Samiyele Wakusaanguna
12 Kumamanino, Samiyele wakabuzya ma-Israyeli boonse kuti: “Ndakachita zintu zyoonse nzimwakaamba* kuti ndimuchitile alubo ndakamusalila mwaami kuti amweendelezye. 2 Lino ngoyu mwaami uunoomweendelezya!* Pesi ime ndachembaala alubo ndaba aamvwi, bana bangu mbaba aawa bali aandinywe alubo ndalikumuzulwida kuzwa kandichili muniini kusikila sunu. 3 Ndilaano. Kuti kakuli chintu chibi nchindakachita, amwaambe kunembo lyaJehova akunembo lyamunanike wakwe: Ngwani ngundakanyanga ng’ombe yakwe naakuti donki lyakwe? Ngwani ngundakeena naakuti ngundakadyaaminina? Ngwani wakandipa chisinkamulomo kayanda kuti nditabi aandaba azintu nzyaakachita? Kuti kaliwo ndilamubweedezya lino.” 4 Mpawo bakasandula kuti: “Taakwe nwaakatweena pe, taakwe nwaakatudyaaminina pe alubo taakwe nwaakabweza chintu kuzwa mukuboko kwawumwi muntu.” 5 Nkinkaako, Samiyele wakati kulimbabo: “Jehova ngukamboni kulindinywe alubo munanike wakwe ngukamboni sunu wakuti taakwe mulandu ngumwajana* ngumukonzya kunditamikizya.” Mpawo bakati: “Iiyi, ngukamboni.”
6 Nkinkaako, Samiyele wakati kubantu: “Jehova ooyo wakabelesya Mozesi a-Aroni ayooyo wakagwisya masianyookulu munyika ya-Ijipita ngukamboni. 7 Lino amwiimikile aawa ndimubeteke kunembo lyaJehova kweendelana amilimu yoonse iiluleme Jehova njaakamuchitila anjaakachitila masianyookulu.
8 “Jakkobo mbaakanjila biyo mu-Ijipita, amasianyookulu naakasaanguna kukumbila lugwasyo kuli Jehova, Jehova wakatuma Mozesi a-Aroni kuti bazulwide masianyookulu kuzwa mu-Ijipita akupa kuti bakkale munyika eeyi. 9 Pesi bakamuluba Jehova Leza wabo mpawo wakabawuzya mukuboko kwaSisera muzulwidi wankamu yamasooja aakuHazori amukuboko kwamaFilisiti amukuboko kwamwaami wakuMowabbu mpawo bakabalwana. 10 Bakayita Jehova kuti abagwasye kabati: ‘Twabisya, nkaambo twasiya Jehova akubelekela baBbaala azikozyano zya-Ashitoreti. Lino tuvune mukuboko kwabasinkondoma kuchitila kuti tukubelekele.’ 11 Mpawo Jehova wakatuma Jerubbaala, Bbedani, Jefita aSamiyele mpawo bakamuvuna mukuboko kwabasinkondonyokwe bakamuzyungulukide zyakuti mwakakkala kamulyiibide. 12 Nimwakabona Nahashi, mwaami wama-Amoni kaza kuzoomulwana, mwakaliswini kwaamba kuti, ‘Peepe, tuyanda mwaami kuti atweendelezye,’ nikuba kuti Jehova Leza wanu Mwaami wanu. 13 Lino ngoyu mwaami ngumwakali kuyanda, ngumwakakumbila. Amubone! Jehova wamubikkila mwaami kuti amweendelezye. 14 Kuti mwayoowa Jehova akumubelekela akuswiilila jwi lyakwe alubo kuti mwaleka kubukila mulawu waJehova, akuti inywe amwaami uulikumweendelezya mwatobela Jehova Leza wanu, zilikabotu. 15 Pesi kuti mwaleka kuswiilila jwi lyaJehova akuleka kutobela malayilile aaJehova, kuboko kwaJehova kunoomulwana, inywe amawuso. 16 Lino amuze kunembo mubone chintu chipati Jehova nchatachite kunembo lyanu. 17 Teechiindi chakutebula wiiti na eechi? Ndilayita Jehova kuti ape kuti kube kudilima amvula mpawo mulaziba akumvwisisisya kuti mwachita chibi chipati biyeni kunembo lyaJehova kwiinda mukukumbila kuti mube aamwaami uumweendelezya.”
18 Kuzwa waawo, Samiyele wakayita Jehova mpawo Jehova wakapa kuti kube kudilima amvula mubuzuba oobo, zyakuti bantu bakayoowa Jehova aSamiyele. 19 Mpawo bantu boonse bakati kuli Samiyele: “Tukombele kuli Jehova Leza wako tubabelesi bako mbukunga tatuyandi pe kufwa, nkaambo twaliyungizizya chimwi chibi aajulu aazibi zyesu zyoonse kwiinda mukukumbila mwaami.”
20 Nkinkaako, Samiyele wakabuzya bantu kuti: “Mutayoowi pe. Mwazichita zibi zyoonse eezi. Lino mutaleki pe kutobela Jehova alubo mweelede kukomba Jehova amoyo woonse. 21 Mutaleyi pe akutobela zintu zyabuyo* zitagwasyi zitakonzyi pe kumufutula, nkaambo nzyabuyo.* 22 Jehova tazoobalekelezyi pe bantu bakwe akaambo kazina lyakwe pati, nkaambo Jehova lwakwe wasala kuti mube bantu bakwe. 23 Pesi ime tandikoobisizya Jehova pe kwiinda mukuleka kumukombela alubo ndilayinkilila kunembo kumuyiisya nzila mbotu iiluleme. 24 Inywe amuyoowe Jehova alubo mumubelekele kamusyomeka* amoyo woonse. Amubone mbuzili zipati zintu nzyaakamuchitila. 25 Pesi kuti mwayinkilila kunembo kubisya, muzoonyonyoonwa, inywe amwaami wanu.”