Gu bhudzisana ni sanana sago si na gu phasa guti sigaradzo sawe
GA VAVELEGI
Nya wu 5: Gubhudzisana
SO THULA GINANI
Mu na yeyedza gu khenu mu ngu bhundzisana ni sanana sano khu gu ba mu dzipwa na mu tshulegide gasi gu bhula khedzi mu dzipwago khidzo ni esi mu si pimisago.
KHU GINANI SI GU NA NI LISIMA
Si ngu garadza gu bhudzisana ni sanana si gu romo avba nya tanga nya dziphuphute. Tepo sanana sago si nga ba si ri sidugwana, si di gu bhuleya satshavbo. Adzina olu kha si ngu gu bhuleya satshavbo nigu kha wu ngu siti esi va si pimisago ni edzi va dzipwago khidzo. Ganiolu, khiyo kamu tepo yeyi eyi gyanana gyago gi vbwetago ngudzu gu bhula.
GINANI U NGA GIRAGO
Dzi pwananise ni tepo eyi si vbwetago ngudzu gu bhula. Gira isoso ambari na si gu vbweta gu bhula ni wutshigu.
“Adzina u nga si wudzisa gu khuwe: ‘ora yeyi khiyo mu vbwetago gu bhula ni eni? Litshigu latshavbo ni diri nanu! Ganiolu, ginani hi yedego gu gira tepo sanana sathu si vbwetago gu bhula ni ethu? Ina khandriso esi vavelegi vatshavbo va si vereyago?” — Lisa.
“Nyi ngu gola ngudzu gu lala, ganiolu ga litshigu nya gu hegise nyi nga bhula ni gyanana gyangu si tsakisa ngudzu gu diri vbakari nya watshigu.” — Herbert.
LITSHINA NYA NAYO NYA BHIBHILIYA: “Muthu ni muthu a nga dwaneyi gu gira esi si na phasago uye basi, ganiolu a na dzi garadzeye gu gira esi si na phasago vambe.” — 1 Vakorinto 10:24.
U nga dzumeyi gu tsolopetedwa: Papayi nyo khaguri ganede gu khuye: “Dzimbe dzitepo nyi ngu dundrugeya khu simbe silo tepo sanana sangu si bhulago ni eni. Ga tepo yoyo, iso so dzegeya gu tugula gu khiso nyo pimisa simbe silo, kha nyi vegi gupima ga esi si ganeyago.”
Wa gu ba u tsolopetedwa khu telefoni mwendro televhizori, i tshukwana u tshima. Vega gupima ga esi gyanana gyago gi gu embeyago u bwe u theya kota khiso, ambari sa gu wonegisa gu khiso si mwalo lisima.
“Ho vbweta gu teyisegisa sanana sathu gu khethu hi ngu ninga lisima edzi va dzipwago khidzo. Kholu, va gu mba wona gu khavo hi ngu khatala khavo, va na hi siheya edzi va dzipwago khidzo ambari kamu gu lomba giphaso ga vambe.” — Maranda.
“Ambari ha gu wona gu khethu esi sanana sathu si si pimisago kha si pwisisegi, kha hi yeli gu vbiredzeya gu hlamula.” — Anthony.
LITSHINA NYA NAYO NYA BHIBHILIYA: “Engiseyani gwadi.” — Luka 8:18.
Londrowa gu bhula navo khu githugedza. Dzimbe dzitepo sanana si ngu tshulega gu bhula sa gu ba sa sa khedzana ni vavelegi vaso.
“Ho londrowa tepo hi gu romo movhani. Mumbe a gu ba a romo khu bambe ga mumbe na si ri khu khovbe ni khovbe, si ngu hi vbevbugeya gu bhula.” — Nicole.
Tepo hi hodzago guhodza aniyo khiyo tepo nya yadi gasi hi bhula khu githugedza.
“Ni siyambo tepo hi hodzago, ho bhula khu silo nya gu vivbe ni esi nya sadi si dugeledego ga litshigu lolo. Isoso sa gu hi gira hi pwanana ni gu bwe si phasa moyo ni moyo wathu gu wona gu khuye kha yeli gu dwana ni sigaradzo na ri enga.” — Robin.
LITSHINA NYA NAYO NYA BHIBHILIYA: “Gu vbwetega va vbiredzeya gupwa [nigu] va si tutumeyi gu ganeya.” — Jakobe 1:19.