Tukomba Leza “Ulaaluse Kapati”

1. Niinzi chifwambaana kusika mumizeezo kuti wamvwa bbala lyakuti luse?

NIINZI chifwambaana kusika mumizeezo yesu kuti twamvwa bbala lyakuti luse? Nisimpe kuti biingi besu tufwambaana kuyeeya muntu ulaaluzyalo, ulaalweetelelo alubo uupa. Alubo tulakonzya kuyeeya lwaano lwaJesu luli atala amuSamariya mubotu. MuSamariya ooyo “wakamufwida luzyalo” muJuda wakali wawumwa aamasosi. Akaambo kakuti “wakamufwida luzyalo,” wakamulangania muJuda ooyo. (Lk. 10:29-37) Chikozyano eechi chituyiisya atala abuntu bubotu mbwalaabo Leza bwakuba aaluse. Leza ututondeezya luse nkaambo ulatuyanda alubo ulazitondeezya eezi buzuba abuzuba kwiinda muzintu nzyatuchitila.

2. Niinzi chimwi nchituyeeya kuti twamvwa bbala lyakuti luse?

² Kuli chimwi lubo nchituyeeya kuti twamvwa bbala lyakuti luse. Tuyeeya atala amuntu uusala kutasubula mweenzinyina nikuba keelela kupegwa chisubulo. Eezi nzizyo Jehova nzyalikuchita kulindiswe nkaambo sintembawuzyo wakaamba kuti: “Kunyina naatucitila kweelana azibi zyesu.” (Int. 103:10) Pesi chimwi chiindi Jehova ulakonzya kumupa chisubulo chipati muntu uunga wabisya.

3. Njiili mibuzyo njitutasandule muchiiyo eechi?

³ Muchiiyo eechi, tulasandula mibuzyo iitatu iiti: Nkamboonzi Jehova natutondeezya luse? Kuti Jehova wapa umwi muntu chisubulo chipati, nga ulikumutondeezya luse na? Niinzi chikonzya kutugwasya kuti tube aaluse? Atubone nsandulo kuzwa muJwi lyaLeza.

NKAMBOONZI JEHOVA NATUTONDEEZYA LUSE?

4. Nkamboonzi Jehova natutondeezya luse?

⁴ Jehova ututondeezya luse akaambo kakuti ulaaluyando. Mwaapostolo Pawulu wakazulwidwa kulemba kuti “Leza ulaaluse kapati.” Mulugwalo oolu, Pawulu wakali kwaamba kuti Leza uli aaluse nkaambo wakapa bantu bali aachibi bulangilizi bwakuyoopona kujulu, chaamba maKristu bananikidwe. (Ef. 2:4-7) Pesi luse ndwalaalo Jehova talugoleli kumaKristu bananikidwe luzutu. Sintembawuzyo Davida wakalemba kuti: “Jehova mubotu kuli boonse, alimwi luse lwakwe lulalibonya mumilimo yakwe yoonse.” (Int. 145:9) Akaambo kakuti Jehova ulabayanda bantu, ubatondeezya luse kuti kakuli kaambo kapa kuti achite oobo.

5. Nkamboonzi nitukonzya kwaamba kuti Jesu nguwe uuzi kabotu kuti Jehova uli aaluse kapati?

⁵ Jesu nguwe uuzi kwiinda bantu boonse kuti Jehova uli aaluse kapati. Nkamboonzi nitukonzya kwaamba oobo? Nkaambo Jehova aJesu bakalaamwi kujulu kwachiindi chilamfu Jesu katanaza aanyika. (Tus. 8:30, 31) Kwaziindi zyiingi, Jesu wakabona Wisi mbaakali kubatondeezya luse bantu bali aachibi. (Int. 78:37-42) Jesu naakali kuyiisya, wakali kukkala kaamba atala abuntu oobu bubotu mbwalaabo Wisi.

6. Jesu wakatugwasya biyeni kumvwisisisya luse ndwalaalo Wisi?

⁶ Mbuli mbutwakayiya muchiiyo chayinda, Jesu wakabelesya chikozyano chamwana mulombe kuti atugwasye kumvwisisisya kuti Jehova ututondeezya luse akaambo kakuti ulatuyanda. Mulombe ooyo wakazwa aamuunzi mpawo “wakaakusowaila [naakuti kusaanisya] lubono lwakwe kwiinda mukupona buumi bwakutalilemeka.” (Lk. 15:13) Mukuya kwachiindi, wakatondeezya kuti wakeempwa kwiinda mukusiya michito yakwe mibi. Alubo wakalibombya mpawo wakabweeda kulimbabo. Wisi wakachita biyeni? Jesu wakati: “Kacili kulaale, bausyi bakamubona aboobo bakamufwida luzyalo, eelyo bakamubalikila, baakumukumbata akumumyonta.” Teezyakamubwezela chiindi pe kuti abone kuti wisi wakali kulimvwa biyeni atala anguwe. Wisi taakachita zintu zyakapa kuti mwanaakwe abe aabweeme. Pesi wakamutondeezya luse kwiinda mukumulekelela akumutambula. Nikuba kuti mulombe ooyo wakachita chibi chipati pesi akaambo kakuti wakali kweempwa, wisi wakamulekelela. Wisi wamwana mulombe ooyu wiiminina Jehova. Muchikozyano eechi, Jesu wakali kutondeezya kuti Wisi ulilibambilide kulekelela sizibi uutondeezya kweempwa kwachoonzyo.​—Lk. 15:17-24.

7. Nzila njatutondeezyaayo luse Jehova itondeezya biyeni kuti ulaabusongo?

⁷ Jehova ututondeezya luse akaambo kakuti ulaabusongo. Chiindi choonse, Jehova usala kuchita zintu zigwasya zilenge zyakwe. Bbayibbele lyaamba kuti: “Busongo buzwa kujulu . . . bulizwide luse amicelo mibotu.” (Jak. 3:17) Mbuli muzyali uli aaluyando, Jehova ulizi kuti bakombi bakwe balagwasigwa kuti wabatondeezya luse. (Int. 103:13; Is. 49:15) Akaambo kakuti Jehova ubatondeezya luse bakombi bakwe, eezi zipa kuti babe aabulangilizi bwakuyoopona buumi bubotu muchiindi chilikunembo nikuba kuti bali aachibi. Busongo mbwalaabo Jehova bupa kuti atutondeezye luse kuti kakuli kaambo kapa kuti achite oobo. Pesi Jehova ulizi mpatayelede kututondeezya luse. Akaambo kakuti musongo, tatutondeezyi luse pe kuti kazi kuti kuchita oobo nga ulikuzumizya zintu zibi kuti zichitike.

8. Niinzi nzitweelede kuchita kuti umwi muntu wasala kupona buumi bwakutalijata alubo nkamboonzi?

⁸ Atuteedi umwi mukombi waJehova wasala kupona buumi bwakutalijata, niinzi nzitweelede kuchita? Pawulu wakalemba kuti “muleke kuyanzana amuntu” ooyo. (1 Kor. 5:11) Sizibi uutayandi kweempwa ulagwisigwa mumbungano. Mabambe aaya alayandikana nkaambo akwabilila bakwesu abachizi basyomeka bali mumbungano alubo atondeezya kuti tulayiswiilila milawu yaJehova. Pesi bamwi bayeeya kuti mabambe aaya atondeezya kuti Leza taamutondeezya luse pe muntu ooyo. Nichoonzyo na eechi? Atubone.

KUGWISYA SIZIBI MUMBUNGANO NKUMUTONDEEZYA LUSE NA?

9-10. Kweendelana alugwalo lwa Bahebrayo 12:5, 6, nkamboonzi nitukonzya kwaamba kuti kugwisya sizibi mumbungano nkumutondeezya luse? Amba chikozyano.

⁹ Chiindi nitumvwa chizibisyo kumiswaangano yambungano chakuti umwi muntu ngutuzi alubo ngutuyanda “tachili umwi waBakamboni baJehova pe,” zilatuchisa. Chimwi chiindi tulakonzya kubonaanga muntu ooyo tayelede kugwisigwa pe mumbungano. Pesi kugwisya sizibi mumbungano nkumutondeezya luse na? Iiyi. Kuti umwi muntu kayelede kululamikwa mpawo twamululamika nga tulikutondeezya kuti tuli basongo, tuli aaluse akuti tulamuyanda. (Tus. 13:24) Ani kugwisya sizibi mumbungano kulakonzya na kumugwasya kuti asiye michito yakwe mibi? Iiyi kulakonzya. Bakwesu abachizi biingi bakali bachita chibi chipati bakaamba kuti, kugwisigwa nkubakachitwa mumbungano kwakabagwasya kuti basiye zintu zibi nzibakali kuchita akuti baboole kuli Jehova.—Bala Bahebrayo 12:5, 6.

¹⁰ Lino atubone chikozyano chitondeezya kuti kugwisya sizibi mumbungano nkubatondeezya luse bakwesu abachizi bali mumbungano. Atuteedi mweembeli wabona kuti imwi mbelele yakwe ilikuchiswa. Mweembeli ooyu ulizi kuti nzila iilikabotu yakwiisilika nkwiipambula kuli zimwi. Mbukunga mbelele ziyandisya kweenda kazili tanga alubo zilakataazikana kuti zyapambulwa, kuti wayipambula mbelele eeyo zyaamba kuti mweembeli ooyu ulaalunya na? Teembubo pe. Nkaambo ulizi kuti, kuti waleka kwiipambula ilakonzya kutabukizya zimwi mbelele bulwazi. Pesi kuti wayipambula, nga ulikukwabilila tanga lyoonse.—Kozyanisya a Levitiko 13:3, 4.

11. (a) Muntu wakagwisigwa mumbungano ukozyenie biyeni ambelele iichiswa? (b) Niinzi nzibakonzya kujana bantu bagwisidwe mumbungano?

¹¹ Kuti umwi muKristu wagwisigwa mumbungano, tulakonzya kumukozyanisya aambelele iichiswa. Nga ulikuchiswa mubukombi. (Jak. 5:14) Muntu uuchiswa mubukombi ulakonzya kusungwaazya bamwi kuti bachite zintu zitali kabotu. Nkinkaako, chimwi chiindi kuleelela kumugwisya mumbungano. Mabambe aaya atondeezya kuti Jehova ulabayanda bakombi bakwe basyomeka alubo alakonzya kugwasya sizibi kuti abone kuti nzyaakachita tazili kabotu pe alubo zilamugwasya kuti aboole kuli Jehova. Muntu wakagwisigwa mumbungano ulakonzya kunjila miswaangano kuchitila kuti akonzye kubambulula bweenzinyina aJehova. Ulakonzya kujana mabbuku alubo ulakonzya kweebela JW Broadcasting^®. Chiindi baalu nibabona kuti muntu ooyo ulikuchincha, balakonzya kumugwasya aamalayilile aamuBbayibbele chiindi achiindi kuchitila kuti akonzye kubambulula bweenzinyina aJehova akuti akonzye kubweedezegwa mumbungano.b

12. Niinzi nzibakonzya kuchita baalu kuti batondeezye kuti balamuyanda sizibi uutayandi pe kweempwa?

¹² Bantu bachita zibi kabatayandi kweempwa mbabo bagwisigwa mumbungano. Baalu balizizi kuti kulayandikana kwiilanga-langa kabotu nkani yasizibi kabatanasala kumugwisya mumbungano nkaambo balizi kuti Jehova ululamika “cansaizi.” (Jer. 30:11) Baalu balabayanda bakombinyina alubo tabayandi pe kuchita zintu zikonzya kunyongania bweenzinyina bwabo aJehova. Nikuba boobo, chimwi chiindi nga bazoobona kuti nzila iilikabotu yakumutondeezya luse aluyando sizibi nkumugwisya mumbungano.

13. Nkamboonzi umwi muKristu wakuKkorinto naakeelede kugwisigwa mumbungano?

¹³ Atubone nzyaakachita mwaapostolo Pawulu atala awumwi sizibi wakatali kuyanda kweempwa wakapona muchiindi chamaKristu bakusaanguna. Umwi muKristu wakuKkorinto wakali kuchita bwaamu amwanakazi wawisi. Nzyaakali kuchita zilasesemya. Pawulu wakalizi kuti Jehova wakabuzya maIsrayeli kuti: “Mwaalumi woonana amukaintu wabausyi wausya bausyi nsoni. Mwaalumi amukaintu ooyo beelede kujaigwa.” (Lev. 20:11) Pawulu taakalikwe nguzu zyakubuzya maKristu bakuKkorinto kuti bajaye mwaalumi ooyu pesi wakababuzya kuti bamugwisye mumbungano. Zintu zibi zyakachitwa amwaalumi ooyu zyakali kupambanisya bakombinyina. Bamwi bakali kubonaanga nzyaakali kuchita teechakali chibi chipati pe.—1 Kor. 5:1, 2, 13.

14. Pawulu wakamutondeezya biyeni luse mwaalumi wakuKkorinto wakali wagwisigwa mumbungano alubo nkamboonzi? (2 Bakorinto 2:5-8, 11)

¹⁴ Mukuya kwachiindi, Pawulu wakazooziba kuti mwaalumi ooyo wakali wachincha. Nikuba kuti mwaalumi ooyo wakali wapa kuti mbungano ibe aampuwo mbi pesi Pawulu wakabuzya baalu bamumbungano eeyo kuti taakali kuyanda “kumunyemena” pe. Pesi wakababuzya kuti “mweelede kumulekelela akumuumbulizya” kuchitila kuti “atamenenwi limwi akaambo kakuusa kapati.” Pawulu wakamufwida luzyalo mwaalumi ooyo. Taakali kuyanda pe kuti abe abweeme, awuse naakuti akataazikane akaambo kazibi nzyaakachita zyakuti kumuyumine kuti akumbile lulekelelo.—Bala 2 Bakorinto 2:5-8, 11.

15. Baalu bachitobelezya biyeni chikozyano chaJehova kuti umwi muKristu wachita chibi chipati?

¹⁵ Mbuli Jehova, baalu batondeezya luse akaambo kakuti balatuyanda. Kuti umwi muKristu wachita chibi chipati, baalu balamululamika kuti kakweelela alubo baleezya kumutondezya luse kuti kakuli kaambo kapa kuti bachite oobo. Pesi kuti baalu baleka kumululamika, ngatabali kumutondeezya luse pe pesi ngabalikuzumizya chibi kuti chichitike mumbungano. Baalu mbabo na abalikke beelede kutondeezya luse?

NIINZI ZIKONZYA KUTUGWASYA TOONSE KUTI TUTONDEEZYE BAMWI LUSE?

16. Kweendelana alugwalo lwa Tusimpi 21:13, niinzi Jehova nzyaabachitila aabo batatondeezyi luse?

¹⁶ Mbuli Jehova, maKristu boonse baleezya kubatondeezya luse bamwi. Nkamboonzi? Kamwi kaambo nkakuti Jehova taziswiilili pe nkombyo zyabaabo batayandi pe kutondeezya bamwi luse. (Bala Tusimpi 21:13.) Tweelede kuba bantu bali aaluse nkaambo taakwe muntu uutayandi pe kuti Jehova aswiilile nkombyo zyakwe. Tweelede kukkala katulibambilide kuswiilila ‘kulila kwamuntu uukataazikene.’ Nkinkaako, tuleezya kuswiilila malayilile aamuBbayibbele aakuti: “Ooyo uutafwidi bamwi luse uyoobetekwa kakunyina kufwidwa luse.” (Jak. 2:13) Kuti twaziba mbukuyandikana kuti bamwi batutondeezye luse, ziyootuubila andiswe kuti tubatondeezye luse. Tuyanda kutondeezya bamwi luse ikapati aabo bakali bagwisigwa mumbungano.

17. Davida wakatondeezya biyeni kuti uli aaluse?

¹⁷ Zikozyano zili muBbayibbele zilakonzya kutugwasya kuti tutondeezye bamwi luse akuti tutabi bantu bali aalunya. Muchikozyano, chiindi chiingi Mwaami Davida wakali kutondeezya bamwi luse. Nikuba kuti Mwaami Sawulu wakali kuyanda kumujaya pesi Davida wakamutondeezya luse alubo taakwe nakeezya pe kumubweedezya naakuti kumuchisa.​—1 Sam. 24:9-12, 18, 19.

18-19. Nziizili zyiimo zibili Davida mpaakatatondeezya luse?

¹⁸ Nikuba kuti Davida wakali aaluse pesi teechiindi choonse pe mpaakali kutondeezya buntu oobu. Muchikozyano, mwaalumi wakali aalunya uutegwa Nabbala wakaamba majwi aatali kabotu atala aDavida alubo wakakaka kupa Davida abaalumi mbaakalaabo chakulya. Eezi zyakapa kuti Davida anyeme loko akuti asale kumujaya mwaalumi ooyu abamung’anda yakwe boonse. Pesi Abbigayeli mwanakazi waNabbala wakali aluse amoyo mulamfu. Wakachijaana-chijaana kuti akape Davida chakulya mpawo Davida taakazoomujaya pe Nabbala abamung’anda yakwe.​—1 Sam. 25:9-22, 32-35.

¹⁹ Aali chimwi chiindi, mupolofita Natani wakabuzya Davida atala awumwi mwaalumi wakanotede wakabba mbelele yasimayakilane wakwe wakali kufwaba. Naakazimvwa, Davida wakanyema mpawo wakati: “Masimpe mbubonya Jehova mbwali muumi, mwaalumi ooyo iwakacita boobo weelede kujaigwa!” (2 Sam. 12:1-6) Davida wakalizi kuti mulawu waMozesi wakali kwaamba kuti, muntu wakali kubba mbelele iimwi wakeelede kuzoobbadala muntu ngwaakabbida mbelele 4. (Kul. 22:1) Pesi Davida wakaamba kuti mwaalumi wakanotede wakeelede kujayigwa. Aawa Davida wakatondeezya lunya. Natani wakabelesya biyo chikozyano eechi kuti agwasye Davida kubona kuti zibi nzyaakachita zyakali zipati. Nikuba boobo, Jehova wakamutondeezya luse kapati Davida kwiinda nzyaakali kunoochita Davida kumwaalumi uulya wakabba mbelele wamuchikozyano chaNatani.​—2 Sam. 12:7-13.

20. Twiiyaanzi kuzwa kuchikozyano chaDavida?

²⁰ Mbuli mbutwabona, kunyema kwakapa kuti Davida asale kujaya Nabbala abamung’anda yakwe. Mukuya kwachiindi, Davida wakaamba kuti mwaalumi wamuchikozyano chaNatani wakeelede kujayigwa akaambo kazintu nzyaakachita. Pesi tulakonzya kulibuzya kuti, mbukunga Davida wakali mwaalumi ulaaluzyalo, nkamboonzi naakabeteka mwaalumi wakanotede munzila yalunya? Kuti tujane nsandulo, atuyeeye atala azyakali zyazwa kuchitika. Aachiindi eecho, moyo wakwe Davida wakali kumupa mulandu akaambo kazintu zibi nzyaakachita. Munzila iikozyenie, kuti umwi muntu wabeteka mweenzinyina munzila yalunya, nchitondeezyo chakuti tasimide pe mubukombi. Jesu wakachenjezya batobeli bakwe kuti: “Amuleke kubeteka kutegwa mutabetekwi; nkaambo lubeta ndomubetesya, ndomuyoobetesyegwa andinywe.” (Mt. 7:1, 2) Atubeleke changuzu kuti tutabi bantu bali aalunya pesi tweezye kuba bantu bali ‘aaluse kapati’ mbuli Leza wesu.

21-22. Niinzi nzitukonzya kuchita kuti tutondeezye bamwi luse?

²¹ Kuti katuli aaluse, tatugoleli aakufwida bamwi luzyalo luzutu pesi tweelede kubweza ntaamu kuti tubagwasye. Toonse tulakonzya kugwasya bantu bayanda lugwasyo bali mumbungano zyesu, mumpuli naakuti muchilawu chesu. Tuli aamweenya myiingi yakutondeezya bamwi luse. Kuli umwi na muntu nguzi uyanda kuumbulizigwa? Ani uyanda kugwasigwa aachakulya naakuti kugwasigwa imwi milimu? Kuli muKristu nguzi na wakabweedezegwa mumbungano lino-lino ngukonzya kuumbulizya naakuti kumusungwaazya? Ulakonzya na kuumbulizya bamwi kwiinda mukubakambawukila makani mabotu? Kuti twachita zintu eezi nga tulikutondeezya bamwi luse.—Job. 29:12, 13; Rom. 10:14, 15; Jak. 1:27.

²² Kuti twabona kuti kuli bamwi bayanda kugwasigwa munzila zili boobu, tulakonzya kubelesya myeenya eeyo kuti tubatondeezye luse. Kuti twachita oobo, ngatulikupa kuti Leza wesu “ulaaluse kapati” abotelwe.