Pimedzeya edzi Jehovha ni Jesu va pimisago khidzo

1-2. Sa gu pata ginani gu haladza Jehovha, nigu Jesu yeyedzide kharini gu khuye a di gu haladza Jehovha khu mapimo yaye yatshavbo?

JESU a di gu giti gwadi gileletelo nya lisima avba nya Nayo wa Mosi gi gu khigyo: “Haladza Jehovha Nungungulu wago khu monyo wago watshavbo, khu hefemulo wago watshavbo, khu tshivba yago yatshavbo ni mapimo yago yatshavbo.” (Luka 10:27) Wona gu khuwe lihaladzo hi gu nalo khu Jehovha la gu pata monyo wathu, iso si patago gambe gudogoreya gwathu, gudzipwa gwathu ni tshivba yathu. Sa gu pata gambe edzi hi pimisago khidzo. Lisine gu, gima kha hi na nga si kodza gu pwisisa khu gu vbeleya edzi Jehovha a pimisago khidzo. Ganiolu, hi nga pwisisa gwadi edzi Jehovha a pimisago khidzo khu gu hevbula “mapimo ya Kristo” kholu Jesu a gu pimisa nga Papayi waye, nigu a gu mu pimedzeya khu gu vbeleya. — 1 Kor. 2:16.

² Jesu haladzide Jehovha khu mapimo yaye yatshavbo. Jesu a di gu siti esi Nungungulu a nga ba a vbweta gu khuye a gira, nigu a di gu dzi emisede gu gira isoso ambari a gu tshaniseka khu gu gira silo nya sadi. Khu kotani nya olu a nga ba a vega gupima avba nya gu gire gugola ga Papayi waye, uye kha dzumeleya ni gevbini gilo gi khala nya lisima ngudzu womini waye.

3. Ginani Pedro a gi hevbudego ga Jesu, nigu Pedro a kutside Makristo gu gira ginani? (1 Pedro 4:1)

³ Pedro ni vambe vapostoli, va manegide ni lithomo nya likhongolo ngudzu nya gu vbedze tepo ni Jesu ni gu hevbula edzi a nga ba a pimisa khidzo. Tepo Pedro a nga lova lidangaliya laye nyo pheye khu gu thumiswa khu liphuvbo nya guage, uye kutside Makristo gu manega ni mapimo ya mamowo ni Kristo. (Leri 1 Pedro 4:1.) Pedro a di thumisa lito li thumiswago khu masotshwa tepo ma vbwetago guya dwana, li tshamuseyago gu khilo: “Dzi dongiseyeni.” Khu kharato, Makristo ma gu pimedzeya edzi Jesu a pimisago khidzo, ma na ba mari ni esi ma si vbwetago gasi gu dwana ni gwevbini gudogoreya nyo vivbe ni litigo leli li fumwago khu Sathane. — 2 Kor. 10:3-5; Efes. 6:12.

4. Ndrima yeyi, yi na hi phasa kharini gu landrisa wusingalagadzi wa Pedro?

⁴ Hi na wona edzi Jesu a pimisago khidzo hi bwe hi wona edzi hi nga mu pimedzeyago khidzo. Hi na hevbula 1) edzi hi nga pimisago khidzo nga Jehovha, a gu iso si na hi phasago gu pwanana ni vambe, 2) edzi hi nga dzi nogisago khidzo ni 3) edzi hi nga manegago khidzo ni mapimo nya yadi, na hi gu tumba Jehovha.

PIMEDZEYA EDZI JEHOVHA A PIMISAGO KHIDZO

5. Ga giemo muni Pedro a yeyedzidego gu khuye kha nga ba a pimisa nga edzi Jehovha a pimisago khidzo?

⁵ Wona giemo nyo khaguri Pedro a nga mba pimedzeya edzi Jehovha a pimisago khidzo. Jesu a di embede vapostoli vaye gu khuye a di hadzi gu hongola Jerusalema aya ningedwa ga vathangeyi nya dzitshetshe, a tshaniswa a bwe a songwa. (Mat. 16:21) Pedro a di gu dziti gu khuye Jesu a diri Mesiya a tumbisidwego gasi guta vbulugisa vathu va Jehovha. Khu ndziya yeyi, adzina saye si mu garadzede gu khodwa gu khuye Jehovha a di hadzi gu dzumeleya Jesu a songwa. (Mat. 16:16) Khu kharato, Pedro a di rana Jesu khu phuvbo aya mu embeya gu khuye: “U nga ganeyi isoso Pfhumu; isoso gima kha si na nga gu dugeleya.” (Mat. 16:22) Khu kotani nya olu Pedro a nga ba a si pimisi nga edzi Jehovha a pimisago khidzo khu mahungu yoyo, uye kha nga ba a pimisa nga Jesu.

6. Jesu yeyedzide kharini gu khuye a di gu pimisa nga edzi Jehovha a pimisago khidzo?

⁶ Jesu a di gu dziti edzi Papayi waye a nga ba pimisa khidzo, nigu uye a di gu pimisa khu ndziya yayimweyo. Jesu a di embeya Pedro gu khuye: “Khuga khavba Sathane! Uwe u gitshunganiso gwangu, kholu mapimo yago khandri ya Nungungulu ganiolu khya vathu.” (Mat. 16:23) Pedro adzina a di gira isoso khu sighelo nya sadi, ganiolu Jesu a di bomba wusingalagadzi waye. Pedro hevbude gu khuye a di yede gu pimisa nga edzi Jehovha a pimisago khidzo. Egi gihevbudzo nya lisima gwathu nethu.

7. Pedro yeyedzide kharini gu khuye a di gu vbweta gu pimisa khu ndziya eyi Jehovha a pimisago khiyo? (Wona kapa.)

⁷ Khu gu landreya, Pedro a di yeyedza gu khuye a di gu vbweta gu hevbuleya gu pimisa nga edzi Jehovha a pimisago khidzo. Yi di gu vbohide tepo gasi vathu nya mayigo va gira gipandre nya vathu va Nungungulu. Jehovha a di embeya Pedro gasi gu tshumayela Korineliyo, oyu a nga ba ari moyo nya ava va nga pheya khavo gu khala Makristo. Vajudha va di gu potsa gu vbungadza ni ava va nga ba va siri Vajudha, khu kharato Pedro a di yede guvbindrugedza mapimiselo yaye gasi a si kodza gu va tshumayela. Tepo Pedro a nga tugula esi Jehovha a pimisago maningano ni ava va nga ba va siri Vajudha, uye a di vbindrugedza mawonelo yaye. Kha nga handro wakone, tepo a nga rumwa gasi guya wuseya Korineliyo uye kha “bomba.” (Mith. 10:28, 29) Uye tshumayede Korineliyo ni vandrangani gwaye, nigu avo va bhabhatisidwe. — Mith. 10:21-23, 34, 35, 44-48.

8. Hi nga yeyedza kharini gu khethu hi ngu pimisa nga edzi Jehovha a pimisago khidzo? (1 Pedro 3:8)

⁸ Hwane nya myaga nyo khaguri, Pedro a di kutsa Makristo gasi gu “hengeya mapimo ya mamowo.” (Leri 1 Pedro 3:8.) Kha nga vathu va Jehovha, hi nga hengeya mapimo ya mamowo khu gu pimisa nga edzi Jehovha a pimisago khidzo, guya khesi hi hevbulago omu nya Bhibhiliya. Khu giyeyedzo, Jesu gengedzide valandreyi vaye gu thangisa Mufumo womini gwawe. (Mat. 6:33) Khu kharato, muthu nyo khaguri libandlani a nga hunga gu pheya gu thuma kha nga piyonero mwendro gu beleya thumo nya tepo yatshavbo. Wulangani nya gu mu embeye gasi gu vega gupima avbo gwaye, hi yede gu mu embeya malito nyo tiyise khu gudzigaradza a gu girago hi bwe hi mu seketeya.

DZI NOGISE

9-10. Jesu yeyedzide kharini gu khuye a di gu dzi nogisa?

⁹ Ga wutshigu nya gu hegise Jesu na si gufi, uye hevbudzide vapostoli vaye gilo nya lisima, a gu dzi nogisa. Hwanenyana, Jesu a di gu lombide Pedro ni Johane gasi guya dongiseya esi si nga hadzi gu vbwetega gasi gu hodza navo na si gufi. Isoso si di gu pata gu dongiseya basiya ni dzitowaliya gasi gu handza migondro na va si hodzi. Ganiolu, khu mani a nga hadzi gu gira thumo wowu wu wonegago na wuri wa vbavbatshi ya gu vboha tepo yoyo?

¹⁰ Jesu a di gira thumo wowu khu monyo waye watshavbo. Uye a di yeyedza gu khuye a di gu dzi nogisa ngudzu. Vapostoli va hlamadzisidwe ngudzu khu gu wona Jesu na gu gira thumo wu nga ba wu olovedwa gu girwa khu sithumi. Jesu a di tshula libhadzi laye, a dzega towaliya a tshomega mugiwununi, a theya mati omu nya basiya a bwe a pheya gu handza migondro yawe. (Joh. 13:4, 5) Jesu a di handza migondro nya 12 vapostoli vaye, gupata eyi ya Judha, a gu oyu a nga hadzi gu mu ningeya. Ambari ulolo, Jesu khu gu dzi nogisa giride thumo wowu kala wu vbeya. Khu gu landreya, Jesu khu gwadi a di va tshamuseya gu khuye: “Mu si pwisiside esi nyi nga mi gira? Enu mwa gu nyi rana khenu ‘Muhevbudzi’ mwendro ‘Pfhumu,’ khiso mu ganeyago, kheni kamo. Khu kharato, abari gu eni nyi gu Pfhumu ni Muhevbudzi nyi mi handzide migondro, anenu mu yede gu handzana migondro.” — Joh. 13:12-14.

11. Pedro yeyedzide kharini gu khuye a di gu hevbulede gu dzi nogisa? (1 Pedro 5:5) (Wona fotu.)

¹¹ Pedro a hevbude khu gudzinogisa ga Jesu. Hwane nya gu ba Jesu a bwelede ndzadzini, Pedro a di gira gilewugiso, uye a di hawulugisa mwama a nga ba ari gilima gukhugeya a nga velegwa. (Mith. 1:8, 9; 3:2, 6-8) Nya mba kanakana, gigiro gegi nya gu hlamadzise gi giride gu vathu nya vangi va mu hidzimeleya. (Mith. 3:11) Ganiolu, Pedro kha vbweta wuzundzo nya vathu kholu a nga gira isoso ambari olu a nga ba a dugeya ga wulanga vathu va nga ba va dzi garadzeya gu wonwa nga vathu nya lisima. Wulangani nya isoso, uye a di dzi nogisa a bwe a zundza Jehovha ni Jesu khu gu ganeya gu khuye: “Mwama yoyu mu mu wonago ni gu muti, vbanyisidwe khu lina la Jesu khu kotani nya olu hi khodwago avba nya lina la Jesu.” (Mith. 3:12-16) Malito ya Pedro a ma thumisidego tepo a nga loveya lidangaliya Makristo maningano ni lisima nya gu dzi nogise, ma nga hi dundrugisa tepo khiyo Jesu a tshomegidego khidzo libhadzi laye giwununi a bwe a handza migondro ya vapostoli. — Leri 1 Pedro 5:5.

12. Gu fana ni Pedro, hi nga simama kharini gu haguleya gu dzi nogisa?

¹² Hi nga pimedzeya Pedro hi bwe hi simama gu hevbuleya gu dzinogisa. Dundruga gu khuwe gu dzi nogisa sa gu pata nya singi guvbindra gu ganeya basi malito nya yadi. Lito Pedro a li thumisidego kha nga “gudzinogisa” la gu yeyedza gu khilo gu dzi nogisa ga gu pata edzi hi pimisago khidzo khu vambe ni ethu vamune. Ethu ha gu gireya wuwadi vambe kholu hi haladzago Jehovha ni vathu nasiri kholu hi vbwetago gu wonwa. Ha gu thumeya Jehovha ni vandriyathu khedzi hi dzi kodzago khidzo, ambari gudzigaradza gwathu gwa gu mba wonwa khu vambe, ha gu yeyedza gu khethu hi ngu dzi nogisa. — Mat. 6:1-4.

MANEGA NI “MAPIMO NYA YADI”

13. Tshamuseya esi si patago gu manega ni “mapimo nya yadi.”

¹³ Gu manega ni “mapimo nya yadi” sa gu pata ginani? (1 Ped. 4:7) Mukristo a gu na ni mapimo nya yadi, a gu gira satshavbo a si kodzago gasi gu hunga makungo ma pwananago ni edzi Jehovha a pimisago khidzo. Uye a ngu dziti gu khuye wupari waye ni Jehovha gilo nya lisima ngudzu womini gwaye. Uye a gu potsa gu pimisa ngudzu khuye mune a bwe a pwisisa gu khuye khati satshavbo. Nigu uye gambe a gu yeyedza gu khuye a ngu tumba Nungungulu, khu gu mu hidzimeleya tepo yatshavbo khu nombelo.a

14. Ga giemo muni Pedro a digidego gu tumba Jehovha?

¹⁴ Ga wutshigu waye nyo hegise na si gufi, Jesu a di gengedza vapizane vaye gu khuye: “Wutshigu wowu mwatshavbo mu na nyi diga khu kotani nya esi si na nyi giregeyago.” Pedro a di pimisa gu khuye a di gu tiyide a bwe a mu hlamula gu khuye: “Ambari vatshavbo va gu gu diga, eni gima kha nyi na nga gu diga.” Ga wutshigu wa wumowo, Jesu a di ninga wusingalagadzi vapizane vaye nyo khaguri, khuye: “Khalani na mu virede, mu gombeya tepo yatshavbo.” (Mat. 26:31, 33, 41) Pedro kha landrisa wusingalagadzi wowu. Nari khatshi a di gu landriside wusingalagadzi wowu, khu gu landreya na si bombi gu ganeya gu khuye a diri moyo nya vapizane va Jesu. Wulangani nya isoso, Pedro a dzi layide ngudzu khu gu ba a bombide gu khuye kha nga ba a muti Jesu. — Mat. 26:69-75.

15. Jesu simamide kharini gu manega ni mapimo nya yadi ga wutshigu waye nyo hegise na si gufi?

¹⁵ Jesu tumbide Jehovha khu gu vbeleya. Ambari olu Jesu a nga ba a vbelede, uye gombede khu gu phindra-phindra. Isoso si mu ningide gutiya-hwambo gasi gu gira silo si gimbileyanago ni gugola ga Jehovha. (Mat. 26:39, 42, 44; Joh. 18:4, 5) Nya mba kanakana, Pedro gima kha divala gu khuye Jesu a gombede dzitepo nya dzingi ga wutshigu waye nyo hegise na si gufi.

16. Pedro yeyedzide kharini gu khuye a di gu hagulede mapimo nya yadi? (1 Pedro 4:7)

¹⁶ Khu gu gimbiya nya tepo, Pedro a di hevbuleya gu tumba Jehovha khu gu gombeya gwaye. Tepo Jesu a nga wuswa khu gufani, uye a di tiyisegisa Pedro ni vambe vapostoli gu khuye va di hadzi gu hakha liphuvbo nya guage gasi va si kodza gu gira thumo wawe nyo tshumayele. Ambari ulolo, Jesu a di va lomba gasi va simama gu vireya Jerusalema kala isoso si girega. (Luka 24:49; Mith. 1:4, 5) Pedro virede na gu gira ginani? Pedro ni vambe vapostoli “va di simama gu gombeya gumogo.” (Mith. 1:13, 14) Khu gu landreya, ga lidangaliya laye nyo pheye, Pedro tiyiside vandriyaye nya Makristo gu manega ni mapimo nya yadi ni gu tumba Jehovha khu gu gombeya. (Leri 1 Pedro 4:7.) Pedro a di khala muthu a vidzidwego, nari ni mapimo nya yadi a bwe a tiyisa vandriyaye libandlani. — Gal. 2:9.

17. Ambari na hi gu pimisa gu khethu gu gira silo nyo khaguri si vbevbugide, ginani hi yedego gu simama gu gira? (Wona fotu.)

¹⁷ Gasi hi manega ni mapimo nya yadi, hi yede gu hidzimeya dzitepo nya dzingi ga Jehovha khu nombelo. Hi tugude gu khethu hi yede gu simama gu gombeya ga Jehovha gasi a hi phasa ambari na hi gu pimisa gu khethu si ngu vbevbuga gu gira silo nyo khaguri. Ngudzu-ngudzu ha gu ba hi vbweta gu hunga makungo nya lisima, ha gu gombeya ga Jehovha hi mu lomba sileletelo na hi gu tumba gu khethu uye a ngu siti esi si gu sadi gwathu.

18. Hi nga simama kharini gu pimisa khu ndziya eyi Jehovha a pimisago khiyo?

¹⁸ Hi ngu bonga ngudzu khu gu ba Jehovha a hi giride ni makodzelo nya gu pimedzeye makhalelo yaye. (Gen. 1:26) Lisine gu kha hi si kodzi gu mu pimedzeya khu gu vbeleya. (Isa. 55:9) Ganiolu, gu fana ni Pedro ha gu vbweta gu simama gu pimedzeya edzi Jehovha a pimisago khidzo, hi dzi nogisa ni gu manega ni mapimo nya yadi.