Joshuwa
9 Baami boonse bakali kububbila kwaJodani, nkukwaamba aabo bakali muchilawu chili aazilundu, muShefela, abaabo bakakkede munsi aachilawu choonse chili kumbali aaLwizi Lupati,* akunembo kwaLebbanoni—maHeti, ma-Amori, maKkenani, maPerezi, maHivi, amaJebbusi—nibakamvwa zyakachitika, 2 bakajatana kuti balwane Joshuwa ama-Israyeli.
3 Ambabo bantu bakkala muGibbiyoni bakazimvwa nzyaakachita Joshuwa kuJerikko aku-Ayi. 4 Bakachita chabusongo kwiinda mukubikka zyakulya mumasaka aakazakala akuzitansika aamadonki aabo, kuswaanizya azibikkilo zyawayini zyazikumba zyakazakala zisumidwe. 5 Bakazweete manyatela aakazakala aali aazigamba azigogo zyakazakala. Zinkwa zyabo zyoonse zyamulweendo zyakali ziyumu kazibuuluka.* 6 Bakaya kuli Joshuwa kukkeempu kuGiligali mpawo bakati kulinguwe akubaalumi bachi-Israyeli: “Twazwa kunyika iili kule, amupange chizuminano andiswe.” 7 Pesi baalumi bachi-Israyeli bakati kumaHivi: “Amwi mukkala aafwiifwi andiswe. Nga tulapangana biyeni chizuminano andinywe?” 8 Bakasandula Joshuwa kuti: “Tuli babelesi* bako.”
Mpawo Joshuwa wakati kulimbabo: “Ndinywe bani? Muzwa kuli?” 9 Mpawo bakati kulinguwe: “Iswe tubabelesi bako twazwa kunyika iili kule loko akaambo kazina lyaJehova Leza wanu, nkaambo twakamvwa atala ampuwo yakwe azintu zyoonse nzyaakachita mu-Ijipita, 10 anzyaakachita kubaami babili bama-Amori bamutala* aaJodani, Mwaami Sihoni waHeshibboni aMwaami Ogi waBbashani wakali ku-Ashitaroti. 11 Nkinkaako, baalu besu abantu boonse bakkala munyika yesu bakatubuzya kuti, ‘Amubweze chakulya chamulweendo mukaswaanane aambabo. Mukababuzye kuti: “Tulaba babelesi banu; amupange chizuminano andiswe.”’ 12 Zinkwa eezi nitwakabweza kuti chibe chakulya chesu chamulweendo zyakali kupya mubuzuba nitwakazwa mumaanda eesu katuza ookuno. Pesi lino amubone zyayuma, zyaabubuuluka.* 13 Zibikkilo eezi zyawayini zyakali zipya nitwakazizuzya, pesi lino zyabbaluka. Zigogo zyesu amanyatela eesu zyazakala akaambo kakulampa kwamusinzo ngutwakeenda.”
14 Mpawo baalumi bachi-Israyeli bakabweza* chimwi chakulya chabo pesi teebakabuzya makani kuli Jehova. 15 Nkinkaako, Joshuwa wakabamba luumuno ambabo alubo wakapanga chizuminano chakuti takoobajaya pe, eezi nzizyo nzibakabakonkezya basilutwe bambungano, kuti teebakali kuzoobajaya pe.
16 Nikwakayinda mazuba aatatu kuzwa nibakapanga chizuminano ambabo, bakamvwa kuti bakkala aafwiifwi, mulukoche biya. 17 Ma-Israyeli bakazwa mpawo mubuzuba bwachitatu bakasika mumyuunzi yabo; myuunzi yabo yakali Gibbiyoni, Kkefira, Bberoti aKkiriyati-jeyarimu. 18 Pesi ma-Israyeli teebakabalwana pe nkaambo basilutwe bambungano bakali bakonka chikonke kwiinda muli Jehova Leza wa-Israyeli. Nkinkaako, mbungano yoonse yakasaanguna kung’ung’unina basilutwe. 19 Mpawo basilutwe boonse bakabuzya mbungano yoonse kuti: “Tatuzumizigwi pe kubachitila chintu chibi mbukunga twakakonka chikonke ambabo kwiinda muli Jehova Leza wa-Israyeli. 20 Nzezi nzitutachite: Tatukoobajaya pe kuchitila kuti bukali bwaLeza butatusikili akaambo kachikonke nchitwakakonka ambabo.” 21 Mpawo basilutwe bakayungizya kuti: “Amubaleke kabali bawumi, ababe basikutebba nkuni abasikutekela mbungano yoonse maanzi.” Eezi nzizyo basilutwe nzibakabasyomezya.
22 Lino Joshuwa wakabayita mpawo wakati kulimbabo: “Nkamboonzi nimwakatweena nimwakati, ‘Tuzwa kunyika iili kule loko,’ kakuli mukkede aakati kesu? 23 Kuzwa lino mulitukidwe, munoochita milimu yabuzike yakutebba nkuni akuteka maanzi aamung’anda yaLeza wangu.” 24 Bakasandula Joshuwa kuti: “Iswe tubabelesi bako twakabuzigwa aantanganana kuti Jehova Leza wanu wakalayilila Mozesi mubelesi wakwe kuti amupe nyika eeyi yoonse akuti anyonyoone bantu boonse bakkala mulinjiyo. Twakayoowa kujayigwa, nchitwakachita zintu eezi. 25 Lino tuli mumaboko aanu. Amuchite kufumbwa nzimubona kuti zilikabotu akuti zililuleme.” 26 Eezi nzizyo nzyaakabachitila; wakabavuna kuma-Israyeli, teebakabajaya pe. 27 Pesi mubuzuba oobo, Joshuwa wakabachita basikutebba nkuni abasikuteka maanzi aambungano aachipayililo chaJehova, bachichita oobo kusikila sunu.