Kubambulula Bweenzinyokwe aJehova

MUNYAKA amunyaka bantu biingi balabweedezegwa mumbungano yachiKristu. Amuyeeye ‘kukondwa kupati ikuba kujulu’ chiindi bantu aaba nibabweedezegwa mumbungano. (Lk. 15:7, 10) Kuti kuli wakabweedezegwa mumbungano, baachoonzyo chakuti Jesu, bangelo kuswaanizya aJehova balabotelwa akaambo kakuti wakaboola lubo mumbungano. Pesi chiindi nulikubambulula bweenzinyokwe aJehova, ulakonzya kuswaanana aabuyumu-yumu. Mbuubuli buyumu-yumu oobo alubo niinzi zikonzya kukugwasya?

BUYUMU-YUMU MBUKONZYA KUSWAANA

Bakwesu abachizi biingi ngabachilipa mulandu nikuba kabali bakabweedezegwa mumbungano. Kulakonzeka kuti mulimvwa mbuli mbakaamba Mwaami Davida. Nikuba kuti wakalekelelwa zibi zyakwe, wakaamba kuti: “Milandu yangu minji kapati.” (Int. 40:12; 65:3) Nikuba kuti umwi muntu waboola kuli Jehova, nga ulaabweeme alubo nga uchilipa mulandu kwaminyaka myiingi. Umwi muchizi wakali wagwisigwa mumbungano kwaminyaka yiinda ku20 uutegwa Isabellea wakaamba kuti: “Zyakali kundiyumina kusyoma kuti Jehova wakali wandilekelela.” Kuti wamana manguzu, bweenzinyokwe aJehova bulakonzya kumana lubo. (Tus. 24:10) Yezya kugwisya mizeezo iili boobu.

Bamwi ngabayoowa kuti tabazookonzyi pe kubambulula bweenzinyina aJehova. Antoine naakabweedezegwa mumbungano wakaamba kuti: “Ndakali ndaluba zintu zyiingi nzindakali kuchita kanditanagwisigwa mumbungano.” Bantu balimvwa munzila eeyi, ngabazookachilwa kuti babeleke changuzu mumulimu waJehova.

Muchikozyano, atuteedi umwi muntu ulaang’anda mbotu mpawo yazoodilika nikwawunga guwo pati lilaamvula. Muntu ooyu ulakonzya kukataazikana kuti wayeeya atala amulimu mupati ngwayelede kuzoochita kuti azooyibambulule lubo ng’anda yakwe. Munzila iikozyenie, kuti bweenzinyokwe aJehova kabuli bwakanyongana akaambo kakuti wakachita chibi chipati ulakonzya kubonaanga kububambulula mulimu mupati nguyelede kuchita. Pesi ulakonzya kujana lugwasyo.

Jehova wakati: “Amuboole lino tubambe twaambo akati kesu.” (Isa. 1:18) Wakabamba kale twaambo anguwe alubo Jehova ulakuyanda akaambo kakubeleka changuzu nkwaakachita. Yeeya atala azeezi: Kuboola kuli Jehova nkwaakachita kwakapa kuti Jehova atondeezye kuti Saatani mubeji.​—Tus. 27:11.

Kuboola kuli Jehova kutondeezya kuti wakasaanguna kale kuswena aafwiifwi anguwe. Alubo anguwe uyooswena aafwiifwi anduwe. (Jak. 4:8) Nikuba kuti kuli kabotu kuti bamwi babone kuti wakabweedezegwa mumbungano, pesi weelede kukkala kuchita zintu zitondeezya kuti ulamuyanda Taateesu wakujulu. Nga ulazichita biyeni eezi?

SALA KUCHITA ZINTU NZUKONZYA KUZUZIKIZYA

Chiindi nulikubambulula bweenzinyokwe aJehova, sala kuchita zintu nzukonzya kuzuzikizya. Kulakonzeka kuti uchiziyeeyede zintu nzwaakayiya atala aJehova achisyomezyo chakwe chaparadayizi. Pesi lino weelede kubeleka changuzu kuti uchite zintu zyabukombi mbuli kukambawuka chiindi choonse, kunjila miswaangano yoonse akujana chiindi chakubaamwi abakombinyokwe. Atubone zimwi zintu nzukonzya kuchita.

Waambuula aaJehova chiindi choonse. Taata wako Jehova ulamvwisisisya kuti kukkala kulipa mulandu akaambo kazintu zibi nzwaakachita kulakonzya kupa kuti kukuyumine kukomba kuli nguwe. (Rom. 8:26) Nikuba boobo, weelede ‘kujatisya kupaila,’ kubuzya Jehova kuti uyanda kuba mweenzinyina. (Rom. 12:12) Andrej wakaamba kuti: “Ndakali aabweeme alubo ndakali kukkala kandilipa mulandu, pesi nindakali kumaninsya kukomba ndakali kumvwa kabotu, teendakachili kukataazikana pe.” Kuti wabula majwi aakwaamba chiindi nulikukomba, ulakonzya kugwasigwa aankombyo zyaMwaami Davida zilembedwe muli Intembauzyo 51 a65.

Bala Bbayibbele buzuba-abuzuba. Kubala Bbayibbele kulakugwasya kuti ube aalusyomo lusimide akuti umuyande loko Jehova. (Int. 19:7-11) Umwi mwaalumi uutegwa Felipe wakaamba kuti: “Akaambo kakuti teendakalikwe pulogilamu yakubala Bbayibbele, lusyomo lwangu lwakasaanguna kucheya alubo ndakachita zintu zinyemya Jehova. Teendakali kuyanda pe kuti ndiyindulile lubo. Nkinkaako, ndakasala kuti ndibe aapulogilamu yakubala Bbayibbele buzuba-abuzuba.” Anduwe ulakonzya kuchita mbubo. Kuti kuyanda kugwasigwa kuti ubale atala aankani zili, ulakonzya kukumbila muKristu uusimide mubukombi kuti akugwasye.

Yezya kuswena aafwiifwi abakwesu abachizi bamumbungano yako. Bamwi bakwesu abachizi bakabweedezegwa mumbungano bakali kukataazikana nkaambo bakali kubonaanga bamwi bachibanyemenede akaambo kazintu nzibakachita. Muchikozyano, Larissa wakaamba kuti: “Ndakali aabweeme. Ndakalimvwa kuti nzindakachita zyakabachisa loko bakwesu abachizi. Ndakali kulimvwa munzila eeyi kwachiindi chilamfu.” Kuti kulimvwa munzila eeyi, baachoonzyo chakuti baalu abamwi maKristu basimide mubukombi balilibambilide kukugwasya. (Langa kabbokesi kati: “Nzibakonzya Kuchita Baalu?”) Baalu bachita oobo akaambo kakuti balabotelwa kuti wakaboola mumbungano alubo bayanda kuti anduwe ubotelwe.​—Tus. 17:17.

Niinzi chikonzya kukugwasya kuti uswene aafwiifwi abakwesu abachizi bamumbungano yako? Chita milimu yabukombi iiswaanizya kunjila miswaangano chiindi choonse akuya mumulimu wakukambawuka. Eezi ziyookugwasya biyeni? Mvwa zyakaambwa aFelix. Wakati: “Bakwesu abachizi bamumbungano bakali kuchilangilila aameso aasalala chiindi nchindakali kuyoobweedezegwa mumbungano, ndakabona kuti balandiyanda. Boonse bakandigwasya kuti ndibone kuti ndilaakati kabakombima bali aaluyando, ndibone kuti Jehova wakandilekelela akuti ndizumanane kumubelekela.”​—Langa kabbokesi kati, “Nzukonzya Kuchita.”

UTAMANI MANGUZU!

Saatani uyoozumanana kukubikkila masanzyo munzila kuchitila kuti kukuyumine kubambulula bweenzinyokwe aJehova. (Lk. 4:13) Beleka changuzu kuti usimye bweenzinyokwe aJehova lino.

Jehova wakaamba majwi aatondeezya kuti ulayanda kuzigwasya mbelele zyakwe. Wakati: “Eeyo iisweekede ndiyakwiiyandaula, eeyo yiingaila ndiyakwiijola, eeyo iiliciside ndiyooyaanga, alimwi eeyo iitajisi nguzu ndiyakwiiyumya.” (Ezk. 34:16) Jehova wakagwasya bantu biingi kuti bakonzye kubambulula bweenzinyina anguwe. Baachoonzyo chakuti anduwe ulakugwasya kuti uzumanane kubambulula bweenzinyokwe anguwe.