Baami Wachibili
16 Mumunyaka wachi 17 wabweendelezi bwaPekka mwana waRemaliya, Ahazi mwana waMwaami Jotamu waJuda wakaba mwaami. 2 Ahazi wakali aaminyaka iili 20 naakaba mwaami, alubo wakeendelezya kwaminyaka iili 16 muJerusalema. Taakachita ziluleme pe mumeso aaJehova Leza wakwe mbuli mbaakachita Davida sianyinakulu. 3 Pesi wakeenda munzila yabaami ba-Israyeli, alubo naba mwanaakwe mulombe wakamutenta* mumulilo, katobelezya michito iisesemya yazisi eezyo Jehova nzyaakatanda kunembo lyama-Israyeli. 4 Alubo wakali kupa zipayizyo akuuntumuna busi bwazipayizyo mundawu zyakukombela, mutulundu, amunsi aaminsamu yoonse iifwefwema.
5 Aachiindi eecho, mpimpawo Mwaami Rezini waSiriya aPekka mwana waRemaliya mwaami wa-Israyeli nibakaza kuzoolwana Jerusalema. Bakasinkila Ahazi, pesi teebakakonzya pe kuuzunda muunzi. 6 Aachiindi nchicheecho, Rezini Mwaami waSiriya wakabweedezya muunzi wa-Elati ku-Edomu. Kuzwa waawo, wakatanda maJuda* bakali mu-Elati. Mpawo ma-Edomu bakanjila mu-Elati, alubo bachikkala mumuunzi ooyu kusika sunu. 7 Nkinkaako, Ahazi wakatuma batumwa kuMwaami Tigilati-pileseri wa-Asiriya kati: “Ndili mubelesi wako alubo ndili mwanaako. Kuza uzoondivune mukuboko kwamwaami waSiriya amukuboko kwamwaami wa-Israyeli, aabo baliikundilwana.” 8 Ahazi wakabweza nsiliva angolida zyakajanika mung’anda yaJehova amuzibikkilo zyamung’anda yamwaami,* mpawo wakazitumizya kumwaami wa-Asiriya kazili chisinkamulomo. 9 Mwaami wa-Asiriya wakaswiilila nzyaakakumbilwa, mpawo wakayinka kuDamasikko waakuzunda muunzi akubweza bantu wabatola mubuzike kuKkiri, alubo wakajaya Rezini.
10 Mpawo Mwaami Ahazi wakayinka kuti akaswaanane aaMwaami Tigilati-pileseri wa-Asiriya kuDamasikko. Naakabona chipayililo chakali muDamasikko, Mwaami Ahazi wakatumizya Urija mupayizi chifanikisyo chachipayililo eecho chakali kutondeezya mbuchibede ambuchakapangwa. 11 Urija mupayizi wakayaka chipayililo kweendelana amalayilile woonse Mwaami Ahazi ngaakatumizya kali kuDamasikko. Urija mupayizi wakamaninsya kuyaka chipayililo eecho Mwaami Ahazi katanaboola pe kuzwa kuDamasikko. 12 Mwaami naakaboola kuzwa kuDamasikko, wakabona chipayililo eecho, mpawo wakayinka kuchipayililo waakupa zipo aalinchicho. 13 Alubo aachipayililo eecho, wakawuntumuna busi bwazipo zyakwe zitentwa abwazipo zyakwe zyazilyo. Wakatila zipo zyakwe zinywigwa akusansiila ganzi lyazipayizyo zyakwe zyalumvwanano aalinchicho. 14 Mpawo wakagwisya chipayililo chakkopa* chakali kunembo lyaJehova aandawu yacho kunembo aang’anda, eecho chakali aakati kachipayililo chakwe ang’anda yaJehova, mpawo wakachibikka kubbazu lyakunyika kwachipayililo chakwe. 15 Mwaami Ahazi wakalayilila Urija mupayizi kuti: “Wuntumuna busi bwachipo chitentwa chakuseeni aachipayililo chipati, uchite mbuboobu akuchipo chazilyo chagoko, chipo chamwaami chitentwa, achipo chakwe chazilyo kuswaanizya azipo zitentwa, zipo zyazilyo azipo zinywigwa zyabantu boonse. Usansiile ganzi lyoonse lyazipo zitentwa aalinchicho aganzi lyoonse lyazimwi zipayizyo. Pesi chipayililo chakkopa* ndilabona nzinditachite anchicho.” 16 Mpawo Urija mupayizi wakachita zyoonse Mwaami Ahazi nzyaakamulayilila.
17 Mukuyungizya, Mwaami Ahazi wakanenga-nenga tuzeng’e twamumbali twatungolo mpawo wakagwisya mabbavu aalintuto, alubo wakaselusya Lwizi lwakali aajulu aabapule bang’ombe bakkopa* walubikka aansi aamabwe aayalidwe. 18 Kuzwa waawo, wakagwisya ndawu iivumbidwe yakali kubelesegwa muSabata, eeyo yakayakilidwe mung’anda alubo wakajala nzila yamwaami njaakali kubelesya kuya mung’anda yaJehova. Wakachita oobo akaambo kamwaami wa-Asiriya.
19 Makani aachiindi woonse aali atala a-Ahazi, azintu nzyaakachita, taalembedwe na mubbuku lyamakani aachiindi aaziindi zyabaami baJuda? 20 Mpawo Ahazi wakalazikwaamwi amasianyinakulu alubo wakazikkwaamwi amasianyinakulu muMuunzi waDavida. Mwanaakwe Hezekkiya* wakaba mwaami mundawu yakwe.