Baami Wakusaanguna
9 Solomoni mbaakamaninsya biyo kuyaka ng’anda yaJehova ang’anda yamwaami,* azintu zyoonse Solomoni nzyaakali kuyanda kupanga, 2 Jehova wakalibonia kachibili kuli Solomoni mbuli mbaakali walibonia kulinguwe kuGibbiyoni. 3 Jehova wakati kulinguwe: “Ndayimvwa nkombyo yako akukumbila kwako kwakuti ufwidwe luzyalo nkwaachita kunembo lyangu. Ndayisalazya ng’anda eeyi njwaayaka kwiinda mukubikka zina lyangu aalinjiyo kukabe kutamani, alubo meso aangu amoyo wangu zinooli aalinjiyo chiindi choonse. 4 Anduwe kuti weenda kunembo lyangu mbuli wuso Davida mbaakeenda, amoyo uusyomeka amubululami kwiinda mukuchita zintu zyoonse nzindakulayilila akuswiilila malayilile aangu ambeta zyangu, 5 ndizoozyatika chuuno chabwaami bwako kukabe kutamani mu-Israyeli mbuli mbundakasyomezya wuso Davida nindakati: ‘Takuzoobuliki muntu pe uuzwa mubana bako uutazookkale aachuuno chabwaami cha-Israyeli.’ 6 Pesi kuti inywe abana banu mwaleka kunditobela alubo kuti mwaleka kubamba milawu yangu amalayilile aangu ngindabikka kunembo lyanu, mpawo mweenda mwaakubelekela bamwi baleza akubakotamina, 7 ndizoobanyonyoona ma-Israyeli aanyika njindakabapa, alubo ng’anda njindasalazya akaambo kazina lyangu ndizooyigwisya kunembo lyangu, alubo Israyeli uzooba chintu chiweelwa* achintu chisesya aakati kabantu bamisyobo yoonse. 8 Ang’anda eeyi izooba mulwi wamagadi. Muntu woonse wiinda aalinjiyo uzooyilanga kagambide alubo uzoosiba mulozwi* kati, ‘Nkamboonzi Jehova naakachita oobu kunyika eeyi akung’anda eeyi?’ 9 Mpawo bazooti: ‘Nkaambo bakasiya Jehova Leza wabo, ooyo wakagwisya masianyinakulu munyika ya-Ijipita, alubo bakabweza bamwi baleza babakotamina akubabelekela. Nzizyo zyakapa kuti Jehova abeetele mapenzi woonse aaya.’”
10 Kumamanino aaminyaka iili 20, chiindi Solomoni naakayaka maanda aabili, ng’anda yaJehova ang’anda yamwaami,* 11 Hiramu mwaami waTire wakapa Solomoni masamu aamukkedari amasamu aamujunipa angolida njaakali kuyanda, mpawo Mwaami Solomoni wakapa Hiramu myuunzi iili 20 munyika yaGalili. 12 Nkinkaako, Hiramu wakazwa kuTire kuti akabone myuunzi eeyo Solomoni njaakali wamupa, pesi taakayiyanda pe.* 13 Mpawo Hiramu wakati: “Myuunzi iilibiyeni eeyi mweenzuma njwaandipa?” Nkinkaako, myuunzi eeyi yakawuzikwa kuti Nyika yaKkabbuli* kusika sunu. 14 Aachiindi eecho, Hiramu wakatumizya mwaami matalenta* aangolida aali 120.
15 Aaya ngiimakani aali atala abaabo Mwaami Solomoni mbaakayita kuti babeleke milimu iimizya kuti bayake ng’anda yaJehova, ng’anda yakwe,* Dundulundu,* muduli waJerusalema, Hazori, Megido, aGezeri. 16 (Faro mwaami wa-Ijipita wakali wasika wazunda muunzi waGezeri wawutenta aamulilo alubo wakajaya maKkenani bakali kukkala mumuunzi ooyu. Nkinkaako, muunzi ooyu wakawupa mwanaakwe musimbi, mwanakazi waSolomoni, kawuli chipo.)* 17 Solomoni wakayaka* Gezeri, Bbeti-horoni Yamunsi, 18 Bbaalati, aTamari iili munkanda munyika eeyo, 19 kuswaanizya amyuunzi yoonse yaSolomoni yakubambila zintu, myuunzi yangolo, myuunzi yabasimabbiza azintu zyoonse Solomoni nzyaakali kuyanda kuyaka muJerusalema, muLebbanoni, amundawu zyoonse zyakali mubweendelezi bwakwe. 20 Pesi bantu boonse, aabo bakasyaala kuma-Amori, maHeti, maPerezi, maHivi, amaJebbusi, aabo bakatali aakati kama-Israyeli, 21 bana babo aabo bakasyaala munyika—aabo ma-Israyeli mbibakakachilwa kunyonyoona—bakayitwa aaSolomoni kuti babe bazike kababeleka milimu iimizya kusika sunu. 22 Pesi Solomoni taakwe mu-Israyeli naba uumwi ngwaakachita kuti abe muzike, nkaambo bakali basilumamba bakwe, babelesi bakwe, basilutwe bakwe, basikugwasilizya bapati bamasooja, bapati babasikweenzya ngolo abapati babasimabbiza. 23 Kwakali basilutwe babeendelezi bali 550 bakali kulanga mulimu waSolomoni, mafolomani babantu bakali kubeleka mulimu.
24 Pesi mwana musimbi waFaro wakazwa muMuunzi waDavida waya kung’anda yakwe njaakayakilwa aaSolomoni. Mpawo Solomoni wakayaka Dundulundu.*
25 Tutatu mumunyaka, Solomoni wakali kupa zipayizyo zitentwa azipayizyo zyalumvwanano aachipayililo nchaakayakila Jehova, alubo wakali kuuntumuna busi bwazipayizyo aachipayililo eecho chakali kunembo lyaJehova, nkinkaako, wakamaninsya kuyaka ng’anda.
26 Alubo Mwaami Solomoni wakapanga maato mu-Eziyoni-gebberi, iili aafwiifwi a-Eloti, kunkomwe yaLwizi Lusalala munyika ya-Edomu. 27 Hiramu wakatuma babelesi bakwe, basimaato bali aaluzibo kuti bakabeleke mumaato aayo kabalaamwi ababelesi baSolomoni. 28 Bakaya ku-Ofiri baakubweza matalenta aangolida aali 420 mpawo bakaayeta kuMwaami Solomoni.