‘Mu na bani mu kategide mwa gu landrisa silo sesi’

1. Gudzikhusedza ga tigoni momu gu nga khuha kharini gudzinogisa gwathu?

KHU ginani si garadzago gu vbanya khesi hi si hevbulago omu nya lito la Nungungulu? Gimwego nya sighelo, khu gu gasi gu gira silo nya sadi gu vbwetega gudzinogisa. ‘Matshiguni yaya nya guhegise,’ si ngu garadza gudzinogisa, kholu vathu nya vangi va hi randredego va ‘magundrele mwendro va nya gu dzi gola vabune, va gu gola dzitsapawu, va na ni matshandza, va ngu dzi gugumugisa,’ ni “gumba dzi phara.” (2 Thimoti 3:1-3) Kha nga sithumi sa Nungungulu, hi ngu dziti gu khethu makhalelo yoyo ma vivbide, ganiolu si nga wonega nga khatshi vathu va girago silo soso va ngu dugeleya ni gu tsakiswa khu womi wawe khu lisine. (Ndzimo 37:1; 73:3) Adzina hi nga dzi wudzisa gu khethu: ‘Ina kamo si ngu phasa gu thangisa esi si vbwetegago ga vambe wulangani nya esi sangu? Nya gu dzinogisa, ina kamo vathu va na simama gu nyi ninga githawo?’ (Luka 9:48) Ha gu dzumeleya gu beledwa khu liphuvbo nya gudzikhusedze nya litigo leli, hi nga songa wupari wathu nya wadi ni vandriyathu nigu si nga garadzeya vambe gu hi wona kha nga maKristo. Ha gu hevbula khu siyeyedzo nya sithumi nyo dzinogise sa Nungungulu ni gu si pimedzeya, hi na vbwera mihandro nya yadi.

2. Ginani hi nga gi hevbulago ga sithumi nyo tumbege sa Nungungulu sa teponi ya gale?

² Ginani gi phasidego sithumi nyo tumbege sa Nungungulu sa teponi ya gale gu manega ni wupari naye? Si di gu mu tsakisa khu ndziya muni? Si di gu yi mana hayi tshivba gasi gu gira silo nya sadi? Ha gu leri siyeyedzo sawe omu nya Bhibhiliya hi bwe hi dundrugeya khesi hi si lerigo, gukhodwa gwathu gu na dandra.

GINANI GI TIYISAGO GUKHODWA GWATHU?

3, 4. a) Jehovha a gu hi hevbudza kharini? b) Khu ginani gu vbwetegago gimbe gilo vbavbandze nya guti basi gasi gu simama gu tiyisa gukhodwa gwathu?

³ Jehovha a ngu hi ninga esi si vbwetegago gasi gu hi simama gu tiyisa gukhodwa gwathu. Hi ngu hakha wusingalagadzi nya wadi ni gu hevbudzwa khu gu thumisa Bhibhiliya, mabhuku yathu nya wuKristo, jw.org, JW Broadcasting, mitshangano nya libandla ni mitshangano nya yikhongolo. Ganiolu Jesu tshamusede gu khuye gyomo gimbe gilo gi vbwetegago vbavbandze nya guti basi. Uye a di khuye: “Guhodza gwangu khu gu gira guhaladza ga wule a nga nyi rumelago ni gu gira mithumo yaye.” — Johane 4:34.

⁴ Gu gira guhaladza ga Nungungulu gu di gu fana ni guhodza avbo ga Jesu. Gu hodza guhodza nya gwadi gu ngu hi gira hi dzipwa gwadi gu bwe gu sayisa givili gyathu. Khu ndziya nyo fane, gu gira guhaladza ga Nungungulu nugo gu na hi gira hi dzipwa gwadi gu bwe gu sayisa gukhodwa gwathu. Khu giyeyedzo: U di nga hongola mitshanganoni mwendro thumoni nya gutshumayele na wu garade ganiolu tepo u bweleyago gaya hwane nya thumo nya gutshumayele u dzipwa na wu tsakide?

5. Ha gu phasega kharini khu gu khala vathu nya guti?

⁵ Ho gira esi Jehovha a si vbwetago, hi na khala vathu nya guti. (Jakobe 3:13) Nigu silo nya singi nya sadi sa gu giregeya ava va gu na ni guti. “Gimwalo igyo u yelago gu gi gola nya gufanane ni ugo. . . . Guti Simbo wu ningago womi ga vale va gu manelago, va kategide vatshavbo va gu sayisago.” (Mavingu 3:13-18) Jesu a di khuye: “Kha nga olu mu sitigo silo sesi, mu na bani mu kategile mwa gu si landrisa.” (Johane 13:17) Vapizane va Jesu va di hadzi tsaka va nga nga simama gu gira esi Jesu a va embedego. Gu landreya sihevbudzo saye ni giyeyedzo gyaye si di khala mavbanyelo yawe.

6. Khu ginani gu vbwetegago gu hi simama gu vbanya khesi hi si hevbulago?

⁶ Muhuno, anethu gu vbwetega gu hi simama gu vbanya khesi hi si hevbulago. Nga dundrugeya khu mekaniko a gu na ni dziferameta dzatshavbo ni guti. Silo soso si na mu phasa gu khala mekaniko nya wadi a gu si thumisa gwadi basi. Si nga gira na ari ni myaga nya yingi na gu wuti thumo wowu, ganiolu a gu ba a vbweta gu simama nari mekaniko nya wadi gu vbwetega gu a simama gu gira esi a si hevbudego. Khu ndziya nyo fane, tepo hi nga hevbula lisine, hi tsakide kholu hi di vbanya khesi hi si lerigo omu nya Bhibhiliya. Ganiolu gasi gu hi tsaka kala gupindruga guvbwetega gu hi simama gu vbanya khesi hi hevbudzwago khu Jehovha tshigu ni tshigu.

7. Ginani hi yedego gu gira gasi gu hevbula khu siyeyedzo si gomogo omu nya Bhibhiliya?

⁷ Omu nya ndrima yeyi, hi na ganeya khu siemo nyo khaguri omu si nga hi garadzeyago gu dzi nogisa. Hi na hevbula khedzi vathu nyo tumbege va teponi ya gale va simamidego khidzo gu dzinogisa. Ganiolu hi yede gu gira simbe guvbindra gu leri mahungu basi. Hi yede gu dundrugeya khesi hi lerigo hi bwe hi vbanya khiso.

U NGA DZI WONI NA WU HATHEGIDE

8, 9. Ginani hi gi hevbulago khu gudzinogisa ga Pawulo omu ga Mithumo 14:8-15? (Wona foto gupheyani nya ndrima.)

⁸ Jehovha a gu vbweta gu khuye vathu vatshavbo “va vbanye ni guti lisine.” (1 Thimoti 2:4) Wa gu va wona kharini vathu vatshavbo va si litigo lisine? Muspotoli Pawulo tshumayede vaJudha va nga ba vati gilogyo khu Jehovha. Ganiolu uye tshumayede gambe ava va nga ba va khozeya vanungungulu nya malipha. Gu tshumayela vathu vovo gu lingide gudzinogisa ga Pawulo. Khu ndziya muni?

⁹ Ga liendro nyo pheye la Pawulo nya wumisiyonariyo, hongode ni Bharinabha tigoni ga Listra. Vathu va Likawoniya va nga ba va vbanya iyoyo va di phara Pawulo ni Bharinabha nga vathu nyo hathege nya tshivba ngudzu, va bwe va va rana khu malina nya vanungungulu vawe nya malipha Zewusi ni Herimesi. Ina Pawulo ni Bharinabha va tsakisidwe khiso? Ina avo va wonide isoso kha nga guvbindrugedza nya gwadi kha nga olu va nga ba va tshanisidwe omu nya madhoropa ya mavili va vbindridego khumo? Ina va pimiside gu khavo wuzundzo watshavbo wule wu di hadzi phasa vathu nya vangi gu dzumeya mahungu nya yadi? Ne! Avo va di goroga ngudzu va ganeya khu tshivba khavo: “Khu ginani mu gira esi! Ethu nethu hi vathu nga enu, hi na ni mavbanyelo mamowo ni enu.” — Mithumo 14:8-15.

10. Khu ginani Pawulo ni Bharinabha va nga mba dzipwa na va hathegide guvbindra vathu va Likawoniya?

¹⁰ Tepo Pawulo ni Bharinabha va nga ganeya gu khavo anavo vathu nya nga avo, va di gu vbweta gu khavo kha va vbeleya. Kha va nga ba va vbweta gu khavo wukhozeyi wawe wu di gu fana ni wa vathu va Likawoniya. Pawulo ni Bharinabha va di gu rumedwe khu Nungungulu kha nga vamisiyonariyo. (Mithumo 13:2) Avo va di gu todzidwe khu liphuvbo nya guage ni gu va diri ni gutumba nyo tsakise. Ganiolu igyogyo kha gya nga ba giri gighelo nya gu va dzipwa na va hathegide. Avo va di gu dziti gu khavo si di gu kodzega gu vathu vale va hakha navo gutumba ga dzandzini va gu dzumeya mahungu nya yadi.

11. Hi nga dzi nogisa kharini nga Pawulo tepo hi tshumayelago?

¹¹ Eyi khiyo mweyo nya dzindziya hi yeyedzago khiyo gudzinogisa nga Pawulo. Gima kha hi dzipwi na hi hathegide khu kotani nya thumo nya gutshumayele hi ningidwego mwendro simbe silo esi Jehovha a hi phasago gu si tadzisa. Hi nga dzi wudzisa gu khethu: ‘Nya gu dzipwa kharini khu vathu va gipandreni nyi tshumayelago umo? Ina nyi ngu venga vathu nya lifumbo nyo khaguri?’ Dzifakazi dza Jehovha mafuni gwatshavbo, dza gu zama gu mana vathu va na engisago mahungu nya yadi. Vambe va ngu dzi garadzeya gu hevbula lidimi mwendro mavbanyelo nya vathu va wonwago nari va vbavbatshi. Ganiolu avo gima kha va dzipwi na vari tshukwana guvbindra ava va va tshumayelago. Wulangani nya isoso, avo va gu zama gu pwisisa muthu ni muthu gasi gu phasa vathu nya vangi khavba si kodzegago khavbo gu dzumeya mahungu nya Mufumo.

GOMBELEYA VAMBE KHU MALINA YAWE

12. Epafrasi yeyedzide kharini gu khuye a di gu khathala khu vambe khu lisine?

¹² Yimbe ndziya hi nga yeyedzago khiyo gudzinogisa khu gu gombeleya vandriyathu, ava va “hakhidego gukhodwa nya gululame nga ogu gwathu.” (2 Pedro 1:1) Khiso a giridego Epafrasi. Bhibhiliya yo mu khumbuga guraro basi. Tepo Pawulo a nga ba ari pasoni Roma, lovede maKristo ya Kolosi, na gu ganeya khu Epafrasi khuye: Epafrasi “Milombeloni gwaye a ngu lombelela ngudzu ga Nungungulu gukhuye mu simame gutiya.” (Vakolosi 4:12) Epafrasi a di gu vati gwadi vandriyaye libandlani, nigu a di gu khathala khavo khu lisine. Pawulo a di khuye a “naye pasoni,” kholu Epafrasi tshanganide ni sigaradzo saye nuye. (Filemoni 23) Ganiolu simamide gu khathala khesi si nga ba si vbwetega ga vambe, nigu a di gu gira gilogyo gasi gu va phasa. Epafrasi a di gu gombeleya vandriyaye, a bwe a va khumbuga khu malina yawe, nigu anethu hi nga gira sasimweso. Milombelo yoyo yi na ni tshivba ngudzu. — 2 Vakorinto 1:11; Jakobe 5:16.

13. U nga pimedzeya kharini Epafrasi omu nya milombelo yago?

¹³ Dundrugeya khu muthu u nga mu gombeleyago khu lina. Adzina u nguti dzipari libandlani mwendro valongo va emisanago ni sigaradzo. Si nga gira na vari ni silo nya lisima va yedego gu si hunga mwendro silingo va yedego gu si timiseya. U nga gombeleya gambe vandriyathu malina yawe ma gomogo omu nya gipandre gi gomogo omu nya jw.org gi gu khigyo “Testemunhas de Jeová presas por causa de sua fé.” (Beya omu nya IMPRENSA > CASOS JURÍDICOS khu vbavbatshi gakona.) U nga gombeleya gambe vale va fedwego khu sigodwa sawe, ava va ngarigo gu emisana ni dzimhango nya tumbunugo ni dzinyimbi, ni ava va gu na ni gigaradzo nya dzitsapawu. Gu na ni vandriyathu nya vangi gu vbwetegago gu hi va gombeleya! Tepo hi va gombeleyago, ha gu yeyedza gu khethu kha hi khathali basi khesi hi si vbwetago ganiolu khesi si vbwetwago khu vambe navo. (Vafilipi 2:4) Jehovha a ngupwa milombelo yoyo.

‘VBIREDZA GUPWA’

14. Jehovha muengiseyi nya wadi khu ndziya muni?

¹⁴ Yimbe ndziya hi nga yeyedzago khiyo gudzinogisa khu gu engiseya gwadi tepo vambe va ganeyago. Jakobe 1:19 wari khuye hi na “vbiredze gupwa.” Jehovha khuye muengiseyi nya wadi ga vatshavbo. (Genesi 18:32; Josuwa 10:14) Khu giyeyedzo, nga leri libhulo li gomogo omu ga Ekisodha 32:11-14. (Leri.) Ambari olu si nga ba si si lombi gu ningwa mawonelo khu Mosi, Jehovha dzumelede gu Mosi a dzi tshula edzi a nga ba a dzipwa khidzo. Ina anuwe u di hadzi laphisa-monyo u engiseya muthu oyu a manegidego ni mapimo nyo hosege teponi yi nga vbindra u bwe u landreya mawonelo yaye? Ambari ulolo, Jehovha a ngu laphisa monyo a engiseya vathu vatshavbo va gombeyago khu gukhodwa.

15. Hi nga pimedzeya kharini Jehovha khu gu khathala khu vambe?

¹⁵ Dzi wudzise kharati: ‘Abari gu Jehovha a ngu dzi nogisa kharati nyo bwe a engiseya vathu nga edzi a engisedego khidzo Abrahama, Rakeli, Mosi, Josuwa, Manowa, Eliya, ni Ezekhiya, ina kha nyi yeli gu zama gu gira sasimweso? Ina nyi nga engedzeya githawo khu vatshavbo vandriyangu libandlani khu gu va engiseya nyi bwe nyi landreya mawonelo yawe sa gu kodzega? Gu na ni muthu libandlani gwangu mwendro ndrangani gwangu nyi nga engedzeyago gu khathala khuye? Ginani nyi na girago khu isoso?’ — Genesi 30:6; Valamuli 13:9; 1 Dzipfhumu 17:22; 2 Dzikoronika 30:20.

“A GU DZINA SAYE PFHUMU NUNGUNGULU A NA WONA GUTSHANISEKA GWANGU”

16. Ginani a giridego Dhavhide tepo a nga giredwa guvivba khu Simeyi?

¹⁶ Gudzinogisa nugo gu ngu hi phasa gu yeyedza gudziphara tepo vambe va hi gireyago guvivba. (Vaefeso 4:2) Hi ngu wona giyeyedzo nya gyadi nya isoso omu ga 2 Samuweli 16:5-13. (Leri.) Simeyi, nongo wa Pfhumu Sawule a di vala a bwe a wugeya Dhavhidhe ni sithumi saye. Dhavhidhe na si kodzide gu degudza Simeyi, ganiolu wulangani nya isoso uye a di timiseya guvadwa khuye. Kodzide kharini gu dziphara Dhavhidhe? Hi nga si tugula ha gu khedzisisa gwadi gipimo nya wuraro nya Dzindzimo.

17. Ginani gi phasidego Dhavhidhe gu dziphara, nigu hi nga mu pimedzeya kharini?

¹⁷ Dhavhidhe lovide libhuku nya wuraru nya dzindzimo tepo gyanana gyaye Abhisalamo gi nga ba gi zama gu mu songa. Khiyo gambe tepo yoyo yayimweyo eyi Simeyi a wugedego khiyo nuye Dhavhidhe, ganiolu Dhavhidhe a yi mane tshivba nya gudziphare. Kharini? Omu ga Ndzimo 3:4, ha gu leri malito yaya ya Dhavhidhe: “Nyi ngu khusa lito nyi rana [Jehovha, NM], uye a ngu nyi hakha khu gigomoni gwaye nya gukatege.” Ha gu ba hi giredwa guvivba gu vbwetega gu hi gombeya nga Dhavhidhe. Khavbovbo Jehovha a na hi ninga liphuvbo laye nya guage gasi gu hi phasa gu timiseya. Ina u nga engedzeya gudziphara mwendro gu divaleya wa gu giredwa guvivba khu muthu? Ina u ngu tiyisega gu khuwe Jehovha a ngu khathala khu gutshaniseka gwago nigu a na gu phasa a bwe a gu kategisa?

‘GUTI GILO NYA GUPHEYE’

18. Hi na phasega kharini khu gu landreya sileletelo sa Jehovha?

¹⁸ Ha gu gira silo hi si tigo nari sadi, hi na gengeya ni gu Jehovha a na hi kategisa. Omu ga Mavingu 4:7, Bhibhiliya yari khiyo: “Guti gilo nya guphele.” Ambari olu wugengeyi wu seketedwago khu guti, wu ngu pata silo nya singi guvbindra gu pwisisa lisine nya silo basi. Wugengeyi wu ngu pata esi hi si hungago. Ambari wuguhudzi wu ngu yeyedza wugengeyi khu gu hengeledzeya guhodza wu na hodzago vbagirameni. (Mavingu  30:24, 25) Kristo a ranwago pwani “guti gwa Nungungulu,” tepo yatshavbo a gu gira esi si tsakisago Papayi waye. (1 Vakorinto 1:24; Johane 8:29) Nungungulu a na hi tshatshazeya nethu ha gu yeyedza wugengeyi khu gu hatha gu gira esi hi si tigo nari sadi hi bwe hi simama gu dzinogisa. (Leri Matewu 7:21-23.) Khu kharato simama gu dzi garadza gasi gu libandla li khala wulanga owu vatshavbo va si kodzago gu thumeya Jehovha khu gudzinogisa. Si ngu dzega tepo nigu guvbwetega gulaphisa-monyo gasi gu gira esi hi si tigo nari sadi. Ganiolu gu gira isoso go yeyedza gudzinogisa, nigu gudzinogisa gu na hi gira hi tsaka olu kala gupindruga.