Kuzondana Kuzoomana Kukabe Kutamani!
Nikuba kuti twaleka kuzonda bamwi, tatukonzyi kupa kuti bamwi bantu baleke kuzonda bamwi. Bantu bachita zintu zilikabotu banooswini kabazondwa. Niinzi chitazoope kuti kuzondana kumane kukabe kutamani.
Jehova Leza nguwe alikke ukonzya kumaninsya kuzondana munyika. Eezi nzizyo loko nzilyaamba Bbayibbele kuti uzoochita.—Tusimpi 20:22.
LEZA UZOOGWISYA ZINTU ZYOONSE ZIPA KUTI KUBE KUZONDANA
1. SAATANI DYABBULOSI. Saatani mungelo wakapapila nguwe uupa kuti kube kuzondana koonse nkutubwene sunu. Leza uzoonyonyoona Saatani abaabo boonse bamutobela.—Intembauzyo 37:38; Baroma 16:20.
2. NYIKA YEENDELEZEGWA AASAATANI. Leza uzoonyonyoona zintu zyoonse zibi zili munyika iino bazyapolitikisi abapati bazikombelo bapa kuti kube kuzondana munyika. Alubo Leza uzoonyonyoona bazyabbizinesi babbida akudyaaminina bantu.—2 Petro 3:13.
3. CHIBI NCHITULAACHO. Bbayibbele lyaamba kuti bantu boonse balaachibi, chaamba kuyeeya, kulimvwa akuchita zintu zitali kabotu. (Baroma 5:12) Kuzonda akusaluula bamwi njiimwi nzila iitondeezya kuti tulaachibi. Leza uzoogwasya bantu kuti bazunde chibi alubo eezi zizoopa kuti kuzondana kumane kukabe kutamani.—Isaya 54:13.
BBAYIBBELE LITUSYOMEZYA KUTI KUZONDANA KUZOOMANA MUNYIKA
1. BANTU BOONSE BAZOOJATWA KABOTU. Bwaami bwaLeza buzooyendelezya nyika yoonse. Buzooyendelezya kabuli kujulu alubo buzoopa kuti munyika mube kululama kukabe kutamani. (Daniele 2:44) Kusaluula bamwi kuzoomana. Leza uzoomaninsya kutalulama koonse bantu nkubali kuswaanana aako lino.—Luka 18:7.
2. BANTU BOONSE BANOOKKEDE MULUUMUNO. Takwe muntu pe uyooswaanana amapenzi aaba akaambo kankondo akulwana. (Intembauzyo 46:9) Kunoobotezya kukkala munyika akaambo kakuti bantu banooli aluumuno alubo balaaluyando.—Intembauzyo 72:7.
3. BANTU BAZOOPONA BUUMI BULIKABOTU KUKABE KUTAMANI. Bantu boonse bakkala munyika banootondeezyania luyando. (Matayo 22:39) Takwe muntu uyookataazikana pe nikuba kuyeeya zintu zitali kabotu zyakachitika chiindi. (Isaya 65:17) Bantu batanookkale munyika aachiindi eecho banooli kabatazondani pe alubo “bayoobotelwa kapati muluumuno lunji.”—Intembauzyo 37:11.
Ulayanda na kukkala munyika iili boobo? Nikuba mazubaano kuli bantu bakaleka kuzonda bamwi akaambo kakuti babelesya malayilile ajanika muBbayibbele. (Intembauzyo 37:8) Eezi nzizyo nzibalikuchita Bakamboni baJehova munyika yoonse. Nikuba kuti bazwa munyika zisiyene-siyene alubo bakakomezegwa munzila zisiyene-siyene, nimpuli iiyandana alubo iijisini.—Isaya 2:2-4.
Bakamboni baJehova bazoobotelwa kukubuzya mbubakalisimya kukutajatwa kabotu akukusaluulwa. Nzutayiye zilakugwasya kuti uleke kuzonda bamwi pesi ube aluyando. Uyooyiya kuti weelede kubajata kabotu bamwi nikuba aabo bakuzonda. Eezi ziyoopa kuti ubotelwe akuti umvwanane aabamwi. Kwiinda zyoonse, uyooyiya mbukonzya kupona aansi abweendelezi bwaLeza, chiindi kuzondana nikutazoomane kukabe kutamani.—Intembauzyo 37:29.