May

Nikwakaba “nzala mpati munyika yoonse”, nzala eeyo teeyakabayinda kumbali pe maKkristu bamumwaanda wakusaanguna. Bazyali kweelede bakali kukataazikana kuti bakali kuyoochijana kuli chakulya kuti basanine mpuli zyabo. Bachikula nibakali kuyanda kuyungizya mulimu wabo wakukambawuka, kweelede bakali kukataazikana kuti bakali kuyoozichita biyeni. Amwi bakali kuyeeya kuti bakeelede kwiimikila mbichaani mpawo bazoosaangune nzala niyayinda. Kufumbwa zyiimo nzibakaswaana, maKkristu aaba bakapona kweendelana achiimo chakaliwo. Bakayinkilila kunembo kukambawuka kufumbwa mpubakali kukonzezya. Alubo bakabotelwa kwaabana zintu nzibakalaazyo abakombinyina bakali muJudiya. (Mil. 11:​29, 30) Aabo bakajana lugwasyo bakabona Jehova mbaakali kubagwasya. (Mt. 6:​31-33) Kweelede eezi zyakapa kuti bamvwanane loko abakombinyina bakali kubagwasya. Alubo kweelede kuti aabo bakatola lubazu mumulimu wakugwasilizya bakabotelwa akaambo kakupa.—Mil. 20:35. w23.04 16 ¶12-13

Chimwi chiindi, Jehova usandula nkombyo zyabakombi bakwe kwiinda mukubelesya bantu batamukombi pe. Muchikozyano, wakabelesya Mwaami Aritasasita kuti azumizye Nehemiya kuti abweede kuJerusalemu kuti akayiyakulule. (Neh. 2:​3-6) Nikuba mazubaano, Jehova ulakonzya kubelesya bantu batamukombi kuti batugwasye chiindi nituyanda kugwasigwa. Chimwi chiindi, nkombyo zyesu zilakonzya kutasandulwa munzila njitulangilila. Pesi nsandulo nzitujana zitugwasya kuti tukkale katusyomeka kuli Taateesu wakujulu. Nkinkaako, kkala kulangisisya akuyeeyesesya, ubone Jehova mbalikusandula nkombyo zyako. (Int. 66:​19, 20) Tweelede kutondeezya kuti tuli aalusyomo kwiinda mukukomba kuli Jehova akuzumina kuti ulazisandula nkombyo zyesu kazitakwe ndaba kuti watusandula munzila iili biyeni.—Heb. 11:6. w23.05 11 ¶13; 12 ¶15-16

Chiindi nitwakakomba kuli Jehova katulipeda kulinguwe, twakamusyomezya kuti tunookomba nguwe alikke akuti tunoochita kuyanda kwakwe. Tweelede kuchibamba chisyomezyo eechi. Kupona kweendelana akulipeda kwesu takumizyi pe nkaambo Jehova wakatulengela kuti tuchite kuyanda kwakwe. (Chi. 4:11) Jehova wakatulenga munzila yakuti tube aachiyandisyo chakumuziba akumukomba alubo wakatulenga muchikozyano chakwe. Eezi zipa kuti tuswene aafwiifwi anguwe akuti tubotelwe akaambo kakuti tuchita kuyanda kwakwe. Kuti twachita kuyanda kwaLeza akutobelezya Mwanaakwe, ‘tulalemununwa.’ (Mt. 11:​28-30) Nkinkaako, yinkilila kunembo kuyanda Jehova kwiinda mukuyeeyesesya atala azintu zibotu nzyaakakuchitila anzyaazookuchitila kunembo. Kuti wayungizya kuyanda Leza, kuyookuubila kuti umuswiilile. (1 Joh. 5:3) Jesu wakazwidilila kuchita kuyanda kwaLeza nkaambo wakali kukomba kulinguwe kakumbila kuti amugwasye alubo wakali kukkala kabikkila maanu kubulumbu mbwaakabikkilidwe kunembo. (Heb. 5:7; 12:2) Mbuli Jesu, komba kuli Jehova kuti akupe manguzu alubo ukkale kuyeeyesesya atala abulangilizi bwakuzoopona kukabe kutamani. w23.08 27-28 ¶4-5

Toonse tulabayanda bantu bali aamoyo mulamfu. Nkamboonzi? Nkaambo tulabalemeka bantu bali amoyo mulamfu chiindi nibalindila chimwi chintu kuti chichitike kabatanyemi. Tulabalumba bamwi kuti batutondeezya moyo mulamfu chiindi nitwapambanisya. Alubo tulabalumba bantu bakatuyiisya Bbayibbili nkaambo bakali aamoyo mulamfu nitwakali kweezya kumvwisisisya njiisyo zyamuBbayibbili, kuzitambula naakuti kuzibelesya. Kwiinda zyoonse, tulamulumba Jehova akaambo kakututondeezya moyo mulamfu. Nikuba kuti tuyanda kuti bamwi babe aamoyo mulamfu, chimwi chiindi iswe kulakonzya kutuyumina kuba aamoyo mulamfu. Muchikozyano, kulakonzya kutuyumina kuba aamoyo mulamfu chiindi nitulayinide mulayini ndamfu, kapati kuti katuli twanonoka. Tulakonzya kunyema kuti umwi watubuzya zintu nzitutayandi. Alubo chimwi chiindi kulakonzya kutuyumina kuti tukkale katulindila zisyomezyo Jehova nzyaakatusyomezya munyika mpya. Nikuba oobo, tweelede kuba amoyo mulamfu muzyiimo zyoonse eezi. w23.08 20 ¶1-2

Jehova wakabuzya Gidiyoni kuti asyaale aamasoja mache loko. Kulakonzeka kuti Gidiyoni wakali kulibuzya kuti, ‘Nkamboonzi nindeelede kusyaala aamasoja mache aali boobu? Ndiyoozwidilila na?’ Nikuba oobo, Gidiyoni wakaswiilila Jehova. Mazubaano, baalu balakonzya kutobelezya chikozyano chaGidiyoni kwiinda mukuswiilila chiindi nikwaba kuchincha. (Heb. 13:17) Gidiyoni wakaswiilila Jehova nikuba kuti wakali kuyoowa akuti nzyaakali kuyanda kusala zyakali kukonzya kumunjizya mumapenzi. (Bab. 9:17) Gidiyoni wakaba aachoonzyo chakuti Jehova wakali kuyoomugwasya kuti akwabilile bakombi bakwe nkaambo wakali wamusyomezya kuti uyoomugwasya takamulekelezyi pe. Baalu bakkala mumanyika mulimu wesu muukasigwa balikutobelezya chikozyano chaGidiyoni. Bali aachibindi kwiinda mukuzulwida kumiswaangano amumulimu wakukambawuka nikuba kuti balayoosezegwa, kubuzigwa-buzigwa, kumaninwa milimu naakuti kupenzegwa. Muchiindi chamapenzi mapati, baalu beelede kuyootondeezya chibindi kwiinda mukuswiilila malayilile ngibayoopegwa nikuba kuti kuchita oobo kulakonzya kuyoobanjizya mumapenzi. w23.06 5-6 ¶12-13

Jehova wakapa kuti makani awambuula atala aMupayizi Mupati Jehoyada alembwe kuchitila kuti tujane zyiiyo. (Rom. 15:4) Alubo chiindi Jehoyada naakafwa, Jehova wakamulemeka kwiinda mukupa kuti azikkilwe “mu Munzi wa Davida antoomwe abami akaambo kazintu zibotu nzyaakacita mu Israyeli alimwi akujatikizya Leza mwini-mwini aŋanda ya Leza.” (2 Mak. 24:​15, 16) Nkani yaambuula atala aJehoyada ilakonzya kutugwasya toonse kuti tuyoowe Leza. Bazulwida mumbunga balakonzya kutobelezya chikozyano chaJehoyada kwiinda mukuyanduula nzila zyakukwabilila butanga bwaLeza. (Mil. 20:28) Bachembeede balakonzya kujana chiiyo kuti bayoowa Jehova akukkala kabasyomeka, Jehova ulakonzya kubabelesya kuti azuzikizye makanze aakwe. Bachikula balakonzya kwiiya kuzwa kunzila Jehova njaakamujataayo Jehoyada akutobelezya Jehova munzila njabajataayo bakomena akubalemeka, kapati aabo baba aachiindi chilamfu kabakomba Jehova chakusyomeka. (Tus. 16:31) Toonse atugwasilizye “aabo balikuzulwida” aakati kesu, kwiinda mukubaswiilila.—Heb. 13:17. w23.06 17 ¶14-15

Nuli kumiswaangano, ziba chiindi chakutambika kuti usandule. Kuti katutambika loko, tulakonzya kupa kuti sikuchitisya kanoowaamba ndiswe kwaziindi zyiingi nikuba kuti bamwi ngatabanajana mweenya wakusandula pe. Eezi zilakonzya kubabbowa bamwi akupa kuti baleke kusandula. (Muk. 3:7) Kuti basikupupulula biingi kabatambika kuti basandule nikuchitwa chimwi chiiyo, tulakonzya kutajana mweenya wakuti tusandule kwaziindi zyiingi. Chimwi chiindi, sikuchitisya ulakonzya kutatwaamba pe kuti tusandule kusikila chimane chiiyo eecho. Eezi zilakonzya kutubbowa pesi tatweelede kunyema pe kuti zyatuchitikila. (Muk. 7:9) Kuti teewajana mweenya wakusandula kwaziindi zyiingi, ulakonzya kuswiilisisya bamwi nibanoosandula mpawo niyamana miswaangano ubalumbe akaambo kansandulo zyabo zisungwaazya. Bakwesu abachizi balasungwaazigwa kuti wabalumba mbuli mbubali kukonzya kusungwaazigwa aansandulo zyako kaansinga wajana mweenya wakusandula. w23.04 23-24 ¶14-16

Bala Jwi lyaLeza akuyeeyesesya atala anzubala. Kuti munsamu ukkale kuusimide, weelede kuba aamiyanda iinikide. Andiswe tulasima kuti lusyomo lwesu kalunikide muJwi lyaLeza. Chiindi munsamu nukomena, miyanda yawo nga iyoobubbila. Chiindi nitubala akuyeeyesesya, ngatuli kusimya lusyomo lwesu alubo ngatwaba aachoonzyo chakuti nzila zyaLeza zilagwasya chiindi choonse. (Kol. 2:​6, 7) Yeeyesesya atala amalayilile aJehova mbaakagwasya bakombi bakwe bachiindi ambaakabakwabilila akubazulwida. Muchikozyano, Ezekkiyele wakaswiilisisya chiindi ngilozi niyakali kumubuzya atala akupimwa kwatempele ndyaakabona muchilengaano. Chilengaano eechi chakamusimya loko Ezekkiyele alubo mazubaano chituyiisya kuti tukakatile kuzyeelelo zyaJehova zili atala abukombi bwakasimpe (Ezk. 40:​1-4; 43:​10-12) Andiswe tulakonzya kugwasigwa kuti twayeeyesesya atala azintu zinikide zili muJwi lyaLeza. Tulakonzya kuba aamoyo uukkalikene kwiinda mukusyoma Jehova amoyo woonse.—Int. 112:7. w23.07 18 ¶15-16

Bbayibbili lili aazikozyano zibotu zyabaalumi bachiniini nzukonzya kutobelezya. Baalumi aabo bakali kumuyanda Leza alubo bakali aamilimu iisiyene-siyene njibakali kuchita kuti bagwasye bakombi baLeza. Alubo ulakonzya kujana zikozyano zibotu zyabakwesu bakomena mubukombi mumpuli yanu naakuti mumbungano yanu. (Heb. 13:7) Alubo uli aachikozyano chimaninide chaJesu Kkristu nchukonzya kutobelezya. (1 Pet. 2:21) Chiindi nutanooyiye atala azikozyano eezi, langa buntu bubotu mbubakalaabo. (Heb. 12:​1, 2) Kuzwa waawo, ubone mbukonzya kubatobelezya baalumi aaba. Mwaalumi uuyeeya kabotu usaanguna kuyeeya katanachita zintu nzyayanda kuchita. Nkinkaako, beleka changuzu kuti ukkale kuyeeya kabotu. Saanguna kwiiya malayilile aamuBbayibbili alubo uyeeye kuti nga alakugwasya biyeni. Belesya malayilile aayo kuchitila kuti usale zintu zibotezya Jehova. (Int. 119:9) Njiyo ntaamu iiyandikana yakuti ube muKkristu uusimide mubukombi.—Tus. 2:​11, 12; Heb. 5:14. w23.12 24-25 ¶4-5

Bazyali balakonzya kuyiisya bana babo mbubakonzya kusandula bantu bakazya nzibasyoma kabali aamoyo uubombede (Jak. 3:13) Bamwi bazyali bakazichita eezi mukukomba kwampuli. Nga balanga nkani zikonzya kubukila bana babo kuchikolo, baambuuzyania mbubakonzya kusandula alubo nga babayiisya mbubakonzya kwaambuula munzila iibombede. Kujana chiindi chakupulakatizya mbukonzya kusandula iimwi mibuzyo kulakonzya kugwasya maKkristu kuti babe aachoonzyo chakuti zintu nzibasyoma nzyachoonzyo. Alubo kulabagwasya mbubakonzya kupandulwida bamwi twaambo tupa kuti basyome zintu nzibasyoma. Aachipanzi chijanika aajw.org chitii, “Bakubusi Balabuzya” chiswaanizya mapepa aakulembela aabachikula. Mapepa aayo akapangilwa kuti agwasye bachikula kuti babe aachoonzyo chakuti zintu nzibasyoma nzyachoonzyo akubagwasya kuti balibambile nsandulo mumajwi aabo. Kulanga-langa zyiiyo zili muchipanzi eechi katuli mpuli, kulatugwasya toonse kuti twiiminine lusyomo lwesu katuli aamoyo uubombede. w23.09 17 ¶10; 18 ¶15-16

Keuli zipeekezyo zyamubukombi na nzwaakasala zilikukuyumina kuzuzikizya? Kuti kakuli boobo, tuli aawulikke pe. Muchikozyano, Philip wakali kuyanda kuti kakombela zintu ziyandikana akuti kakomba kwaziindi zyiingi pesi kwakali kumuyumina kujana chiindi chakukomba. Erika wakakanza kuti kafwambaana kusika kumiswaangano yamulimu wakukambawuka, pesi wakali kunonoka kumiswaangano yoonse. Kuti kuli aachipeekezyo nchutanazuzikizya, utalengwaani pe. Nikuba kuzuzikizya zipeekezyo ziniini kuyanda chiindi akubeleka changuzu. Kubeleka changuzu kuti uzuzikizye chipeekezyo chako kutondeezya mbubusimide bweenzinyokwe aJehova akuti uyanda kuchita zintu zipa kuti abotelwe. Jehova ulabotelwa akubeleka changuzu nkuchita. Talangilili kuti uchite zintu nzutakonzyi kuchita pe. (Int. 103:14; Mik. 6:8) Nkinkaako, kanza kuchita zintu zyeendelana aachiimo chako. w23.05 26 ¶1-2

Bantu bali aachibindi balakonzya kuyoowa pesi kuyoowa ooko takubakachizyi kuchita zintu zilikabotu. Daniyele wakali mulombe wakali aachibindi alubo wakali kubala malembe aabapolofita baLeza, aaswaanizya bupolofita bwaJeremiya. Chiindi naakali kubala malembe aayo, Daniyele wakabona kuti nikuba kuti maJuda bakali mubuzike kwachiindi chilamfu kuBbabbiloni pesi bakali baba aafwiifwi kwaangununwa. (Dan. 9:2) Kubona bupolofita oobu kabulikuzuzikizigwa kwakapa kuti Daniyele amusyome Jehova. Alubo aabo basyoma Leza chakumaninina balayungizya kuba aachibindi. (Kozyanisya Baroma 8:​32, 37-39.) Kwiinda zyoonse, Daniyele wakali kukkala kakomba kuli Wisi wakujulu. (Dan. 6:10) Wakalyaambilila zibi zyakwe kuli Jehova, alubo wakamubuzya mbaakali kulimvwa. Wakakumbila kugwasigwa aaJehova. (Dan. 9:​4, 5, 19) Daniyele wakali muntu mbuli ndiswe, taakazyalwa kali aachibindi pe pesi wakabubelekela biya buntu oobu kwiinda mukubala, kukomba akusyoma Jehova. w23.08 3 ¶4; 4 ¶7

Kuswiilila beendelezi kugwasya ndiswe abamwi. Nkamboonzi? Nkaambo kupa kuti tutaswaani mpindu zitali kabotu nzibaswaana bantu bataswiilili mulawu. (Rom. 13:​1, 4) Kuswiilila nkutuchita kupa kuti bapati bamfulumende bababone munzila iilikabotu Bakamboni baJehova boonse. Muchikozyano, minyaka yayinda kuNigeria, masooja bakanjila muNg’anda yaBwaami kakuli kuchitwa miswaangano, bakali kuyanduula bantu bakali kupapila mfulumende akukaka kubbadala mitelo. Pesi mupati wamasooja wakabuzya masoojanyina kuti bazwe muNg’anda yaBwaami, kaamba kuti: “Bakamboni baJehova mbiibantu bataleki pe kubbadala mitelo.” Chiindi choonse nituswiilila milawu, nga tulikupa kuti bakombi baJehova babe aampuwo mbotu. Alubo mpuwo eeyo, ilakonzya kuzookwabilila bakombima muchiindi chilikunembo. w23.10 9 ¶13

Bamwi bakombi baJehova baba aachiindi chilamfu kabali kulindila kuti nyika eeyi mbi inyonyoonwe. Kweendelana amaboneno aabantu, chisyomezyo eechi chibonekaanga chanonoka kuzuzikizigwa. Pesi Jehova ulizi kuti mbubalimvwa bakombi bakwe. Wakabuzya mupolofita Habbakkukku kuti: “Cilengaano eeci ciyoocitika aciindi caco cibikkidwe, alimwi cifwambaanina kumamanino, eelyo tacikabeji pe. Nokuba kuti camuka, kozumanana kucilangila! Nkaambo ziyume zitete ciyoozuzikizyigwa. Tacikamuki pe!” (Hab. 2:3) Makani aaya abeleka kuli Habbakkukku kupela na naakuti alabeleka akulindiswe mazubaano? Kazulwidwa aamuuya uusalala, mwaapostoli Pawulu wakabelesya malayilile aaya kumaKkristu bali kulindila nyika mpya. (Heb. 10:37) Tulakonzya kuba aachoonzyo chakuti nikuba kuti chisyomezyo eechi chabonekaanga chanonoka pesi “ziyume zitete ciyoozuzikizyigwa. Tacikamuki pe!” w23.04 30 ¶16

Zilawusisya kuti ma-Israyeli biingi bakakaka bukamboni bwakali aantanganana bwakuti Jehova wakasala Mozesi kuti abe mwiiminini wakwe. (My 14:​10, 11) Kwaziindi zyiingi, teebakali kuzumina pe kuti Mozesi nguwe wakeelede kubazulwida. Eezi zyakapa kuti bakachilwe kunjila muNyika Yachisyomezyo. (My. 14:30) Nikuba oobo, bamwi ma-Israyeli bakaswiilila malayilile aaJehova. Muchikozyano, Jehova wakaamba kuti: “Kalebe . . . wazumanana kunditobela camoyo woonse.” (My 14:24) Jehova wakamulongezya Kkalebbu alubo wakamuzumizya kuti asale nyika njaakali kuyanda kukkala muKkenani. (Jos. 14:​12-14) Ma-Israyeli bakazumizigwa kunjila muNyika Yachisyomezyo ambabo bakatusiila chikozyano chilikabotu chakuswiilila malayilile aaJehova. Chiindi Joshuwa naakasalwa kuti azulwide ma-Israyeli, ma-Israyeli “bakamulemeka kapati mubuumi bwakwe boonse.” (Jos. 4:14) Eezi zyakapa kuti Jehova abalongezye kwiinda mukubapa nyika njaakabasyomezezye.—Jos. 21:​43, 44. w24.02 21 ¶6-7

Mbuli dokotela mbakonzya kujana makani atala achiimo chamoyo wesu kwiinda mukumvwa kuuma kwansinga, andiswe tulakonzya kujana aamwi makani aali atala ambubusimide bweenzuma bwesu aLeza kwiinda mukulanga mbutubayanda bamwi. Kuti twabona kuti luyando lwesu abakombima luyabutontola, nchitondeezyo chakuti luyando lwesu aLeza luyabutontola. Pesi kuti twayinkilila kunembo kuyanda bakombima, nchitondezyo chakuti luyando lwesu aLeza lulisimide. Kuti twabona kuti tatuchibayandi loko pe bakombima mbuli mbutwakali kuchita chiindi, tweelede kubambulula. Nkamboonzi? Nkaambo anguwe Jehova nga tatuchimuyandi mbuli mbutwakali kuchita chiindi. Mwaapostoli Johane wakakabikka aantanganana kaambo aaka chiindi naakalemba kuti: “Muntu uutayandi mukombinyina ngwabwene, takonzyi pe kuyanda Leza ngwatanabona.” (1 Joh. 4:20) Twiiyaanzi? Jehova ulabotelwa kuti “katuyandana.”—1 John 4:​7-9, 11. w23.11 8 ¶3; 9 ¶5-6

Naakachili muniini, Mwaami Jehowashi wakasala munzila iilikabotu. Nikuba kuti taakalikwe wisi pe, wakali kuswiilila malayilile ngaakali kubuzigwa aaMupayizi Mupati uusyomeka, Jehoyada. Mupayizi Jehoyada, wakayiisya Jehowashi mbuli kuti mwanaakwe. Jehowashi wakaswiilila nkaambo wakasala munzila yabusongo wakazulwida bukombi bwakasimpe alubo wakagwasya bantu kuti bakombe Jehova. Kuyungizya, Jehowashi wakachita mabambe aakuti tempele lyaJehova libambululwe. (2 Mak. 24:​1, 2, 4, 13, 14) Kuti kuli kuyiisigwa kuyanda Jehova akuti upone kweendelana azyeelelo zyakwe, ulikupegwa chipo chiyandikana loko. (Tus. 2:​1, 10-12) Bazyali bako balakonzya kukuyiisya munzila zisiyene-siyene. Kuti wabelesya malayilile aazwa muMagwalo, ulapa kuti bazyali bako babotelwe. Kwiinda zyoonse, ulapa kuti Leza abotelwe alubo ulakkala kuli aabweenzinyina busimide anguwe. (Tus. 22:6; 23:​15, 24) Zilaantanganana kuti eezi zipa kuti uyande kutobelezya chikozyano chaJehowashi naakali muniini. w23.09 8-9 ¶3-5

Jehova utusyomezya kuti ulaziswiilila nkombyo zyesu. Leza wesu ulabayanda bakombi bakwe basyomeka, nkinkaako, tasinki matwi pe chiindi nibakomba. (Int. 10:17; 37:28) Nikuba oobo, tazyaambi kuti ulatupa zintu zyoonse nzitukumbila. Chimwi chiindi nga kwayandikana kuti tulindile kusikila tukanjile munyika mpya kuti tuzoojane zimwi zintu nzitumukumbila. Jehova ulanga kuti zintu nzitumukumbila zyeendelana biyeni amakanze aakwe. (Is. 55:​8, 9) Makanze aakwe aambi ngakuti nyika izule bantu babotelwa alubo bajisini kabeendelezegwa aanguwe. Pesi Saatani wakaamba kuti bantu balazwidilila kuti kabalyeendelezya. (Matl. 3:​1-5) Kuti Jehova atondeezye kuti Dyabbulosi ulabeja, wakazumizya bantu kuti balyeendelezye. Pesi lino bweendelezi bwabantu bulikupa kuti tuswaane mapenzi miingi mazubaano. (Muk. 8:9) Tulizi kuti Jehova taagwisyi pe mapenzi woonse ngituswaana aachiindi eechino. w23.11 21 ¶4-5

Jehova wakasyomezya kuti kwiinda muli Abbrahamu, ‘zisi zyiingi’ zyakali kuyoolongezegwa. Nikuba oobo, Abbrahamu naakali waba aaminyaka iili 100 aSara naakali waba aaminyaka iili 90, chisyomezyo chakuti wakali kuzooba aamwana teechakayinazuzikizigwa pe. Kweendelana amaboneno aabantu, kwakali kubonekaanga tazichiti pe kuti Abbrahamu aSara babe aamwana. Eeli lyakali sunko kuli Abbrahamu. Pesi “akaambo kabulangilizi, wakali aalusyomo lwakuti uzooba wisi wazisi zyiingi.” (Rom. 4:​18, 19) Zintu nzyaakali kulangilila Abbrahamu zyakazoozuzikizigwa. Wakazooba aamwana ngwakali kulangilila kwaminyaka myiingi uutegwa Izakka. (Rom. 4:​20-22) Tulakonzya kutambulika kuli Leza akwaambwa kuti tuli balulami akuba beenzinyina mbuli Abbrahamu. Eezi wakazyaamba Pawulu mulugwalo lwakwe naakati: “Majwi aakuti ‘wakabonwa kuti,’ taakalembelwa nguwe kupela, pesi alatuswaanizya andiswe nituzoobonwa kuti tuliluleme nkaambo tulamusyoma Ooyo wakabusya Jesu Mwaami.” (Rom. 4:​23, 24) Mbuli Abbrahamu, tweelede kuba aalusyomo amilimu mpawo abulangilizi. w23.12 7 ¶16-17

Kuti waswaana sunko lipa kuti uyoowe, yeeya kuti Jehova ulilibwene sunko eelyo akuti ulizi mbulilikupa kuti ulimvwe. Muchikozyano, Jehova wakalibwene kuti ma-Israyeli bakali kujatwa munzila iitali kabotu ku-Ijipiti alubo wakali kwaabona “mapenzi” ngibakali kuswaana. (Kul. 3:7) Kuti waswaana sunko liyoosya, ulakonzya kutabona Jehova mbalikukugwasya. Kuti kakuli oobo, mukumbile kuti akugwasye kubona mbalikukugwasya. (2 Bam. 6:​15-17) Langa-langa mibuzyo iitobela: Kuli nkani na naakuti nsandulo yakapegwa kumiswaangano yambungano yakakusimya? Kuli bbuku, vidiyo naakuti lwiimbo lwaBroadcasting na lwakakusungwaazya? Kuli umwi na wakakubuzya majwi aasungwaazya naakuti wakakubalila lugwalo lusungwaazya? Tulakonzya kutazibona zintu nzibatuchitila bakombima naakuti kutachibona kachiyandikana chakulya chamubukombi nchitujana. Pesi zintu eezi nzipo ziyandikana zizwa kuli Jehova. (Is. 65:13; Mk. 10:​29, 30) Zitondeezya kuti Jehova ulakuyanda kukugama. (Is. 49:​14-16) Alubo zitondeezya kuti uyanda kuti umusyome. w24.01 4-5 ¶9-10

Kali waba aafwiifwi kuti abweede kujulu, Jesu wakayeezya basikwiiya bakwe kuti bakeelede kupa bukamboni atala anguwe “muJerusalema, muJudiya yoonse amuSamariya, kusikila kundawu zili kule loko zyanyika.” (Mil. 1:8; Lk. 24:​46-48) Muchiindi chifwiifwi chakatobela, beendelezi bachiJuda bakasunga mwaapostoli Petro aJohane mpawo bakabatola kuNkuta Mpati yamaJuda, bakabalayilila kuti baleke kukambawuka alubo bakali kubayoosezya. (Mil. 4:​18, 21) Petro aJohane bakaamba kuti: “Kuti kamubonaanga zilikabotu mumeso aaLeza kuswiilila ndinywe kwiinda kuti tuswiilile Leza, zyasyaalila kulindinywe. Pesi iswe tatukooleka pe kwaambuula atala azintu nzitwakabona anzitwakamvwa.” (Mil.4:​19, 20) Chiindi Petro aJohane nibakaangununwa, basikwiiya bakakomba kuli Jehova kabamubuzya kuti bayanda kuchita kuyanda kwakwe. Jehova wakayisandula nkombyo eeyo.—Mil. 4:31. w23.05 5 ¶11-12

Kwaminyaka myiingi, Jehova aMwanaakwe ngwayandisya bakali kutondeezyania luyando lupati. Mbabo kupela bapona kwaminyaka myiingi kabali kutondeezyania luyando. Mulugwalo lwasunu , Jehova wakaamba mbamuyanda Jesu. Jehova wakali kukonzya kwaamba kuti: ‘Ooyu ngunguwe uundibotezya.’ Pesi Jehova wakali kuyanda kuti tuzibe mbamuyanda Jesu, nkinkaako, wakamwaamba, kuti “Mwanaangu uuyandwa.” Jehova wakali kubotelwa loko anzyaakali kuchita Jesu, ikapati naakalipeda kuti afwe. (Ef. 1:7) Alubo Jesu taakwe naakazumbuuzya pe kuti Wisi ulamuyanda na. Wakali aachoonzyo chakuti Wisi ulamuyanda amoyo woonse. Kwaziindi zyiingi, wakaamba kali aachoonzyo kuti Wisi ulamuyanda.—Joh. 3:35; 10:17; 17:24.w24.01 28 ¶8

Atuteedi muntu nguyanda waamba zintu zibi atala anduwe. Pesi iwe ulizi kuti zintu eezyo nzyakubeja, nikuba oobo bamwi bazisyoma. Zyiinda kubija, bantu aabo basaanguna kubuzya bamwi zintu eezyo zyakubeja mpawo aabo banga babuzigwa ambabo bazisyoma. Ulamvwa biyeni? Manwa aayo alakonzya kukuchisa, teembubo na? Chikozyano eechi chitugwasya kumvwisisisya mbaakalimvwa Jehova chiindi naakabejelezegwa. Saatani wakaamba manwa atala aLeza kumwanakazi wakusaanguna, Eva. Eva wakaasyoma manwa aayo. Manwa aayo akapa kuti bazyali besu bakusaanguna bapapile Jehova. Eezi zyakapa kuti bantu boonse babe aachibi akuti bafwe. (Matl. 3:​1-6; Rom. 5:12) Mapenzi woonse aali munyika, lufu ankondo zyakabawo akaambo kamanwa ngaakaamba Saatani. Zilaantanganana kuti kubejelezegwa nkwaakachitwa Jehova amapenzi aakayetwa akaambo kakubejelezegwa zilamuchisa. Pesi Jehova taakatwaangila nkoto pe. Bbayibbili lyaamba kuti, ‘nguLeza uubotelwa.’—1 Tim. 1:11. w24.02 8 ¶1-2

Niinzi nzukonzya kuchita kuti utobelezye chikozyano chaJosefa? Ulakonzya kusala nzutazoochite lino kuti wazooswana sunko. Yiya kufwambaana kutantamuka zintu nzyazonda Jehova alubo utayeeyi atala anzizyo. (Int. 97:10; 119:165) Kuti wachita oobo, tuzoochiti chibi pe kuti wasunkwa. Kulakonzeka kuti ulizi kuti wakajana kasimpe akuti uyanda kubelekela Jehova amoyo woonse, pesi, amwi kuchili chimwi chintu chili kukukachizya kuti ulipede akuti ubbabbatizigwe. Ulakonzya kuyeeyesesya atala achikozyano chaMwaami Davida. Ulakonzya kukombelezya Jehova kumubuzya kuti: “O Leza, kondilanga-langa, uuzyibe moyo wangu. Kondilingula, wiizyibe mizeezo iindilibilisya. Kobona naa mukati kangu kuli nzila iili yoonse mbyaabi, alimwi kondeenzya munzila iiliko lyoonse mane kukabe kutamani.” (Int. 139:​23, 24) Jehova ulongezya aabo “bamuyanduula amoyo woonse.” Kubeleka changuzu nkuchita kuti ulipede akuti ubbabbatizigwe kutondeezya Jehova kuti ulikumuyanduula amoyo woonse.—Heb. 11:6. w24.03 6 ¶13-15

Mupayizi mupati wakali kwiiminina bantu kunembo lyaLeza. Mupayizi mupati wakusaanguna wama-Israyeli, Aroni, wakasalwa aaJehova chiindi tente lyakukombela nilyakali kupedwa. Nikuba oobo, mwaapostoli Pawulu wakapandulula kuti, “biingi bakali kusiilana bupayizi nkaambo lufu lwakali kubakachizya kuti bayinkilile kunembo kabali bapayizi.” (Heb. 7:​23-26) Mbukunga bapayizi bapati aabo teebakamaninide pe, bakeelede kupa zipayizyo zyazibi zyabo. Eezi nzizyo zipa kuti kube musiyano mupati aakati kabapayizi bapati bama-Israyeli aMupayizi Mupati, Jesu Kkristu. Mbuli Mupayizi wesu Mupati, Jesu Kkristu ‘mubelesi . . . mutente lyachoonzyo, lyakayimikizigwa aaJehova kutali amuntu pe.’ (Heb. 8:​1, 2) Pawulu wakapandulula kuti “akaambo kakuti [Jesu] unooli muumi kukabe kutamani, bupayizi bwakwe tabusiilanwi pe.” Pawulu wakayungizya kuti Jesu mupayizi mupati “uusalala, wakaanzaanisigwa kuli basizibi” alubo kusiyana abapayizi bapati bama-Israyeli, “ooyu tayandikani kuti ape zipayizyo buzuba abuzuba” zyazibi zyakwe. w23.10 26 ¶8-9

“Julu lyachiindi” lyaamba mfulumende zyabantu zyeendelezegwa aaSaatani amadimoni aakwe. (Mt. 4:​8, 9; 1 Joh. 5:19) Mbuli mbulibelesedwe muBbayibbili, bbala liti ‘nyika’ lilakonzya kwaamba bantu bakkala aanyika. (Matl. 11:1; Int. 96:1) Nkinkaako, ‘nyika yachiindi’ yaamba bantu bachita zibi mazubaano. Jehova takabambululi “julu” “anyika” ziliwo mazubaano pesi uyoozinyonyoona. Kuzwa waawo, uzoobikka “julu pya anyika mpya,” zyaamba kuti mfulumende mpya iyooyendelezya bantu baluleme. Jehova uyoopa kuti nyika ibe mpya akuti bantu bamaninine. Mbuli mbaakaamba Isaya, nyika iyooba mbuli mbuwakabede muunda wa-Edeni. Uyoopa kuti toonse tukabe bapya. Uyooponia balemene, bataboni abatamvwi kumatwi alubo bafwide bayoobusigwa.—Is. 25:8; 35:​1-7. w23.11 4 ¶9-10

“Mapenzi mapati” azoosika katutayeeyeli. (Mt. 24:21) Mapenzi mapati alisiyene amapenzi aalichitikila akaambo kakuti tulizi kuti azoosika. Minyaka iisika ku2 000 yayinda, Jesu wakachenjezya basikwiiya bakwe kuti balibambile buzuba bwamapenzi mapati. Kuti katulibambilide, kuyootuubila kuti tulisimye alubo tuyoogwasya bamwi kuti ambabo balisimye muchiindi eecho chiyumu. (Lk. 21:36) Tweelede kuyoolisimya kwiinda mukuswiilila Jehova katuli aachoonzyo chakuti uyootukwabilila. Tuyoochitaanzi kuti bakwesu basweekelwa zimwi zintu naakuti basweekelwa zintu zyoonse zyakumubili? (Hab. 3:​17, 18) Kuba aaluzyalo kuyoopa kuti tukakonzye kuyoobagwasya azintu nzibayandikana. Tuyoochitaanzi kuti zisi zyatubuzya kuti tukkale aabusena bumwi katuli aamwi abakwesu abachizi kwachiindi chilamfu? (Ezk. 38:​10-12) Kuba aaluyando kuyootugwasya loko muchiindi eecho chiyumu. w23.07 2 ¶2-3

Bakwetene balakonzya kwiiya kuzwa kuchikozyano cha-Akkwila aPulisila. Akkwila aPulisila bakali chikozyano chibotu loko kumaKkristu biingi bakusaanguna (Rom. 16:​3, 4) Bakali kubelekaamwi, kukambawukaamwi akugwasya bamwi kabalaamwi (Mil. 18:​2, 3, 24-26) Chiindi Bbayibbili nilyaamba atala a-Akkwila aPulisila, libaamba kabalaamwi. Bakwetene ngabalachitobelezya biyeni chikozyano chabo? Mulakonzya kuyeeya zintu nzimukonzya kuchita kamuli babili. Mulakonzya na kuchita milimu eeyi kamulaamwi kutali kuzichita kuli awulikke? Muchikozyano, Akkwila aPulisila bakali kuchita mulimu wakukambawuka kabalaamwi. Mulazichita na eezi chiindi choonse? Akkwila aPulisila bakali kubelekaamwi. Kulakonzeka kuti mubeleka milimu iisiyene, pesi mulakonzya na kuchita milimu yaang’anda kamulaamwi? (Muk. 4:9) Chiindi nimugwasyania kuchita uumwi mulimu, nga mwalimvwa kuti mulikubeleka kamuli timu alubo nga mwajana chiindi chakwaambuuzyania. w23.05 22-23 ¶10-12

Chimwi chiindi, toonse tulayoowa. Muchikozyano, Mwaami Sawulu naakali kumwaandila kuti amujaye, Davida wakasala kuchijila kumuunzi wamaFilisiti uutegwa Gati. Mwaami wakuGati uutegwa Akkisi wakamvwa kuti Davida wakali sinkondo ulaanguzu alubo wakali kulumbayizigwa mulwiimbo luti “wajaya makumi aazyuulu” zyamaFilisiti. Davida “wakayoowa kapati.” (1 Sam. 21:​10-12) Davida wakali kukataazikana kuti Mwaami Akkisi wakali kuzootyeni atala anguwe. Davida wakalizunda biyeni penzi lyakuyoowa? Muli Intembauzyo chaandaano 56, Davida wakaamba mbaakali kulimvwa chiindi naakali kuGati. Muntembauzyo eeyi, Davida wakaamba kaambo kakali kupa kuti ayoowe alubo wakaamba chintu chakamugwasya kuti azunde kuyoowa. Chiindi naakali kuyoowa, Davida wakasyoma Jehova (Int. 56:​1-3, 11) Wakali aatwaambo twakali kupa kuti asyome Jehova. Kagwasigwa aaJehova, Davida wakayeeya pulani yakali kukonzya kumugwasya njaakatayinachita pe mubuumi bwakwe. Wakachitaanga muntu uupengede alubo pulani eeyo yakazwidilila. Kwiinda kuti Akkisi abone Davida mbuli sinkondonyina, pesi wakabona kuti zintu nzyaakali kuchita Davida zyakali kumusesemya nkinkaako, Davida wakakonzya kuchija.—1 Sam. 21:13–22:1. w24.01 2 ¶1-3

Mbaani baambidwe mulugwalo lwabuzuba lwasunu? MaKkristu bananikidwe batazooyinke kujulu! Nkinkaako, chiindi maKkristu bananikidwe basyeede aanyika nibatazooyinke kujulu kumamanino aamapenzi mapati, mulimu wabo wakusaanguna ngwakulwana. Nibatazooyinke kujulu bayoobelekaamwi aKkristu angilozi zyakwe zisalala chiindi nibayoolwana basinkondonyina baLeza munkondo yamamanino. Yeeya atala azeezi. Bamwi maKkristu bananikidwe bachili aanyika bachembaala alubo bamwi tabachikwe nguzu pe. Pesi nibazooyinka kujulu, bayooba aanguzu alubo bayooba zilenge zyamuuya zitafwi, bayoobelekaamwi aMwaami Singuzu Jesu Kkristu. Nkondo ya-Amagedoni niyazoomana, bayoobelekaamwi aJesu Kkristu kuti bakagwasye bantu kuti bamaninine. Kabali kujulu, maKkristu bananikidwe bayoobagwasya loko bakwesu abachizi batanooli aanyika kwiinda nzibakali kuchita kabachili aanyika. w24.02 6-7 ¶15-16

Bamwi banga balibambila kulipeda akubbabbatizigwa ngabazooleka. Balakonzya kwaamba kuti: ‘Ani kuti ndazoochita chibi chipati mpawo ndigusigwe mumbungano?’ Kuti kuli uumwi wabo, baachoonzyo kuti Jehova ulakupa nzuyanda kuti ‘weende bweelede mbuli muntu uumukomba, umubotezye munzila iizwide.’ (Kol. 1:10) Alubo Jehova ulakupa manguzu aakuti uchite zintu zilikabotu. Wakazitondeezya kale eezi kuti ulakonzya kuzichita nkaambo wakagwasya bakombi bakwe biingi kuti bachite zintu zilikabotu. (1 Kor. 10:13) Eezi nzizyo zipa kuti kube bantu bache bagwisigwa mumbungano yachiKkristu. Jehova ulabagwasya bakombi bakwe kuti bakkale kabasyomeka kulinguwe. Akaambo kakuti tuli aachibi, muntu ulasunkwa kuti achite zintu zitali kabotu. (Jak. 1:14) Nikuba oobo, weelede kusala zyakuchita kuti wasunkwa. Kasimpe nkakuti nduwe nuusala buumi mbuyanda kupona. Pesi bamwi bantu nga baamba kuti tatukonzyi pe kulilesya kuchita zimwi zintu. Aaya manwa, muntu woonse ulakonzya kulilesya kuti atachiti zintu zitali kabotu. w24.03 5 ¶11-12