Edzi Jehovha a hi phasago khidzo gu timiseya

1. Khu ginani hi vbwetago giphaso gasi hi si kodza gu timiseya, nigu giphaso muni hi gu nagyo? (1 Pedro 5:10)

GA MATSHIGU yaya nyo hegise, vathu va Jehovha va yede gu timiseya. Vambe va ngu emisana ni madwali khu tepo nyo laphe ngudzu. Vambe va ngu garadzega kholu va nga fedwa khu muthu va mu haladzago. Nigu vambe gambe va ngu wugedwa khu valongo mwendro vathangeyi nya wufumo. (Mat. 10:18, 36, 37) Tiyisega gu khuwe ambari nari gigaradzo muni u tshanganago nagyo womini gwago, Jehovha a nga gu ninga tshivba u yi vbwetago gasi u simama gu timiseya kala mahegiso. — Leri 1 Pedro 5:10.

2. Hi nga si kodza kharini gu timiseya?

² Gutimiseya so thula gu simama na hi tumbegide ga Jehovha ni gu mu thumeya na hi tsakide ambari tepo hi tshanganago ni sigaradzo, tepo hi wugedwago mwendro gu lingwa gu gira gighoho. Nigu gambe, gasi hi si kodza gu timiseya hi yede gu khodwa gu khethu silo si na tshukhwata. Hi nga si kodza gu timiseya basi kholu Jehovha a hi ningago “tshivba nya yikhongolo,” nigu ethu kha hi si kodzi gu timiseya nya mbana giphaso gyaye. (2 Kor. 4:7) Avba nya ndrima yeyi, hi na bhula khu 4 malulamiselo Jehovha a hi ningago gasi gu timiseya. Hi na wona gambe edzi hi nga wuyedwago khidzo khu malulamiselo yoyo.

NOMBELO

3. Khu ginani hi nga khethu nombelo giningwa nyo samadzise?

³ Jehovha giride gilo nyo samadzise ngudzu gasi gu hi phasa gu timiseya. Ambari olu hi gu vathu nya mba vbeleya, uye giride si kodzega gu hi bhula naye ni gu uye a hi engiseya. (Hebh. 4:16) Dundrugeya khesi: Hi nga gombeya ga Jehovha ni yevbini tepo, hi mu embeya satshavbo hi sipwago. Uye a ngu pwisisa ni levbini lidimi, nigu a ngu hipwa na hi romo ni ga wevbini wulanga ambari na hi romo honga mwendro pasoni. (Jona 2:1, 2; Mith. 16:25, 26) Tepo hi garadzegago ngudzu nyo bwe hi si si kodzi gu ganeya edzi hi dzipwago khidzo, Jehovha a ngu pwisisa esi hi vbwetago gu ganeya. (Rom. 8:26, 27) Khu lisine, nombelo giningwa nya lisima ngudzu!

4. Ho dziti kharini gu khethu tepo hi gombeyago ga Jehovha gasi hi timiseya uye a na hi phasa?

⁴ Omu nya Lito laye, Jehovha o hi tiyisegisa gu khuye ‘ni gevbini hi lombago gi gimbileyanago ni gugola gwaye, uye a ngu hipwa.’ (1 Joh. 5:14) Ina hi nga lomba Jehovha gasi a hi phasa gu timiseya? Ina! Isoso si ngu gimbileyana ni gugola gwaye. Khu ginani hi ganeyago isoso? Jehovha o ganeya gu khuye tepo hi simamago na hi tumbegide gwaye, uye a nga si kodza gu hlamula Sathane. (Mav. 27:11) Gu diga isoso, Bhibhiliya yo ganeya gu khiyo Jehovha a gu vbweta “gu yeyedza tshivba yaye ga vale va mu vbwetago khu monyo wawe watshavbo.” (2 Dzik. 16:9) Khu ndziya yeyi, hi nga tiyisega gu khethu Jehovha a na ni tshivba ni gudogoreya nya gu hi phasi gu timiseya. — Isa. 30:18; 41:10; Luka 11:13.

5. Nombelo wu nga hi phasa kharini gu manega ni gurula mapimoni? (Isaya 26:3)

⁵ Bhibhiliya yari khiyo tepo hi girago milombelo yi khugeyago monyoni yi ganeyago khu sigaradzo sathu, “gurula ga Nungungulu gu vbindrago gupwisisa gwatshavbo, gu na sayisa myonyo [yathu] ni mapimo [yathu].” (Filp. 4:7) Khu lisine hi ngu tsaka ngudzu khu guti isoso. Vathu va gu mba thumeya Jehovha va ngu emisana ni sigaradzo nya singi, nigu va nga thumisa dzindziya nya dzingi gasi va si kodza gu mana gurula mapimoni. Khu giyeyedzo, vathu nyo khaguri va ngu zama gu dusa gwatshavbo gugaradzega gwawe gasi va dzipwa gwadi. Ganiolu, isoso si nga resa sigaradzo khu liphuvboni. (Fananisa ni Matewu 12:43-45.) Ambari vathu va gupwa gurulanyana khu gu thumisa ndziya yeyi, avo va mwalo gurula nya lisine gutago khiyo ga Jehovha, a gu gilo nya lisima ngudzu guvbindra satshavbo. Ethu hi ngu tumba Jehovha khu gu vbeleya, khiso si hi girago hi gombeya gwaye hi mu lomba gurula. Nigu kha nga edzi a nga hi tumbisa, uye a ngu hi ninga “gurula.” (Leri Isaya 26:3.) Nigu mweyo nya dzindziya Jehovha a yi thumisago gasi gu hi ninga gurula, khu gu hi dundrugisa mavhesi ma hi thaveleyago. Gu diga isoso, mavhesi yoyo ma ngu hi dundrugisa gu khayo uye a ngu hi haladza ni gu dzina gu hi phasa, nigu isoso si ngu hi ninga gurula. — Ndzi. 62:1, 2.

6. Ginani hi yedego gu gi pata omu nya milombelo yathu? (Wona fotu.)

⁶ Esi u nga girago. Tepo u emisanago ni sigaradzo, “vega womi wago” mandzani ga Jehovha khu gu gombeya gwaye u mu lomba gurula. (Ndzi. 55:22) Gombeya gambe u lomba guti gu na gu phasago gu emisana ni sigaradzo sago. (Mav. 2:10, 11) Gu diga isoso, ga milombelo u girago u nga digi gu bonga Jehovha khu satshavbo a gu gireyago. (Filp. 4:6) Dundrugeya edzi Jehovha a gu phasago khidzo gasi u timiseya tshigu ni tshigu u bwe u mu bonga khu giphaso ni silo nya sadi a gu ningago. Ambari wa gu ba u emisana ni sigaradzo nya singi, gima u nga si dzumeleyi si gu gira u si woni dzindziya Jehovha a gu phasago khidzo. — Ndzi. 16:5, 6.

LITO LA NUNGUNGULU

7. Gu hevbula Bhibhiliya si nga hi phasa kharini gu timiseya?

⁷ Jehovha a hi ningide Lito laye gasi gu hi phasa gu timiseya. Bhibhiliya yi na ni mavhesi nya mangi ma hi hevbudzago gu khayo khu lisine Jehovha a ngu hi phasa. Wona giyeyedzo gimwegyo. Matewu 6:8 yari khiyo: “Papayi wanu a ngu siti esi mu si vbwetago ambari na mu ngasi mu lombi.” Khu Jesu a nga ganeya malito yaya, nigu uye a ngu muti gwadi Jehovha guvbindra ni wevbini muthu vbakari gwathu. Khu kharato, tepo hi emisanago ni sigaradzo, hi nga tiyisega gu khethu Jehovha a ngu siti esi hi si vbwetago nigu a na hi phasa. Bhibhiliya yi tade khu situmbiso nya singi sa Jehovha si nga hi ningago tshivba hi yi vbwetago gasi hi timiseya sigaradzo. — Ndzi. 94:19.

8. a) Ninga giyeyedzo nya edzi matshina nya milayo nya Bhibhiliya ma nga hi phasago khidzo gu timiseya. b) Ginani gi nga hi phasago gu dundruga matshina nya milayo nya Bhibhiliya tepo hi ma vbwetago?

⁸ Matshina nya milayo nya Bhibhiliya ma nga hi phasa gu timiseya. Kholu ayo ma na ni sihevbudzo nya singi si nga hi ningago guti hi gu vbwetago gasi hi hunga makungo nya yadi. (Mav. 2:6, 7) Khu giyeyedzo, Bhibhiliya yi ngu hi kutsa gu mba garadzega khesi si nga giregago mindru wa tshigu, ganiolu hi tumba Jehovha matshigu yatshavbo. (Mat. 6:34) Ha gu leri Bhibhiliya tshigu ni tshigu ni gu dundrugeya khesi hi leridego, si na hi vbevbugeya gu dundruga wusingalagadzi hi wu vbwetago gasi hi hunga makungo mwendro gu timiseya sigaradzo nyo khaguri.

9. Matimo nya Bhibhiliya ma na hi phasa kharini gu tumba gu khethu Jehovha a ngu hi phasa?

⁹ Bhibhiliya gambe yi na ni matimo nya vathu nya vangi va nga tumba Jehovha va bwe va phaswa khuye. (Hebh. 11:32-34; Jak. 5:17) Tepo hi dundrugeyago khu matimo yaya, hi ngu engedzeya gu tumba gu khethu Jehovha “wuthavelo ni likhokhola lathu, muphasedzeli vbakari nya dzimhango.” (Ndzi. 46:1) Nigu tepo hi dundrugeyago edzi sithumi sa Jehovha sa gale si nga yeyedza khidzo gukhodwa ni gu simama gu mu thumeya ambari na si emisana ni sigaradzo, isoso si ngu hi kutsa gu gira sasimweso. — Jak. 5:10, 11.

10. Ginani u nga girago gasi u kodza gu wuyedwa gwadi khu Lito la Nungungulu?

¹⁰ Esi u nga girago. Leri Bhibhiliya tshigu ni tshigu u bwe u gira sasamedzo nya mavhesi ma nga gu phasago. Vathu nya vangi va tugude gu khavo gu hevbula lowo nya litshigu vbadzimindrutunu, si ngu va phasa gu dundrugeya khu lowo wowo litshigu latshavbo. Ndriyathu nya nyamayi nyo pwani khu Mariea, wonide gu khuye isoso lisine tepo vavelegi vaye va nga tugudwa madwali nya câncer. Ginani gi nga mu phasa gu timiseya tepo a nga ba a va khathaleya ndrani nya migima yoyo nyo garadze? Uye wari khuye: “Tshigu ni tshigu vbadzimindrutunu, nyi di gu hevbula ni gu dundrugeya khu lowo wu gomogo omu nya Gevisisa milowo tshigu ni tshigu. Gu manega ni longoloko wowo si nyi phaside gu tadza mapimo yangu khu mahungu nya Bhibhiliya, nigu isoso si nyi phaside gu vega gupima avba nya silo nya sadi nasiri avba nya sigaradzo nyi nga ba nyi emisana naso.” — Ndzi. 61:2.

VANDRIYATHU

11. Ho dzipwa kharini khu gu dziti gu khethu vandriyathu va ngu timiseya sigaradzo sawe?

¹¹ Jehovha a hi ningide vandriyathu va mafuni gwatshavbo gasi va hi phasa gu timiseya. Khu gu dziti basi gu khethu ‘vandriyathu va mafuni gwatshavbo anavo va ngu emisana ni sigaradzo sasimweso [hi emisanago naso],’ si ngu hi ninga tshivba nyo timiseye. (1 Ped. 5:9) Khu kharato, hi nga tiyisega gu khethu ambari ha gu ba hi emisana ni giemo muni, vambe vandriyathu va emisanide ni giemo nyo fane nigu va si kodzide gu timiseya. Khu ndziya yoyo, anethu hi nga si kodza gu timiseya! — Mith. 14:22.

12. Vandriyathu va nga hi phasa kharini, nigu ginani hi nga va gireyago? (2 Vakorinto 1:3, 4)

¹² Vandriyathu va nga hi phasa gu timiseya khu malito ni sigiro sawe. Mupostoli Pawulo wonide gu khuye malito yaya lisine. Ga malangaliya yaye, uye a di khumbuga malina ya vale va nga mu phasa tepo a nga ba a khotedwe gaya a bwe a va bonga khu giphaso gyawe. Vandriyathu vava va di embeya silo nya sadi Pawulo va bwe va mu ninga giphaso a nga ba a gi vbweta. (Filp. 2:25, 29, 30; Kol. 4:10, 11) Muhuno, vandriyathu navo va nga hi tiyisa ni gu hi phasa gu timiseya ga siemo nyo garadze. Nigu anethu hi nga va phasa khu ndziya nyo fane tepo va vbwetago giphaso. — Leri 2 Vakorinto 1:3, 4.

13. Ginani gi nga phasa ndriyathu Maya gu timiseya?

¹³ Vandriyathu va mafuni gwatshavbo va tiyiside ngudzu ndriyathu moyo nya nyamayi wa Rússia nyo pwani khu Maya. Khu 2020 ndranga yaye yi di setshwa, nigu khu gu gimbiya nya tepo a di yiswa tribhunali khu kotani nya gu bhuleye vambe khu gukhodwa gwaye. Uye a di khuye: “Ndrani nya tepo yeyi nyo garadze, vandriyathu va di nyi ligareya ni gu nyi rumeleya malangaliya ma yeyedzago lihaladzo lawe. Eni tepo yatshavbo nyi di gu dziti gu kheni vandriyangu va mafuni gwatshavbo va ngu nyi haladza ngudzu. Ganiolu, gukhugeya khu 2020 nyi ngu tiyisega ngudzu khu isoso.”

14. Ginani hi yedego gu gira gasi hi si kodza gu wuyedwa khu giphaso gya vandriyathu? (Wona fotu.)

¹⁴ Esi u nga girago. Tepo u emisanago ni sigaradzo, si na ni lisima gu u khala vbafuvbi ga vandriyago. U nga giri mihuni gu lomba giphaso madhota. Ayo ma nga khala “wuthavelo gikhatini nya phuvbo ni gingulu.” (Isa. 32:2) Dundruga gu khuwe vandriyago gukhodwani anavo va ngu emisana ni sigaradzo. Khu kharato, tepo u girago gilogyo gasi gu phasa vambe va vbwetago giphaso, isoso si na gu ninga tshivba ni gu gu phasa gu timiseya sigaradzo sago. — Mith. 20:35.

GUTUMBA GWATHU

15. Gutumba gu phaside kharini Jesu, nigu gu na hi phasa kharini anethu muhuno? (Vahebheru 12:2)

¹⁵ Jehovha a hi ningide gutumba nyo tiye gasi gu hi phasa gu timiseya. (Rom. 15:13) U ngu dundruga edzi gutumba gu nga phasa khidzo Jesu gu timiseya litshigu laye nyo garadze ngudzu omu mafuni? (Leri Vahebheru 12:2.) Jesu a di gu dziti gu khuye gutumbega gwaye gu di hadzi gu phasa gu agisa lina la Jehovha. Jesu a di gu vireya gu bweleya ga Papayi waye, nigu khu gu gimbiya nya tepo a khala pfhumu nya Mufumo wa Nungungulu. Khu ndziya nyo fane, gutumba gwathu nyo vbanye kala gupindruga mafuni nya maphya ya Nungungulu, gu ngu hi ninga tshivba nya gu timiseye silingo satshavbo sa Sathane.

16. Gutumba gu phaside kharini ndriyathu moyo nya nyamayi gu timiseya, nigu ginani u gi hevbudego khu matshango yaye?

¹⁶ Wona edzi gutumba nya mafu nya maphya gu nga phasa khidzo ndriyathu nya nyamayi wa Rússia nyo pwani khu Alla. Mwama waye a di khothedwa na gu vireya gu hongola tribhunali. Tepo isoso si nga giregeya ndriyathu Alla a di khuye: “Gu gombeya khu gutumba gwathu ni gu dundrugeya khugo, si ngu nyi phasa gu mba garadzega ngudzu. Nyi ngu dziti gu kheni hwane nya sigaradzo sesi, hi na dzi buza khu silo nya sadi. Jehovha a na pala valala vaye a bwe a hi tshatshazeya.”

17. Hi nga yeyedza kharini gu khethu hi ngu mu bonga Jehovha khu gutumba a hi ningago? (Wona fotu.)

¹⁷ Esi u nga girago. Dzi ninge tepo nya gu dundrugeye khu wumindru nyo mbure Jehovha a hi tumbisidego. Dundrugeya edzi u na tsakago khidzo khu gu vbanya mafuni nya maphya na wu romo ni dzipari dzago ni valongo vago na mu tsakide. Sigaradzo u tshangano naso olu kha “gitepwana” wa gu si fananisa ni gu vbanya kala gupindruga paradhesini. (2 Kor. 4:17) Gu diga isoso, dzi garadzeye gu bhuleya vambe khu situmbiso sa Jehovha. Dundrugeya edzi si va garadzeyago khidzo gu emisana ni sigaradzo nya litigo leli la Sathane nya mbati situmbiso sa Nungungulu khu wumindru. Ambari wa gu va bhuleya silo nya sidugwana, isoso si nga va kutsa gu vbweta guti nya singi khu Mufumo wa Nungungulu ni situmbiso saye.

18. Khu ginani hi nga tumbago situmbiso sa Jehovha?

¹⁸ Hwane nya gu ba Joba na timisede sigaradzo nya singi, a di embeya Jehovha gu khuye: “Nyi ngu dziti gwadi gukheni khu padwi khu gilo, ni gimwegyo nya makungo yago kha gi thindrekiswi.” (Joba 42:2) Joba hevbude gu khuye gimwalo gi nga himbedzeyago Jehovha gu tadzisa situmbiso saye. Gu dundruga esi, si nga hi ninga tshivba nya gu timiseye. Khu giyeyedzo, nga dundrugeya nyamayi nyo khaguri a dwalago khu myaga nya yingi, uye a vbede tshivba khu kotani nya olu vadhogodheya va gu mba si kodza gu mu hawulugisa ga madwali yaye. Khu gu landreya, a mana dhogodheya nya wadi a mu embeyago esi si mu girago a dwala ni gu mu embeya edzi a na mu phasago khidzo gasi gu a hawuluga. Uye a gu dzegeya gu tsaka ambari a dzitigo gu khuye a na vireya tepo nyo khaguri gasi a dzipwa gwadi. Olu si nga mu vbevbugeya gu simama gu timiseya madwali yaye kholu a ngu dziti gu khuye a na hawuluga. Khu ndziya nyo fane, gutumba hi gu nago khu Paradhesi yi tago gu ngu hi phasa gu timiseya.

19. Ginani gi na hi phasago gu timiseya?

¹⁹ Kha nga hi si wonidego, Jehovha a ngu hi phasa gu timiseya khu gu thumisa nombelo, Lito laye, vandriyathu gukhodwani ni gutumba gwathu. Ha gu gira satshavbo hi si kodzago gasi hi thumisa malulamiselo aya Jehovha a hi ningidego, uye a na simama gu hi phasa ambari ha gu emisana ni gevbini gigaradzo. Hi na si kodza gambe gu simama gu timiseya kala tepo litigo la Sathane ni gutshaniseka gwatshavbo gu na fuviswago. — Filp. 4:13.