Aajanika Makani aaKabbuku Kamuswaangano waBuumi Amulimu Wesu
MARCH 2-8
LUBONO LUZWA MUJWI LYALEZA | MATALIKILO 22-23
“Leza Mwini-mwini Wakasunka Abrahamu”
w12 1/1 23 ¶4-6
Nkamboonzi Leza Naakabuzya Abrahamu Kuti Akajaye Mwanaakwe?
Amuyeeyesesye majwi ngaakaamba Jehova naakabuzya Abrahamu kuti: “Kobweza mwanaako musankwa uuli alikke ngoyandisya kapati Izaka . . . ukamutuule kali cituuzyo cuumpwa.” (Matalikilo 22:2) Jehova wakaamba lzaka kuti mwana musankwa “ngoyandisya.” Jehova wakalizi kuti Abrahamu wakali kumuyandisya loko Izaka. Alubo niinzila Leza njaakali kumuyandaayo Jesu. Jehova wakali kumuyanda loko Jesu alubo wakazitondeezya eezi chiindi naakayindulula majwi aakuti “Mwanaangu ngweyandisya.”—Marko 1:11; 9:7.
Alubo Jehova wakakumbila Abrahamu kabelesya bbala lyakuti “[ikaka].” Umwi sikulanga-langa makani aamuBbayibbele wakaamba kuti bbala eeli litondeezya kuti “MWAAMI ulazibikkila maanu zyoonse nzyakumbila.” Chikumbizyo nchaakachita Jehova chakapa kuti Abrahamu achiswe moyo alubo eezi zyakali kutondeezya kuchiswa moyo Jehova nkwaakali kuyoomvwa chiindi naakali kuyoobona Mwanaakwe kali kupenzegwa akujayigwa. Zilaantanganana kuti Jehova zyakamuchisa loko.
Nikuba kuti nkuyumu kuyeeyela kuchita chikumbizyo Jehova nchaakabuzya Abrahamu pesi tweelede kuziba kuti Jehova taakazumizya kuti mukombi wakwe uusyomeka Abrahamu ajaye mwanaakwe. Taakapa Abrahamu kuti amvwe machise aakufwidwa mwana kwiinda mukupa kuti lzaka tajayigwi. Pesi Jehova taakalesya “Mwanaakwe mwini kupenga, pele wakamulekela kuti atufwide swebo toonse.” (Baroma 8:32) Nkamboonzi Jehova naakalipeda kuti kufwe mwanaakwe? Wakazichita “ikutegwa tukonzye kuba abuumi.” (1 Johane 4:9) Nzyaakachita Jehova zitondeezya kuti ulatuyanda. Eezi zipa kuti andiswe tumuyande loko.
w12 10/15 23 ¶6
Swiilila Leza Alubo Ugwasigwe Azisyomezyo Zyakwe
Kuti akonzye kugwasya bantu bali aachibi, Jehova wakali kukonka kabelesya majwi aakuti “‘Masimpe mebo mbondili muumi,’ mbwaamba Mwami Singuzuzyoonse Jehova.” (Ezk. 17:16) Bbayibbele litondeezya kuti Jehova wakakonka kwaziindi zyiinda ku40 muzintu zisiyene-siyene. Kulakonzeka kuti chikonke chizibinkene loko ncheechi nchaakachita aaAbrahamu. Kwaminyaka myiingi yakayinda, Jehova wakali wachita zizuminano zyiingi kuli Abrahamu zyakali kutondeezya kuti Lunyungu lwakasyomezedwe lwakali kuyoozwa kuli Abrahamu kwiinda mumwanaakwe lzaka. (Matl. 12:1-3, 7; 13:14-17; 15:5, 18; 21:12) Jehova wakasunka Abrahamu kwiinda mukumubuzya kuti achite chintu chiyumu loko chakuti ajaye mwanaakwe ngwaakali kuyandisya. Chakutawaya-waya, Abrahamu wakaswiilila, kali waba aafwiifwi kuti ajaye lzaka Leza wakamukasya. Mpawo Leza wakakonka kati: “Ndakonkezya lwangu . . . akaambo kakuti wacita cintu eeci alimwi tonookasya mwanaako musankwa, ngojisi alikke, ncobeni ndiyookulongezya alimwi ncobeni ndiyoovwuzya lunyungu lwako mbuli nyenyeezi zyakujulu, mbuli musenga wakunkomwe yalwizi, alimwi lunyungu lwako luyakwiibweza milyango yabasinkondonyina. Alimwi kwiinda mulunyungu lwako, masi oonse aamunyika ayoolongezyegwa akaambo kakuti waswiilila jwi lyangu.”—Matl. 22:1-3, 9-12, 15-18.
Kuyanduula Lubono muJwi lyaLeza
w16.02 11 ¶13
Jehova Wakamwaamba Kuti “Imulongwe Wangu”
Kabatanaanzaana ababelesi bakwe, Abrahamu wakati: “Amusyaale aano ambongolo, pele mebo amulombe ooyu tulaunka okuya kuyookomba, twamana tulapiluka kulindinywe.” (Matl. 22:5) Wakali kwambaanzi Abrahamu? Wakali kubejela babelesi bakwe na kuti bakali kuyoboolaamwi alzaka kazi kuti wakali kuyanda kuyoomujaya? Peepe. Bbayibbele lilatugwasya kumvwisisisya kuti nkamboonzi Abrahamu naakaamba oobu. (Bala Bahebrayo 11:19.) Abrahamu “wakasyomede kuti Leza wakali kukonzya kumubusya [lzaka] nokuba kuzwa kubafwu.” Abrahamu wakali kuchisyoma chisyomezyo chabubuke. Wakalizi kuti Jehova wakapa kuti we amukayintu wakwe babe aamwana nikuba kuti bakali bachembaala. (Heb. 11:11, 12, 18) Abrahamu wakabona kuti zintu zyoonse zilakonzeka kuli Jehova. Nkinkaako, wakali aachoonzyo chakuti kufumbwa chakali kuyoochitika mubuzuba oobo, Jehova wakali kuzoobusya lzaka. Abrahamu uleelela kwiitwa kuti “usyi wabaabo boonse bajisi lusyomo.”
it-1 853 ¶5-6
Kuziba
Kusala kuziba ziyoochitika. Leza usala kuziba ziyoochitika kunembo kuti kazyeendelana aazyeelelo zyakwe alubo kazyeendelana aazilembedwe muJwi lyakwe. Kusiyana amakani aazibinkene ali atala alyajuunza, mabbuku miingi atondeezya kuti Leza ulangisisya chiimo chamuntu mpawo wasikuchita nzyaasala kweendelana amuntu ooyo.
Lugwalo lwa Matalikilo 11:5-8 lutondeezya kuti Leza wakalanga aanyika kali kubona zintu zyakali kuchitika chiindi nikwakali kuyakwa ng’anda yaBbabbelo, mpawo Leza wakabweza ntaamu yakuti alesye mulimu ooyu kuti uyinkilile kunembo. Bubi nibwakavula muSodoma aGomora, Jehova wakabuzya Abrahamu (kabelesya bangelo) kuti akabone “naa kulila [ikwakamusikilide] nkwamasimpe akuti naa zibi zyayo zyaindila ncobeni. Ikuti naa takuli boobo, ndilazyiba.” (Mtl 18:20-22; 19:1) Leza wakaamba kuti ‘wakali wasala Abrahamu kuti abe mweenzinyina’ chiindi Abrahamu naakalipeda kujaya Izaka, Jehova wakati, “nkaambo lino ndazyiba kuti ulamuyoowa Leza, nkaambo tonoondikasya mwanaako omwe buyo.”—Mtl 18:19; 22:11, 12; kozyanisya a Ne 9:7, 8; Ga 4:9.
MARCH 9-15
LUBONO LUZWA MUJWI LYALEZA | MATALIKILO 24
“Izaka Mbakayandwiidwa Mwanakazi”
wp16.3 14 ¶3
“Inzya Ndilayanda”
Abrahamu wakabuzya Eliezeri kuti akonke kuchitila kuti atakasalili Izaka mwanakazi aakati kabanakazi bakuKkenani. Wakazichitilaanzi? Nkaambo bantu bakuKkenani teebakali kukomba Jehova Leza pe alubo teebakali kumulemeka pe. Abrahamu wakalizi kuti Jehova wakali kuyanda kubasubula bantu bakuKkenani akaambo kamichito yabo yakatali kabotu. Abrahamu taakali kuyanda pe kuti mwanaakwe Izaka akwate muntu wakatali kulijata kabotu. Alubo wakalizi kuti mwanaakwe wakali kuyoochita mulimu uuyandikana loko wakuzuzikizya zisyomezyo zyaLeza.—Matalikilo 15:16; 17:19; 24:2-4.
wp16.3 14 ¶4
“Inzya Ndilayanda”
Eliezeri naakali kubuzya mpuli yakulibaRebbekka wakaamba kuti naakasika aachikala aafwiifwi akuHarani, wakakomba kuli Jehova Leza. Wakakumbila Jehova kuti amugwasye kusala mwanakazi waIzaka. Wakazichita biyeni? Wakakumbila kuti musimbi wakali kuyookwatwa aaIzaka asike kuchikala. Naakali kuyoomukumbila maanzi aakunywa wakali kuyoomupa alubo wakali kuyoonywinsya nkamela zyakwe. (Matalikilo 24:12-14) Ngwani musimbi wakasika wakazoochita kweendelana achikumbizyo chakwe? NguRebbekka. Amuyeeyele Rebbekka mbaakalimvwa chiindi naakamvwa Eliezeri kalikubuzya bazyali bakwe atala ambaakamujana.
wp16.3 14 ¶6-7
“Inzya Ndilayanda”
Mumviki ziche zyakali zyayinda, Eliezeri wakali wabuzya Abrahamu mubuzyo wakuti: “‘Ino mbuti kuti musimbi ooyo akakake kuboola andime? Abrahamu wakasandula kuti: “Eeci ciyookwaangununa kucikonke cako.” (Matalikilo 24:39, 41) Mumpuli yaBbetueli, bakali kuzilemeka zyakali kusalwa aamuntu wachanakazi. Eliezeri wakali kuyanda kuziba kuti wakali kuyoozwidilila na kuti abweede kuKkenani kuseeni mpawo wakabuzya kuti bakali kuyooyinkaamwi na aRebbekka. Pesi bamumpuli yaRebbekka bakachili kuyanda kuti Rebbekka akkale kwamazuba aambi aali 10. Kumamanino, bakaamba kuti: “Atumwiite musimbi tumvwe mbwatiiambe.”—Matalikilo 24:58.
Aachiindi eechi Rebbekka wakeelede kusala zyakuchita. Wakali kuyoosala kuchitaanzi? Wakali kuyoosala kuswiilila wisi amunyandumaakwe kuti azumine kweenda aamuntu ngwatazi na naakuti wakali kuyoochibona kachili chilongezyo chizwa kuli Jehova? Chiindi naakaamba maboneno aakwe wakatondeezya kuti wakali walipeda kuchincha buumi bwakwe. Wakaamba kuti: “Inzya ndilayanda.”—Matalikilo 24:58.
Kuyanduula Lubono muJwi lyaLeza
wp16.3 12-13
“Inzya Ndilayanda”
Limwi zuba goko, naakazwa kuteka maanzi munongo, wakabona umwi mudaala wakazobuchijaana kaza kuli nguwe. Mwaalumi ooyo wakati kuli nguwe: “Ndalomba twaanzi tusyoonto munongo yako ndinywe.” Mwaalumi ooyo wakakumbila munzila yabulemu. Rebbekka wakazibona kuti mwaalumi ooyo wakali wazwa kule. Chakufwambaana, wakatula nongo yakwe mpawo wakapa mwaalumi ooyo maanzi aakunywa kutali aakuvwipa pesi miingi aatontolela. Alubo wakabona kuti mwaalumi ooyo wakali aankamela zili 10 zyakafugeme mpawo muchinywido chankamela temwakalikwe maanzi pe. Wakazibona kuti mwaalumi ooyo wakali kumulangisisya alubo Rebbekka wakalipeda kuti amugwasye kusikila mpakonzezya. Kuzwa waawo, wakati: “Azyalo nkamela zyanu ndilazitekela zyoonse kusikila zinywe zikkwane.”—Matalikilo 24:17-19.
Rebbekka wakazipa maanzi nkamela eezyo kusikila zyagondwa. Nkamela iimwi kuti kayilaanyota loko inywa malita aali 95. Kuti nkamela eezi zyoonse kazili zyakali aanyota loko zilaantanganana kuti Rebbekka wakabeleka changuzu kuti zyoonse zikkwane mbukunga zyakalaanyota. Wakalizi na kuti wakali kuyoobeleka kwachiindi chilamfu oobu? Peepe. Pesi wakalilipedelede kubeleka kusikila mpagolela kuti agwasye mwaalumi ooyo wakali wakomena. Mwaalumi ooyo wakazumina kugwasigwa. Wakali kumulangisisya chiindi naakali kubibilika kalikuteka akutulida maanzi muchinywido chankamela.—Matalikilo 24:20, 21.
wp16.3 13, ftn.
“Inzya Ndilayanda”
Kwakali kwaba goko. Bbayibbele taakwe mpulitondeezya pe kuti Rebbekka wakalibbizya kuchikala. Alubo taakwe nilyaamba pe kuti bamumpuli yakwe bakalilede chiindi Rebbekka naakatola chiindi chilamfu kuchikala naakuti kube muntu uumutobela kuti akalange kuti niinzi chamuchelezya.
wp16.3 15 ¶3
“Inzya Ndilayanda”
Kumamanino, zuba nditwasaanguna kwaamba kumatalikilo aachiiyo eechi lyakasika. Nibakasika aafwiifwi akuNegebbu, zuba kalili lyasekka lubaba, Rebbekka wakabona umwi mwaalumi kayobweenda musokwe. Mwaalumi ooyo wakali kuyeeyesesya. “Cakufwambaana wakaseluka ankamela njaakatantide,” kulakonzeka kuti wakaseluka nkamela kayitanafugama mpawo wakabuzya kuti: “Ino nguni mwaalumi uulya weenda kuzwa musyokwe uuboola kulindiswe?” Naakaziba kuti wakali Izaka, wakalisunga nduku kumutwe. (Matalikilo 24:62-65) Nkamboonzi naakalivumba? Wakali kutondeezya kuti ulamulemeka Izaka wakali kuyanda kumukwata. Mazubaano, bamwi balakonzya kubonaanga nzyaakachita Rebbekka tazichibeleki pe. Kwaamba choonzyo, baalumi abanakazi balakonzya kujana chiiyo chiyandikana loko chakulibombya kwaRebbekka. Kuli muntu na uutayandi kulibombya?
MARCH 16-22
LUBONO LUZWA MUJWI LYALEZA | MATALIKILO 25-26
“Esawu Wakawuzya Bupati Bwakwe”
it-1 1242
Jakkobo
Esawu wakali kuyandwa awisi, chiindi chiingi wakali kukkala musokwe akaambo kakuti wakali kuyandisya kuvwima pesi Jakkobo wakali “muntu uutakwe kampenda [Heb., tam], uukkala mumatente,” wakali kuyandisya zyakweembela alubo wakali kuyandwa aabayina. (Mtl 25:27, 28) Bbala lyachiHebrayo lyakuti tam lilabelesegwa kukupandulula bantu batambulika kuli Leza. Muchikozyano “bantu bafwide nyota yakutila bulowa balamusulaika muntu uunyina mulandu,” pesi Jehova utupa choonzyo chakuti muntu uutakwe kabala “uyooba muluumuno.” (Tu 29:10; In 37:37) Jobu wakaambwa kuti “mwaalumi uunyina kampenda [Heb., tam] alimwi mululami.”—Job 1:1, ftn, 8; 2:3.
Nkamboonzi Nitweelede Kulumba?
Zilawusisya kuti bamwi bantu baambidwe muBbayibbele, bakakachilwa kutondeezya kulumba. Muchikozyano, nikuba kuti Esawu wakakomezegwa abazyali bakali kuyanda Jehova akumulemeka pesi taakali kuzilumba pe zintu zisalala. (Bala BaHebrayo 12:16.) Kutalumba kwakwe kwakaboneka biyeni? Esawu wakafwambaana kuuzya bupati kumwanikaakwe Jakkobo akaambo kamusinza luzutu. (Matl. 25:30-34) Mukuya kwachiindi, Esawu wakalisola akaambo kakusala kwakwe. Pesi wakali watondeezya kuti taakali kuzilumba pe zintu nzyaakali aazyo, nkinkaako taakeelede kung’ung’una chiindi naakatajana chilongezyo chabupati.
it-1 835
Kuba Mutaanzi Kuzyalwa
Chiindi mwana mutaanzi wakali kulemekwa loko mumpuli alubo nguwe wakali kuzumizigwa kuti abe mutwe wampuli. Nguwe wakali kujana lubono lwawisi lwiingi kwiinda bamwi. (Dt 21:17) Mbukunga Rubbeni wakali mutaanzi kuzyalwa, Josefa wakamupa ndawu njakeelede kukkala chiindi nibakali kulya. (Mtl 43:33) Pesi chimwi chiindi muBbayibbele bana tabalembedwe kweendelana abupati bwabo. Bbayibbele lyaamba bantu kweendelana akuzibinkana kwabo naakuti kusyomeka kutali kuba mutaanzi kukuzyalwa.—Mtl 6:10; 1Mk 1:28; kozyanisya a Mtl 11:26, 32; 12:4; langa BIRTHRIGHT; INHERITANCE.
Kuyanduula Lubono muJwi lyaLeza
Mibuzyo Yabasikubala
Lino atululange-lange lubo lugwalo lwaBaHebrayo 12:16, lwaamba kuti: “Kutabi mwaamu naba muntu uutaluzi uuli mbuli Esawu, uwakauzya bupati bwakwe bwakuzyalwa kumutiba omwe wacilyo.” Majwi aaya atondeezyaanzi?
Mulugwalo oolu, mwaapostolo Pawulu taakali kwaamba atala aluzubo lwaMesiya. Wakali wabasungwaazya kale maKristu kuti ‘bazumanane kweenda munzila iiluleme.’ Eezi zyakali kuyoopa kuti ‘kutabi naba omwe muntu utakachilwe kujana luzyalo lwaLeza,’ pesi eezi zyakali kukonzya kuchitika kuti bachita bwaamu. (Heb. 12:12-16) Kuti bachita oobu bakali kuyooba mbuli Esawu. ‘Taakali kubikkila maanu kuzintu zisalala’ alubo wakachita zintu zitaluleme.
Esawu wakapona chiindi alubo wakali achilongezyo chakutuula zipayizyo. (Matl. 8:20, 21; 12:7, 8; Job. 1:4, 5) Pesi akaambo kakuti wakali amiyeeyo itali kabotu Esawu wakasweekelwa azilongezyo eezi akaambo kamusinza wanyangu. Amwi wakali kuyanda kuti mapenzi akaambidwe kuti ayoochitikila bana baAbrahamu atachitiki pe kulinguwe. (Matl. 15:13) Esawu wakachita zintu zitaluleme alubo taakabikkila maanu kuzintu zisalala kwiinda mukukwata banakazi babili bakatali kukomba Leza, eezi zyakabachisa bazyali bakwe. (Matl. 26:34, 35) Wakali siyene aJakkobo nkaambo Jakkobo wakakwata mwanakazi uyoowa Leza!—Matl. 28:6, 7; 29:10-12, 18.
it-2 245 ¶6
Kubeja
Nikuba kuti Bbayibbele litondeezya kuti kubeja takuyandikani pesi muntu tanooli wabisya pe kuti waamba makani aatali ngawo kubantu bateelede kuziba atala amakani aayo. Jesu Kristu wakaamba kuti: “Mutapi babwa zintu zisalala, nokuba kufwusila ngulube ngale zyanu, kutegwa zitazilyatauli mpoonya zimupilukile akumukwamauna.” (Mt 7:6) Eezi nzizyo zyakapa kuti chimwi chiindi Jesu ataambi makani aakkwene naakuti kwaamba nsandulo zyachoonzyo chiindi naakazi kuti zintu eezyo zyakali kukonzya kumunjizya mumapenzi. (Mt 15:1-6; 21:23-27; Joh 7:3-10) Nkinkaako, kutaamba makani aali ngawo nkwaakachita Abrahamu, lzaka aElisha kubantu batakombi Jehova, tatweelede kukubona kuti nkubisya pe.—Mtl 12:10-19; chaand 20; 26:1-10; Jos 2:1-6; Jak 2:25; 2Ba 6:11-23.
MARCH 23-29
LUBONO LUZWA MUJWI LYALEZA | MATALIKILO 27-28
“Jakkobo Wakapegwa Chilongezyo Chabupati”
w04 4/15 11 ¶4-5
Rebbekka Mwanakazi Uuyoowa Leza
Bbayibbele taakwe nilitondeezya kuti Izaka wakalizi kuti Esawu wakali kuyoobelekela Jakkobo. Pesi Rebbekka aJakkobo bakalizi kuti zilongezyo zyakali kuyoojanwa aaEsawu. Rebbekka wakafwambaana kubweza ntaamu chiindi naakamvwa kuti Izaka uyanda kulongezya Esawu, chiindi Esawu naakali kuyootola chakulya kuli wisi. Busongo mbwakalaabo kachili musimbi Rebbekka wakachilaabo. Nkinkaako, ‘wakabuzya’ Jakkobo kuti ayete bana bampongo babili. Kuzwa waawo, wakajikila mulumaakwe chakulya nchaakali kuyandisya loko. Mpawo Jakkobo wakeelede kuyoolichitaanga nguEsawu kuchitila kuti wisi amulongezye. Jakkobo wakakataazikana nkaambo wakali kuyoowa kuti wisi aaziziba kuti tee Esawu pe wakali kuyoomutuka. Pesi Rebbekka wakamukombelezya. Wakati: “Ikuti naa mboobo, andisinganizyigwe ndime muciindi canduwe mwanaangu.” Wakajika chakulya, wakabuzya Jakkobo kuti alichitaanga nguEsawu mpawo wakamubuzya kuti ayinke kuli Izaka.—Matalikilo 27:1-17.
Kaambo kakapa kuti Rebbekka achite oobo takaambidwe pe. Bantu biingi balazizonda nzyaakachita, pesi Bbayibbele talizizondi pe alubo taakwe nilitondeezya kuti Izaka wakanyema chiindi naakaziba kuti wakalongezya Jakkobo. Pesi wakabotelwa anzyaakachita. (Matalikilo 2729; 28:3, 4) Rebbekka wakalizizi zintu Jehova nzyaakapulofitide atala abana bakwe. Nkinkaako, wakafwambaana kubweza ntaamu kuchitila kuti Jakkobo ajane chilongezyo chakwe. Nzyaakachita Rebbekka zileendelana akuyanda kwaJehova.—Baroma 9:6-13.
w07 10/1 31 ¶2-3
Mibuzyo Yabasikubala
Bbayibbele talitwaambi pe twaambo twakapa kuti Rebbekka aJakkobo basale kuchita nzibakachita nikuba kuti bakazichita chachibukila mbuta. Bbayibbele taakwe nilisola zintu zyakachitwa aaRebbekka aJakkobo alubo taakwe nilyaamba kuti nzibakachita nkubeja. Pesi litugwasya kuti tube aamaboneno aalikabotu atala ankani eeyi.
Chakusaanguna, Bbayibbele litondeezya kuti Jakkobo nguwe wakeelede kulongezegwa aawisi kutali Esawu. Aachiindi eechi, Jakkobo wakali wawula bupati kumukulanaakwe wakatondeezya kutalumba chilongezyo chakuba mupati kwiinda mukuyanda kumana nzala luzutu. Esawu “wakacisampaula coolwe cakuba mutaanzi kuzyalwa.” (Matalikilo 25:29-34) Nkinkaako, kwakali kweelela kuti Jakkobo ayinke kuli wisi kuti akalongezegwe.
it-1 341 ¶6
Chilongezyo
Kweendelana amaponeno aabantu bachiindi, wisi wakali kulongezya bana bakwe kali waba aafwiifwi kuti afwe. Nkani eeyi yakali kuyandikana loko muchiindi eecho. Chiindi Izaka naakalongezya Jakkobo wakali kubonaanga ulikulongezya mwanaakwe mutaanzi Esawu. Izaka naakali kulongezya Jakkobo wakali kukumbila Jehova kuti amugwasye kuti azwidilile muzintu zyoonse nzyaakali kuyoochita mubuumi pesi Jakkobo wakali kubonaanga zilongezyo eezyo wakali kuzipa Esawu nkaambo taakachili kubona kabotu pe akaambo kakuchembaala. (Mtl 27:1-4, 23-29; 28:1, 6; Heb 11:20; 12:16, 17) Kuzwa waawo, Izaka wakamulongezya Jakkobo. (Mtl 28:1-4) Katanafwa, Jakkobo wakasaanguna kulongezya bana baJosefa babili naakazoolongezya bana bakwe. (Mtl 48:9, 20; 49:1-28; Heb 11:21) Mozesi katanafwa, alakwe wakalongezya chisi chaIsrayeli. (Dt 33:1) Zyoonse eezi zyakachitika zitondeezya kuti bakali kuzuzikizya bupolofita. Muli zimwi zyiimo, chiindi muntu naakali kuyanda kulongezegwa, sikulongezya wakali kubikka maboko aakwe mumutwe wamuntu ngwaakali kuyanda kulongezya.—Mtl 48:13, 14.
Kuyanduula Lubono muJwi lyaLeza
w06 4/15 6 ¶3-4
Mbukonzya Kuzwidilila Kwaambuuzyania Aangukwetenaawe
Izaka aRebbekka bakali kwaambuuzyania kabotu na? Chiindi Esawu naakakwata bana baHeti babili, mumpuli mwakaba kutamvwanana. Rebbekka wakayinkilila kunembo kabuzya lzaka kuti: “Lino buumi tabucindikkomanisyi akaambo kabana basimbi aaba bana ba Heti. Ikuti awalo Jakobo [mwanaabo muniini] akakwate bana ba Heti . . . , nkokuti inga cainda kubota kuti ndafwa buyo.” (Matalikilo 26:34; 27:46) Zilaantanganana kuti Rebbekka wakaamba mbaakali kulimvwa.
Izaka wakabuzya Jakkobo muyanganyina waEsawu kuti atazookwati musimbi wamuKkenani. (Matalikilo 28:1, 2) Rebbekka wakaangunuka kwaamba mbaakali kulimvwa. Izaka aRebbekka bakabelesya majwi aalikabotu chiindi nibakali kwaambuula atala ankani yakali kubakataazya mumpuli. Nkinkaako, bakatusiila chikozyano chilikabotu loko munkani eeyi. Niinzi nzibeelede kuchita bakwetene kuti kabali kukazyania? Niinzi chikonzya kubagwasya?
w04 1/15 28 ¶6
Makani Aazwa Mubbuku lyaMatalikilo—II
28:12, 13—Chiloto chaJakkobo ‘chamatantilo’ chakali kwiimininaanzi? ‘Matantilo’ aaya aakali kubonekaanga mabwe aayilinkene, akali kutondeezya kuti kuli kwaambuuzyania kuliwo aakati kabantu bali aanyika abangelo. Bangelo baLeza bakali kuzwa kujulu kabaza aanyika bakali kutondeezya kuti bakali kweeta mulumbe kubantu bakali kutambulika kuli Jehova.—Johane 1:51.
MARCH 30–APRIL 5
LUBONO LUZWA MUJWI LYALEZA | MATALIKILO 29-30
“Kukwata kwaJakkobo”
w03 10/15 29 ¶6
Jakkobo Wakali Kuzibikkila Maanu Zintu Zyabukombi
Chitondeezyo chakuti muntu uyanda kukwata chachoonzyo chakali chakusela bazyali bamwanakazi. Kweendelana aMulawu waMozesi, muntu wakali kuvumpila musimbi wakali kubbadala masekeli aansiliva aali 50. Sikulanga-langa makani aamuBbayibbele uutegwa Gordon Wenham wakaamba kuti: “mali yakali kugwisigwa aamuntu wavumpila muntu yakali nyingi loko” pesi muntu wakali kuyanda kukwata “wakali kugwisya mali nche kwiinda wavumpila.” (Deuteronomo 22:28, 29) Pesi Jakkobo takeelede kusela pe. Wakabelekela Labbani kwaminyaka iili 7. Wenham wakayinkilila kunembo kati: “Mbukunga babelesi kuBbabbiloni yachiindi bakali kupegwa hafu yasekeli naakuti sekeli mumweezi (bakali kupegwa masekeli aali 42 kusika ku84 muminyaka iili 7), kubeleka nkwaakali kuchita Jakkobo lwakali luselo lwakuti akwate Rakkele.” Labbani wakazumina kumupa Rakkele.—Matalikilo 29:19.
w07 10/1 8-9
Mukulana Amwanike Bakali Kulwana “Ibakayaka Ŋanda ya Israyeli”
Leya wakali kuyanda kweena Jakkobo na? Naakuti wakali kuyanda kuswiilila wisi? Achiindi eechi, Rakkele wakali kuli? Wakalizizi na zyakali kuchitika? Kuti kakuli boobo, wakalimvwa biyeni? Wakali kunoozuminana aazyakali kuyandwa aawisi na? Nsandulo zyamibuzyo eeyi tazijaniki pe muBbayibbele. Kufumbwa nzyaakayeeya Rakkele aLeya kujatikizya nkani eeyi, zyakachitika zyakamunyemya Jakkobo. Jakkobo wakabuzya Labbani kuti: “Sena tali Rakele ngondakali kubelekela kulinduwe? Ino wandicengela nzi?” Labbani wakasandula kati: “Kweelana acilengwa cakokuno, tacizumizyidwe kukwasya musimbi musyoonto mupati katanakwatwa. Kokkomana kwansondo yoonse amukaintu ooyu. Kwamana boobo uyoopegwa mukaintu awalo ooyu ngoyoobelekela myaka iimbi iili ciloba.” (Matalikilo 29:25-27) Zyakachitika zyakapa kuti Jakkobo akwate banakazi babili alubo zyakeeta kutamvwanana.
it-2 341 ¶3
Lukwatano
Pobwe. Mbukunga taakwe malayilile aatondeezya mbiyelede kuchitwa michado pesi chiindi chamalsrayeli bakali kuchita michado inoneezya loko. Mubuzuba mwamuchado, musimbi wakali kuchada wakali kulibambila kachili kulimbabo. Chakusaanguna, wakali kusamba akunana mafuta aanunkilila. (Kozyanisya a Ru 3:3; Ezk 23:40.) Wakali kugwasigwa ababelesi baang’anda kuti bamubotye-botye mbuuli kumuzwaatika gawuni lyeendelana amali njalaayo. (Je 2:32; Ciy 19:7, 8; In 45:13, 14) Alubo wakali kuzwaatikwa bulungu munsingo amalangu-langu. (Is 49:18; 61:10; Ciy 21:2) Gawuni ndyaakali kuzwaatikwa lyakali kuzwa kumutwe kusika kumawulu. (Is 3:19, 23) Eezi zitondeezya kuti nzizyo zyakapa kuti Labbani abejele Jakkobo kuti mwanakazi ngwaakamupede wakali Leya kutali Rakkele. (Mtl 29:23, 25) Rebbekka wakasunga nduku chiindi nakabona lzaka. (Mtl 24:65) Nzyaakachita Rebbekka, zyakali kutondeezya kuti wakali kubulemeka busilutwe bwamulumaakwe.—1Ko 11:5, 10.
Kuyanduula Lubono muJwi lyaLeza
it-1 50
Bana Bakujana
Rakkele aLeya bakali kubona bana bakazyalwa aaJakkobo ababelesi babo bachanakazi kabali bana ‘mbibakalizyalila.’ (Mtl 30:3-8, 12, 13, 24) Bana aabo bakali kozyenie abana Jakkobo mbaakazyala abanakazi bakwe. Wisi wabana aabo wakali Jakkobo, mbukunga babelesi bakazyede bana aabo bakali baba mpuli yaJakkobo, nkinkaako zyakali kweelela kuti Rakkele aLeya babone bana aaba kuti mbana babo bakulizyalila.
w04 1/15 28 ¶7
Makani Aazwa Mubbuku lyaMatalikilo—II
30:14, 15—Nkamboonzi Rakkele naakasala kutalala amulumaakwe kuti abweze mamandirake? Chiindi, muchelo wamunsamu wamamandirake wakali kubelesegwa kuti muntu wakali kuchiswa ajatwe ng’onzi kuti atamvwi kuchisa akwaangununa malambi akaangene. Alubo munsamu ooyu wakali kubelesegwa kuti muntu abe aachiyandisyo chakoonana akuti akonzye kubaada. (Lwiimbo lwa Solomoni 7:13) Pesi Bbayibbele talyaambi pe kuti nkamboonzi Rakkele naakali kuyanda mamandirake, kulakonzeka kuti wakali kuyeeya kuti ulakonzya kuba aada akuti ulaleka kusampawulwa akaambo kakutazyala. Nikuba boobo, wakakkala kwachiindi chilamfu, Jehova naakazoopa kuti “akonzye kumita.”—Matalikilo 30:22-24.