Ganeya ni gu gira silo khu ndziya nya yadi

Ginani Jesu a giridego?

VHIDHIYU: Jesu a gu hawulugisa mwama nya gikhumo

1. Wona VHIDHIYU, mwendro leri Johane 9:1-7. Khavbovbo bhulani khu siwudziso si landreyago:

1. Ginani Jesu a giridego — a di hawulugisa mwama wule nya gikhumo mwendro a di mu bhuleya khu mahungu nya yadi? — Wona Johane 9:35-38.

2. Ginani gi gu tiyisegisago gu khuwe mwama wule a di dzi emisede gu engiseya Jesu?

Ginani u gi hevbulago khu Jesu?

2. Muthu a na vbweta gu hi engiseya a gu dziti gu khuye hi ngu khathala khuye.

Pimedzeya Jesu

3. Yeyedza pweya-wusiwana. Zama gu dundrugeya khedzi muthu yoyo a dzipwago khidzo.

1. Dzi wudzise gu khuwe: ‘Ginani gi mu girago a garadzega? Ginani gi na mu phasago ni gu mu tsakisa?’ Isoso si na gu phasa gu yeyedza wuwadi nya lisine.

2. Muthu nyo khaguri a gu tshuka a ganeya edzi a dzipwago khidzo khu gilo nyo khaguri mwendro gu ganeya egi gi mu garadzago, u nga vbindrugedzi mabhulo. Tepo u mu engiseyago, wa gu yeyedza gu khuwe u ngu ninga lisima esi a si wonago na siri ni lisima gwaye.

4. Ganeya khu wuwadi ni githawo. Wa gu ba u pweya-wusiwana muthu nyo khaguri mwendro gu vbweta gu mu phasa, isoso si na wonega khedzi u ganeyago khidzo naye. Dzi woneye ni esi u ganeyago u bwe u potsa gu ganeya silo si na mu gorosago.

5. Phasa vambe. Vbwetedzeya dzindziya nya gu phase muthu yoyo. Gu yeyedza wuwadi si na hi tuleya ndziya nya gu manege ni mabhulo.