Levitikko

4 Jehova wakayinkilila kunembo kubuzya Mozesi kuti: 2 “Buzya ma-Israyeli kuti, ‘Kuti umwi muntu wabisya katazi pe kwiinda mukuchita chimwi chazintu Jehova nzyaakalayilila kuti zitachitwi, nzezi zyeelede kuchitwa:

3 “‘Kuti mupayizi uunanikidwe wabisya akupa kuti bantu babe aamulandu, weelede kweeta pule wang’ombe uuchili muniini uulikabotu kuli Jehova kuti abe chipayizyo chachibi akaambo kachibi nchaachita. 4 Weelede kweeta pule ooyo kumanjililo aatente lyakuswaanganina kunembo lyaJehova, abikke kuboko kwakwe aamutwe wapule ooyo mpawo amujaye kunembo lyaJehova. 5 Mpawo mupayizi uunanikidwe, ulabweza limwi ganzi lyapule ooyo akulyeeta mutente lyakuswaanganina. 6 Mupayizi ulanika kanwe kakwe muganzi mpawo alosye limwi ganzi kwaziindi zili musanu azibili kunembo lyaJehova, kunembo lyakketeni lyamundawu iisalala. 7 Alubo mupayizi ulalamba limwi ganzi aameja aachipayililo chatununkilizyo, chili kunembo lyaJehova mutente lyakuswaanganina mpawo ganzi lyoonse lisyaala lyapule ooyo ulalitila aansi aachipayililo chazipo zitentwa chili kumanjililo aatente lyakuswaanganina.

8 “‘Kuzwa waawo, ulagwisya mafuta woonse aapule wachipayizyo chachibi, kuswaanizya aluvumbula* amafuta aazyungulukide mala, 9 ansa zibili zili aamafuta aali aafwiifwi amala. Mpawo ulagwisya mafuta aali aafwiifwi achini, aamwi ansa. 10 Zintu eezi zilikozyenie azigwisigwa aali pule wang’ombe wachipayizyo chalumvwanano. Mpawo mupayizi ulazitenta aamulilo kuti zisuke busi aachipayililo chazipo zitentwa.

11 “‘Pesi chikumba chapule ooyo, nyama yakwe yoonse, mutwe, myeendo, mala alufusi,— 12 nkukwaamba mutumba woonse wapule ooyo—uzoolayilila kuti ugwisigwe aanze aakkeempu, kundawu iitakwe doti, kusowelwa dyota* mpawo ulawutenta amulilo wankuni. Weelede kutentelwa kusowelwa dyota.

13 “‘Kuti mbungano yoonse yama-Israyeli yaba aamulandu kwiinda mukubisya kayitazi, pesi bamumbungano teebazibona pe kuti bachita chintu Jehova nchaakabalayilila kuti batachichiti, 14 mpawo chibi eecho chazibinkana, mbungano yeelede kweeta pule wang’ombe uuchili muniini wachipayizyo chachibi akumweeta kunembo lyatente lyakuswaanganina. 15 Baalu bambungano balabikka maboko aabo aamutwe wapule ooyo kunembo lyaJehova mpawo pule ooyo ulajayigwa kunembo lyaJehova.

16 “‘Mpawo mupayizi uunanikidwe uleeta limwi ganzi lyapule wang’ombe ooyo mutente lyakuswaanganina. 17 Mupayizi weelede kunika kanwe kakwe muganzi mpawo alosye limwi ganzi kwaziindi zili musanu azibili kunembo lyaJehova kunembo lyakketeni. 18 Kuzwa waawo, weelede kulamba limwi ganzi aameja aachipayililo chili kunembo lyaJehova, chili mutente lyakuswaanganina mpawo ganzi lyoonse lisyaala, weelede kulitila aansi aachipayililo chazipo zitentwa chili kumanjililo aatente lyakuswaanganina. 19 Uzoogwisya mafuta aacho woonse akwaatenta kuti asuke busi aachipayililo. 20 Nzyatachite kuli pule ooyu, zyeelede kukozyania anzyaakachita kuli pule wachipayizyo chachibi. Oobu mbubo mbatachite mupayizi. Kuzwa waawo, ulamaninsya milandu yabo mpawo balalekelelwa. 21 Uzoolayilila kuti pule ooyo abwezegwe atolwe aanze aakkeempu mpawo akamutente, mbuli mbaakatenta pule wakusaanguna. Nchipayizyo chachibi chambungano.

22 “‘Kuti silutwe wabisya katazi, kwiinda mukuchita chimwi chazintu Jehova Leza wakwe nchaakalayilila kuti tacheelede kuchitwa mpawo waba aamulandu, 23 naakuti waziba kuti wakabisya kwiinda mukutyola mulawu, weelede kweeta kapule kampongo kalikabotu kuti kabe chipo chakwe. 24 Uzoobikka kuboko kwakwe aamutwe wakapongo akukajaya kundawu kujayilwa chipo chitentwa kunembo lyaJehova. Nchipayizyo chachibi. 25 Mupayizi ulatompa kanwe kakwe muganzi lyachipayizyo chachibi alilambe aameja aachipayililo chazipo zitentwa mpawo ganzi lyoonse lisyaala ulalitila aansi aachipayililo chazipo zitentwa. 26 Ulatenta mafuta aacho woonse akupa kuti asuke busi aachipayililo mbuli mbachita kumafuta aachipayizyo chalumvwanano. Mupayizi ulamaninsya mulandu wamuntu ooyo mpawo chibi chakwe chilalekelelwa.

27 “‘Kuti umwi muntu wamunyika wabisya katazi mpawo waba aamulandu kwiinda mukuchita chimwi chazintu Jehova nchaakalayilila kuti tacheelede kuchitwa pe, 28 naakuti waziba kuti kuli chibi nchaachita, weelede kweeta kapongo kapwizi kalikabotu, kakali chipayizyo chachibi nchaachita. 29 Ulabikka kuboko kwakwe aamutwe wachipayizyo chachibi akujaya chipayizyo chachibi kundawu kujayilwa chipo chitentwa. 30 Mupayizi ulatompa kanwe kakwe muganzi lyachipo eecho akulilamba aameja aachipayililo chachipo chitentwa mpawo ganzi lyacho limwi lyoonse lisyaala, ulalitila aansi aachipayililo. 31 Ulagwisya mafuta aacho woonse mbuli mbagwisya mafuta aachipayizyo chalumvwanano. Alubo mupayizi weelede kuchitenta kuti chisuke busi aachipayililo kachili aabweema bununkilila* kuli Jehova. Mupayizi ulamaninsya mulandu wamuntu ooyo mpawo chibi chakwe chilalekelelwa.

32 “‘Pesi kuti wapa kabelele kakali chipayizyo chachibi, weelede kweeta kabelele kapwizi kalikabotu. 33 Ulabikka kuboko kwakwe aamutwe wachipayizyo chachibi akuchijaya kachili chipayizyo chachibi kundawu kujayilwa chipo chitentwa. 34 Mupayizi uzootompa kanwe kakwe muganzi lyachipayizyo chachibi akulilamba aameja aachipayililo chachipo chitentwa mpawo ganzi lyoonse lyasyaala ulalitila aansi aachipayililo. 35 Ulagwisya mafuta aacho woonse mbuli mbagwisya mafuta aakagutu kachipayizyo chalumvwanano alubo mupayizi ulazitenta kuti zisuke busi aachipayililo aajulu aazipo zyaJehova zitentwa aamulilo. Mupayizi ulamaninsya mulandu wamuntu ooyo akaambo kachibi nchaachita mpawo chibi chakwe chilalekelelwa.