Samiyele Wakusaanguna
1 Kwakali mwaalumi wakuRamatayimu-zofimu* iili kuchilawu chili aazilundu cha-Efremu. Zina lyakwe wakali kutegwa Elikkana mwana waJerohamu, mwana wa-Elihu, mwana waTohu, mwana waZufi wamusyobo wa-Efremu. 2 Wakali aabanakazi babili. Umwi wakali kutegwa Hana mpawo umwi wakali kutegwa Penina. Penina wakali aabana, pesi Hana taakalikwe bana pe. 3 Munyaka amunyaka, mwaalumi ooyu wakali kuzwa kumuunzi wakwe kuti akakombe* akupa zipayizyo kuli Jehova wamakamu kuShilo. Ooku nkuko bana ba-Eli babili, Hofini aFiniyasi nkubakali kubeleka kabali bapayizi baJehova.
4 Limwi zuba Elikkana naakapa chipayizyo, wakapa mwanakazi wakwe Penina abana bakwe boonse balombe abasimbi zyaabilo, 5 pesi wakapa Hana chaabilo chiyandikana loko, nkaambo wakali kumuyanda loko. Nikuba oobo, Jehova taakamupede bana pe.* 6 Mukuyungizya, mukwatwanyina wakaliswini kumufubaazya kayanda kuti akataazikane akaambo kakuti Jehova taakamupede bana pe. 7 Eezi nzizyo zyakali kuchitwa aamukwatwanyina munyaka amunyaka. Chiindi choonse, Hana naakali kuya kung’anda yaJehova, mukwatwanyina wakali kumufubaazya zyakuti wakali kulila akutalya. 8 Pesi mulumaakwe Elikkana wakati: “Hana, nkamboonzi nulikulila? Nkamboonzi nutalikulya alubo nkamboonzi nuuside? Ime tandiyandikani loko na kwiinda bana balombe bali kkumi?”
9 Mpawo Hana wakanyampuka nibakamaninsya kulya akunywa kuShilo. Aachiindi eecho, Eli mupayizi wakalikkede aamulyango watempele* lyaJehova. 10 Hana wakakataazikene loko alubo wakasaanguna kukomba kuli Jehova kalikulila loko. 11 Wakakonka kati: “O Jehova wamakamu, kuti wandifwida nsoni ndimubelesi wako akundiyeeya alubo kuti teewandiluba ndimubelesi wako akundipa mwana mulombe ndimubelesi wako, ndizoomupa kuli Jehova kwamazuba woonse aabuumi bwakwe alubo masusu aamumutwe wakwe tazoogelwi pe.”
12 Naakali kukomba kunembo lyaJehova kwachiindi chilamfu, Eli wakali kulanga mulomo wakwe. 13 Hana wakali kwaambwiida mumoyo, milomo yakwe njiyo yakali kuputuuka kupela, pesi taakali kubbusya majwi pe. Nkinkaako, Eli wakabonaanga ulikoledwe. 14 Eli wakamubuzya kuti: “Unookoledwe kusika lili? Leka kunywa wayini.” 15 Hana wakamusandula kuti: “Peepe simalelaangu! Ndili mwanakazi uukataazikene loko.* Taakwe wayini njindanywa, nichiba chintu chikola, pesi ndilikubuzya Jehova zyoonse zili mumoyo wangu. 16 Utandiboni mbuli mwanakazi wabuyo ndimubelesi wako, nkaambo ndali kwaambuula kusikila lino akaambo kakuti ndilikataazikene akuti ndili mupenzi.” 17 Mpawo Eli wakamusandula kuti: “Kuya muluumuno, Leza wa-Israyeli akupe nzwaamukumbila.” 18 Naakamvwa oobo, Hana wakati: “Mubelesi wako afwidwe luzyalo mumeso aako.” Kuzwa waawo, mwanakazi ooyo wakeenda, waakulya alubo busyu bwakwe teebwakachuuside pe.
19 Bakabuka kuseeni-seeni, bafugama kunembo lyaJehova, kuzwa waawo, bakabweeda kung’anda yabo kuRama. Elikkana wakoona aamwanakazi wakwe Hana mpawo Jehova wakamuyeeya Hana. 20 Kakutanayinda munyaka,* Hana wakaba aada alubo wakatumbuka mwana mulombe mpawo wakamuuzika kuti Samiyele,* nkaambo wakati, “ndakamukumbila kuli Jehova.”
21 Nikwakayinda chiindi, Elikkana wakayinka aabamung’anda yakwe boonse kuti akape Jehova chipayizyo chipegwa munyaka amunyaka akupa chipo chachikonke. 22 Pesi Hana taakayinka pe, nkaambo wakati kumulumaakwe: “Mwana naalesegwa kupela, ndizoomweeta. Kuzwa waawo, uzooyimikila kunembo lyaJehova akukkala nkukooko kuzwa aachiindi eecho kaziya kunembo.” 23 Mulumaakwe Elikkana wakati kulinguwe: “Chita nzuyeeya kuti zilikabotu.* Kkala aamuunzi kusikila umulesye. Jehova achite nzwaamba.” Nkinkaako, mwanakazi ooyo wakakkala aamuunzi kanyonsya mwanaakwe kusikila naakamulesya.
24 Mbaakamulesya biyo, wakayinkaawe kuShilo, kali aapule wang’ombe uuli aaminyaka iitatu a-efa* iimwi yafulawa anongo mpati yawayini mpawo wakasika aamwana kung’anda yaJehova kuShilo. 25 Kuzwa waawo, bakajaya pule wang’ombe ooyo akweeta mulombe kuli Eli. 26 Nkinkaako, Hana wakati: “Ikaka simalelaangu! Mbuli mbuli muumi simalelaangu, ndime uulya mwanakazi wakayimvwi aanduwe aandawu eeyi kali kukomba kuli Jehova. 27 Ooyu nguumwana ngundakali kukombela alubo Jehova wakandipa nzindakamukumbila. 28 Lino andime ndaabumupa* Jehova. Kwamazuba aakwe woonse, unooli waJehova.”
Mpawo wakavuntama aansi* mpawaawo kuli Jehova.