Jwi lyaLeza Lyakachinchwa Na?

Bamwi bantu babonaanga Jwi lyaLeza lyakachinchwa. Mupolofita lsaya wakaamba kuti Jwi lyaLeza “linooliko lyoonse.” (Isaya 40:8) Niinzi chikonzya kutugwasya kuti tube aachoonzyo chakuti Jwi lyaLeza teelyakachinchwa pe?

Leza ulaamanguzu aakukwabilila Jwi lyakwe akupa kuti litachinchwi. Chiindi basikukkopa nibakali kuyanda kukkopa malembe ngibajana, bakali kubala namba yamabala aali mumalembe aayo kuchitila kuti batayungizyi, batachinchi naakuti kusotoka amwi makani. Mbukunga bantu bali aachibi, chimwi chiindi basikukkopa kuli tumwi tuntu ntubakali kupambanisya.

NIINZI ZIPA KUTI TUBE AACHOONZYO CHAKUTI MAGWALO AASALALA TAAKACHINCHWA PE?

Kuli malembe aachiindi miingi loko aaMagwalo Aasalala. Nibakali kujana kuti limwi bbuku lyamalembe aachiindi lilisiyene mbichaani aamwi malembe, bakali kulyeezyanisya aamwi malembe aachiindi kuti balembe makani aachoonzyo. Kuti ujane zyiingi langa chiiyo chiti, “Has the Bible Been Changed or Tampered With?” aawebbusayiti iitegwa jw.org.

Muchikozyano, atulange-lange malembe aayitwa kuti Mabbuku aaKupeta aakuLwizi Lufwide, akajanwa aabantu bachiArabbu mumabwe aali aafwiifwi aKulwizi Lufwide mu1947. Malembe aaya akali aachipanzi chaMagwalo Aasalala alubo akali aba aaminyaka yiinda ku2 000. Basyaabusongo bakeezyanisya malembe aachiindi aMalembe Aasalala ngitulaawo mazubaano. Bakajanaanzi?

Basyaabusongo bakajana kuti makani aajanika muJwi lyaLeza nditubelesya mazubaano alikozyenie amalembe aachiindi aakusaanguna.a Kubikkila maanu kukulanga-langa makani aachiindi kutondeezya kuti mulumbe waLeza uuli mukati teewakachinchwa pe. Eezi zipa kuti tube aachoonzyo chakuti Leza wakakwabilila Malembe Aasalala kusikila sunu.

Nkinkaako, tweelede kubala Jwi lyaLeza katuli aachoonzyo chakuti lili aamakani aakasimpe. Katuli aamuzeezo ooyu, atulange-lange zintu Leza nzyaakabuzya mapolofita.