Samiyele Wakusaanguna
2 Mpawo Hana wakakomba kati:
“Moyo wangu ulakondwa muli Jehova,
Kwija kwangu kwasumpulwa* aaJehova.
Ndaasama mulomo wangu kuti ndisandule basinkondoma,
Nkaambo ndilabotelwa mumilimu yako yalufutuko.
2 Taakwe muntu uusalala mbuli Jehova,
Taakwe uuli mbuli nduwe,
Alubo taakwe bbwe lili mbuli Leza wesu.
3 Mutaambuuli chakulisumpula,
Kutazwi majwi aakulisumpula munkanwa lyanu,
Nkaambo Jehova nguLeza waluzibo
Alubo nguwe uulanga-langa michito munzila iiluleme.
4 Madaantambwa aabaalumi basinguzu atyoloolwa,
Pesi aabo balikulebwa bapegwa manguzu.
5 Aabo bakali kukkuta beelede kubelekela bamwi bantu kuti bajane chinkwa,
Pesi basinzala tabachiimvwi lubo pe nzala.
Wakatali kuzyala, wazyala bana bali musanu ababili,
Pesi ooyo wakali aabana biingi tachikwaabo pe.*
6 Jehova ulaamanguzu aakujaya amanguzu aakufutula buumi,
Ulaamanguzu aakutola kuKabanda* amanguzu aakubusya.
7 Jehova ulafwabya akunotya,
Ulafwiinsya akusumpula.
8 Ubusya muntu uulangilwaansi kuzwa mulusuko,
Ubusya muntu uufwaba kuzwa kundawu iisowelwa dyota,*
Kuti bakkale aabantu balemekwa,
Akubapa chuuno chabulemu.
Mapila aagaba nyika ngaaJehova,
Alubo ubikka nyika aalingawo.
9 Uzulwida ntaamu zyabaabo basyomeka kulinguwe,
Pesi babi ulabawumuzya mumudima,
Nkaambo teemanguzu pe aapa kuti muntu azunde.
10 Jehova uzoobanyonyoona aabo bamulwana,*
Uzoobadilimina kuzwa kujulu.
Jehova uzoobeteka kusikila kumamanino aanyika,
Uzoomupa manguzu mwaami wakwe
Akusumpula kwija kwamunanike* wakwe.”
11 Mpawo Elikkana wakabweeda kung’anda yakwe kuRama, pesi mulombe wakaba mubelesi waJehova* kunembo lya-Eli mupayizi.
12 Bana ba-Eli bakali basizibi, teebakali kumulemeka pe Jehova. 13 Nzezi nzibakali kuchita atala azipanzi nzibakeelede kujana bapayizi kuzwa kubantu: Chiindi choonse muntu naakali kupa chipayizyo, mubelesi wamupayizi wakali kuza kajisi fologo iili aamenyo aatatu chiindi nyama niyakali kubila 14 mpawo wakali kuyasa nyama mumupika wakujikila, mumupika uuli aamijatisyo iibili, mumpoto naakuti mumupika uuli aamujatisyo uumwi. Kufumbwa nyama njaakali kuyasa aafologo, mupayizi wakali kwiibweza. Eezi nzizyo nzibakali kuchita kuShilo kuma-Israyeli bakali kusika nkukooko. 15 Mukuyungizya, nikuba aachiindi muntu ooyo wakali kupa chipayizyo katanapa kuti mafuta asuke busi, mubelesi wamupayizi wakali kusika kamubuzya kuti: “Pa mupayizi nyama yakuyoka. Takoobweza iijikidwe pe kulinduwe, ulabweza mbisi kupela.” 16 Muntu ooyo naakali kwaamba kuti: “Baleke bape kuti mafuta asuke busi saansi mpawo ulakonzya kubweza kufumbwa njuyanda,” mubelesi wamupayizi wakali kwaamba kuti: “Peepe, ndipe lino, kuti undiime kupela ndilakunyanga!” 17 Nkinkaako, chibi chababelesi babapayizi chakaba chipati loko kunembo lyaJehova, nkaambo baalumi aaba teebakachili kuchilemeka pe chipo chaJehova.
18 Aachiindi eecho, Samiyele wakali kubelekela Jehova alubo wakali kuzwaata* kabaki kabupayizi kakapangidwe aamulembo mubotu nikuba kuti wakachili muniini. 19 Mukuyungizya, banyina bakali kumusumina kajansi katakwe maboko mpawo bakali kumweetela munyaka amunyaka chiindi nibakali kwiinkaamwi amulumaabo kuti bakape chipayizyo chakali kupegwa munyaka amunyaka. 20 Eli wakalongezya* Elikkana amwanakazi wakwe, kati: “Jehova akupe uumbi mwana kwiinda mumwanakazi ooyu mundawu yawulya wakapegwa* Jehova.” Mpawo bakabweeda kulimbabo. 21 Jehova wakamuyeeya Hana zyakuti wakaba aada alubo wakatumbuka bana balombe batatu abasimbi babili. Alubo mulombe ooyo Samiyele wakayinkilila kunembo kukomena kunembo lyaJehova.
22 Eli wakali wachembaala, pesi wakali wazimvwa zyoonse nzibakali kuchita bana bakwe kuma-Israyeli boonse akuti bakali koona aabanakazi bakali kubeleka kumanjililo aatente lyakuswaanganina. 23 Wakali kunoonga wati kulimbabo: “Nkamboonzi nimulikuchita zintu zili boobu? Nkaambo zintu nzindilikumvwa bantu boonse kabaamba atala andinywe nzibi. 24 Peepe bana bangu, makani ngindilikumvwa aalikuzula aakati kabantu baJehova, taali kabotu pe. 25 Kuti muntu wabisizya mweenzinyina, umwi muntu ulakonzya kumukombelezezya kuli Jehova,* pesi kuti wabisizya Jehova, ngwani uutamukombele?” Nikuba oobo, teebakamuswiilila pe wisi, nkaambo Jehova wakali wakanza kale kubajaya. 26 Aachiindi eecho, Samiyele wakali kuyabukomena alubo kayandwa aaJehova abantu.
27 Muntu waLeza wakasika kuli Eli mpawo wakati kulinguwe: “Mbobu mbaamba Jehova: ‘Ime lwangu teendakalitondeezya aantanganana na kuli bamung’anda yawuso chiindi nibakali ku-Ijipita kabali bazike mung’anda yaFaro? 28 Alubo wakasalwa kuzwa aakati kamisyobo yoonse yama-Israyeli kuti abeleke kali mupayizi wangu akuti katanta aachipayililo changu kuti kapa zipayizyo, katenta tununkilizyo* akuzwaata kabaki kabupayizi kunembo lyangu. Alubo bamung’anda yasianyookulu ndakabapa zipo zyoonse zyama-Israyeli zitentwa aamulilo. 29 Nkamboonzi inywe nibantu nimutalemeki zipayizyo zyangu azipo zyangu nzindalayilila mundawu njindikkala? Nkamboonzi nulemeka bana bako kwiinda ndime, kwiinda mukulineneesya nkumuli kuchita kuzwa kuzipanzi zibotu zyazipo zyoonse zizwa kubantu bangu ma-Israyeli?
30 “‘Nzizyo zilikupa kuti jwi lyaJehova, Leza wa-Israyeli lyaambe kuti: “Kwaamba choonzyo, ime ndakati, ng’anda yako ang’anda yasianyookulu inooyenda kunembo lyangu chiindi choonse.” Pesi lino Jehova waamba kuti: “Tandizoochiti oobo pe, nkaambo aabo bandilemeka ndizoobalemeka, pesi aabo bandisampula bazoosampulwa.” 31 Lino bona, mazuba alikuza aawo ninditazoogwisye manguzu* aako amanguzu aabamung’anda yawuso zyakuti taakwe muntu wamung’anda yako uutazoopone kusikila achembaale. 32 Mukuyungizya, uzoobona sinkondonyokwe mung’anda yangu, ma-Israyeli naanoochitilwa zintu zyoonse zibotu alubo mung’anda yako tamuzoojaniki lubo pe muntu uutazoopone kusikila achembaale. 33 Pesi mwaalumi wamung’anda yako ngunditazooleke kugwisya kuti abeleke aachipayililo changu, uzoopa kuti meso aako ataboni akupa kuti wuuse, pesi bantu biingi bamung’anda yako bazoojayigwa aapanga lyabantu. 34 Zitazoochitike kubana bako babili Hofini aFiniyasi, zizooba chitondeezyo kulinduwe: Boonse bazoofwa mubuzuba bumwi. 35 Mpawo ndizoolibusizya mupayizi uusyomeka. Uzoochita kweendelana aziyandwa aamoyo* wangu. Mukuyungizya, ndizoomuyakila ng’anda iitamani alubo uzooyenda kunembo lyamunanike wangu chiindi choonse. 36 Kufumbwa muntu wamung’anda yako uusyaala, uzoosika amufugamine kuti afozegwe mali achinkwa mpawo uzoowamba kuti: “Ikaka, ndikumbila undipe mulimu wabupayizi kuchitila kuti ndilye kankwa.”’”