Khu ginani Dzifakazi dza Jehovha dzi gu mba thumisa gihambano omu nya wukhozeyi wadzo?

Vathu nya vangi vo wona gihambano kha nga gifungo nya Wukristo. Ambari olu Dzifakazi dza Jehovha dzi gu Makristo, kha hi thumisi gihambano omu nya wukhozeyi wathu. Khu ginani?

Gimwegyo nya sighelo khu gu Bhibhiliya kha yi ganeya gu khiyo Jesu a fede vbagihambanotunu, ganiolu yari khiyo fede avba nya simbo. Vbavbandze nya isoso, Bhibhiliya yi ngu gengedza Makristo khu gukongoma mba ‘khozeya sithombe,’ esi si thulago gu mba thumisa gihambano gasi gu khozeya Nungungulu.​ — 1 Vakorinto 10:14; 1 Johane 5:​21.

Nga wona esi Jesu a ganedego: “Khavbo vathu va na dzitigo nya gukhavo mu vapizane vangu, mwa gu golanani khu gyanu.” (Johane 13:34, 35) Khu malito yaya, Jesu a di gu yeyedza gu khuye lihaladzo khigyo gifungo nya Makristo nya lisine, nasiri gihambano mwendro gimbe silo.