Niinzi Cicitwa kuWofesi yaMutabi?

Bampuli yaBbeteli babeleka mumadipatimenti asiyene-siyene, kabalangania mulimu wakukambawuka mucisi naa muzisi zyiingi. Balakonzya kubeleka mutubunga twakusandulula, kudinda mamagazini, kunamatika mabbuku, kun’anda yakubikkila mabbuku, kulekkoda zyakuswiilizya naa mavidiyo, akulangania ziyandika zyamucisi eeco.

Kkomiti yaMutabi yeendelezya mulimu ooyu. Kabunga Keendelezya kalapa mulimu wakweendelezya wofesi yaMutabi imwi ayimwi kuKkomiti yaMutabi ipangwa abaalu beelela botatwe naa biindaawo. Ikkomiti izibya Kabunga Keendelezya atala amabambe amulimu uyandikana mucisi cimwi acimwi ceendelezegwa akkomiti, alimwi abuyumu-yumu buli boonse bukonzya kuba. Malipoti alibobu agwasya Kabunga Keendelezya kusala makani aayelede kubikkilwa maanu atazoolembwe muciindi cili kunembo muma bbuku alimwi akumiswaangano mipati aminiini. Bayiminini baKabunga Keendelezya balatumwa ciindi aciindi kuswaya kumitabi akupa malayilile kuli baKkomiti yaMitabi kulangania milimu yabo. (Tusimpi 11:14) Ipulogilamu ibikkilizya nkani icitwa amwiiminini wamawofesi mapati ilabambwa kukusungwaazya aabo bakkala mucilawo camutabi.

Imbungano zili mucilawo zilagwasigwa. Bakwesu beelela babeleka kuwofesi yamutabi balazumizya kubambwa kwambungano zipya. Alubo bakwesu balulamika milimu yamapayona, mamishinali, abalangizi bamabazu babeleka kabali mucilawu camutabi. Balabamba miswaangano yalubazu ayabbooma, baleendelezya kuyakwa kwa Maanda aBwaami, akubona kuti mabbuku atumizigwa kumbungano.Milimu yoonse icitwa kumawofesi amutabi igwasya kuti mulimu wakukambawuka ucitwe kabotu kweelana abubambe.—1 baKorinto 14:33, 40.

• BaKkomiti yaMutabi bakagwasya biyeni Kabunga Keendelezya?

• Mitolo nzi ilanganizigwa kuwofesi yamutabi?