Lwiiyo Lwaajulu Amali Zipa Kuti Tuzoopone Buumi Bulikabotu Na Kunembo?
Bantu biingi babonaanga bantu bayiide abanotede, buumi bwabo bwakunembo bulikwabililidwe. Basyoma kuti, kuti muntu wayinka kuyunivesiti unoobeleka kabotu kumulimu, ulabajata kabotu bamumpuli abamuchilawu chabo. Alubo babonaanga kuba alwiiyo lwaajulu kupa kuti muntu ajane mulimu uufozya mali nyingi akuti kuba aamali nyingi kupa kuti muntu abotelwe.
NZIBASALA KUCHITA BANTU BIINGI
Amubone zyakaambwa aZhang Chen wakuChina. Wakati, “Ndakali kusyoma kuti, kuti ndaba adigili ndilanota akuti kujana mulimu uufozya mali nyingi kulapa kuti ndikkutisikane mubuumi.”
Bantu biingi nga baya kumayunivesiti aalaampuwo chimwi chiindi kuli zimwi nyika kabayanda kuti bazoopone buumi bukwabililidwe kunembo. Eezi nzintu zijayilinkene biya pesi lino balikukachilwa akaambo kakkorona. Muminyaka iili 10 yayinda kabunga kamwi kakachita kuyanduulisisya kakaamba kuti: “Bana bachikolo bayiila kuli zimwi nyika bayinda kuhafu mbakuAsia.”
Bazyali balikubeleka changuzu kuti bayiisye bana babo kunze anyika. Qixiang wakuTaiwan wakaamba kuti, “Bazyali besu teebakalikwe mali pe pesi bakatutola kukkoleji yaku-United States toonse katuli 4.” Bazyali biingi batola bana babo kunze aanyika ngabanjila muzikwelete kuti bakonzye kubabbadalila.
NZIIZILI MPINDU ZIBA?
Bantu biingi bayiide loko abanotede nga bachaala kabakataazikene
Kwiiya kulakonzya kugwasya muntu mubuumi pesi chiindi chiingi, takupi kuti muntu azoojane mpindu nzyaakali kuyeeyela pe. Muchikozyano, muntu nga wanjila muzikwelete kuti akonzye kuyiila umwi mulimu pesi nga wazoobeleka mulimu ngwaakatayiila pe. Imwi lipoti yakalembwa aaRachel Mui wakuSingapore yakaamba kuti: “Namba yabantu balokugilajuweta kabatalokujana mulimu pe ilokuvula loko.” Umwi mwaalumi uuyiide uutegwa Jianjie wakuTaiwan wakaamba kuti, “Bantu biingi balikubeleka milimu yaansi loko iteendelani pe amadigili aabo.”
Bantu bakajana milimu yeendelana amadigili aabo balikubona kuti buumi tabulokuba mbuli mbubakali kuyanda pe. Naakagilajuweta kuyunivesiti yaku-United Kingdom, Niran wakuThailand wakajana mulimu kulimbabo. Wakati, “Mbukunga ndakali adigili ndakajana mulimu wakali kufozya mali nyingi. Nikuba boobo mali eeyo yakali aatwayo, ndakali kubeleka changuzu alubo chiindi choonse ndakali kuchimanina kumulimu. Mukulaba kwaliso, kkampani eeyo yakatalika kutanda bantu, andime ndakatandwa. Ndakabona kuti taakwe mulimu uukwabilila pe.”
Nikuba bantu banotede naakuti baambwa kuti bakkede kabotu baswaanana amapenzi mumpuli, balachiswa alubo mali ilawa kufumbwa chiindi. Katsutoshi wakuJapan wakaamba kuti, “Ndakali aamali nyingi pesi teendakali kubotelwa pe nkaambo bantu bakali kundichitila bbivwe alubo teebakali kundijata kabotu pe.” Umwi mwanakazi uutegwa Lam uukkala kuVietnam wakati, “Nga ndabona bantu biingi kabayanduula milimu iifozya mali nyingi kuti balikwabilile pesi kwaamba choonzyo tabalujani pe lukwabililo, mbakukataazikana kupela mumizeezo.”
Zilaantanganana kuti bantu biingi balimvwa mbuli Franklin, wakabona kuti buumi bulayandikana kwiinda lwiiyo lwaajulu abunoti. Bamwi bakabona kuti, kuti bakonzye kuzoopona buumi bulikabotu beelede kuba bantu balikabotu akuchitila bamwi zintu zilikabotu. Kuba muntu ulikabotu akuchitila bamwi zintu zilikabotu nkuko kupa kuti muntu azoopone buumi bulikabotu na kunembo? Mubuzyo ooyu ulasandulwa muchiiyo chitobela.