Mitshamuselo yi gomogo omu nya mabhuku ma khumbugidwego omu nya Gibhukwana nya mitshangano nya thumo ni mavbanyelo
© 2025 Watch Tower Bible and Tract Society of Pennsylvania
7-13 NYA JULHO
DZITHOMBA NYA LITO LA NUNGUNGULU | MAVINGU 21
Matshina nya milayo gasi u manega ni mutshadho nyo tsakise
Mukhedziseyi 15/10/03 paj. 4, par. 5
U nga hunga kharini makungo nya yadi?
Makungo ma hungwago nya mba pheya khu gu pimisa ma nga yeyedza wupumbu. Mavingu 21:5 a gu hi gengedza gu khuye: “Makungo ya muthu a gu ma pimisa gwadi, ma na mu ninga mihandro, aholu ayo nya gu ma dongisele khu guvbiredza, kha ma bhindzuli gilo.” Khu giyeyedzo, vaphya va haladzanago va yede gu dzega tepo gasi gu hunga gu khavo va na tshadha mwendro ne. Va gu mba gira isoso, va na wona lisine nya malito ya William Congreve, dramaturgo nya mughinza wa lizana myaga nya wu 18 ma gu khayo: “Oyu a vbiredziseyago gu tshadha, a na dzi laya khu tepo nyo laphe.”
Khendzugani! 7.08 paj. 7, par. 2
U nga manega kharini ni mutshadho nyo tsakise
Yeyedza gudzinogisa. ‘U nga giri gilo khu gu vbweta gu dzi khusedza mwendro khu mapalisana, ganiolu dzi nogisi, u wona vambe na vari vakhongolo guvbindra uwe.’ (Vafilipi 2:3) Mipatwa nya yingi ya gu ganedzisama ngudzu-ngudzu khu kotani nya gu dzi khusedze; ya gu zama gu ningana nandru khu gyawe wulangani nya gu vbwetedzeyi dzindziya nya gu vbevbugise silo. Ga dzitepo dzedzi, gudzinogisa gu nga phasa gasi gu potsa gu dzi emeleya.
Mukhedziseyi 15/9/06 paj. 28, par. 13
“Tangadziswa khu mwangadzi wa wudzahani wago”
13 Ahati mutshadho wu gomogo mhangoni khu kotani nya edzi ava va tshadhidego va dzi pharago khidzo? Gasi gu lulamisa mahungu yaya va yede gu dzigaradza. Khu giyeyedzo, adzina saye va di pheya gu mba bhula khu ndziya nya yadi, khavbovbo isoso si khala giolovedzo. (Mavingu 12:18) Kha nga hi si wonidego ga ndrima yi vbindridego, isoso si nga kuha mutshadho wawe khu ndziya nya mba yadi. Livingu nyo khaguri nya Bhibhiliya lari khilo: “Tshukwana gu khala giwulani, guvbindra gu vbanya ni nyamayi nya gihafane ni gu dwanisa.” (Mavingu 21:19) Abari gu uwe u mwangadzi nigu mutshadho wago womo kharati, dzi wudzise gu khuwe: ‘Ina edzi nyi girago khidzo silo si ngu garadzeya mwama wangu gu khala vbafuvbi gwangu?’ Bhibhiliya ya gu embeya vama gu khiyo: “Simamani gu haladza vagadzi vanu, mu nga va zangareyi.” (Vakolosi 3:19) Wa gu ba uri mwama a tshadhidego, dzi wudzise gu khuwe: ‘Ina mwangadzi wangu dzimbe dzitepo a ngu dzina gu vbwetedzeya giphaso ga vambe vathu gasi va pwisisa esi a si vbwetago kholu nyi gu mba kodza gu dzi vega wulangani gwaye?’ Lisine gu gimwalo gighelo nya gu gire wubhayi. Khu kharato, olu hi dzitigo gu khethu isoso si nga tshuka si girega, gighelo nya gyadi gasi gu mu bhula gwadi khu sigaradzo sanu.
Kemba dzithomba nya liphuvbo
Mukhedziseyi 15/1/05 paj. 17, par. 9
Esi si ganedwego khu Mufumo wa Nungungulu si tadzisegide
9 Muhuno, Jesu khandri muthu nya nyama a khiledego giburwana, ganiolu Pfhumu nya tshivba. Uye a gu tshamusedwa na khilede kavhalu — omu nya Bhibhiliya yi emeyago nyimbi. (Mavingu 21:31) Gutuledwa 6:2 a gu ganeya gu khuye: “Nyi di wona kavhalu nyo age. Wule a nga ba a yi khilede a diri ni wulaho; a di ningwa korowa, a bwe a duga gasi gu ya pala valala vaye, nigu va pade kamo.” Gu diga isoso, muembi nya dzindzimo Dhavhidhe, a di lova maningano khu Jesu gu khuye: “Pfhumu Nungungulu a guromo Siyoni a na tiyisa ndronga nya wufumu waye a ganela, khuye: ‘Fuma vbakari ya valala vago.’” — Ndzimo 110:2.
14-20 NYA JULHO
DZITHOMBA NYA LITO LA NUNGUNGULU | MAVINGU 22
Matshina nya milayo ma phasago gu dandrisa sanana
Mukhedziseyi 10.20 paj. 27, par. 7
Vavelegi, phasani sanana sanu gasi si dandra si thumeya Jehovha
7 Mo ba mu tshadhide na mu dogoreya gu velega sanana, dzi wudziseni gu khenu: ‘Ina hi vathu nya gu dzi nogise hi haladzago Jehovha ni Lito laye? Ina Jehovha a di hadzi gu hi hatha gasi gu khathaleya gyanana gi ngarigo gu velegwa?’ (Ndzi. 127:3, 4) Wo ba uri muvelegi, dzi wudzise gu khuwe: ‘Ina nyi ngu hevbudza sanana sangu gu wona lisima nyo thume?’ (Muh. 3:12, 13) ‘Ina nyi ngu gira satshavbo nyi si kodzago gasi gu vhikeya sanana sangu ga dzimhango dzi gomogo tigoni momu ga Sathane?’ (Mav. 22:3) Lisine gu khu na nga si kodza gu vhikeya sanana sago ga dzatshavbo dzimhango. Isoso kha si kodzegi kamo. Ganiolu, u nga dongiseya sanana sago ga sigaradzo si na tshanganago naso womini khu gu simama gu si hevbudza khu lihaladzo edzi si yedego gu tumba khidzo wusingalagadzi nya Bhibhiliya. (Leri Mavingu 2:1-6.) Khu giyeyedzo, go tshuka nongo nyo khaguri a diga gu thumeya Jehovha, phasa sanana sago gu simama si hevbula Lito la Nungungulu gasi si wona lisima nyo simame si tumbega ga Jehovha. (Ndzi. 31:23) Mwendro mo tshuka mu fedwa khu muthu mu mu golago, yeyedza mavhesi nya Bhibhiliya sanana sago ma na si phasago gu timiseya wuvi wowo ma bwe ma si ninga gurula. — 2 Kor. 1:3, 4; 2 Thim. 3:16.
Mukhedziseyi 12.19 paj. 26, dzipar. 17-19
Vavelegi hevbudzani sanana sanu gu haladza Jehovha
17 U nga vireyi gu khuwe sanana sago si dandra gasi gu si hevbudza. Vavelegi hi ganedego khavo gupheyani va hevbudzide sanana sawe khu ndziya nya yadi. (Mav. 22:6) Nga wona giyeyedzo gya Thimoti, oyu khu gu gimbiya nya tepo a thumidego ni mupostoli Pawulo. Mamayi wa Thimoti, Ewunise ni vhovho waye Loyidhe, va phede gu hevbudza Thimoti na ngari likeke. — 2 Thim. 1:5; 3:15.
18 Jean-Claude ni Peace, wumbe patwa wa Costa do Marfim, wu si kodzide gu hevbudza satshavbo sanana sawe nya livbandre na gimwegyo gu haladza Jehovha. Ginani gi va phasidego gu dugeleya? Avo va di landreya giyeyedzo gya Ewunise ni Loyidhe. Vari khavo: “Guvelegwa si nga velegwago, hi di dzegeya gu pheya gu si hevbudza Lito la Nungungulu.”— Dhet. 6:6, 7.
19 So thula ginani gu hevbudza sanana sago lito la Nungungulu? Omu ga Dhewuteronome 6:7, lito nya giHebheru li vbindrugedzedwego gupwani “gu hevbudza” lo thula “gu hevbudza na wu gu wuyedzeya dzitepo nya dzingi.” Gasi gu gira isoso, vavelegi gu vbwetega va dzi tshiyela tepo nyo vbungadze ni sanana sawe nya sidugwana tshigu ni tshigu. Dzimbe dzitepo va nga goroga khu gu zama gu wuyedzeya gu hevbudza sasimweso sanana sawe. Ambari ulolo, avo va nga wona magirelo yoyo kha nga lithomo nyo hevbudze sanana sawe gu pwisisa Lito la Nungungulu ni gu vbanya khilo.
Mukhedziseyi 1/4/06 paj. 9, par. 4
Vavelegi — khalani giyeyedzo nya gyadi ga sanana sanu
Si olovegide gu sanana si gira silo nya wanana, nigu simbe sakone si na ni kanu nigu kha si engise. (Genesi 8:21) Vavelegi va nga gira ginani? Bhibhiliya yari khiyo: “Wupumbu wu namarede monyoni ga gyanana, aholu lipitso nya gulaye, li ngu kodza gu wu tsapurula li wu yisa hwindzo.” (Mavingu 22:15) Vambe va gu pimisa gu khavo gu laya khu ndziya yeyi si vivbide nigu si vbindredwe. Ganiolu, Bhibhiliya kha yi seketeyi wughevenga ni gu thumisa dzimbe dzindziya nya guvivbe. Ambari olu “lipitso” li thumiswago gasi gu kawuka, ilo la gu emeya wuthangeyi muvelegi a gu nawo, ganiolu a gu yeyedza isoso khu ndziya nya lihaladzo, na gu yeyedza gugaradzega khu gu khadzisega nya sanana saye. — Vahebheru 12:7-11.
Kemba dzithomba nya liphuvbo
Mukhedziseyi 08.21 paj. 22, par. 11
Tsaka khu esi u si kodzago gu gireya Jehovha
11 Ha gu thuma khu sighingi ga yatshavbo mithumo hi ningwago hengeledzanoni ya Jehovha, hi na mana gutsaka nya gu khongolo. Gira thumo nyo tshumayele khu “tshivba” yago yatshavbo u bwe u patega ga mithumo yatshavbo libandlani. (Mith. 18:5; Hebh. 10:24, 25) Gimbiya mitshanganoni na wu dongide gwadi, gasi uya ningeya mihlamulo yi tiyisago. Wona sipandre u ningwago avba nya mitshangano ya vbakari nya semana kha nga gilo nya lisima. Madhota ma gu gu lomba gu u gira thumo nyo khaguri libandlani, u nga hweyi gu wu gira nigu khala muthu nya gu tumbege. U nga pimisi gu khuwe thumo u ningidwego, wu mwalo lisima ni gu u mwalo gighelo nyo vbedze tepo yago khu gu wu gira. Londrola yatshavbo mathomo gasi gu tshukwadzisa makodzelo yago. (Mav. 22:29) Wa gu dzi garadzeya gu thumeya Jehovha, u na khala pari yaye nya yikhongolo nigu u na tsaka ngudzu. (Gal. 6:4) Si na gu vbevbugeya gu tsaka ni ava va nga hakha malungelo u nga ba u ma vbweta. — Rom. 12:15; Gal. 5:26.
21-27 NYA JULHO
DZITHOMBA NYA LITO LA NUNGUNGULU | MAVINGU 23
Matshina nya milayo gasi gu thumisa gwadi wadwa
Mukhedziseyi 1/12/04 paj. 19, dzipar. 5-6
Manega ni mawonelo nya yadi maningano ni wadwa
5 Ahati muthu a gu ba a seya wadwa, ganiolu na dzi woneya gasi gu a si levi? Vathu nyo khaguri kha va levi ambari na va vetide dzikopo nya dzingi. Ganiolu, oyu a pimisago gu khuye isoso khandri mhango a gu dzi senga. (Jeremiya 17:9) Adzina saye si nga gira gu a si kodzi gu vbedza litshigu nya mba seya nigu si mu gira a khala “gumbi nya vhinyu.” (Tito 2:3, Tradução do novo Mundo) Na gu ganeya khu dzindziya dzi girago muthu a khala gidhakwa, Caroline Knapp wari khuye: “So pheya vbadugwana-vbadugwana nigu nya mba si tugula.” Gu seya wadwa khu gu vbindrisa pimo i napwi u songago!
6 Wona gigengedzo gya Jesu gi gu khigyo: “Khu kharato, dzi woneyeni gasi gu myonyo yanu yi si pfhali khu gu hodza ngudzu ni gu seya ngudzu ni gugaradzega khu silo nya guvbanye, mu ta manwa khu litshigu lolo na mu pfhade nga khatshi girengo gi modwago khu naphwi. Kholu ilo li nata ga vatshavbo va vbanyago mafuni.” (Luka 21:34, 35) Ambari muthu a gu mba seya nyo bwe a leva, wadwa wu nga mu gira a woteya ni gu manega ni wugara khu nyamani ni liphuvboni. Ginani gi nga hadzi gu va giregeya la gu vboha litshigu la Jehovha na va romo ga giemo gegi?
Perspicaz-1 paj. 304
Gu leva
Gu himbedzedwago khu Bhibhiliya. Bhibhiliya yo ganeya gu khiyo si vivbide gu seya ngudzu nyo bwe hi leva. Mulovi nyo khaguri nya Mavingu ganede khu mihandro yi reswago khu gu seya khu gu vbindrisa pimo. Uye a gu gengedza gu khuye: “Khu mani a gu ni libango? Khu mani a gu ni mhango? Khu mani a gu ni gutshaniseka? Khu mani a guromo mayungani? Khu mani a gu ni wuvi? Khu mani a gu ni dzimbanga vbavbandze nya nandru? Gasi khu mani a fuvidego maho? Khavo avovo va pfhalago khu gusela wadwa, va golago gudhivanisela wadwa nya guvave. U nga khedzi gufuvila nya wadwa, idzo wu ngangamelago khidzo gikombeni [tepo vhinyu yi nungeyago ni gu ndrindra gupima], wu relela wabune [tepo wu vbevbugago gu releya ngoloni]. Guhegisani wa gu hodza kha nga nyoga, wu paya kha nga mamba [wu nga gira muthu a dwala khu nyamani (khu giyeyedzo, gu manega ni madwali nya libindri) ni madwali nya mapimo (ma vangwago tepo muthu a nga ba a seya ngudzu wadwa a zamago gu wu diga), nigu ayo ma nga songa]. Maho yago ma na wona silo nya guvivbe [wadwa wu ngu gira wongo nya muthu wu thuma khu ndziya nya mba yadi, nya nga gu pheya gu vbisa, gu wona silo nya mba iso, gu pheya gu ganeya silo nya mba pwala, gu dhedhereka ni gu gira silo nyo vivbe], ni mapimo yago ma na pimisa silo nyamba yela [satshavbo esi a pimisago ni esi a si dogoreyago a na gira].” — Mav 23:29-33; Ho 4:11; Mt 15:18, 19.
Mulovi a gu simama gu ganeya khu muthu nya gidhakwa gu khuye: “U na dzipwa gukhwatshi vbakari nya mati u ladego, [u garadzega ngudzu nga muthu a dzamago matini, khu gu hegisa u tshunganega mapimo], mwendro gukhwatshi u di lala vbatshani dzitshokhani nya ningwati [gu fana ni navhiyu yi kutsungwago khu mati, womi nya gidhakwa womo mhangoni khu kotani nya gu dwane ni simbe silo]. ‘Va nyi vetide aholu kha nyapwa guvbisa! Va nyi vetide aholu kha ga pwala [khiso gidhakwa gi ganeyago mapimoni gwagyo; kha gya nga ba gipwa guvbisa tepo gi nga ba gi tshaniswa]. Nyi na wuga lini gasi nyi dusa bhabhalaza. Nyi na wu vbwetedzeya gambe [a yede gu lala kala wu vbeya wadwa watshavbo, ganiolu uye gumbi nya wadwa nigu a gu vbwetedzeya lithomo nya gu seye gambe].’” Uye a na khala gisiwana nigu gambe kha na nga tumbwa ambari gu gira gwadi thumo waye. — Mav 23:20, 21, 34, 35.
Kemba dzithomba nya liphuvbo
Mukhedziseyi 1/11/04 paj. 31, par. 2
Siwudziso sa valeri
Khu giyeyedzo, muthu a enidego si nga gira nari ni limidzo, ganiolu khandri tepo yatshavbo si thulago isoso. Muthu a nga ena ngudzu khu kotani nya madwali. Muthu nyo khaguri a nga ena khu kotani nya olu valongo vaye nyo khaguri va enidego. Hi yede gu dziti gu khethu gu ena ngudzu makhalelo ya nyamani nigu limidzo gilo hi girago na hi gu kutswa khu mapimo yathu. Gu ena ngudzu sa gu wonega khu gu muthu a manega ni mafura nya mangi, ganiolu limidzo sa gu wonega tepo muthu a hodzago ngudzu nya mba khedza hwane. Iso si yeyedzago gu khiso limidzo kha li yeyedze khu gu ena nya muthu, ganiolu khedzi a hodzago khidzo. Muthu a nga manega ni pezo nya yadi, na hongide, ganiolu nari ni limidzo. Gu diga isoso, wulanga ni wulanga vathu va na ni mawonelo yawe maningano ni pezo nya yadi.
28 NYA JULHO–3 NYA AGOSTO
DZITHOMBA NYA LITO LA NUNGUNGULU MAVINGU 24
Dzi dongiseye gasi u si kodza gu emisana ni sigaradzo
Mukhedziseyi 07.23 paj. 18, par. 15
“Tiyani mu si tsekatseki”
15 Hevbula Lito la Nungungulu u bwe u dundrugeya khilo. Simbo wu nga simama na wu tiyide, wo ba wuri ni mikhamba nya yikhongolo, yi tsitsegidego gwadi. Khu kharato, ho ba hiri ni gukhodwa nyo tiye, hi na si kodza gu simama na hi tiyide. Tepo simbo wu dandrago, mikhamba yakone ya gu dandra ngudzu yi bwe yi engedzeya gunava. Tepo hi hevbulago ni gu dundrugeya khesi hi hevbudego, ha gu tiyisa gukhodwa gwathu hi bwe hi tiyisega gu khethu dzindziya dza Jehovha khyadi. (Kol. 2:6, 7) Dundruga khedzi sithumi sa gale si phasegidego khidzo khu sileletelo ni wusingalagadzi wa Jehovha. Khu giyeyedzo, Ezekiyeli vegide gwadi gupima tepo ngilozi yi nga ba yi dusa dzimedhidha nya tempele a wonesidwego. Giwoniso gegi gi tiyiside Ezekiyeli, nigu hi ngu hevbula gilogyo nya edzi hi nga emeyago khidzo milayo ya Jehovha, avba nya wukhozeyi nya guage. (Ezek. 40:1-4; 43:10-12) Anethu hi nga wuyedwa ha gu dzi ninga tepo nya gu hevbule ni gu dundrugeya gwadi khesi hi si hevbulago umo nya Lito la Nungungulu.
Mukhedziseyi 15/12/09 paj. 18, dzipar. 12-13
Simama gu tsaka dziteponi nyo garadze
12 Mavingu 24:10 a gu ganeya khu gu kongoma gu khuye: “Wa gu dugedwa khu mhango u vbela tshivba, gu yeyedza gupwani khwa tiya.” Limbe livingu lari khilo: “[Monyo] wa gu bani wu vbisega, hefemulo wa gu vbela tshivba.” (Mav. 15:13) Makristo nyo khaguri ma ngu vbeya ngudzu tshivba nyo bwe ma si si kodzi gu leri Bhibhiliya ni gu dundrugeya khiyo. Ayo ma nga gira milombelo yi si khugeyigo monyoni mwendro gu dzi hambanisa ni mambe Makristo. Khu lisine, gu simama na wu vbede tshivba si nga vanga sigaradzo nya singi. — Mav. 18:1, 14.
13 Gu diga isoso, gu manega ni mawonelo nya yadi si ngu hi phasa gu vega gupima ga esi si dugeleyago womini gwathu, a gu esi si hi ningago litsako ni gu khadzisega. Dhavhidhe a di lova gu khuye: “Nyi ngu tsaka khu gu gira guhaladza gwago, Nungungulu wangu.” (Ndzi. 40:8) Kha hi yeli gu ema gu gira longoloko wathu wa liphuvboni tepo silo si gu mba gimbiya gwadi womini gwathu. Khu lisine, rendre nya wadi nya gu pale gugaradzega gu gira mithumo yi ningago litsako. Jehovha a gu hi embeya gu khuye hi nga mana litsako khu gu leri ni gu gevesisa Lito laye tshigu ni tshigu. (Ndzi. 1:1, 2; Jak. 1:25) Milowo nya Guage ni mitshangano nya wukristo si ngu hi ninga “magana nya gutsakise” ma nga hi phasago gu tsakisa monyo wathu. — Mav. 12:25; 16:24.
Mukhedziseyi 12.20 paj. 15
Siwudziso sa valeri
Mavingu 24:16 wari khuye: “Kholu muthu nya gululame, ambari a thega livbandre na dzimbili dzinyondro, uye a na wuga.” Ina livhesi leli lo tshamuseya gu khilo ambari muthu a gu ghoha dzitepo nya dzingi Nungungulu a ngu mu divaleya.
Khu lisine, livhesi leli khandri lo tshamuseya isoso. Livhesi leli lo ganeya khu muthu a emisanago ni sigaradzo nya singi ganiolu a si timiseya.
Khu lisine, Mavingu 24:16 kha ganeyi khu gu “thegeya gighohoni.” Ganiolu, a gu ganeya khu gu emisana ni sigaradzo khu dzitepo nya dzingi. Ga litigo leli nyo vivbe, muthu nyo lulame a nga emisana ni gigaradzo nya madwali mwendro simbe sigaradzo. Uye gambe a nga tshaniswa khu wufumo khu kotani nya gu emeye gukhodwa gwaye. Ganiolu, uye a nga tiyisega gu khuye Nungungulu a na mu seketeya a bwe a mu phasa gu timiseya ni gevbini gigaradzo. Dziwudzise gu khuwe: ‘Lini avba nyi nga wona sithumi sa Jehovha na si si gimbiledwi gwadi khu silo womini?’ Khu ginani si giregago isoso? Kholu hi ngu tiyisega gu khethu ‘Jehovha a ngu tiyisela avo va kanakanago, a gu wusa avo va rerekago va thega.’ — Ndzi. 41:1-3; 145:14-19.
Kemba dzithomba nya liphuvbo
Mukhedziseyi 15/10/09 paj. 12
Siwudziso sa valeri
Matshigoni nya Bhibhiliya, mwama a gu vbweta gu tshadha gasi a manega ni ndranga a di yede gu dzi wudzisa gu khuye: ‘Ina nyi na ni makodzelo nya gu sayise ni gu khathaleya mwangadzi wangu ni sanana nya gu tshuka nyi manega naso?’ Na si manegi ni ndranga a diri ni thumo nya gu khathaleye mathembwe yaye. Khu kharato, Bhibhiliya khu lidimi la matshigoni yathu, ya gu vbindrugedzeya malito yaya khu ndziya nyo vbevbude ni gu kongoma gu khiyo: “U nga vbahi ndranga, ambari gu tshadha kala dzimbewu dzago dzi buga u bwe u tiyisega gu khuwe u na mana womi.” Ina litshina leli li ngu hi phasa muhuno?
Ina. Mwama a dogoreyago gu tshadha a yede gu dzi dongiseya gwadi. Abari gu a ni makodzelo a yede gu thuma. Lisine gu, gu thuma khu gudzigaradza kha si thuli basi gu khathaleya ndranga khu nyamani. Lito la Nungungulu la gu ganeya gu khilo mwama a gu mba khathaleya ndranga yaye khu nyamani, gu dzipwa gwayo nigu khu liphuvboni vivbini ngudzu guvbindra wule a gu mwalo gukhodwa. (1 Thim. 5:8) Khu kharato, tepo muphya a dongiseyago mutshadho mwendro gu manega ni ndranga, adzina a nga dzi wudzisa gu khuye: ‘Ina nyi na ni makodzelo nya gu sayise ndranga? Ina nyi dongide gasi gu thangeya ndranga yangu khu liphuvboni? Ina nyi na hevbula Bhibhiliya tshigu ni tshigu ni mwangadzi wangu ni sanana sangu?’ Lito la Nungungulu li ngu tshingisa silo sesi nya lisima. — Dhet. 6:6-8; Efes. 6:4.
Khu kharato, tepo muphya a vbwetago nyamayi a yede gu dundrugeya gwadi khu litshina li gu romo omu ga Mavingu 24:27. Khu ndziya nyo fane, ndriyathu nya nyamayi a yede gu dzi wudzisa gu khuye ina nyi dongide gasi gu khala mwangadzi ni mamayi. Patwa nyo khaguri wu nga dzi gira siwudziso sasimweso wa gu dundrugeya gu manega ni sanana. (Luka 14:28) Gu landra sileletelo sesi, si na phasa vathu va Nungungulu gu potsa sigaradzo ni gu manega ni litsako ndrangani.
4-10 NYA AGOSTO
DZITHOMBA NYA LITO LA NUNGUNGULU MAVINGU 25
Matshina nya milayo ma hi phasago gu ganeya khu ndziya nya yadi
Mukhedziseyi 15/12/15 paj. 19, dzipar. 6-7
Thumisa khu wugengeyi tshivba nya lidimi
6 Mavingu 25:11 a gu tshamuseya lisima nya gu hathe tepo nya yadi gasi gu ganeya: “Mahungu ma ganedwago khu gikhati gyaye, kha nga sifananiso nya [maçã] nya ndralama.” Dzimaçã nya ndralama dzi mburide. Dza gu patedzedwa ni parata dzi di hadzi gu mbura ngudzu. Khu ndziya nyo fane, tepo hi hathago khu wugengeyi tepo nyo ganeye, malito yathu ma na tsakisa nigu ma na vboheya makungo yayo. Hi nga gira kharini isoso?
7 Malito yathu ma nga phasa muthu nyo khaguri. Ganiolu, ha gu mba hatha gwadi tepo nyo ganeye khiyo, ayo kha ma na nga phasa. (Leri Mavingu 15:23.) Giyeyedzo gi landreyago gi ngu hi phasa gu pwisisa isoso. Khu Março nya 2011, sipandre nyo khaguri nya leste ga Japão si di emisana ni girevareva ni tsunami si nga ghoheteya madhoropa nya mangi. Guvbindra 15 mil vathu va fude. Dzifakazi dza Jehovha dza gipandreni mule anidzo dzi emisanide ni sigaradzo sesi, ganiolu idzo dzi di londrola yatshavbo mathomo gasi gu thaveleya vale va nga ba va fedwe khu gu thumisa Bhibhiliya. Ganiolu, wukhongeyi nya wu budismo wu na ni tshivba gipandreni mule nigu vathu nya vangi kha va siti nya singi khu sihevbudzo nya Bhibhiliya. Hwane nya gu ba yi giregide tsunami, vandriyathu va di wona gu khavo yi di siri tepo nya yadi gasi gu bhula ni ava va fedwego khu gitumbiso nya gu wuswe ga ava va fudego. Wulangani nya isoso, avo va di thumisa giningwa nyo ganeye gasi gu tiyisa ni gu tshamuseya khu gu thumisa Bhibhiliya gu khavo khu ginani si giregeyago silo nyo vivbe vathu nya vadi.
Mukhedziseyi 15/12/15 paj. 21, dzipar. 15-16
Thumisa khu wugengeyi tshivba nya lidimi
15 Edzi hi ganeyago khidzo si na ni lisima ngudzu. Tepo Jesu a nga ganeya sinagogani ga lidhoropa laye, Nazareta, vathu va di “hlamala khu malito nya yadi nyo kuhe monyo ma nga ba ma duga khu kanani gwaye.” (Luka 4:22) Malito nyo tsakise ma ngu kuha monyo nigu kha ma vbedzi tshivba nya lidimi. Khu lisine, tepo hi ganeyago malito nya yadi si ngu vbevbuga gu vambe va ma dzumeya. (Mav. 25:15) Hi nga pimedzeya edzi Jesu a nga ba a ganeya khidzo khu gu yeyedza wuwadi ni gu ninga lisima gudzipwa ga vambe. Tepo a nga wona gudzigaradza vathu va nga ba va gu gira gasi gu mu engiseya, Jesu a di va pweya wusiwana a bwe “a pheya gu [va] hevbudza silo nya singi.” (Marko 6:34) Ambari tepo a nga ba a vadwa, Jesu kha nga ba a thumisa malito nyo paye monyo. — 1 Ped. 2:23.
16 Si nga hi garadzeya gu ganeya khu ndziya nya githawo ni wuwadi ni muthu hi nga mu oloveya nya nga givbango gya ndrangani mwendro pari ya libandlani. Ga giemo gegi, hi nga dzipwa na hi tshulegide gu ganeya silo khu gu kongoma. Ina Jesu a di gu pimisa gu khuye kha nga olu a nga ba ari ni wupari wa vbafuvbi ni vapizane vaye, a di gu tshulegide gu ganeya navo khu ndziya a nga ba a yi vbweta? Ahihi! Tepo vapizane vaye va vbafuvbi va nga ba va simama gu ganedzisana maningano khoyu a gu khongolo vbakari gwawe, Jesu a di va kawuka khu malito nya yadi nigu a va kotarede giyeyedzo nya gyanana nyo khaguri. (Marko 9:33-37) Madhota ma nga pimedzeya Jesu khu gu ninga wusingalagadzi “khu wuwadi.” — Gal. 6:1.
Mukhedziseyi 1/4/95 paj. 17, par. 8
Hi nga kutsana kharini lihaladzoni hi bwe hi gira mithumo nya yadi?
8 Tepo hi thumeyago Nungungulu, hatshavbo hi nga kutsana khu giyeyedzo. Jesu kutside vaengiseyi vaye. Uye a di gu gola ni gu ninga lisima thumo nyo tshumayele. Uye a di gu ganeya gu khuye guhodza gwaye. (Johane 4:34; Varoma 11:13) Guvbisega gogu gu nga thapedzisana. Ina u nga yeyedza guvbisega gwago thumoni nyo tshumayele? U nga bhuleya vandriyathu libandlani khu matshango yago nya yadi, ganiolu nya mba dzi khusedza. Tepo u ranago vambe gasi gu thuma navo, wona edzi u nga va phasago khidzo gu manega ni gudogoreya nya gu bhule ni vambe maningano khu Muvangi wathu nya khongolo, Jehovha. — Mavingu 25:25.
Kemba dzithomba nya liphuvbo
Perspicaz-1 paj. 379
Gudzivbevbugisa
Muthu a gu dzi vbevbugisa khu kotani nya olu a gu na ni gukhodwa ni gifefe nya tshivba. Uye gima kha digi gu ninganiseya nigu kha digi gu khala muthu nya gu pwisise. Muthu a gu mba dzi vbevbugisa, kha dzi tumbi, a gu garadzega, kha khodwi, a mwalo gutumba nigu kha giti gilo nyo gire. Livingu nyo khaguri la gu ganeya khu muthu a gu mba dzi vbevbugisa, gu khilo: “Muthu a gumba kodza gutimisela, a gu fanana ni lidhoropa likhokhola laye li khungumugidego.” (Mav 25:28) Uye a nga dhumedwa khu yatshvabo mapimo nya mba handzega nigu isoso si nga mu kutsa gu gira silo nya mba handzega.
11-17 NYA AGOSTO
DZITHOMBA NYA LITO LA NUNGUNGULU MAVINGU 26
Khala hwindzo ni muthu nya “gipumbu”
Perspicaz-1 paj. 485, par. 6
Ndzadzi
Dzinango. Dzinango dzimbili nya litshina mafuni nya Gitumbiso, a gu lihani ni girami, idzo dzi nga wonwa gambe kha nga dzinango nya gubange ni dzindzadzi. (Fananisa ni Ndz 32:4; Gz 2:11.) Gukhugeya Abril kala outubro, ya guwa ndzadzi nya yidugwana. Ndzadzi ya gu kala tepo yeyi nya gu vbwere. Mavingu 26:1 ya gu yeyedza gu khiyo tepo nya nango nya gu vbwere, ndzadzi yi mwalo lisima. (Fananisa ni 1Sa 12:17-19.) Tepo nya nango nya ndzadzi, ndzadzi kha yiwe tepo yatshavbo, mambe matshigu ndzadzini gu agide. Kha nga olu a gu tepo nya girame, tepo ndzadzi yi wuwago muthu a gupwa girame nya gikhongolo. (Ezr 10:9, 13) Khu kharato, vathu va ngu dzipwa gwadi gu khala wulanga nyo furumeyi. — Isa 4:6; 25:4; 32:2; Job 24:8.
Mukhedziseyi 1/10/87 paj. 19, par. 12
Gu kawuka gu ngu resa handro nya gu rule
12 Ga simbe siemo, adzina si na vbwetega gu kawuka vathu nyo khaguri khu ndziya nyo tiye, kha nga si yeyedzwago khu Mavingu 26:3 wu gu khuwo: “Kavalu ya gu gimbidziswa khu gisephu, ni buru yi gimbidziswa khu matomu, gasi hwambo nya gipumbu wu emedwe khu mboma.” Dzimbe dzitepo, Jehovha digide Vaisrayeli va wuyedwa khu mihandro yi nga vangwa khesi va nga si khuta: “Khu kotani nya guyeyise ni guwugela Nungungulu, ni gu nyenya makungo ya oyu a Khusegidego ngudzu, Nungungulu a di va rwega sigaradzo nya sikhongolo; va garala va thega nyamba mana muthu nya gu va phase. Aholu vbakari nya sigaradzo sawe va di lila ga Pfhumu Nungungulu, uye a di va vbanyisa ga sigaradzo sawe.” (Ndzimo 107:11-13) Sipumbo nyo khaguri si ngu bangisa myonyo yaso nyo bwe si si dzumeye gu kawukwa: “Uye a kanyisago mwendro gumba dzumela [gu kawukwa], a na mbembiswa na si pimi gilo, a na hamuga ni uye nya gu mu wuse.” — Mavingu 29:1.
Perspicaz-1 paj. 580, par. 2
Gilima
Gu thumiswa nya Livingu. Pfhumu Solomoni a di ganeya gu khuye: “Gu rumela mahungu khu mandzani ga gipumbu, gu fanana ni gu dzi pila litundru.” Khu lisine, muthu a tumbago gipumbu gasi gi khathaleya thumo waye, khu mahegiso a na dzi laya nigu thumo waye kha wu na nga dugeleya. — Mav 26:6.
Kemba dzithomba nya liphuvbo
Perspicaz-2 paj. 1140
Gipumbu
Gu hlamula gipumbu guya ‘khu wupumbu wagyo’, khu gu thumisa maganelelo yagyo nya mba phasa gilo, so gira gu muthu yoyo a pimisa ni gu gira silo nga gipumbu gyogyo. Gasi hi si fani ni gipumbu, mavingu a gu hi gengedza gu khuye: “U nga phindruli gipumbu khu wupumbu wa[gyo].” Khu yimbe ndziya, Mavingu 26:4, 5 a gu yeyedza gu khuye si nga phasa gu hlamula gipumbu guya khu wupumbo wagyo, khu gu zama gu pwisisa esi gi ganeyago, u yeyedza gu khuwe esi gi ganeyago kha si phasi gilo, ni gu khuwe esi gi hungidego si hambanide ngudzu ni esi gi ganedego.
18-24 NYA AGOSTO
DZITHOMBA NYA LITO LA NUNGUNGULU MAVINGU 27
Ha gu wuyedwa kharini khu gu manega ni dzipari nya lisine
Mukhedziseyi 09.19 paj. 5, par. 12
Jehovha a ngu ninga lisima sithumi saye nyo dzinogise
12 Muthu nyo dzi nogise a ngu bonga wusingalagadzi a ningidwego. Gasi gu fananisa: Nga dzi dundrugeya na wuri mitshanganoni nya wuKristo. Hwane nyo bhule ni vandriyathu nya vangi, moyo wawe a gu ndreyisa phuvbo, a gu lembeya ndzeveni khuye, gu tshade sithaphana nyo khaguri magwahani gwago. Nya mba kanakana u di hadzi khala dzitshoni. Ganiolu, ina u di hadzi gu mba bonga khesi ndriyathu a gu giredego? Khu lisine u di hadzi ganeya gu khuwe nari khatshi nyi di dzegede gu embedwa gupheyani! Khu gufana, gu vbwetega hi dzi nogisa gasi gu bonga ndriyathu a tiyidego-hwambo a hi ninga wusingalagadzi khu tepo hi nga ba hi wu vbweta. Ethu ha gu wona ndriyathu yoyo kha nga pari nasiri nala. — Leri Mavingu 27:5, 6; Gal. 4:16.
Perspicaz-2 paj. 1215, par. 5
Vavhizinyu
Ambari ulolo, Mavingu a gu hi kutsa gu manega ni gukhodwa ni gu tumba pari yathu, ni gu yi lomba giphaso tepo hi gi vbwetago: “U nga hambani ni pari yago, ambari ni pari ya babe wago; ambari guya ndrangani ga ndriyago, khu litshigu nya sigaradzo; i tshukwana guya ga muakelane [sha·khenʹ] a gu romo vbafuvbi, guvbindra ga ndriyago a guromo hwindzo.” (Mav 27:10) Avba, mulovi a di gu vbweta gu ganeya gu khuye pari ya vbafuvbi hi yede gu yi ninga lisima nigu hi yedi gu yi vbwetedzeya gasi gu lomba giphaso wulangani nya gu vbwetedzeye nongo, nya nga ndriyathu nya novba a khalago hwindzo, kholu adzina saye kha na nga ba a dzi emisede gu hi phasa mwendro a na ba a mwalo makodzelo nyo gire isoso.
Mukhedziseyi 09.23 paj. 10, par. 7
Vaphya — Womi muni mu vbwetago gu manega nawo?
7 Khu gu ba Jowasi a hungide makungo nya mba yadi, ha gu hevbula gu khethu hi yede gu hatha gwadi dzipari dzathu dzi gu na ni mavbanyelo nya yadi, dzi haladzago Jehovha ni gu vbweta gu mu tsakisa. Hi nga manega ni dzipari nya dzitanga nya gu hambane-hambane. Dundruga gu khuwe Jowasi a diri muphya ngudzu gu vbindra pari yaye Joyadha. Ganiolu, maningano khu dzipari dzago, dzi wudzise gu khuwe: ‘Ina idzo dzi ngu nyi phasa gu tiyisa gukhodwa gwangu ga Jehovha? Dzi ngu nyi kutsa gu vbanya khu milayo ya Nungungulu? Ina dzi ngu nyi ninga wusingalagadzi tepo nyi wu vbwetago?’ (Mav. 27:5, 6, 17) Lisine gu abari gu dzipari dzago kha dzi haladzi Jehovha, idzo kha dzi na nga gu phasa. Ganiolu, wo ba wuri ni dzipari dzi haladzago Jehovha dzi na gu phasa tepo yatshavbo. — Mav. 13:20.
Kemba dzithomba nya liphuvbo
Mukhedziseyi 15/09/06 paj. 19, par. 12
Tshamuselo nya libhuku la Mavingu
27:21. Hi nga yeyedza edzi hi gu idzo tepo hi zundzwago. Hi ngu yeyedza gudzinogisa tepo hi dzumeyago gu khethu khu Jehovha a hi phasago gu gira satshavbo, nigu isoso si ngu hi kutsa gu simama gu mu thumeya. Muthu a nga yeyedza gu khuye kha dzi nogise tepo a dzi khusedzago khu gu zundzwa.
25-31 NYA AGOSTO
DZITHOMBA NYA LITO LA NUNGUNGULU MAVINGU 28
Gu hambana nya muthu nya mba wadi ni muthu nyo lulame
Mukhedziseyi 15/5/93 paj. 26, par. 2
Ina u ngu thumeya Jehovha khu gu tumbega?
“Avo va lulamidego va gu tiya nga nghala.” (Mavingu 28:1) Avo va gu khodwa, va tumba Lito la Nungungulu va bwe va simama gu gira thumo wa Jehovha ambari va gu tshangana ni gevbini gigaradzo.
Perspicaz-1 paj. 814, par. 2
Gupwisisa
Avo va dzi hambanisago ni Gifefe. Oyu a vegago gupima avba nya gighoho, kha lombi giphaso Jehovha tepo a hungago makungo. (Job 34:27) Muthu a pimisago khu ndziya yeyi, a gu dzumeya gu sengwa khu monyo waye, a si dzumeyi gighoho gyaye a bwe a luzekedwa khu gu pwisisa. (Ndz 36:1-4) Ambari olu a ganeyago gu khuye a ngu khozeya Nungungulu, uye a gu thangisa gudogoreya nya vathu gu vbindra ogu ga Nungungulu. (Isa 29:13, 14) Uye a gu zama gu dzi emeleya ni gu wona gu gira silo nyo vivbe khatshi a gu ‘hagana’ (Mav 10:23), a wona silo khu ndziya nya mba yadi, a khala muthu nya maghilivindra, a pimisa nga gipumbu nyo bwe a pimisa gu khuye Nungungulu kha woni esi a girago, nga khatshi mapimo ya Nungungulu kha ma thumi gwadi. (Ndz 94:4-10; Isa 29:15, 16; Jer 10:21) Uye a gu yeyedza khesi a ganeyago ni mithumo yaye gu khuye: “[Jehovha] mwalo!” (Ndz 14:1-3) nigu ‘kha mu ningi lisima’. Kha nga olu a gu mba gimbidziswa khu matshina ya Nungungulu, uye kha woni silo khu ndziya nya yadi, kha woni satshavbo si pategago ga mahungu nyo khaguri nigu kha hungi makungo nya yadi. — Mav 28:5.
Perspicaz-1 paj. 1237, par. 1
Gutumbega
Kha si kodzegi gu tumbega khu tshivba yathu, ganiolu hi nga gira isoso khu gu khodwa ni gu tumba Jehovha ni tshivba yaye nya gu vbulugise. (Ndz 25:21) Nungungulu a gu tumbisa gu khala “gitshangu” ni “likhokhola”, a sayisa ndziya ya vale va tumbegago gwaye. (Mav 2:6-8; 10:29; Ndz 41:12) Gu garadzega gwago nya gu vbwete gu tsakedwa khu Jehovha, si ngu gu phasa gu manega ni womi nya wadi ni gu simama gu gimbiya khu ndziya nyo tumbege kala u vboheya makungo yago. (Ndz 26:1-3; Mav 11:5; 28:18) Ambari olu Joba a nga wona edzi vathu va gu mwalo nandru va tshanisekago khidzo khu kotani nya wuvivbi va bwe vafa gumogo ni vathu nya mba vadi, Jehovha a ngu hi tiyisegisa gu khuye a ngu wuti womi wa ava va gu mwalo nandru nigu khuye thomba nya vathu vovo yi na pindruga nigu va na manega ni wumindru nya gu rule ni gu tsakisa. (Job 9:20-22; Ndz 37:18, 19, 37; 84:11; Mav 28:10) Gu fana ni Joba, muthu kha ningwi lisima ni githawo khu kotani nya dzithomba dzaye, ganiolu khu kotani nya gutumbege gwaye. (Mav 19:1; 28:6) Sanana si gu na ni lithomo nya gu manege ni papayi mwendro mamayi nya makhalelo yaya, si yedwe gu wonwa na si tsakide (Mav 20:7), kholu gi ngu ningwa giyeyedzo nya gyadi khu papayi wagyo ni gu wuyedwa khu gu ba ari ni lina nya ladi ni gu ningwa githawo.
Kemba dzithomba nya liphuvbo
Mukhedziseyi 1/12/01 paj. 12, par. 1
Ina u nga potsa gu manega ni mhango khu liphuvboni
Gu dzi tumba ngudzu. Vathu nya vangi va nga emisana ni madwali nya monyo va di gu tumba givili gyawe, myonyo yawe na yi si emi gu veta (ataque cardíaco). Dzitepo nya dzingi va di gu wona gu gira dziexame medhiku na si si phasi. Khu ndziya nyo fane, ava va gu na ni myaga nya yingi lisineni adzina va nga pimisa gu khavo gimwalo gi na va dugeleyago. Adzina saye va nga diga gu dzi gevesisa khu liphuvboni kala va dugeledwago khu mhango. Gwadi gu dundruga gigengedzo gya mupostoli Pawulo gi ganeyago khu gu dzi tumba ngudzu, gi gu khigyo: “Oyu a pimisago gu khuye tiyide, a na dzi woneye gasi a si thegi.” Gwadi gu dundruga gu khethu kha ha vbeleya, nigu hi yede gu dzi ninga tepo nya gu dzi gevesise khu liphuvboni. — 1 Vakorinto 10:12; Mavingu 28:14.