Nikuba Mazubaano Malayilile Aali muBbayibbele Achigwasya

MUYEYEELE EEZI: Atuteedi uyoobweendeenda mumiziyamu, iizwide zintu zyachiindi. Chiindi nuyoobweenda wabona kuti zyiingi zyazintu nzulikubona zyakakumbuuka akukwamuka-kwamuka alubo zimwi zyakkona zilidonkokede-donkokede. Mpawo wazoobona chimwi chisiyene azimwi, chisimide loko. Mpawo wabuzya muntu ulookumutondeezya zintu eezyo kuti: “Ani eechi nchichipya na kwiinda zimwi? Wakuvwiila kuti: Peepe eechi nchichachiindi kuli zyoonse eezi, alubo takwe nichakali chabambululwa pe.” Mpawo wabuzya kuti: “Ani chakali kwabililidwe na?” Sikukutondeezya wakusandula kati: Peepe eechi nchicho chakabbubbulwa aaguwo akuwidwa aamvula kwiinda zyoonse alubo kuli bantu bakali kuyanda kuchinyonyoona. Ulakonzya kugamba akulibuzya kuti, ‘Chintu eechi chipangidwe anyamaanzi?’

Munzila iikozyenie, Bbayibbele lili mbuli chintu eechiya chisiyene azimwi. Ndyachiindi loko kwiinda mabbuku miingi. Pesi kuli aambi mabbuku aachiindi loko. Mbuli zintu zilikumiziyamu zyakafwa, mabbuku aayo alaazintu zitacheendelani pe mazubaano. Muchikozyano, zintu zilembedwe mumabbuku aayo zili atala asayensi, tazicheendelani pe aluzibo lupya abukamboni buliwo mazubaano. Malayilile aali mumabbuku aayo aali atala abusilisi aboneka kuti alikubikka buumi bwabantu mupenzi kutali kuti abagwasye. Alubo bwiingi bwamabbuku aaya akasyaala tupanzi, zyiingi zyakanyonyooka.

Pesi Bbayibbele lilisiyene amabbuku aamwi. Lyakasaanguna kulembwa muminyaka iili 3 500 yayinda pesi takwe nilyakachinchwa pe. Nikuba kuti kwaminyaka myiingi bantu bakeezya kunyonyoona Bbayibbele kwiinda mukuliwumpa, kukazya mulumbe walyo naakuti kulilangila aansi, pesi makani alembedwe mukati taakwe naakachincha pe. Alubo zintu zilembedwe muBbayibbele tazikazyanyi pe aluzibo ndubabaalo bantu mazubaano.—Langa kabbokesi kati “Bbayibbele Talichibeleki Na Naakuti Lilikweendelana Aachiindi?”

MALAYILILE NGITWEELEDE KUTOBELEZYA MAZUBAANO

Ulakonzya kulibuzya kuti, ‘Njiisyo zyamuBbayibbele zichibeleka na mazubaano?’ Kuti ujane nsandulo yamubuzyo ooyo libuzye kuti: ‘Ngaali mapenzi ngibali kuswaana bantu mazubaano? Ngaali aayoosya loko?’ Chimwi chiindi ulakonzya kuyeeya atala ankondo, kusofwaazigwa kwamoya, milandu, naakuti kupapila. Kwalino atubone amwi malayilile aazwa muBbayibbele. Chiindi wanoolanga-langa malayilile aaya libuzye kuti, ‘Kuti bantu bapona kweendelana amalayilile aaya, nyika teeyali kunoobota na?’

KUYANDA LUUMUNO

“Balikkomene aabo baleta luumuno, nkaambo bayooitwa kuti mbana ba Leza.” (Matayo 5:9) “Kamusoleka kusikila mpomugolela kukkala muluumuno abantu boonse.”—Baroma 12:18.

LUZYALO AKULEKELELA

“Balikkomene aabo balaaluse, nkaambo bayoofwidwa luse.” (Matayo 5:7) “Amuzumanane kweengelelana akulekelelana camoyo woonse nokuba kuti umwi kajisi kaambo kakutongooka mweenzinyina. Mbubonya Jehovaa mbwaakamulekelela camoyo woonse, andinywe mweelede kucita mbubonya oobo.”—Bakolose 3: 13.

KUTASALUULANA

Leza “kuzwa kumuntu omwe wakalenga bantu ibali muzisi zyoonse kuti bakkale munyika yoonse.” (Milimo 17:26) “Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kilinguwe.”—Milimo 10:34, 35.

KWIIJATA KABOTU NYIKA

“Mpoonya Jehova Leza wakabweza muntu akumubikka mumuunda wa Edeni kutegwa kaulima akuulanganya.” (Matalikilo 2:15) Leza “uzoonyonyoona baabo banyonyoona nyika.”—Ciyubunuzyo 11:18.

KUZONDA BWAAMU AKUTANGALA

“Amucenjele akulikasya kubusyaacivwulemwangu buli boonse, nkaambo nokuba kuti muntu kajisi zintu zinji buti, ibuumi bwakwe tabuzwi kuzintu eezyo nzyajisi.” (Luka 12:15) “Bwaamu abusofwaazi bwamusyobo uuli woonse naa busyaacivwulemwangu tazyeelede nokuba kwaambwa akati kanu pe, mbubonya mbokweelede kubantu basalali.”—Baefeso 5:3.

KUSYOMEKA AKUBELEKA CHANGUZU

“Tuyanda kuti katusyomeka muzintu zyoonse.” (Bahebrayo 13:18) “Ooyo uubba atabbi limbi pe, muciindi cakubba abeleke mulimo canguzu.”—Baefeso 4:28.

MBUKUYANDIKANA KUGWASYA BAFWABA

“Amubaumbulizye aabo ibatyompedwe mumoyo, amubagwasye aabo ibatajisi nguzu, akubakkazikila moyo bantu boonse.” (1 Batesalonika 5:14) “Kulanganya bamucaala abamukabafwu mumapenzi aabo.”—Jakobo 1:27.

Bbayibbele talikwe mundando wamalayilile aazintu zyoonse pe pesi lilatugwasya kuti twaabone kayandikana malayilile aalyo akuti twaabelesye mubuumi bwesu buzuba abuzuba. Ubonaanga kuti bantu babelesya malayilile aambwa aajulu aawa mapenzi ngibaswaananaawo bantu taalikunoocheya na? Zilaantanganana kuti malayilile aali muBbayibbele alabeleka chiindi choonse. Njiisyo zili muBbayibbele kujana zyakugwasya biyeni lino?

MBUZIKONZYA KUKUGWASYA NJIISYO ZYAMUBBAYIBBELE MAZUBAANO

Mwaalumi musongo kwiinda boonse wakaamba kuti: “Busongo bulabonwa kuti buliluleme kwiinda mumilimo yambubo.” (Matayo 11:19) Majwi aaya ngachoonzyo. Muntu uboneka kuti musongo kwiinda muzintu nzyachita. Nkinkaako, ulakonzya kulibuzya kuti, ‘Kuti Bbayibbele kalili lyachoonzyo, lilakonzya na kundigwasya mubuumi? Nga lilandigwasya biyeni mumapenzi ngindiswaananaawo?’ Atubone chikozyano chitobela.

Delphine,b wakali kupona buumi bubotu alubo wakali aazintu zyiingi pesi mukulaba kwaliso wakaswaanana amulongo wamapenzi. Mwana wakwe musimbi wakafwa. Lukwatano lwakwe lwakamana. Mali yakamana. Wakasika mpaakazoowamba kuti: “Ndakamaninwa nkaambo teendakachilikwe mwana, mwaalumi, amuunzi. Ndakalibona mbuli kuti tandichigwasyi pe kanditandichikwe manguzu pe abulangilizi.”

Kuzwa chiindi, Delphine taakaazi pe majwi aaya aakuti: “Imyaka yabuumi bwesu ili buyo 70, naa 80, ikuti muntu kali muyumu kapati. Pele yoonse izwide buyo mapenzi amause; ilafwambaana kumana, eelyo tulauluka.”—Intembauzyo 90:10.

Delphine wakasaanguna kubala Bbayibbele chiindi naakali muchiimo chiyumu. Bbayibbele lyakamugwasya munzila iigambaya loko. Mbuli mbututabone muzyiiyo zitatu zitobela, bantu biingi bakagwasigwa loko aBbayibbele chiindi nibakabelesya malayilile aalyo kumapenzi ngibakali kuswaana mubuumi. Bakasika mpubakabona kuti Bbayibbele lilikozyenie achintu eechiya chiboneka kabotu chaambwa kumatalikilo. Lilisiyene amabbuku amwi anga tachibeleki pe mukuya kwachiindi. Eezi zyaamba kuti Bbayibbele lipangidwe azintu zisiyene na aamwi mabbuku? Lijisi mizeezo yaLeza na naakuti yamuntu?—1 Batesalonika 2:13.

Chimwi chiindi anduwe wakazibona kuti buumi mbufwiifwi alubo buzwide mapenzi. Chiindi nwaaswaanana amapenzi nkuukuli nkukonzya kujana luumbulizyo, lugwasyo amalayilile aagwasya?

Atulange-lange nzila zitatu oomo Bbayibbele mulikonzya kukugwasya mubuumi bwako. Lilakonzya kukuyiisya mbukonzya

1. kuchenjelela kuti utanjili mumapenzi.

2. kubambulula kutamvwanana.

3. kulisimya kuti waswaanana aazyiimo nzutakonzyi kuchincha.

Zyiiyo zitobela ziyoowambuula atala anzila eezi zitatu.