Baami Wachibili
2 Jehova naakali waba aafwiifwi kubweza Elija kuti amutole kujulu* mukambizi, Elija a-Elisha bakazwa kuGiligali. 2 Elija wakati kuli Elisha: “Ikaka, syaala aano, nkaambo Jehova wandituma kuBbeteli.” Pesi Elisha wakati: “AJehova muumi anduwe mbuli muumi, tandikookusiya pe.” Nkinkaako, bakakunukaamwi kabaya kuBbeteli. 3 Mpawo bana babapolofita* bamuBbeteli bakasika kuli Elisha bamubuzya kuti: “Ulizizi na kuti sunu Jehova ulabweza simalelaako, tachinooli silutwe wako pe?” Wakati: “Iiyi, ndilizizi. Amuumune.”
4 Elija wakati kulinguwe: “Ikaka Elisha, syaala aano, nkaambo Jehova wandituma kuJerikko.” Pesi wakati: “AJehova muumi anduwe mbuli muumi, tandikookusiya pe.” Nkinkaako, bakayinka kuJerikko. 5 Mpawo bana babapolofita, aabo bakali muJerikko bakasika kuli Elisha bamubuzya kuti: “Ulizizi na kuti sunu Jehova ulabweza simalelaako, tachinooli silutwe wako pe?” Wakati: “Iiyi, ndilizizi. Amuumune.”
6 Elija wakati kulinguwe: “Ikaka, syaala aano, nkaambo Jehova wandituma kuJodani.” Pesi Elisha wakati: “AJehova muumi anduwe mbuli muumi, tandikookusiya pe.” Nkinkaako, boonse kabali babili bakeenda. 7 Ambabo bana babapolofita bali 50 bakayinka baakwiimikila kule-kule kabali kulangilizya baalumi aaba babili nibakayimvwi kumbali aaJodani. 8 Mpawo Elija wakabweza chigogo chakwe chabupolofita wachipeta, wawuma maanzi mpawo maanzi akaanzaana, amwi akaya kuchimweensi amwi kuchilisyo, zyakuti boonse kabali babili bakazubuka bayinda aanyika njumu.
9 Mbubakazubuka biyo, Elija wakati kuli Elisha: “Kumbila kufumbwa nchuyanda kuti ndikuchitile kanditanabwezegwa pe kulinduwe.” Mpawo Elisha wakati: “Ndikumbila kuti ndipegwe zipanzi zibili zyamuuya wako.” 10 Elija wakasandula kuti: “Wakumbila chintu chiyumu. Kuti undibone kandibwezegwa kulinduwe, zilachitika mbuboobo. Pesi kuti teewandibona tazikoochitika pe.”
11 Nibakali kuyabweenda kabali kwaambuula, aachiindi nchicheecho, ngolo yamulilo amabbiza aamulilo zyakabapambula, mpawo Elija wakatolwa kujulu* mukambizi. 12 Elisha naakali kulangilizya, wakoompolola kati: “Ndeende, ndeende! Ngolo ya-Israyeli abasimabbiza bakwe!” Naakabbila katachikonzyi pe kumubona, wakajata zigogo zyakwe wazidelula zyaba muzipanzi zibili. 13 Mpawo wakabweza chigogo cha-Elija chabupolofita chakali chaloka kuzwa kulinguwe, mpawo wakabweeda waakwiimikila kunkomwe yaJodani.* 14 Wakabweza chigogo cha-Elija chabupolofita chakali chaloka kuzwa kulinguwe, mpawo wakawuma maanzi wati: “Ulikuli Jehova Leza wa-Elija?” Naakaawuma, maanzi akaanzaana, amwi akaya kuchimweensi amwi kuchilisyo, mpawo Elisha wakazubuka.
15 Bana babapolofita bakuJerikko nibakamubona kachili kule-kule bakati: “Muuya wa-Elija wakkala aali Elisha.” Nkinkaako, bakayinka kuti bakaswaanane aanguwe mpawo bakafugama kunembo lyakwe. 16 Bakati kulinguwe: “Mbaba baalumi bali 50 basimide bali aakati kesu tubabelesi bako. Ikaka, baleke bayinke bakayanduule simalelaako. Amwi muuya waJehova wamunyampula waakumusowela* muli chimwi chilundu naakuti muli umwi mumpata.” Pesi wakati: “Mutabatumi pe.” 17 Nikuba oobo, bakaliswini kumukombelezya kusikila waba aabweeme, nkinkaako, wakati: “Amubatume.” Bakatuma baalumi bali 50, aabo bakaliswini kumuyanduula kwamazuba aatatu, pesi teebakamujana pe. 18 Nibakaboola kulinguwe, wakali kukkala muJerikko. Mpawo wakati kulimbabo: “Teendakamubuzya na kuti mutayinki pe?”
19 Mukuya kwachiindi, bantu bamumuunzi bakabuzya Elisha kuti: “Simaleleesu ulibwene kuti muunzi ukkede aandawu iilikabotu, pesi maanzi mabi alubo nyika tayilikuzyala michelo pe.”* 20 Mpawo wakati: “Amundeetele ndido niini mpya mubikke munyo mukati.” Nkinkaako, bakayeeta kulinguwe. 21 Mpawo wakazwa waya kukasawu kamaanzi waakuwaala munyo mukati, mpawo wakati: “Nzezi nzyaamba Jehova, ‘Ndaasalazya* maanzi aaya. Taachinoojayi pe nikuba kupa kuti banakazi bakachilwe kuzyala.’”* 22 Maanzi aayo akasalazigwa* kusika sunu, kweendelana ajwi lyakaambwa aa-Elisha.
23 Elisha wakazwa ooko mpawo wakatanta waya kuBbeteli. Naakali kuyabweenda munzila, mumuunzi mwakazwa bamwi bana balombe, mpawo bakasaanguna kumuseka,* alubo bakali kuti kulinguwe: “Yinka, iwe siampabang’a!* Yinka, iwe siampabang’a!” 24 Kumamanino, wakachenguluka wabalanga, wabatuka muzina lyaJehova. Mpawo banyama babili bazyazi bategwa bbeya bakasika kabazwa musokwe mpawo bakazavuula bana bali 42. 25 Mpawo wakayinkilila kunembo kweenda kaya kuChilundu chaKkameli, alubo naakazwa nkukooko, wakabweeda kuSamariya.