Nzyatuyiisya Mulengi Wesu Zipa Kuti Tube Aabulangilizi
Leza wakatusyomezya kuti muchiindi chifwiifwi chilikunembo zintu ziyoochincha. Uyoowamaninsya mapenzi woonse akupa kuti bantu babotelwe aanyika. (Intembauzyo 37:11) Niinzi chipa kuti tusyome makani aaya? Nkaambo “Leza tali muntu-muntu buyo iwaamba zyakubeja.” (Myeelwe 23:19) Bona zimwi zintu zibotu nzyayoochita Mulengi wesu.
Leza Uyoogwisya Bantu Babi
“Ibabi baakumena mbuli nsaku alimwi basimucita zibi boonse baakuvwulisya, eeci ciyoocitika kutegwa bakanyonyoonwe kukabe kutamani.”—INTEMBAUZYO 92:7.
Mbuli mbutwabona muchiiyo chayinda, bubi bulikuyungizya. Eezi tazyeelede kutugambya pe nkaambo Bbayibbele lyakaamba kale muli 2 Timoteyo 3:1-5 kuti “kumazuba aamamanino” bantu bakali kuyooyindilila kubija. Mamanino aanzi? Mamanino aabantu bataswiilili Leza. Lino-lino Leza uyoonyonyoona bantu batayandi kusiya zintu zibi pesi baswiilila Leza mbabo bayoosyaala. “Balulami bayookona nyika, alimwi bayookkala alinjiyo lyoonse mane kukabe kutamani.”—Intembauzyo 37:29.
Leza Uyoonyonyoona Saatani
“Leza uupa luumuno ulapwayaula Saatani.”—BAROMA 16:20.
Chiindi Saatani, madimoni abantu babi baakugwisigwa kuyooba luumuno aanyika. Mulengi utusyomezya kuti: ‘Takukabi muntu naba omwe uuyoomuyoosya.’—Mika 4:4.
Leza Uyoomaninsya Malwazi Alufu
“Tente lya Leza lili aabantu, . . . Eelyo uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe.”—CIYUBUNUZYO 21:3, 4.
Mapenzi amalwazi zinooli kazitachiwo nkaambo Leza uyoomaninsya bubi boonse bwakeetwa aaSaatani, Adamu aEva. Alubo uyoowamaninsya mapenzi aayetwa akaambo kakulubizya kwesu. “Lufwu talukabi limbi.” Bantu bayanda Mulengi akumuswiilila bayoopona kukabe kutamani. Pesi bayoopona kabali kuli?
Mulengi Wesu Uyoopa Kuti Nyika Ibe Paradayizi
“Inkanda alimwi anyika iinyina maanzi ziyoosekelela, acalo cibanda camucimpayuma ciyookondwa akufwulula mbuli maluba-luba aasaferone.”—ISAYA 35:1.
Chiindi Leza naayoomaninsya bubi, nyika yoonse iyooba paradayizi. Munyika munooli minsamu iifwefwema amaluba mabotu alubo chakulya chinooli chiingi loko. (Intembauzyo 72:16) Mulwizi, mumalambwa amumilonga munooli maanzi aatakwe doti alubo munoozwide banyama biingi bapona mumaanzi. Zintu zisofwaazya nyika zinooli kazitachiwo pe. Bantu bayooyaka maanda akukkala mulingawo. Taakwe muntu uuyoobula aakukkala, kufwa nzala naakuti kufwaba.—Isaya 65:21, 22.
Leza Uyoobusya Bantu Bafwide
“Kuyooba bubuke.”—MILIMO 24:15.
Ulayanda na kuzoobabona lubo babbululu bako bakafwa? Leza Singuzuzyoonse uyoobabusya muParadayizi aanyika. Uyoobaziba, ambabo bayookuziba. Yeeyela mbumuyoobotelwa. Nkamboonzi nituli aachoonzyo chakuti bafwide bayoobuka? Nkaambo muBbayibbele muli zikozyano zyabantu bapati abaniini bakabusigwa akuswaanana lubo ampuli zyabo. Alubo Jesu wakabusya bantu biingi kunembo lyabakamboni biingi.—Luka 8:49-56; Johane 11:11-14, 38-44.