Kuti Kwachitika Mapenzi Aalichitikila

“Zintu zyoonse nzitwakalaazyo nizyakanyonyoonwa aamadaka aakakolomoka kuzwa aachilundu, twakalimvwa katutachikwe bulangilizi pe.”—Andrew wakuSierra Leone.

“Nilyakiinda guwo pati lyakali aamvula, twakabweeda nkutwakali kukkala. Twakakujana zintu zyoonse zyanyonyooka. Eezi zyakatumana manguzu. Mwanaangu musimbi wakalila loko.”—David wakuVirgin Islands.

KUTI kamuli mwakafutuka nikwakachitika mapenzi aalichitikila, mulakonzya kumvwisisisya mbubalimvwa bamwi bakachitikilwa mapenzi aali boobo. Bantu aaba balimvwa kabayoowede, kabatabikkilwi maanu, kabakataazikene alubo balota zintu ziyoosya. Bamwi bakafutuka kumapenzi aali boobu nga bamana manguzu alubo nga balombozya kufwa.

Kuti kuli wakasweekelwa zintu zyiingi akaambo kamapenzi aalichitikila, ulakonzya kulimvwa kutachikwe bulangilizi. Ulakonzya kubonaanga buumi tabuchigwasyi pe. Nikuba boobo, Bbayibbele lilakonzya kukugwasya kuti ubone kuti buumi bulayandikana alubo lilakonzya kukupa bulangilizi bwabuumi bulikabotu kunembo.

BBAYIBBELE LILAKONZYA KUKUGWASYA KUTI UBE AABULANGILIZI

Lugwalo lwa Mukambausi 7:8 lwaamba kuti: “Mamanino aamakani mabotu kwiinda matalikilo.” Nkinkaako, chiindi nuli mumapenzi ulakonzya kubonaanga buumi tabugwasyi pe pesi kuti wabeleka changuzu ulakonzya kupa kuti buumi bwako busaangune kubota.

Bbayibbele lyakaambilizya kuti: “Tamukooyoomvwigwa . . . ijwi lyakulila niliba ijwi lyakupenga” naakuti lyakukataazikana. (Isaya 65:19) Majwi aaya ayoozuzikizigwa kwaakweendelezya Bwaami bwaLeza, nyika kayili yaba Paradayizi. (Intembauzyo 37:11, 29) Mapenzi aalichitikila ayoomana alubo bantu tabachikakataazikani atala amapenzi aakabachitikila nkaambo Leza Singuzuzyoonse wakatusyomezya kuti: “[Zintu] zyakusaanguna tazikooyooibalukwa limbi nikuba kuyeeyegwa.”—Isaya 65:17.

Mulengi wesu wakasyomezya kuti kwaakweendelezya mfulumende yakwe uyootupa ‘buumi bulikabotu kunembo.’ (Jeremiya 29:11) Kuziba makani aaya kulakonzya kukugwasya kuti ubone kuti buumi bulagwasya. Sally waambwa kuchiiyo chakusaanguna wakaamba kuti: “Kuyeeya atala azintu zibotu nzituyoochitilwa kunembo kwaakweendelezya Bwaami bwaLeza, kupa kuti tutalikataazyi atala azintu zyakachitika musule pesi kupa kuti tulangane aazintu zilikuchitika aachiindi nchicheecho.”

Utaleki kwiiya zyiingi atala azintu zibotu nzibayoojana bantu kwaakweendelezya Bwaami bwaLeza. Nikuba kuti wakaswaana mapenzi aalichitikila, kwiiya zyiingi atala aBwaami bwaLeza kuyookugwasya kuti uzumanane kulindila chiindi chili kunembo mapenzi aalichitikila nayoomana. Nikuba boobo, Bbayibbele lilakonzya kukugwasya kuti ulisimye nikuba kuli mupenzi. Atubone zimwi zikonzya kutugwasya.

Mavesi AamuBbayibbele Aakonzya Kukugwasya

Weelede kujana chiindi cheelede chakulyookezya.

‘Kulyookezya nkubotu kwiinda maanza aabili aazwide milimu iikataazya iitakkutyi moyo.’—Mukambausi 4:6.

Basikuyanduulisisya bakaamba kuti, “kuti muntu wakachitikilwa penzi katajani chiindi cheelede chakoona, ulakonzya kukataazikana loko.” Nkinkaako, musamu wakuchesya kukataazikana nkujana chiindi cheelede chakulyookezya.

Buzya bamwi zilikukukataazya.

Kuusa naakuti “buusu bwamumoyo wamuntu bulamulemezya, pele ijwi ibbotu lilamusekelezya.”—Tusimpi 12:25.

Buzya umwi mumpuli naakuti mweenzinyokwe ngusyoma zilikukukataazya. Bamumpuli naakuti beenzinyokwe balakonzya kukuswiilila alubo balakonzya kukuumbulizya akukugwasya.a

Yeeya chiindi mapenzi nayoomana.

“Tulangila ijulu ipya anyika impya, mbubonya mbuli mbwaakatusyomezya [Leza]. Mulinzizyo momukala bululami.”—2 Petro 3:13.

a Kuti muntu waba aachiindi chilamfu kali kukataazikana weelede kwiinka kuchibbadela.