Hulda a vbohede makungo yaye
GA GIDWANI nyo khaguri nyo pwani Sangir Besar gi gu romo Indonésia, va gu vbanya vandriyathu vararu. Ga myaga hwane, avo va di gu thuma vatshavbo phwani. Avo va gu tidwa gidwani khu thumo nya wadi va girago nya gu phase vathu gu pwisisa Bhibhiliya. Ganiolu, ga tepo yile va di gu gira simbe silo nyo hambane.
Gidwani gya Sangir Besar gi gu romo norte ya Indonésia
Gupheya, va di gu beya matini va khusa siwindri nyo peze ngudzu va hongola naso funguni. Simbe siwindri si diri sikhongolo ngudzu guvbindra bhola nyo jogari khiyo. Khu gu landreya, vanyamayi va di gu khala avbo nya sibhankwana gasi gu pandreleya siwindri kala si khala sipandre nya sidugwana ngudzu khu gu thumisa martelo. Khavbovbo, va di gu theya siwindryana soso umo nya libhaketi nya plastiku, va si dzega kala avbo va nga ba va khala umo. Va bwe va theya simbe siwindri umo nya dzisako nya dzikhongolo gasi gu rwadwa khu dzikamiyawu si bwe si thumiswa gasi gu gira dziruwa.
Hulda a wungedzeyago siwindri phwani
Moyo nya vandriyathu vovo khu Hulda. Giemo gyaye gi di gu mu dzumeleya gu vbedza tepo nya yingi na gu gira thumo wowu guvbindra vambe. Nya mba kanakana, uye a di hadzi gu thumisa dzitsapawu a nga ba a hakha gasi gu khathaleya ndranga yaye ni gu renga esi si vbwetegago. Ganiolu, olu uye a di gu thuma gasi gu vboheya mambe makungo a nga ba ari nawo. Uye a di gu vbweta thableti gasi gu beya omu nya JW Library. Hulda a di gu dziti gu khuye dzivhidhyu ni simbe si gomogo umo nya aplikativhu yeyi, si di hadzi gu mu phasa gu tshukwadzisa thumo waye nyo tshumayele ni gu pwisisa gwadi Bhibhiliya.
Uye a di gira thumo nya gu pandreleye siwindri gasi si rwadwa khu kamiyawu khu tanga nya dziora dzimbili matshigu yatshavbo vbadzimindrutunu, khu ngima moyo ni metadi. Khu gu hegisa, a si kodzide gu mana dzitsapawu gasi gu renga thableti.
Hulda ni thableti yaye
Hulda wari, khuye: “Ambari olu nyi nga ba nyipwa sihita khu kotani nya gu pandreleyi siwindri, nya mba hweya nyi di divala yatshavbo migaralo ni sihita nyi nga ba nyi sipwa tepo nyi nga pheya gu thumisa thableti wangu gasi wu nyi phasa gu tshukwadzisa thumo wangu nyo tshumayele ni gu donga mitshangano khu ndziya nyo vbevbuge.” Uye gambe a ganede gu khuye thableti waye wu mu phaside tepo wu nga pheya tungo, kholu mitshangano yi di gu bedwa khu gaya. Ethu hi ngu tsaka ni Hulda khu gu ba a vbohede makungo yaye.