Gufana ni Pedro hi nga timiseya kha nga sithumi sa Jehovha

1. Pedro a dzipwide kharini tepo Jesu a nga gira gilewugiso gasi gu mu phasa gu mola dzindzandzi nya dzingi?

PEDRO a di vbedza wutshigu watshavbo na goga, ganiolu kha nga ba a mana gilo. Ganiolu, Jesu a di mu embeya gu khuye: “Hidzimisani ngalava nondrwani, mu thesa dzikhoga dzanu mu goga.” (Luka 5:4) Pedro a di gu kanakana gu khuye a di hadzi mola dzindzandzi, ganiolu a di gira esi Jesu a nga mu embeya. Pedro ni vama vale va nga ba va thuma naye, va di mola dzindzandzi nya dzingi nyo bwe dziredhi dzi pheya gu pferuga. Tepo va nga pwisisa gu khavo Jesu a di ngari gu gira gilewugiso, ‘va di hlamala ngudzu.’ Pedro a di ganeya gu khuye: “Pfhumu, kha nyi yedwi khu gu manega vbafuvbi nago kholu nyi gighohi.” (Luka 5:6-9) Pedro a di gu dzipwa nga khatshi kha dinganedwi khu gu khala vbafuvbi ni Jesu.

2. Khu ginani si gu na ni lisima gu hevbula khu giyeyedzo gya Pedro?

² Pedro a di gu ganeya lisine kholu uye a diri “gighohi.” Milowo yo yeyedza gu khiyo dzimbe dzitepo uye ganede ni gu gira silo, khu mahegiso a nga dzi laya. Anuwe u ngu dzipwa kharato? Ina wa gu zama gu tshukwadzisa makhalelo nyo khaguri mwendro wa gu dwana ni mavbanyelo nya mba yadi khu tepo nyo laphe? Abari gu ina, giyeyedzo gya Pedro gi na gu tiyisa. Khu ndziya muni? Dundrugeya khesi: Jehovha na hathide gu mba lova sihoso sa Pedro umo nya Bhibhiliya. Ambari ulolo, uye a si lovide gasi hi hevbula khiso. (2 Thim. 3:16, 17) Tepo hi hevbulago khu sigaradzo Pedro a dwanidego naso, isoso si na hi phasa gu pwisisa gu khethu Jehovha kha vireyi gu khuye hi khala vathu nyo vbeleye. Uye o vbweta gu khuye hi simama gu timiseya ambari ha gu ba hi gira silo khu kotani nya gu mba vbeleya gwathu.

3. Khu ginani hi yedego gu timiseya?

³ Ginani gi vbwetegago gasi hi simama gu timiseya? Tepo hi simamago gu gira gilo nyo khaguri, dzitepo nya dzingi hi ngu gi tshukwadzisa. Khu giyeyedzo, tepo muthu nyo khaguri a vbwetago gu hevbuleya gu womba gwadi vhiyola, isoso adzina si nga dzega myaga nya yingi. Ndrani nya tepo yoyo, uye adzina a nga womba vhiyola khu ndziya nya gu khandriyo. Ganiolu, a gu mba tsukula a na tshukwadzisa. Ambari a gu ba a kodza gu womba gwadi vhiyola, uye dzimbe dzitepo a nga phazama mawombelo. Ganiolu, kha vbeyi tshivba, nigu a gu simama gu womba gasi a si kodza gu tshukwadzisa. Khu ndziya nyo fane, ambari ha gu dzipwa gu khatshi hi pade gigaradzo nyo khaguri, adzina saye ethu hi nga gira gihoso gya gimwegyo. Ambari ulolo, hi na simama gu gira satshavbo hi si kodzago gasi gu tshukwadzisa. Ethu hi nga ganeya ni gu gira silo khu gu gimbiya nya tepo si na hi girago hi theya nyala kanani. Ganiolu, ha gu mba vbeya tshivba Jehovha a na hi phasa gu simama gu tshukwadzisa. (1 Ped. 5:10) Hongoleni hi wona giyeyedzo gya Pedro nya gu timiseye. Pweya-wusiwana owu Jesu a wu yeyedzidego ga Pedro ambari olu a nga hosisa, wu nga hi phasa gu simama gu thumeya Jehovha.

SIGARADZO ESI PEDRO A NGA TSHANGANA NASO NI MAKATEGWA A MA MANIDEGO

4. Kha nga si khumbugwago umo ga Luka 5:5-10, Pedro a di gu dzi wona kharini, ganiolu Jesu a mu tiyiside khu ndziya muni?

⁴ Milowo kha yi ganeyi gu khiyo khu ginani Pedro a nga khuye nyi “gighohi” mwendro sighoho a nga ba a pimisa khiso. (Leri Luka 5:5-10.) Ganiolu, adzina saye a di giride sighoho nyo khaguri nya sikhongolo. Jesu a di gu dziti gu khuye Pedro a di gu thava. Adzina saye khu kotani nya olu a nga ba a dzipwa gu khuye kha nga ba ari muthu nya wadi. Jesu gambe a di gu dziti gu khuye Pedro a di hadzi simama na tumbegide. Khu wuwadi, Jesu a di embeya Pedro gu khuye “u nga thavi!” Gutumba ogu Jesu a nga ba ari nago khu Pedro, gu vbindrugedzide womi wa Pedro. Pedro ni ndriyaye Andreya va di diga thumo wavo nya gu goge dzindzandzi va khala valandreyi va Jesu. Khavbovbo, Jehovha a di va kategisa khu dzindziya nya gu hambane-hambane. — Marko 1:16-18.

5. Khu gu ba a pade hwanga waye a bwe a khala mulandreyi wa Jesu, makategwa muni Pedro a ma manidego?

⁵ Pedro a diri ni matshango nya mangi ngudzu kholu a diri mulandreyi wa Kristo. Uye a wonide Jesu na gu hawulugisa vadwali, gu tutumisa madhemoni ni gu wusa vathu va nga ba va fude.b (Mat. 8:14-17; Marko 5:37, 41, 42) Pedro gambe manegide ni giwoniso nyo samadzise ngudzu khu wumindru wa Jesu tepo a na khalago pfhumu nya Mufumo wa Nungungulu, nigu Pedro gima kha divala giwoniso gegi. (Marko 9:1-8; 2 Ped. 1:16-18) Khu lisine, Pedro wonide silo nya singi nya gu gima na sa si wona nari khatshi kha nga ba ari mupizani wa Jesu. Uye tsakide ngudzu khu gu ba na sa dzumeleya gudzipwa nya mba gwadi gu mu gira a luza makategwa yaya.

6. Ina Pedro a si kodzide gu pala sigaradzo saye khu gu vbeleya? Tshamuseya.

⁶ Ambari hwane nya gu ba a pwide ni gu wona esi Jesu a giridego, Pedro a di gu simama gu dwana ni gu mba vbeleya gwaye. Wona siyeyedzo nyo khaguri. Tepo Jesu a nga mu tshamuseya edzi a nga hadzi gu tshaniseka khidzo ni edzi a nga hadzi gufa khidzo gasi gu tadzisa giprofeto nya Bhibhiliya, Pedro a di mu embeya gu khuye isoso kha si na nga girega. (Marko 8:31-33) Khu yimbe tepo gambe, Pedro ni vambe vapostoli va di gu ganedzisana khu gu khavo khu mani a gu khongolo vbakari gwavo. (Marko 9:33, 34) Ga wutshigu nyo hegise Jesu na a si gufi, Pedro a di piya ndzeve ya mwama moyo. (Joh. 18:10) Ga wutshigu wa wumowo Pedro a di thava a bwe a bomba pari yaye Jesu guraru. (Marko 14:66-72) Isoso si giride Pedro a liya khu gu vbisega. — Mat. 26:75.

7. Lithomo muni Pedro a manegidego nalo hwane nya gu ba Jesu a wusidwe khu gufani?

⁷ Jesu kha tsukula mupostoli waye a nga ba a vbede tshivba. Hwane nya gu ba Jesu a wusidwe khu gufani, a di tiyisegisa Pedro gu khuye a ngu mu haladza. Jesu a di konvhidhari Pedro gasi gu thuma kha nga muhavisi nya dzinvuta dzaye. (Joh. 21:15-17) Pedro a di dzi emisede gu gira esi Jesu a nga mu embeya. Uye a di romo Jerusalema litshigu nya Pentekosta, nigu a di gu romo avbo nya tsawa nyo pheye wu nga todzwa khu liphuvbo nya guage.

8. Gihoso muni nya gikhongolo Pedro a giridego Antiyokiya?

⁸ Ambari hwane nya gu ba a khade Mukristo a todzidwego, Pedro a di yede gu dwana ni gu mba vbeleya gwaye. Khu mwaga nya 36 matshigoni yathu, Nungungulu a di rumeya Pedro ga Korineliyo a nga ba a siri Mujudha. Eyi, Nungungulu a di todza Korineliyo khu liphuvbo nya guage, isoso si di gu thula gu khiso “Nungungulu mwalo gihatheya.” Nigu vale va nga mba hana wugwera va di hadzi gu gira gipandre nya libandla la Kristo. (Mith. 10:34, 44, 45) Hwane nya isoso, Pedro a di pheya gu hodza ni vale va nga ba va siri Vajudha, a gu silo a nga ba a si gire gale. (Gal. 2:12) Khu kharato, Vajudha nyo khaguri nya Makristo va di gu pimisa gu khavo kha va nga ba va yede gu hodza gumogo ni vale va nga ba va siri Vajudha. Tepo Vajudha nyo khaguri va nga vboha Antiyokiya, Pedro a di ema gu hodza gumogo ni vandriyaye va nga ba va siri Vajudha khu gu thava gu khunguvanyisa Vajudha nya Makristo. Tepo mupostoli Pawulo a nga wona Pedro na a gu gira isoso, a di mu kawuka vbakari nya vambe vathu. (Gal. 2:13, 14) Ambari olu a nga gira gihoso gegi, Pedro a timisede. Ginani gi mu phasidego?

GINANI GI PHASIDEGO PEDRO GU TIMISEYA?

9. Libhuku la Johane 6:68, 69, la gu tshingisa kharini gutumbega ga Pedro?

⁹ Pedro a di gu tumbegide, nigu kha dzumeleya gilo gi mu himbedzeya gu landreya Jesu. Khu giyeyedzo, ga tepo nyo khaguri, Jesu a di ganeya khu silo valandreyi vaye va nga mba si pwisisa. (Leri Johane 6:68, 69.) Nya mba pheya khu gu pimisa mwendro gu lomba Jesu a va tshamuseya, nya vangi va di hunga gu ema gu landreya Jesu. Ganiolu, Pedro kha gira isoso, a di simama gu tumbega a bwe a ganeya gu khuye khu Jesu basi a gu “na ni malito ma ningago womi nya gupindruge.”

10. Jesu a yeyedzide kharini gu khuye a di gu tumba Pedro? (Wona fotu.)

¹⁰ Jesu kha tsukula Pedro. Ga wutshigu nyo hegise na a si gufi, Jesu a di gu dziti gu khuye Pedro ni vambe vapostoli va di hadzi gu mu diga. Ganiolu, Jesu a di ganeya gu khuye, Pedro a di hadzi gu tiya a bwe a simama gu tumbega. (Luka 22:31, 32) Jesu a di gu pwisisa gu khuye: “Monyo wu ngu dzina, ganiolu givili gi garade.” (Marko 14:38) Khu kharato, ambari tepo Pedro a nga mu bomba, Jesu kha mu tsukula. Tepo Jesu a nga wuswa khu gufani a di dzi wonegisa ga Pedro, ganiolu adzina saye Pedro a diri enga. (Marko 16:7; Luka 24:34; 1 Kor. 15:5) Khu lisine, isoso si tiyiside Pedro kholu a di gu vbede tshivba khu kotani nya esi a nga ba a giride.

11. Jesu a tiyisegiside kharini Pedro gu khuye Jehovha a di hadzi gu mu phasa?

¹¹ Jesu tiyisegiside Pedro gu khuye Jehovha a di hadzi gu mu phasa. Jesu a di embeya Pedro ni vambe vapostoli khu gimbe gilewugiso nya gu goge dzindzandzi. (Joh. 21:4-6) Gilewugiso gyogyo, khu lisine gi tiyisegiside Pedro gu khigyo Jehovha a na mu ninga esi a si vbwetago khu nyamani. Adzina saye Pedro a di dundruga malito ya Jesu ma gu khayo, a di hadzi gu ninga esi si vbwetegago vale va na simamago “gu vbwetedzeya Mufumo wa Nungungulu.” (Mat. 6:33) Satshavbo sesi, si phaside Pedro gu thangisa thumo nyo tshumayele womini gwaye guvbindra thumo waye nya gu goge. Khu mwaga nya 33 matshigoni yathu, khu litshigu nya Pentekosta, Pedro a di phasa dzimiliyoni nya vathu gu dzumeya mahungu nya yadi. (Mith. 2:14, 37-41) Khu hwane nya isoso, a di phasa Vasamariya ni vale va nga ba va siri Vajudha gu hevbula ni gu landreya Kristo. (Mith. 8:14-17; 10:44-48) Khu lisine, Jehovha thumiside Pedro khu ndziya nyo samadzise ngudzu gasi gu resa vathu nya mafumbo yatshavbo libandlani gwaye.

GINANI HI GI HEVBULAGO?

12. Guya khu giyeyedzo gya Pedro, ginani hi yedego gu gi dundruga ha gu ba hi dwana ni gigaradzo nyo khaguri khu tepo nyo laphe?

¹² Jehovha a nga hi phasa gu timiseya. Isoso kha si vbevbugi, ngudzu-ngudzu abari gu ho dwana ni gigaradzo gyagimegyo khu tepo nyo laphe. Dzimbe dzitepo, hi nga tshangana ni sigaradzo nya sikhongolo guvbindra esi Pedro a tshanganidego naso, ganiolu Jehovha a nga hi tiyisa gasi hi si vbeyi tshivba. (Ndzi. 94:17-19) Khu giyeyedzo, ndriyathu moyo nya mwama a diri gay khu myaga nya yingi na si hevbuli lisine. Uye a di hunga gu vbindrugedza a bwe a vbanya khu matshina nya milayo nya Bhibhiliya. Ambari ulolo, dzimbe dzitepo a di gu dwana ni gudogoreya nya mba gwadi. Ginani gi mu phasidego gu timiseya? Uye wari, khuye: “Jehovha a ngu nyi tiyisa.” A engedza gambe gu khuye: “Khu gu phaswa khu liphuvbo nya guage la Jehovha . . . Eni nyi hevbude gu kheni si ngu kodzega gu [simama] ndziyani nya lisine . . . Jehovha a ngu nyi thumisa nigu ambari olu nyi emisanago ni gu mba vbeleya gwangu, uye a na simama gu nyi tiyisa.”

13. Guya khesi si khumbugidwego umo ga Mithumo 4:13, 29, 31, hi nga pimedzeya kharini giyeyedzo gya Pedro? (Wona fotu.)

¹³ Pedro a di gira sihoso nya sikhongolo kholu a di gu thava vathu. Ganiolu, khu gu ba a gombede a si kodzide gutiya-hwambo. (Leri Mithumo 4:13, 29, 31.) Anethu hi nga pala hwanga wathu. Wona esi si dugeledego muphya moyo nyo pwani khu Horst, a nga vbanya Alemanha Nazista ndrani nya nyimpi nya wuvili nya mafu yatshavbo. Ga tepo yile, vathu va di gu gurumedzwa gu ganeya gu khavo: “Hitler a na hi vbulugisa.” Ambari olu Horst a nga ba a dziti gu khuye kha sa nga ba siri sadi gu gira isoso, uye dzimbe dzitepo a di gu gira kholu a di gu thava vahevbudzi vaye ni sihevbuli-kwawe xikwatuno. Wulangani nya gu mu vbenyeyi, vavelegi va Horst va di gombeya naye va bwe va lomba Jehovha gasi gu mu ninga gutiya-hwambo. Khu gu phaswa khu vavelegi vaye ni gu tumba Jehovha, Horst a si kodzide gu simama na tiyide. Khu gu landreya uye a di khuye: “Jehovha gima kha nyi diga.”c

14. Vahavisi va nga phasa kharini vale va dzipwago na va vbede tshivba?

¹⁴ Jehovha ni Jesu gima kha va na nga hi diga. Hwane nya gu ba Pedro a bombide Jesu, a di yede gu hunga makungo nya lisima ngudzu. Ina uye a di hadzi gu tsukula mwendro gu timiseya kha nga mupizane wa Kristo? Jesu a di lomba Jehovha gasi gukhodwa ga Pedro gu si vbeyi. Jesu a di embeya Pedro khu nombelo a giridego, a bwe a yeyedza gu khuye a di gu tumba gu khuye Pedro a di hadzi si kodza gu tiyisa vandriyaye khu gu gimbiya nya tepo. (Luka 22:31, 32) Khu lisine, si tiyiside Pedro gu dundrugeya khu malito ya Jesu. Tepo hi hungago makungo nya lisima, Jehovha a gu thumisa vahavise gasi gu hi phasa gu simama na hi tumbegide. (Efes. 4:8, 11) Lidhota la gale nyo pwani khu Paul li zamide gu ninga giphaso gyogyo. Ilo la gu lomba vale va vbwetago gu tsukula, gu dundrugeya khedzi Jehovha a va ranidego khidzo guta lisineni khu tepo nyo pheye. Ilo la gu va tiyisegisa gambe gu khilo Jehovha gima kha na nga va diga khu kotani nya lihaladzo laye nyo tumbege. La gu hegisa khu gu ganeya gu khilo: “Eni nyi ngu wona vathu nya vangi va vbedego tshivba, ganiolu va timiseyago khu gu phaswa khu Jehovha.”

15. Giyeyedzo gya Pedro ni Horst gyo yeyedza kharini lisine li gomogo umo ga Matewu 6:33?

¹⁵ Kha nga edzi Jehovha a ningedego khidzo Pedro ni vambe vapostoli esi si nga ba si vbwetega khu nyamani, anethu a na hi ninga esi hi si vbwetago khu nyamani, ha gu thangisa thumo nyo tshumayele womini gwathu. (Mat. 6:33) Hwane nya gu ba yi vbede nyimpi nya wuvili nya mafu yatshavbo, Horst a khumbugidwego gupheyani a di pheya gu thuma kha nga piyoneru. Uye a diri gisiwana nigu a di gu kanakana gu khuye a di hadzi gu si kodza gu dzi vbanyisa ni gu simama thumoni nya tepo yatshavbo. Ginani a giridego? A di hunga gu linga Jehovha khu gu vbedza semana yatshavbo thumoni nyo tshumayele ndrani nya semana nya gu hathege. Guvbeyani nya semana, a di hlamala ngudzu tepo muwoneleyi nya sirkwitu a nga mu ninga envhelopi yi nga ba yiri ni dzitsapawu. Horst kha nga ba a muti uye a nga mu ninga dzitsapawu dzodzo. Umo nya envhelopi yoyo, gu diri ni dzitsapawu nya dzingi dzi nga hadzi gu mu phasa khu migima nya yingi. Horst wonide gu khuye esi si nga mu giregeya, gitiyisegiso nya gu khigyo Jehovha a na mu phasa. Gukhugeya avbovbo, a thangiside Mufumo wa Nungungulu womini waye watshavbo. — Mal. 3:10.

16. Khu ginani si gu na ni lisima gu hevbula khesi Pedro a lovidego umo nya malangaliya yaye?

¹⁶ Pedro a tsakide ngudzu khu gu ba Jesu a simamide vbafuvbi gwaye ambari olu a nga mu lomba gu khala hwindzo gwaye. Kristo simamide gu trenari Pedro gasi gu khala mupostoli nya gutumbege a bwe a khala giyeyedzo nya gyadi ga mambe Makristo. Khu gu ba si lovidwe esi si mu dugeledego, hi ngu hevbula silo nya singi nya lisima si hi phasago. Pedro lovide sihevbudzo soso umo nya malangaliya mavili a rumedego mabandla ya lizana myaga nyo pheye, olu ma girago gipandre nya Bhibhiliya. Avbo nya ndrima yi landreyago, hi na bhula khu silo nyo khaguri si lovidwego umo nya malangaliya yoyo ni edzi hi nga si thumisago khidzo muhuno.