Joshuwa
21 Basilutwe bamaanda aamaLevi bakasika kuli Eliyezari mupayizi, Joshuwa mwana waNuni akuli basilutwe bamaanda aamisyobo ya-Israyeli, 2 mpawo bakaambuula aambabo kuShilo munyika yaKkenani kabati: “Kwiinda muli Mozesi, Jehova wakalayilila kuti tupegwe myuunzi yakukkala iili aamachezezyo aalubono lwesu.” 3 Nkinkaako, kwiinda mumalayilile aaJehova, ma-Israyeli bakapa maLevi myuunzi eeyi amachezezyo aayo kuzwa mulukono lwabo.
4 Chisale* chakawida mpuli zyakwaKkohati, amaLevi ibakali bana ba-Aroni mupayizi, bakapegwa myuunzi iili 13 kwiinda mukuuma chisale kuzwa kumusyobo waJuda, waSimiyoni awaBbenjamini.
5 Mpawo bamwi baKkohati boonse bakapegwa myuunzi iili kkumi kuzwa kumpuli zyamusyobo wa-Efremu, zyamusyobo waDani, azyahafu yamusyobo waManase.
6 BakwaGeshoni bakapegwa myuunzi iili 13 kuzwa kumpuli zyamusyobo wa-Isakkara, zyamusyobo wa-Asha, zyamusyobo waNafutali, azyahafu yamusyobo waManase muBbashani.
7 BakwaMerari bakapegwa myuunzi iili 12 kweendelana ampuli zyabo kuzwa kumusyobo waRubbeni, waGadi, awaZebbuloni.
8 Ma-Israyeli bakapa maLevi myuunzi eeyi amachezezyo aayo kwiinda mukuuma chisale, mbuli Jehova mbaakalayilila kwiinda muli Mozesi.
9 Ngaya mazina aamyuunzi njibakapegwa kuzwa kumusyobo waJuda awaSimiyoni, 10 yakapegwa bana ba-Aroni bamumpuli zyakwaKkohati zyamaLevi, nkaambo chisale chakasaanguna kuwida mbabo. 11 Bakabapa Kkiriyati-abba (Abba wakali wisi wa-Anakki), nkukwaamba Hebburoni chilawu chili aazilundu chaJuda amachezezyo aayo aayizyungulukide. 12 Pesi lusaka lwamuunzi atuunzi twawo bakazipa Kkalebbu mwana waJefune kuti zibe lukono lwakwe.
13 Bana ba-Aroni mupayizi bakapegwa muunzi wakuyubila kumuntu wajaya muntu nkukwaamba, Hebburoni amachezezyo aayo aLibbina amachezezyo aayo, 14 Jatiri amachezezyo aayo, Eshitemowa amachezezyo aayo, 15 Holoni amachezezyo aayo, Debbiri amachezezyo aayo, 16 Ayini amachezezyo aayo, Juta amachezezyo aayo aBbeti-shemeshi amachezezyo aayo—myuunzi iili musanu ayine kuzwa kumisyobo eeyi iibili.
17 Kuzwa kumusyobo waBbenjamini: Gibbiyoni amachezezyo aayo, Gebba amachezezyo aayo, 18 Anatoti amachezezyo aayo a-Alimoni amachezezyo aayo—myuunzi iine.
19 Myuunzi yoonse yakapegwa bana ba-Aroni bapayizi yakali 13 amachezezyo aayo.
20 Mpuli zyoonse zyakwaKkohati zyakasyaala aakati kamaLevi zyakapegwa myuunzi kuzwa kumusyobo wa-Efremu kwiinda mukuuma chisale. 21 Bakabapa muunzi wakuyubila kumuntu wajaya muntu nkukwaamba, Shekkemu amachezezyo aayo muchilawu chili aazilundu cha-Efremu, Gezeri amachezezyo aayo, 22 Kkibbizayimu amachezezyo aayo, aBbeti-horoni amachezezyo aayo—myuunzi iine.
23 Kuzwa kumusyobo waDani: Elitekke amachezezyo aayo, Gibbetoni amachezezyo aayo, 24 Ayijaloni amachezezyo aayo, Gati-rimoni amachezezyo aayo—myuunzi iine.
25 Kuzwa kuhafu yamusyobo waManase: Taanakki amachezezyo aayo aGati-rimoni amachezezyo aayo—myuunzi iibili.
26 Myuunzi yoonse amachezezyo aayo njizyakapegwa mpuli zyoonse zyakasyaala zyamaKkohati yakali kkumi.
27 BakwaGeshoni bazwa kumpuli zyamaLevi bakapegwa muunzi wakuyubila kumuntu wajaya muntu nkukwaamba Golani iili muBbashani, amachezezyo aayo aBbeshitera amachezezyo aayo, kuzwa kuhafu yamusyobo waManase—myuunzi iibili.
28 Kuzwa kumusyobo wa-Isakkara bakapegwa Kkishiyoni amachezezyo aayo, Dabberati amachezezyo aayo, 29 Jamuti amachezezyo aayo, a-Eni-ganimu amachezezyo aayo—myuunzi iine.
30 Kuzwa kumusyobo wa-Asha bakapegwa Mishali amachezezyo aayo, Abbidoni amachezezyo aayo, 31 Helikkati amachezezyo aayo, aRehobbu amachezezyo aayo—myuunzi iine.
32 Kuzwa kumusyobo waNafutali bakapegwa muunzi wakuyubila kumuntu wajaya muntu nkukwaamba, Kkedeshi iili muGalili amachezezyo aayo, Hamoti-dori amachezezyo aayo, aKkatani amachezezyo aayo—myuunzi iitatu.
33 Myuunzi yoonse yakwaGeshoni kweendelana ampuli zyabo yakali 13 kuswaanizya amachezezyo aayo.
34 Mpuli zyakwaMerari, nkukwaamba maLevi boonse bakasyeede bakapegwa myuunzi eeyi kuzwa kumusyobo waZebbuloni: Jokkineyamu amachezezyo aayo, Kkata amachezezyo aayo, 35 Dimina amachezezyo aayo, aNahalali amachezezyo aayo—myuunzi iine.
36 Alubo kuzwa kumusyobo waRubbeni bakapegwa, Bbezeri amachezezyo aayo, Jahazi amachezezyo aayo, 37 Kkedemoti amachezezyo aayo, aMefaati amachezezyo aayo—myuunzi iine.
38 Kuzwa kumusyobo waGadi bakapegwa muunzi wakuyubila kumuntu wajaya muntu nkukwaamba, Ramoti iili muGiliyadi amachezezyo aayo, Mahanayimu amachezezyo aayo, 39 Heshibboni amachezezyo aayo, aJazeri amachezezyo aayo—myuunzi iine.
40 Myuunzi yoonse yakapegwa bakwaMerari kweendelana ampuli zyabo, nkukwaamba mpuli zyoonse zyakasyaala zyamaLevi, yakali myuunzi iili 12.
41 Myuunzi yoonse yamaLevi yakali aakati kalukono lwama-Israyeli yakali 48 kuswaanizya amachezezyo aayo. 42 Muunzi umwi awumwi wakali aamachezezyo aawo aawuzyungulukide—myuunzi yoonse eeyi mbuyakabede.
43 Nkinkaako, Jehova wakapa ma-Israyeli nyika yoonse njaakakonkezya kupa masianyinakulu, bakayibweza bakkala mulinjiyo. 44 Mukuyungizya, Jehova wakabapa kulyookezya mumabazu woonse mbuli mbaakakonkezya kumasianyinakulu, bakabazunda basinkondonyina boonse. Jehova wakabikka basinkondonyina boonse mukuboko kwabo. 45 Taakwe chisyomezyo nichiba chimwi* aakati kazisyomezyo zyoonse zibotu zyakatazuzikizigwa Jehova nzyaakasyomezya bamung’anda ya-Israyeli; zyoonse zyakazuzikizigwa.