Myeelwe
11 Aachiindi eechi, bantu bakasaanguna kung’ung’una kunembo lyaJehova. Jehova naakazimvwa, wakanyema loko alubo mulilo uuzwa kuli Jehova wakasaanguna kuyaka aakati kabo mpawo wakanyonyoona bamwi bakali kumamanino aakkeempu. 2 Bantu nibakasaanguna kulilila Mozesi, Mozesi wakakomba kalikukombelezya kuli Jehova mpawo mulilo wakazima. 3 Nkinkaako, ndawu eeyo yakawuzikwa zina lyakuti Tabbera,* nkaambo mulilo uuzwa kuli Jehova wakali wayaka aakati kabo.
4 Bantu bamisyobo iisiyene-siyene* bakali aakati kabo, bakasaanguna kulombozya chakulya nchibakali kulya ku-Ijipita mpawo ambabo ma-Israyeli bakasaanguna kukwiila lubo kabati: “Ngwani uutatupe nyama yakuti tulye? 5 Twabayeeya kaka baswi mbitwakali kulya katutabbadali ku-Ijipita kuswaanizya amakowa, manamunywa, ma-onyeni agalikki! 6 Pesi lino twamana manguzu. Taakwe chimwi chintu nchitulaacho pe, kunze kwamana eeyi kupela.”
7 Mana yakali mbuli nseke yakkoriyanda alubo yakali mbuli nzuka iituba. 8 Bantu bakali kunoonga bazwa, bayibwezelela mpawo bayiziya aaziyo naakuti kwiitwa munchili. Kuzwa waawo, bakali kwiijika muzilongo naakuti kupanga zinkwa zyalawundi. Yakali kunona mbuli kkekke liswaanizidwe aamafuta. 9 Lume* nilwakali kubawo aakkeempu mansiku, anjiyo mana yakali kuloka.
10 Mozesi wakamvwa bantu kabali kulila, mpuli ampuli, mwaalumi umwi awumwi kumanjililo aatente lyakwe. Jehova wakanyema loko, anguwe Mozesi wakabijilwa loko. 11 Mpawo Mozesi wakati kuli Jehova: “Nkamboonzi nwaapa kuti mubelesi wako aswaane mapenzi? Nkamboonzi nwaatandifwida luzyalo mbukunga wandipa mukuli wabantu boonse aaba? 12 Ndime ndakabaminta na bantu boonse aaba? Ndime ndakabazyala na zyakuti nga ulandibuzya kuti, ‘Babweze aakaango kako mbuli mubelesi* mbabweza mwana uunyonka’ ubatole kunyika njwaakakonkezya kupa masianyinakulu? 13 Ndilayijana kuli nyama yakupa bantu boonse aaba? Nkaambo baliswini kundikwiilila kabati: “Tupe nyama yakuti tulye!” 14 Tandikonzyi pe kulangania bantu boonse aaba andilikke. Zyandiyumina me. 15 Kuti kakuli kuti mbukubede mbuboobu, ndijaye lino. Kuti wandifwida luzyalo, utachiti kuti ndibone amwi mapenzi.”
16 Jehova wakasandula Mozesi kati: “Ndibunganizizye baalumi bali 70 bazwa kubaalu ba-Israyeli, baalumi mbubona* kuti mbaalu beelela abalupati-pati babantu, ubatole kutente lyakuswaanganina kuti bakayimikile aanduwe nkukooko. 17 Kuzwa waawo, ndilaseluka ndaambuule aanduwe nkukooko mpawo ndilabweza umwi muuya uusalala uuli aalinduwe, nduubikke aalimbabo alubo balakugwasya kunyampula mukuli wabantu kuchitila kuti utawunyampuli aawulikke pe. 18 Weelede kubuzya bantu kuti, ‘Amulisalazye, nkaambo kwaamba choonzyo, juunza muzoolya nyama, mbukunga mwalilila Jehova kamvwide alubo mwaamba kuti: “Ngwani uutatupe nyama yakuti tulye? Zintu zyakali kabotu nitwakali ku-Ijipita.” Kwaamba choonzyo, Jehova uzoomupa nyama mpawo muzooyilya. 19 Tamuzooyilyi buzuba bumwi kupela naakuti mazuba aabili naakuti mazuba aali musanu naakuti mazuba aali 10 naakuti mazuba aali 20 kupela. 20 Pesi muzooyilya kwamweezi woonse kusikila izoozwe mumpemo zyanu alubo izoomubolela, nkaambo mwakaka Jehova uuli aakati kanu akuti mwakali kukwiila kunembo lyakwe kamuti: “Nkamboonzi nitwakazwa mu-Ijipita?”’”
21 Mpawo Mozesi wakati: “Bantu mbindili aabo bali 600 000 baalumi bakuzi kulwana, pesi iwe Leza waamba kuti, ‘Ndizoobapa nyama alubo bazooyilya bakkute kwamweezi woonse’! 22 Nikuba kuti kwajayigwa matanga aambelele amatanga aang’ombe woonse, nga balakkwana na? Naakuti nikuba kuti baswi boonse bamulwizi bajatwa, nga balabakkwana na?”
23 Jehova wakati kuli Mozesi: “Kuboko kwaJehova nkufwiifwi na? Lino ulabona kuti nzindaamba zilachitika na naakuti pe.”
24 Mozesi wakazwa aanze, waakubuzya bantu majwi aazwa kuli Jehova alubo wakabunganizya baalumi bali 70 kuzwa kubaalu babantu mpawo wakapa kuti bayimikile kabazyungulukide tente. 25 Jehova wakaseluka mujoba waambuulaawe alubo wakabweza umwi muuya wakali aalinguwe wawubikka aali umwi awumwi wabaalu bali 70. Muuya ooyo mbwaakakkala biyo aalimbabo, bakasaanguna kuchita mbuli bapolofita,* pesi teebakazichita lubo pe.
26 Kwakali baalumi babili bakachili mukkeempu. Mazina aabo aakali Elidadi aMedadi. Muuya uusalala wakasaanguna kukkala aalimbabo mbukunga bakali aakati kabaabo bakali aamazina aakalembedwe, pesi teebakiinkide pe kutente. Nkinkaako, bakasaanguna kuchita mbuli bapolofita mukkeempu. 27 Umwi mulombe wakachijaana waakubuzya Mozesi kuti: “Elidadi aMedadi balikuchita mbuli bapolofita mukkeempu!” 28 Mpawo Joshuwa mwana waNuni ooyo wakali mubelesi waMozesi kuzwa kachili muniini, wakavwiila kati: “Simalelaangu Mozesi, bakasye kaka!” 29 Pesi Mozesi wakati kulinguwe: “Iwe zyakuchisaali eezi? Nchindilombozya nchakuti kaansinga bantu baJehova boonse baba bapolofita akuti Jehova abape muuya wakwe!” 30 Nikwakayinda chiindi, Mozesi wakabweeda kukkeempu aamwi abaalu bama-Israyeli.
31 Mpawo luuwo luzwa kuli Jehova lwakawunga akutonta bakwale kuzwa mulwizi akupa kuti bawe kabazyungulukide kkeempu kwamusinzo weendwa buzuba bumwi kubbazu eeli lyakkeempu mpawo kwamusinzo weendwa buzuba bumwi kuli limwi bbazu, kabazyungulukide kkeempu alubo bakayilikene kwamakkiyubbiti* aabili kuzwa aansi. 32 Nkinkaako, bantu boonse bakabunganizya bakwale buzuba oobo sikati amansiku amubuzuba bwakatobela. Taakwe muntu wakabwezelela bakwale bakatali kuzula mahomeri* aali kkumi alubo bakaliswini kubayanika mukkeempu yoonse. 33 Pesi kabachilumide nyama, kabatanayinyeela pe, Jehova wakabanyemena bantu alubo Jehova wakasaanguna kubajaya zyakuti kwakafwa bantu biingi.
34 Nkinkaako, bakawuzika ndawu eeyo kuti Kkibbiroti-hatava* nkaambo ooko nkuko nkubakazikka bantu bakalombozya zintu zibi. 35 Bantu bakazwa kuKkibbiroti-hatava baya kuHazeroti alubo bakakkala kuHazeroti.