Baami Wakusaanguna
4 Mwaami Solomoni wakeendelezya Israyeli yoonse. 2 Mbaba bakali balupati-pati* bakwe: Azariya mwana waZadokki wakali mupayizi. 3 Elihorefu a-Ahija bana baShisha bakali balembi. Jehoshafati mwana wa-Ahiludi wakali sikulemba makani. 4 Bbenaya mwana waJehoyiyada wakali silutwe wamasooja. Zadokki a-Abbiyata bakali bapayizi. 5 Azariya mwana waNatani wakali mupati wabeendelezi. Zabbudi mwana waNatani wakali mupayizi alubo wakali mweenzinyina wamwaami. 6 Ahishari wakali mulangizi wang’anda. Adoniramu mwana wa-Abbida wakali kulanga aabo bakayitwa kuti babeleke milimu iimizya.
7 Solomoni wakali aabeendelezi bali 12, aabo bakali kweendelezya Israyeli yoonse, alubo bakali kupa mwaami abamung’anda yakwe chakulya. Umwi awumwi wakali aamulimu wakweeta chakulya kumwaami kwamweezi uumwi mumunyaka. 8 Ngaya mazina aabo: Mwana waHuri, wakali kweendelezya chilawu chili aazilundu cha-Efremu. 9 Mwana waDekka, wakali kweendelezya Makkazi, Shaalibbimu, Bbeti-shemeshi, a-Eloni-beti-hanani. 10 Mwana waHesedi, wakali kweendelezya Arubboti (alubo wakali kweendelezya Sokko andawu yoonse yaHefa). 11 Mwana wa-Abbinadabbu wakali kweendelezya muminkunu yoonse yaDori (wakakwata mwana musimbi waSolomoni uutegwa Tafati). 12 Bbaana mwana wa-Ahiludi, wakali kweendelezya Taanakki, Megido, aBbeti-sheyani yoonse iibambene aaZaretani munsi aaJezriyeli kuzwa kuBbeti-sheyani kuyoosika ku-Abbeli-mehola do kuchilawu chaJokkimeyamu. 13 Mwana waGebberi wakali kweendelezya Ramoti-giliyadi (wakali aatuunzi twamatente twaJayiri mwana waManase tuli muGiliyadi. Alubo wakali aachilawu cha-Agobbi iili muBbashani: myuunzi mipati iili 60 iili aamiduli aminkulwa yakkopa* yamageedi). 14 Ahinadabbu mwana wa-Ido wakali kweendelezya Mahanayimu. 15 Ahimazi wakali kweendelezya chilawu chaNafutali (wakakwata umwi mwana musimbi waSolomoni uutegwa Bbasemati). 16 Bbaana mwana waHushayi wakali kweendelezya chilawu cha-Asha aBbeyaloti. 17 Jehoshafati mwana waParuwa wakali kweendelezya chilawu cha-Isakkara. 18 Shimeyi mwana wa-Ela wakali kweendelezya chilawu chaBbenjamini. 19 Gebberi mwana wa-Uri wakali kweendelezya munyika yaGiliyadi, nyika yaSihoni mwaami wama-Amori anyika ya-Ogi mwaami waBbashani. Alubo kwakali mweendelezi uumwi wakali mupati wabeendelezi boonse munyika eeyo.
20 MaJuda ama-Israyeli bakali biingi loko mbuli museele wamulwizi. Bakali kulya akunywa akubotelwa.
21 Solomoni wakeendelezya bwaami boonse kuzwa kuMulonga* kuyoosika kunyika yamaFilisiti akuyoosika kumugaano wa-Ijipita. Bakali kweeta mutelo akubelekela Solomoni mumazuba woonse aabuumi bwakwe.
22 Chakulya chaSolomoni chabuzuba bumwi chakali makkore* aali 30 aafulawa nante amakkore aali 60 aafulawa, 23 ng’ombe zili 10 zyakali kusaninwa kuti zineneye, ang’ombe zili 20 zyakali kuzwa kumachezezyo, ambelele zili 100, kuswaanizya ansya, balubondwe, abanyama bakachibe mbuli mondwe, abayuni baneneede. 24 Nkaambo wakali kweendelezya zintu zyoonse kubbazu eelino lyaMulonga,* kuzwa kuTifisa kusika kuGaza, kuswaanizya abaami boonse bakubbazu eelino lyaMulonga. Alubo wakali aaluumuno muzilawu zyoonse zyakamuzyungulukide. 25 MaJuda ama-Israyeli bakakkede kabalyiibide, umwi awumwi munsi aamusaansa wakwe amunsi aamukuyu wakwe, kuzwa kuDani kuyoosika kuBberi-shebba, mumazuba woonse aaSolomoni.
26 Alubo Solomoni wakali aazibaya zili 4 000* zyamabbiza aadonsa ngolo zyakwe amabbiza aali* 12 000.
27 Beendelezi aaba bakali kupa Mwaami Solomoni chakulya abantu boonse bakali kulida aatebbulu lyaMwaami Solomoni. Umwi awumwi wakali aamweezi wakwe ngwaakali kutola chakulya, alubo wakali kuba aachoonzyo chakuti taakwe chilikubulika pe. 28 Bakali kweeta bbali abwizu kufumbwa nkubwakali kuyandikana kuti bupegwe mabbiza, amabbiza aadonsa ngolo. Umwi awumwi wakeeta kweendelana ambaakabuzigwa.
29 Leza wakapa Solomoni busongo akumvwisisisya kupati loko alubo amoyo uumvwisisisya zintu zyiingi loko mbuli museele wakunkomwe yalwizi. 30 Busongo bwaSolomoni bwakayinda busongo boonse bwabantu baKubuzwezuba abusongo boonse bwaku-Ijipita. 31 Wakali musongo kwiinda bantu boonse, kwiinda Etani mu-Ezra aHemani, Kkalikkolu, aDara, bana baMaholi. Mpuwo yakwe yakazula muzisi zyoonse zyakazyungulukide. 32 Wakaanza* tusimpi tuli 3 000 alubo nyimbo zyakwe zyakali 1 005. 33 Wakali kwaambuula atala aminsamu, kusaangunina kumunsamu wamukkedari wakuLebbanoni kusika kumuhisopu uumena aamuduli. Wakali kwaambuula atala abanyama, bayuni,* banyama bayavula,* abaswi. 34 Bantu bamuzisi zyoonse bakasika kuti bazoomvwe busongo bwaSolomoni, kuswaanizya abaami bazwa munyika yoonse, aabo bakali bamvwa atala abusongo bwakwe.