Mukambawusi

9 Ndakayeeyesesya zintu zyoonse eezi mpawo ndakabona kuti bantu baluleme abasongo kuswaanizya amilimu yabo, bali mumaboko aaLeza wakasimpe. Bantu tabazi pe atala aluyando akuzondana kwakaliwo kabatanabawo pe. 2 Boonse bali aamamanino aakozyenie, baluleme ababi, balikabotu abasalala abatasalali, bapa zipayizyo abatapi zipayizyo. Muntu uulikabotu ulikozyenie asizibi. Uukonka chikonke ulikozyenie ayooyo uuyoowa kukonka. 3 Nchechi chintu chikataazya chichitika aansi aano: Akaambo kakuti bantu boonse bali aamamanino aakozyenie, myoyo yabo izwide zintu zibi alubo mumyoyo yabo muli kupenga kwabuumi bwabo boonse mpawo kumamanino nga bafwa!

4 Kufumbwa muntu muumi uli aabulangilizi, nkaambo munkala muumi ulikabotu kwiinda mulavu uufwide. 5 Nkaambo bawumi balizi kuti bazoofwa, pesi bafwide taakwe nchibazi pe alubo tabachikwe bulumbu* pe, nkaambo tabachiyeeyegwi pe. 6 Mukuyungizya, luyando lwabo akuzonda kwabo abbivwe lyabo zyakamana alubo tabachiswaanizigwi pe muzintu zichitwa aansi aano.

7 Kuya ukalye chakulya chako kuubotelwa akunywa wayini yako kuli aamoyo uubotelwa nkaambo Leza wakasimpe wabotelwa kale akaambo kamilimu yako. 8 Zigogo zyako azikkale kazituba* alubo utaleki pe kunana mafuta mumutwe wako. 9 Botelwa amwanakazi wako nguyandisya mazuba woonse aabuumi bwako butagwasyi, aayo Leza ngaakakupa aansi aano, mazuba aako woonse aatagwasyi. Nkaambo eechi nchiichaabilo chako mubuumi akumilimu iimizya njubeleka changuzu aansi aano. 10 Kufumbwa nchukonzya kuchita,* chichite aamanguzu aako woonse, nkaambo taakwe milimu, nikuba kukanza, niluba luzibo, nibuba busongo muKabanda* oomo muya.

11 Alubo kuli chimwi nchindakabona aansi aano, ndakabona kuti bali aaluno teembabo pe bazunda mumuzundaano chiindi choonse, bali aamanguzu teembabo pe bazunda munkondo, basongo teembabo pe bali aachakulya chiindi choonse, bali aamaanu teembabo pe bali aabunoti chiindi choonse, nibaba bali aaluzibo teembabo pe bazwidilila chiindi choonse, nkaambo boonse basikilwa aaziindi azintu* zitalangililwi pe. 12 Nkaambo muntu tachizi pe chiindi chakwe. Mbuli baswi mbubajatwa aakansabwe abayuni mbubachegwa aakakole, ambabo bantu balachegwa muchiindi chamapenzi kuti abasikila kabalyiibide.

13 Alubo nchechi chimwi nchindakabona aansi aano chili atala abusongo alubo chakandibotezya: 14 Kwakali muunzi muniini wakali aabaalumi bache mpawo kwakasika mwaami uuli aamanguzu kuti awulwane. Wakawuzyunguluka alubo wakayaka muduli kuti awusinkile. 15 Mumuunzi ooyo mwakali mwaalumi uufwaba pesi kali musongo. Wakafutula muunzi abusongo bwakwe, pesi taakwe wakamuyeeya pe mwaalumi ooyo uufwaba. 16 Mpawo ndakalibuzya kuti: ‘Busongo buli kabotu kwiinda manguzu, pesi busongo bwamuntu uufwaba bulanyansigwa alubo majwi aakwe taaswiililwi pe.’

17 Kuswiilila majwi aamusongo aabeteme kulikabotu kwiinda kuswiilila kupopota kwamuntu weendelezya bafuba-fuba.

18 Busongo bulikabotu kwiinda zilwanisyo zyankondo, pesi sizibi uumwi ulakonzya kunyonyoona zintu zibotu zyiingi.