Levitikko

2 “‘Kuti umwi weeta chipo chazilyo kuli Jehova, chipo chakwe cheelede kuba fulawa nante mpawo weelede kutila mafuta akubikka tununkilizyo tutuba aalinchicho. 2 Kuzwa waawo, weelede kucheeta kubana ba-Aroni bapayizi alubo mupayizi weelede kubweza fulawa nante iikkwana mukuboko iiswaanizidwe aamafuta atununkilizyo twayo toonse tutuba mpawo ulazitenta aachipayililo kuti zisuke busi kazyiiminina chipo choonse,* nchipo chitentwa aamulilo chili aabweema bununkilila* kuli Jehova. 3 Kufumbwa chisyaala kuchipo chazilyo nchicha-Aroni abana bakwe, nchipanzi chachipo chisalalisya chitentwa aamulilo chizwa kuzipo zyaJehova.

4 “‘Kuti weeta chipo chazilyo chajikilwa mu-oveni, cheelede kuba chafulawa nante, kazili zinkwa zyalawundi zili aampako aakati zitakwe bumena ziswaanizidwe aamafuta naakuti zinkwa zipapalete zitakwe bumena zinanikidwe mafuta.

5 “‘Kuti chipo chako chazilyo kachijikilidwe mumpani yakujikila chinkwa, cheelede kuba chafulawa nante iitakwe bumena iiswaanizidwe aamafuta. 6 Cheelede kukwamuunwa chibe zipanzi mpawo weelede kuchitila mafuta. Nchipo chazilyo.

7 “‘Kuti chipo chako chazilyo chakajikilwa mumpani, cheelede kachijikidwe aafulawa nante iiswaanizidwe aamafuta. 8 Weelede kweeta chipo chazilyo kuli Jehova chipangidwe aazintu eezi mpawo chilatolwa kumupayizi uutacheete aafwiifwi achipayililo. 9 Mpawo mupayizi ulabweza chimwi chipanzi chachipo chazilyo chiiminina chipo choonse* akuchitenta aachipayililo kachili chipo chitentwa aamulilo chili aabweema bununkilila* kuli Jehova. 10 Chipanzi chisyaala chachipo chazilyo nchicha-Aroni abana bakwe, nchintu chisalalisya chazipo zitentwa aamulilo zipegwa Jehova.

11 “‘Taakwe chipo chazilyo nchimupa Jehova cheelede kuba aabumena, nkaambo tamweelede kutenta fulawa iikandidwe iili aabumena naakuti kutenta buchi kachili chipo chitentwa kuli Jehova.

12 “‘Mulakonzya kuzyeeta kuli Jehova kazili chipo chazilyo zyakusaanguna, pesi tazyeelede kweetwa kuchipayililo kuti zibe bweema bununkilila.*

13 “‘Chipo choonse chazilyo nchupa, cheelede kulungwa munyo. Alubo kutabuliki munyo wachizuminano chaLeza wako muchipo chako chazilyo. Muzipo zyako zyoonse nzupa, weelede kulunga munyo.

14 “‘Kuti kuli kweeta chipo chako chazilyo zyakusaanguna kubizwa kuli Jehova, weelede kweeta chazilyo zipya ziyokedwe amutuutu uuchobwedwe, kazili chipo chazilyo zyakusaanguna kubizwa. 15 Weelede kuchitila mafuta akuchibikka tununkilizyo tutuba. Nchipo chazilyo. 16 Mupayizi weelede kuchitenta kuti chisuke busi kachiiminina chipo choonse,* nkukwaamba chipanzi chazilyo zichobwedwe amafuta kuswaanizya atununkilizyo twacho toonse tutuba, kachili chipo chitentwa aamulilo kuli Jehova.