Zakkariya
10 “Amumukumbile mvula Jehova muchiindi chamvula yamamanino.
NguJehova uupanga mayoba aamvula mpati,
Nguwe uubawisizya mvula,
Alubo nguwe uupa bantu boonse zimena mumuunda.
Baamba maloto aatagwasyi pe,
Akuumbulizya nkubeezya kuchita takugwasyi pe.
Nzizyo zitazoope kuti bazooyendengane mbuli mbelele.
Bazoowomba, nkaambo taakwe mweembeli pe.
3 Bukali bwangu bwavutukila beembeli,
Alubo ndizoobapa mulandu bazulwidi* badyaaminina;
Nkaambo Jehova wamakamu waliyeeya tanga lyakwe, ng’anda yaJuda,
Wabapa kuti babe mbuli bbiza lyakwe lyabulemu munkondo.
4 Kulinguwe nkuko kuzwa silutwe,*
Kulinguwe nkuko kuzwa mweendelezi uugwasilizya,*
Kulinguwe nkuko kuzwa daantambwa lyankondo;
Kulinguwe nkuko kuzwa balangizi boonse, boonse aaba bazwa kulinguwe.
5 Alubo bazooba mbuli basilumamba,
Aabo badyobboola madaka aali mumigwagwa munkondo.
Bazoolwana nkondo, nkaambo Jehova uli aambabo;
Abasikutanta mabbiza bazoofwisigwa bweeme.
6 Ndizoosumpula ng’anda yaJuda,
Ang’anda yaJosefa ndizooyifutula.
Ndizoobaboozya kunyika yabo,
Nkaambo ndizoobeetelela;
Bazooba mbuli kuti taakwe nindakabakakide pe;
Nkaambo ndime Jehova Leza wabo, nkinkaako ndizoobavwiila.
7 Bantu bakwa-Efremu beelede kuba mbuli silumamba uuli aamanguzu,
Amyoyo yabo izoobotelwa mbuli kuti banywa wayini.
Bana babo bazoochibona eechi mpawo bazoobotelwa;
Myoyo yabo izookondwa muli Jehova.
8 ‘Ndizoobasibila kkwela akubabunganizyaamwi;
Nkaambo ndizoobanununa, mpawo bazoovula,
Alubo bazooyinkilila kunembo kuvula.
9 Nikuba kuti ndakabamwaya mbuli mbuto aakati kabantu,
Bazoondiyeeya kabali kundawu zili kule;
Kabalaamwi abana babo bazooba aamanguzu lubo akuboola.
10 Ndizoobaboozya kuzwa kunyika ya-Ijipita
Akubabunganizyaamwi kuzwa ku-Asiriya;
Ndizoobeeta kunyika yaGiliyadi ayaLebbanoni,
Alubo ooko bazoobula ndawu njibakkwana.
11 Weelede kwiinda mulwizi amapenzi;
Mulwizi uzoowuma mayuwe;
Maanzi woonse aamuli Nayile azooyuminina.
Kulisumpula kwa-Asiriya kuzoomaninsigwa,
Ankoli yabwaami ya-Ijipita izoogwisigwa.
12 Ndizoopa kuti basumpuke muli Jehova,
Alubo bazooyenda muzina lyakwe,’ mbaamba Jehova.”