Myeelwe
12 Miriyemu a-Aroni bakasaanguna kwaambuula bubi atala aMozesi akaambo kamwanakazi muKkushi ngwaakakwete, nkaambo mwanakazi wakwe wakali muKkushi. 2 Bakali kuti: “Jehova waambuula kwiinda muli Mozesi kupela na? Taambuuli kwiinda mulindiswe na?” Jehova wakali kuswiilila. 3 Mozesi wakali mwaalumi uubombede* kwiinda bantu boonse bakkala aanyika.
4 Aachiindi nchicheecho, Jehova wakati kuli Mozesi a-Aroni aMiriyemu: “Amwiinke kutente lyakuswaanganina, kamuli batatu.” Nkinkaako, bakazwa bayinka kabali batatu. 5 Jehova wakaseluka kali mumusumpuululu wajoba mpawo wakayimikila kumanjililo aatente, wayita Aroni aMiriyemu. Kabali babili bakaza kunembo. 6 Mpawo wakati: “Ndikumbila kuti mundiswiilile. Kaansinga kwakali mupolofita waJehova aakati kanu, ndalikunoolizibya kulinguwe kwiinda muchilengaano alubo ndalikunoowambuulaawe kwiinda muchiloto. 7 Pesi teembubo pe atala amubelesi wangu Mozesi. Upedwe zintu zyoonse zyamung’anda yangu.* 8 Ndaambuula aanguwe mulomo mpande, aantanganana, kutali mutulabiko pe alubo Jehova ulalibonia kulinguwe. Nkamboonzi nimwatayoowa kwaambuula bubi atala amubelesi wangu Mozesi?”
9 Nkinkaako, bukali bwaJehova bwakabasikila mpawo wakazwa mpubakabede. 10 Joba lyakanyampuka aajulu aatente alubo Miriyemu wakaba aachipele chituba buu mbuli chaanda.* Mpawo Aroni wakachengunuka walanga Miriyemu alubo wakabona kuti wakali waba aachipele. 11 Aachiindi nchicheecho, Aroni wakati kuli Mozesi: “Inche kaka simalelaangu, utatupi mulandu akaambo kachibi nchitwachita. Nzitwachita, twazichita chabufuba-fuba. 12 Utamulekeli kuti ayinkilile kunembo kali mbuli muntu uufwide, ooyo wakazyalwa kabolede limwi bbazu!” 13 Mpawo Mozesi wakasaanguna kukwiilila Jehova kati: “Inche kaka Leza, muponie! Ndakumbila kaka!”
14 Jehova wakasandula Mozesi kati: “Kaansinga wisi wakamuswida mate kubusyu, taalikunooba aabweeme na kwamazuba aali musanu aabili? Akakkale aalikke kwamazuba aali musanu aabili aanze aakkeempu. Kuzwa waawo, azooyetwe.” 15 Nkinkaako, Miriyemu wakakkala alikke aanze aakkeempu kwamazuba aali musanu aabili alubo bantu taakwe nibakeenda pe kusikila Miriyemu naakaboozegwa. 16 Mpawo bantu bakazwa kuHazeroti, baakusaanguna kukkala munkanda yakuParani.