Levitikko
1 Alubo Jehova wakayita Mozesi, waambuulaawe mutente lyakuswaanganina kati: 2 “Ambuula aama-Israyeli ubabuzye kuti, ‘Kuti umwi wanu kayanda kweeta chipo kuli Jehova kuzwa kuzivuubwa zyakwe, weelede kweeta chipo kuzwa kung’ombe, kumbelele naakuti kumpongo.
3 “‘Kuti chipo chakwe kachili chipo chitentwa chizwa kung’ombe, weelede kweeta pule uulikabotu. Weelede kuchipa chakuliyandila kunembo lyaJehova kumanjililo aatente lyakuswaanganina. 4 Weelede kubikka kuboko kwakwe aamutwe wachipo chitentwa mpawo Leza ulachitambula chipo chakwe kuti milandu yakwe imaninsigwe.
5 “‘Pule wang’ombe uuchili muniini weelede kujayigwa kunembo lyaJehova alubo bana ba-Aroni bapayizi, baleeta ganzi lyakwe akulisansiila mumabazu woonse aachipayililo chili kumanjililo aatente lyakuswaanganina. 6 Chipo chitentwa cheelede kufundwa mpawo chinengwe muzipanzi. 7 Bana ba-Aroni bapayizi beelede kukutula* mulilo aachipayililo mpawo nkuni bazibikke kabotu-kabotu aamulilo. 8 Bana ba-Aroni bapayizi balazibikka kabotu-kabotu zipanzi zyanyama yachipo aajulu aankuni zili aamulilo uuli aachipayililo, aamwi amutwe wacho amafuta aali aansa. 9 Mala aacho amyeendo yacho zyeelede kusanzigwa aamaanzi alubo mupayizi weelede kuchitenta choonse aachipayililo kuti chibe chipo chitentwa aamulilo chili aabweema bununkilila* kuli Jehova.
10 “‘Kuti chipo chakwe chitentwa kachizwa kutubelele naakuti kumpongo, weelede kweeta kagutu kalikabotu. 11 Chipo eecho, cheelede kujayilwa kubbazu lyakunyika lyachipayililo kunembo lyaJehova mpawo bana ba-Aroni bapayizi, balasansiila ganzi lyacho mumabazu woonse aachipayililo. 12 Ulachinenga muzipanzi mpawo mupayizi ulazibamba kabotu-kabotu aajulu aankuni zili aamulilo uuli aachipayililo, aamwi amutwe wacho amafuta aacho aali aansa. 13 Mala aacho amyeendo yacho, weelede kuzisanzya aamaanzi alubo mupayizi weelede kucheeta choonse akuchitenta kuti chisuke busi aachipayililo. Nchipo chitentwa, chipo chitentwa aamulilo chili aabweema bununkilila* kuli Jehova.
14 “‘Nikuba oobo, kuti kalikupa bayuni kuti babe chipo chakwe chitentwa kuli Jehova, weelede kweeta nziba naakuti bana bankwilimba. 15 Mupayizi weelede kucheeta aachipayililo achinenge munsingo mpawo achitente aachipayililo, pesi ganzi lyacho weelede kulitilila kumbali aachipayililo. 16 Weelede kugwisya chiyangilo chacho aboya bwacho* azisowele kumbali aachipayililo, kubuzwezuba kundawu kusowelwa dyota.* 17 Weelede kuchipandula aaswaanana mababa, pesi atachinengi kuti chibe muzipanzi zibili. Mpawo mupayizi weelede kuchitenta aachipayililo kuti chisuke busi aajulu aankuni ziyaka mulilo. Nchipo chitentwa, chipo chitentwa aamulilo chili aabweema bununkilila* kuli Jehova.