Baami Wakusaanguna
11 Pesi Mwaami Solomoni wakayanda banakazi biingi bakuli zimwi zisi kuyungizya aamwana musimbi waFaro, nkukwaamba banakazi maMowabbu, ma-Amoni, ma-Edomu, maSidoni, amaHeti. 2 Bakali kuzwa muzisi eezyo Jehova nzyaakali wabuzya ma-Israyeli kuti: “Mutayinki aakati kabo pe,* ambabo tabeelede kuza aakati kanu pe, nkaambo kwaamba choonzyo, bazoowongelezya myoyo yanu kuti itobele baleza babo.” Pesi Solomoni wakakakatila kulimbabo akubayanda. 3 Wakali aabanakazi bali 700, aabo bakali banamalelo, abamwi banakazi* bali 300, alubo banakazi bakwe bakoongelezya moyo wakwe mbichaani-mbichaani.* 4 Solomoni naakachembaala, banakazi bakwe bakoongelezya moyo wakwe* kuti utobele bamwi baleza, alubo moyo wakwe teewakamaninina pe kuli Jehova Leza wakwe mbuli moyo waDavida wisi. 5 Solomoni wakatobela Ashitoreti leza wachanakazi wamaSidoni aMilikkomu leza uusesemya wama-Amoni. 6 Alubo Solomoni wakachita zibi mumeso aaJehova, taakatobela Jehova chakumaninina pe* mbuli mbaakachita Davida wisi.
7 Eechi nchiichiindi Solomoni naakayaka ndawu yakukombela yaKkemoshi, leza uusesemya wamaMowabbu aachilundu kunembo aaJerusalema, andawu yakukombela yaMolekki leza uusesemya wama-Amoni. 8 Eezi nzizyo nzyaakachitila banakazi bakwe boonse bakuli zimwi zisi, aabo bakali kuuntumuna busi bwazipayizyo akupa zipayizyo kuli baleza babo.
9 Jehova wakamunyemena loko Solomoni, nkaambo moyo wakwe wakali wazwa kuli Jehova Leza wa-Israyeli, ooyo wakali walibonia kulinguwe kwaziindi zibili, 10 alubo wakali wamuchenjezya atala ankani eeyi yakuti tayelede kutobela bamwi baleza pe. Pesi taakaziswiilila pe nzyaakalayililwa aaJehova. 11 Jehova wakati kuli Solomoni: “Akaambo kakuti wachita chintu eechi, akuti teewabamba chizuminano changu amilawu yangu mbuli mbundakakulayilila, kwaamba choonzyo, ndizoodelula bwaami kandibugwisya kulinduwe, mpawo ndizoobupa umwi wababelesi bako. 12 Nikuba oobo, akaambo kawuso Davida, tandizoochiti oobo kuchili muumi pe. Ndizoobudelula kandibugwisya mukuboko kwamwanaako, 13 pesi tandizoobugwisyi pe bwaami boonse. Mwanaako ndizoomupa musyobo uumwi akaambo kaDavida mubelesi wangu, alubo akaambo kaJerusalema eeyo njindakasala.”
14 Mpawo Jehova wakapa kuti kube sikukazya Solomoni uutegwa Hadadi mu-Edomu, wamumpuli yabwaami bwa-Edomu. 15 Davida naakazunda Edomu, Jowabbu silutwe wankamu yamasooja wakayinka kuti akazikke bantu bakajayigwa, mpawo wakeezya kujaya bantu bachaalumi boonse mu-Edomu. 16 (Nkaambo Jowabbu ama-Israyeli boonse bakakkala nkukooko kwamyeezi iili musanu awumwi kusikila naakamaninsya kujaya bantu bachaalumi boonse mu-Edomu.) 17 Pesi Hadadi wakachijaamwi abamwi babelesi bawisi ma-Edomu, mpawo bakayinka ku-Ijipita. Aachiindi eecho, Hadadi wakachili kalombe. 18 Nkinkaako, bakanyampuka kuMidiyani bayinka kuParani. Bakabweza baalumi kuParani bayinkaabo ku-Ijipita kuli Faro mwaami wa-Ijipita, ooyo wakapa Hadadi ng’anda, akulayilila kuti kapegwa chakulya, alubo wakamupa nyika. 19 Hadadi wakayandwa loko aFaro zyakuti wakamupa mwanike wamwanakazi wakwe, Tapenesi namalelo,* kuti amukwate. 20 Mukuya kwachiindi, mwanike waTapenesi wakazyalila Hadadi mwana mulombe uutegwa Genubbati, mpawo Tapenesi wakamukomezezya* mung’anda yaFaro, alubo Genubbati wakakkala kali mung’anda yaFaro abana baFaro.
21 Hadadi naakali ku-Ijipita, wakamvwa kuti Davida wakali walazikwaamwi amasianyinakulu akuti Jowabbu silutwe wankamu yamasooja wakali wafwa. Nkinkaako, Hadadi wakati kuli Faro: “Ndileke ndiinke kunyika yesu.” 22 Pesi Faro wakati kulinguwe: “Wabulaanzi ookuno kulindime chapa kuti uyande kwiinka kunyika yanu?” Mpawo Hadadi wakati: “Taakwe pe, pesi ndileke ndiinke.”
23 Alubo Leza wakapa kuti kube umwi sikukazya Solomoni uutegwa Rezoni mwana wa-Eliyada, ooyo wakali wachija simalelaakwe Hadadezeri mwaami waZobba. 24 Rezoni wakabunganizya baalumi mpawo wakaba silutwe wazigwebenga chiindi Davida naakazunda* baalumi bakuZobba. Nkinkaako, bakayinka kuDamasikko baakukkala nkukooko mpawo bakasaanguna kweendelezya muDamasikko. 25 Mwaalumi ooyu wakaba sikukazya ma-Israyeli mumazuba woonse aaSolomoni, kuyungizya kumapenzi aakeetwa aaHadadi alubo wakali kuzonda ma-Israyeli chiindi naakali kweendelezya Siriya.
26 Alubo kwakali Jerobbowamu mwana waNebbati mu-Efremu wakuZereda, mubelesi waSolomoni, ooyo wakali aabanyina bakali kutegwa Zeruwa mukamufu. Anguwe wakasaanguna kubukila mwaami. 27 Nkaka kaambo kakapa kuti abukile mwaami: Solomoni wakali wayaka Dundulundu* alubo wakali wasinka mweenya muMuunzi waDavida wisi. 28 Jerobbowamu wakali mwaalumi uuli aamanguzu. Solomoni naakabona kuti mulombe ooyu ubeleka changuzu, wakamusala kuti abe mulangizi uulanga bantu boonse bakali kubeleka mulimu uumizya mung’anda yaJosefa. 29 Aachiindi eecho, Jerobbowamu wakazwa muJerusalema, mpawo mupolofita Ahija muShilo wakamuswaana mumugwagwa. Ahija wakazweete chigogo chipya. Baalumi aaba babili bakali aabalikke musokwe. 30 Ahija wakajata chigogo chipya nchaakazweete mpawo wakachidelula muzipanzi zili 12. 31 Mpawo wakati kuli Jerobbowamu:
“Bweza zipanzi zili kkumi, nkaambo nzezi nzyaamba Jehova Leza wa-Israyeli: ‘Ndili kudelula bwaami mukuboko kwaSolomoni mpawo iwe ndilakupa misyobo iili kkumi. 32 Pesi musyobo uumwi ulasyaala kawuli wakwe akaambo kamubelesi wangu Davida alubo akaambo kaJerusalema, muunzi ngundakasala aakati kamyuunzi yoonse yamisyobo ya-Israyeli. 33 Ndizoochita oobo, nkaambo bandisiya alubo balikukotamina Ashitoreti leza wachanakazi wamaSidoni, aKkemoshi leza wamaMowabbu, aMilikkomu leza wama-Amoni, alubo taakwe nibakeenda munzila zyangu pe kwiinda mukuchita ziluleme mumeso aangu akutobela malayilile aangu ambeta zyangu mbuli mbaakachita Davida wisi. 34 Pesi tandizoomunyangi pe bwaami boonse mukuboko kwakwe, ndizoomusiya kali silutwe mumazuba woonse aabuumi bwakwe, akaambo kaDavida mubelesi wangu ngundakasala, nkaambo wakaswiilila milawu yangu amalayilile aangu. 35 Pesi ndizoobweza bwaami mukuboko kwamwanaakwe ndibupe nduwe, nkukwaamba misyobo iili kkumi. 36 Mwanaakwe ndizoomupa musyobo uumwi, kuchitila kuti Davida mubelesi wangu akkale kali aalambe kunembo lyangu muJerusalema, muunzi ngundakasala ime lwangu kuti ube ndawu yakubikka zina lyangu. 37 Ndizoosala nduwe mpawo uzooyendelezya zintu zyoonse nzuyanda, alubo uzooba mwaami wa-Israyeli. 38 Kuti waswiilila zintu zyoonse nzindikulayilila akweenda munzila zyangu, alubo kuti wachita ziluleme mumeso aangu kwiinda mukubamba malayilile aangu amilawu yangu, mbuli Davida mubelesi wangu mbaakachita, andime ndizooba aanduwe. Ndizookuyakila ng’anda iitanooliwo kukabe kutamani, mbuli mbundakayakila Davida, alubo ndizookupa Israyeli. 39 Ndizoobabombya bana baDavida akaambo kachintu eechi, pesi kutali chiindi choonse pe.’”
40 Nkinkaako, Solomoni wakeezya kujaya Jerobbowamu, pesi Jerobbowamu wakachijila ku-Ijipita kuli Shishakki mwaami wa-Ijipita, alubo wakakkala mu-Ijipita kusikila Solomoni naakafwa.
41 Makani aachiindi woonse aali atala aSolomoni, azintu zyoonse nzyaakachita abusongo bwakwe, taalembedwe na mubbuku lyamakani aachiindi aali atala aSolomoni? 42 Solomoni wakeendelezya Israyeli yoonse muJerusalema kwaminyaka iili 40. 43 Mpawo Solomoni wakalazikwaamwi amasianyinakulu, alubo wakazikkwa muMuunzi waDavida wisi. Mwanaakwe Rehobbowamu wakaba mwaami mundawu yakwe.