MBUKONZYA KUZUNDA PENZI LYAKUZONDANA

2 | Utakkwichizyi pe

Nzilyaamba Bbayibbele:

“Mutapilusizyi muntu uuli woonse bubi. . . . Kamusoleka kusikila mpomugolela kukkala muluumuno abantu boonse. Nobayandwa, mutapilusizyi muntu cibi, . . . nkaambo kulembedwe kuti: ‘“Ndime ndisubula; ndime nendiyoopilusya cibi,” mbwaamba Jehova.’”—BAROMA 12:17-19.

Nchizyaamba:

Zili mulindiswe kuti tunyeme kuti muntu watubisizya pesi Leza taatusungwaazyi kuti tukkwichizye pe. Pesi utusungwaazya kuti tulindile nguwe kuti azoobambulule zintu zyoonse.—Intembauzyo 37:7, 10.

Nzweelede Kuchita:

Kuti muntu uulaachibi wakkwichizya, kuzondana kulayinkilila kunembo. Nkinkaako, kuti umwi muntu wakunyemya naakuti wakuchisa utakkwichizyi pe. Yezya kulinyona akuchita zintu zipa kuti kube luumuno. Chimwi chiindi kulakonzya kugwasya kusiyana aazyo zinga zyachitika. (Tusimpi 19:11) Pesi chimwi chiindi kubuzya bamwi zinga zyachitika kulakonzya kugwasya. Muchikozyano, kuti wabbidwa naakuti wachitilwa zimwi zintu ulakonzya kubuzya mapulisa naakuti bamwi balupati-pati.

Kukkwichizya nkulyuuma nkoli mumazwi

Nga ulachita biyeni kuti kakutakwe pe nzila yakubambulula penzi eelyo muluumuno? Ani kuti kakuli wakali weezya kubambulula penzi eelyo muluumuno pesi zyakakaka? Tuweelede kukkwichizya pe. Nkaambo kukkwichizya kulakonzya kupa kuti zintu zyiindilile kubija. Zunda penzi lyakuzondana. Syoma kuti Leza ulakonzya kubambulula penzi eelyo. “Komusyoma, eelyo walo ulakugwasya.”—Intembauzyo 37:3-5.

Zyakachitika Mubuumi—ADRIÁN

Wakazunda Penzi Lyakukkwichizya

Kachili muniini Adrián wakali kukkala kaalwana kakkwichizya bantu bali kumunyemya. Wakaamba kuti: “Chiindi chiingi ndakali kunoonga ndachaala kandilede aansi kumbali aamugwagwa kandizwide ganzi kandili ndaba afwiifwi kufwa.”

Adrián wakasaanguna kwiiya Bbayibbele naakali aminyaka iili 16. Wakayungizya kuti: “Chiindi nindakayinkilila kunembo kwiiya Bbayibbele ndakabona kuti ndakeelede kuchincha buntu bwangu.” Wakabona kuti wakeelede kuleka kuzonda bamwi akulwana. Wakagwasigwa loko anzyakayiya mulugwalo lwa Baroma 12:17-19 iitondeezya kuti tatweelede kukkwichizya pe. Wakaamba kuti: “Ndasyoma kuti Jehova uzoobambulula kutalulamisya achiindi chakwe. Mbichaani-mbichaani, ndakasaanguna kuchincha akuleka zyakulwana.”

Limwi zuba goko Adrián wakasikilwa aakabunga kabantu mbakali kulwana aabo chiindi. Mpawo mupati wabo wakaamba kuti “atulwane.” Adrián wakati: “Achiindi eecho ndakali kuyanda kulwana.” Pesi wakasala kukomba kuli Jehova mpawo wakazwa mpubakabede.

Adrián wakati: “Buzuba bwakatobela ndakaswaanana aamulombe uulya lubo kali aalikke. Ndakanyema zyakuti ndakayanda kukkwichizya pesi ndakakomba kuli Jehova kuti andigwasye kuti ndilinyone. Chakandigambya nchakuti, mulombe ooyo wakasika kulindime mpawo wandibuzya kuti: ‘Ndikumbila kuti undilekelele anzindakachita jilo. Kwaamba choonzyo, ndiyanda kuba mbuli nduwe. Ndiyanda kwiiya Bbayibbele.’ Ndakabotelwa akaambo kakuti teendakakkwichizya pe! Alubo ndakabotelwa nkaambo ndakasaanguna kwiiya Bbayibbele anguwe.”