha khuye a thangeyago hengeledzano yathu. — Hebh. 10:24, 25; 13:17.

17. U nga vbwetedzeya kharini wuthavelo wa Jehovha?

¹⁷ Ambari olu womi wa Vajudha wu nga ba wu si vbevbugi Bhabhiloni, Jehovha a va ningide wuthavelo va nga ba va wu vbweta. Uye a na hi gireya sasimweso. Khu kharato, na si si khathadzisegi iso si na giregago womini wathu mindru watshigu, simama gu vbwetedzeya wuthavelo wa Jehovha. Ina, tumba wuhindzi waye nya wukhongolo. Simama ni gutumba nya gutiye. Nigu gima u nga divali gu khuwe Jehovha Nungungulu wago, gimwalo u nga gi thavago.