MBUKONZYA KUZUNDA PENZI LYAKUZONDANA

4 | Zunda Penzi Lyakuzonda Bamwi Kwiinda Mukugwasigwa Aaleza

Nzilyaamba Bbayibbele:

“Mucelo wamuuya ngooyu: luyando, lukkomano, luumuno, kukkazika moyo, luzyalo, bubotu, lusyomo, kubomba moyo, kulilesya.”—BAGALATIYA 5:22, 23.

Nchizyaamba:

Leza ulakonzya kukugwasya kuti uzunde penzi lyakuzonda bamwi. Muuya uusalala ulakonzya kupa kuti ube aabuntu mbuutakonzyi pe kubaabo awulikke. Muchiindi chakusyoma manguzu aako kuti uzunde penzi lyakuzonda bamwi, weelede kukumbila Leza kuti akugwasye. Kuti wachita oobo, uyooba mbuli mwaapostolo Pawulu wakalemba kuti: “Muzintu zyoonse ndilijisi nguzu kwiinda muli yooyo uundipa nguzu.” (Bafilipi 4:13) Alubo, uyookonzya kwaamba kuti: “Lugwasyo lwangu luzwa kuli Jehova.”—Intembauzyo 121:2.

Nzweelede Kuchita:

“Jehova wakandichincha kuzwa kumuntu wakali kuyandisya zyakulwana akuba muntu uli aaluumuno.”—WALDO

Komba kuli Jehova amoyo woonse kuli kumukumbila muuya usalala. (Luka 11:13) Mukumbile kuti akugwasye kuba abuntu bubotu mubuumi. Bala Bbayibbele kuchitila kuti uzibe buntu bukonzya kukugwasya kuzunda penzi lyakuzonda bamwi buli mbuli luyando, luumuno, moyo mulamfu akulinyona. Yezya kubelesya nzwaabala mubuumi bwako. Alubo, uliswaanizye aabantu babelekela kuba abuntu oobu bubotu. Bantu aabo ‘bayookukulwaizya kutondezya luyando akucita milimo mibotu.’—Bahebrayo 10:24.

Zyakachitika Mubuumi—WALDO

Wakaleka Kulwana

Waldo wakakomezegwa munzila ilaalunya. Eezi zyakapa kuti asaangune kuzonda bamwi. Wakaamba kuti: “Ndakali kukkala kandilwana mumigwagwa abantu bakali kuuzya madrugs . . . Limwi zuba kamwi kabunga nkindakali kukkala kandilwana aako, kakandiyandwiida umwi muntu wakazibikene kuti ulajaya kuti azoondijaye pesi ndakachija kali wandiyasa.”

Waldo taakabotelwa pe chiindi mwanakazi wakwe naakasaanguna kwiiya Bbayibbele aBakamboni baJehova. Wakati: “Ndakali kubazonda Bakamboni alubo ndakali kukkala kandibatukila. Pesi bakali kundivwiila munzila yakulibombya.”

Mukuya kwachiindi Waldo anguwe wakazoosaanguna kwiiya Bbayibbele. Wakaamba kuti: “Teekwakali kuuba pe kubelesya zintu nzindakali kwiiya. Alubo teendakali aachoonzyo pe chakuti ndizookonzya kulinyona mpawo ndileke kuyanda zyakulwana.” Kuli chimwi chintu nchaakayiya muBbayibbele chakamugwasya.

Waldo wakapandulula kuti: “Limwi zuba muntu ngundakali kwiiyaawe Bbayibbele utegwa Alejandro wakandikumbila kuti ndibale lugwalo lwa Bagalatiya 5:22, 23. . . . Alejandro wakapandulula kuti buntu boonse mbundamvwa mulugwalo oolu tandikonzyi pe kubaabo kwiinda mukubelesya manguzu aangu pesi ndilakonzya kubaabo kwiinda mukugwasigwa aamuuya uusalala. Kasimpe aaka kakachincha maboneno aangu!”

Kwiinda mukugwasigwa aaJehova, Waldo wakazwidilila kuzunda penzi lyakuzonda bamwi mubuumi bwakwe. Wakaamba kuti: “Babbululu bangu aabeenzuma bachiindi ilookubagambya nzila njindakachincha aayo.” Alubo wakayungizya kuti: “Jehova wakandichincha kuzwa kumuntu wakali kuyandisya zyakulwana akuba muntu uli aaluumuno.”