MBUKONZYA KUZUNDA PENZI LYAKUZONDANA

1 | Utasaluuli

Nzilyaamba Bbayibbele:

“Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.”—MILIMO 10:34, 35.

Nchizyaamba:

Jehovaa Leza tatusaluuli pe kweendelana ankutuzwa, musyobo wesu naakuti tunsiya-nsiya twesu. Pesi ulanga mbutubede mumoyo. Bbayibbele lyaamba kuti: “muntu ubona buyo zilibonya ameso, pele Jehova ubona zili mumoyo.”—1 Samuele 16:7.

Nzweelede Kuchita:

Nikuba kuti tatukonzyi pe kubona zili mumyoyo yabantu, tweelede kweezya kutobelezya chikozyano chaLeza chakutasaluula. Yezya kubona bantu mbuli umwi awumwi kutali kabunga. Kuti wabona kuti ulaakamuzeezo katali kabotu atala abamwi bantu bawumwi musyobo naakuti bakuliimwi nyika, komba kuli Jehova kuli kumukumbila kuti akugwasye kuti unyukule kamuzeezo aako. (Intembauzyo 139:23, 24) Kuti wakomba kuli Jehova amoyo woonse kuti akugwasye kuti uleke kusaluula, Jehova uyooyimvwa nkombyo yako alubo uyookugwasya.—1 Petro 3:12.

a Jehova ndizina lyaLeza.—Intembauzyo 83:18.

“Chiindi, taakwe nindakali kukkala pe muluumuno amukuwa . . . Ndakabona kuti ndili mumpuli iijisini munyika yoonse.”—TITUS

Zyakachitika Mubuumi—TITUS

Wakazunda Penzi Lyakuzonda Bamwi

Titus wakaliswaanizya akamwi kabunga kakali kuyanda zyakulwana alubo kakali kukazyania amilawu iili atala akusaluula. Wakaamba kuti: “Twakali kunoonga twaya kumasena bantu basiya nkubakatali kuzumizigwa pe mbuli kumahotela akumabbawa kuchitila kuti tukalwane.” Titus wakazumina kuti kuzonda bamwi nkuko kwakali kupa kuti akkale kanyemede akuti akkale kalwana. Alubo wakayungizya kuti: “Ndakali kunoonga kuti ndakazyania amuntu ndime ndakali kusaanguna kuuma mfayindi.”

Titus wakasaanguna kuchincha chiindi naakasaanguna kwiiya Bbayibbele aBakamboni baJehova. Nzyaakali kubala muBbayibbele zyakapa kuti achinche nzyaakali kuyeeya. Chisyomezyo chakuti “alimwi lufwu talukabi limbi, akwalo koomoka, kulila nokuba kucisa takukabi limbi pe” eecho chiyoozuzikizigwa muchiindi chili kunembo chakamusika aamoyo.—Ciyubunuzyo 21:3, 4.

Kumasaangunino, Titus kwakali kumuyumina kuti achinche kuchitila kuti aleke kuzonda bamwi. Wakaamba kuti: “Kumasaangunino, kwakali kundiyumina kuchincha mbundakali kuyeeya ambundakali kuchita.” Pesi wakagwasigwa anzyakayiiya muli Milimo 10:34, 35, yaamba kuti Leza tasaluuli pe.

Niinzi zyakazoochitika? Titus wakati: “Ndakasyoma kuti Bakamboni baJehova mbabo abalikke chikombelo chakasimpe akaambo kaluyando ndubakali kutondeezyania kazitakwe ndaba kuti mbamisyobo iisiyene-siyene. Nikuba kanditanabbabbatizigwa kuba Kamboni waJehova, umwi mukuwa wamumbungano yesu wakanditamba kuti tuzoolye aamwi. Ndakabonaanga ndakali kulota. Chiindi takwe nindakali kukkala pe muluumuno amukuwa, pesi mubuzuba oobo twakalya aamwi. Ndakabona kuti ndili mumpuli iijisini munyika yoonse.”