Jehova Uyanda Kuti Bamumbungano Babajate Biyeni Bantu Bachita Chibi Chipati?

1. Jehova uyanda kuti bantu boonse bachiteenzi?

JEHOVA wakalenga bantu kabali aalwaangunuko lwakulisalila. Tulalubelesya lwaangunuko oolo chiindi nitusala zyakuchita buzuba abuzuba. Kusala kupati nkutukonzya kuchita nkulipeda kuli Jehova akusala kuba mumpuli yabakombi bakwe. Jehova uyanda kuti bantu boonse bachite oobo. Nkamboonzi? Akaambo kakuti ulabayanda bantu alubo uyanda kuti zintu zibeendele kabotu. Uyanda kuti babe aabweenzinyina bulikabotu anguwe akuti bazoopone kukabe kutamani.—Dt. 30:​19, 20; Gal. 6:​7, 8.

2. Jehova ubabona biyeni bantu bachita zibi zipati kabatasanduki? (1 Johane 2:1)

² Nikuba oobo, Jehova taakwe ngwasungilizya pe kuti amukombe. Pesi uyanda kuti umwi awumwi alisalile biya kumukomba. Niinzi nzibeelede kuchita baalu kuti muKkristu uubbabbatizidwe wachita chibi chipati? Kuti taasanduka muKkristu ooyo, weelede kugwisigwa mumbungano. (1 Kor. 5:13) Nikuba oobo, Jehova uyanda kuti muntu ooyo asanduke akuti abe aabweenzinyina busimide lubo anguwe. Nkiikaambo kapati kakapa kuti atupe chinunuzyo kuchitila kuti basizibi basanduka balekelelwe zibi zyabo. (Bala 1 Johane 2:1.) Leza wesu siluyando usungwaazya basizibi kuti basanduke.—Zek. 1:3; Rom. 2:4; Jak. 4:8.

3. Tulalanga-langaanzi muchiiyo eechi?

³ Jehova uyanda kuti tube aamaboneno ngalaawo kuzintu zibi akubantu bachita zibi zipati. Muchiiyo eechi, tulalanga-langa mbutukonzya kuzichita. Chiindi nwaanoobala chiiyo eechi, bona (1) mbuyakalangwa-langwa nkani yamwaalumi wakachita chibi chipati mumbungano yakuKkorinte, (2) nzyaakabuzya bamumbungano mwaapostoli Pawulu kuti bachite sizibi ooyo naakasanduka (3) alubo tulabona Jehova mbababona maKkristu banga bachita chibi chipati.

NIINZI ZYAKACHITIKA CHIINDI UMWI MWAALUMI NAAKACHITA CHIBI CHIPATI MUMBUNGANO YAKUKKORINTE?

4. Niinzi zyakali kuchitika mumbungano yakuKkorinte? (1 Bakkorinte 5:​1, 2)

⁴ Bala 1 Bakkorinte 5:​1, 2. Mulweendo lwakwe lwachitatu lwabumishinali, Pawulu wakamvwa zintu zibi zyakali kuchitika mumbungano yakuKkorinte yakachili mpya. Mumbungano eeyo, kuli mukwesu wakali kuchita bwaamu amwanakazi wawisi. Zintu nzyaakali kuchita zyakali kugambya alubo teezyakali kujanika pe “nikuba aakati kazisi”! Pesi bakombinyina bakali kwiibona kayitali nkani pe yakali kukonzya kupa kuti muntu agwisigwe mumbungano. Amwi bamwi bakali kubonaanga bakali kumutondeezya luzyalo sikubisya mbuli mbachita Jehova. Pesi Jehova tabalekeli pe bakombi bakwe kuti kabali kuchita zintu zibi. Michito mibi njaakali kuchita mwaalumi ooyu, yakali kupa kuti mbungano ibe aampuwo mbi. Nzyaakali kuchita zyakali kukonzya kupa kuti bamwi mumbungano batobelezye michito yakwe iitali kabotu. Nkinkaako, ngaali malayilile Pawulu ngaakabuzya mbungano?

5. Pawulu wakabuzya bantu bamumbungano kuti bachiteenzi alubo wakali kwaambaanzi? (1 Bakkorinte 5:13) (Langa chifanikisyo.)

⁵ Bala 1 Bakkorinte 5:13. Kazulwidwa aamuuya uusalala, Pawulu wakalemba lugwalo lwakali kwaamba kuti sizibi uutasanduki agwisigwe mumbungano. MaKkristu bakeelede kumujata biyeni muntu wagwisigwa mumbungano? Pawulu wakababuzya kuti “muleke kuliswaanizya” aamuntu ooyo. Wakali kwaambaanzi? Pawulu wakayungizya kwaamba kuti tamweelede “kulya nikuba amuntu uuli boobo.” (1 Kor. 5:11) Kuti kamulikulya awumwi muntu nkuuba loko kuti musaangune kuzuwa. Zilaantanganana kuti Pawulu wakali kwaamba kuti bantu bamumbungano teebakeelede pe kuliswaanizya aamwaalumi ooyo. Eezi zyakali kukwabilila mbungano kuti itatobelezyi michito yakwe mibi. (1 Kor. 5:​5-7) Alubo, kutaliswaanizya aamwaalumi ooyo, kwakali kukonzya kugwasya sizibi lwakwe kuti abone kuti wakali wabisizya Jehova alubo zyakali kukonzya kupa kuti alisole akuti asanduke.

6. Lugwalo ndwaakalemba Pawulu lwakabagwasya biyeni bamumbungano asizibi?

⁶ Naakabatumizya lugwalo maKkristu bakuKkorinte, Pawulu wakali kuyeeyesesya atala akuti bakali kuyoolutambula biyeni lugwalo oolo. Tito wakaza aamakani aakamubotezya loko Pawulu. MaKkristu aabo, bakalutambula kabotu loko lugwalo. (2 Kor. 7:​6, 7) Bakachita zintu zyakalembedwe mulugwalo. Kakuli kwayinda myeezi Pawulu katumizizye lugwalo, sizibi ooyo wakali wasanduka. Wakali wachincha maponeno aakwe amizeezo yakwe alubo wakali wasaanguna kupona kweendelana azyeelelo zyaJehova ziluleme. (2 Kor. 7:​8-11) Pawulu wakazoobuzya mbungano kuti ichiteenzi?

BAMUMBUNGANO MBUBAKEELEDE KUMUJATA SIZIBI WAKASANDUKA

7. Mabambe aakugwisigwa mumbungano, akamugwasya biyeni sizibi? (2 Bakkorinte 2:​5-8)

⁷ Bala 2 Bakkorinte 2:​5-8. Pawulu wakaamba kuti: “Kukalalilwa nkwaakachitwa aabiingi banu muntu ooyo, kulikkwene.” Mulaamwi majwi, lulayo lwakabeleka. Lwakabelekaanzi? Lwakapa kuti asanduke mwaalumi ooyo.—Heb. 12:11.

8. Pawulu wakazoobuzya mbungano kuti ichiteenzi?

⁸ Pawulu wakabuzya mbungano kuti: “Mweelede kumulekelela amoyo woonse alubo mumuumbulizye” sikubisya alubo mweelede kuti “mumutondeezye kuti mulamuyanda.” Pawulu wakali kuyanda kuti bamumbungano bachite zyiingi kutali kwaamba aamulomo kupela kuti bamutambula sikubisya. Pawulu wakali kuyanda kuti batondeezye kuti bakali bamulekelela chachoonzyo sikubisya akuti bakali kumuyanda kwiinda mumajwi amumichito. Kuchita oobo, kwakali kutondeezya aantanganana kuti bakali bamutambula mumbungano sikubisya.

9. Nkamboonzi bamwi nikwakali kukonzya kubayumina kuti bamulekelele sikubisya?

⁹ Bamwi bamumbungano kwakabayumina na kumutambula lubo sikubisya wakasanduka? MuBbayibbili tazyaambidwe pe, pesi zilakonzeka. Nzyaakachita sikubisya zyakabachisa loko bamumbungano alubo zilakonzeka kuti zyakali kupa kuti bamwi babe aabweeme. Mbukunga bamwi bakali kubeleka changuzu kuti bakkale kabasyomeka kuli Jehova, nkinkaako, kulakonzeka kuti bakali kubonaanga tazichiti pe kuti bamutambule lubo mwaalumi ooyo. (Yezyanisya a Lukka 15:​28-30.) Nkamboonzi nikwakali kuyandikana kuti bamutondeezye luyando lwachoonzyo mukombinyina naakasanduka?

10-11. Niinzi zyakali kukonzya kuchitika kaansinga baalu teebakamulekelela sizibi wakasanduka?

¹⁰ Amuyeeyele kuti niinzi chakali kunoochitika kaansinga baalu bakakaka kumuboozya mumbungano sikubisya wakasanduka naakuti bamumbungano bamulanga aameso kupela naaboola mumbungano. Wakali kukonzya kuzundwa “aakuusa kwiindilide.” Alubo wakali kukonzya kulimvwa katachigwasyi pe. Alubo wakali kukonzya kutakata kuti abambulule bweenzinyina mbwaakalaabo aLeza.

¹¹ Chiinda kubija loko nchakuti, kaansinga bakwesu abachizi bamumbungano bakaleka kumulekelela sikubisya wakasanduka, bakali kukonzya kupambanisya bweenzinyina mbubakalaabo aJehova. Nkamboonzi? Nkaambo bakayinootondeezya buntu bubi bwalunya bwaDyabbulosi kwiinda kuti batondeezye buntu bwakulekelela mbuli Jehova. Mulaamwi majwi, nga baba zibelesyo zyaSaatani nkaambo nga bazumina kuti Saatani anyonyoone bweenzinyina mbwalaabo muntu ooyo aJehova.—2 Kor. 2:​10, 11; Ef. 4:27.

12. Bamumbungano kujana bamutobelezya biyeni Jehova?

¹² Niinzi nzibakeelede kuchita bamumbungano yakuKkorinte kuti batobelezye Jehova kutali Saatani? Nkwiinda mukulekelela sizibi wasanduka mbuli mbalekelela Jehova. Atubone bamwi balembi baBbayibbili mbubakaamba atala aJehova. Davida wakati Leza “mubotu alimwi ulilibambilide kulekelela zibi.” (Int. 86:5) Mikka wakalemba kuti: “Ino nguni Leza uuli mbuli nduwe, uujatila milandu akulekelela nsotoko?” (Mik. 7:18) Alubo Isaya wakati: “Simucita zibi aileke nzila yakwe awalo muntu mubi aileke mizeezo yakwe; aapiluke kuli Jehova, walo uutiimufwide luse, aapiluke kuli Leza wesu, nkaambo uyoomulekelela cakumaninina.”—Is. 55:7.

13. Nkamboonzi nikwakali kweelela kuti sikubisya wasanduka abweedezegwe mumbungano? (Langa kabbokesi katii, “Mwaalumi wakuKkorinte Wakabweedezegwa Lili Mumbungano?”)

¹³ Kabatobelezya Jehova, bamumbungano yakuKkorinte, bakeelede kutambula mwaalumi wakali wasanduka akumutondeezya kuti balamuyanda. Kwiinda mukutobelezya malayilile ngaakaamba Pawulu aakutambula sikubisya wasanduka, bamumbungano bakatondeezya kuti ‘balaswiilila muzintu zyoonse.’ (2 Kor. 2:9) Sikubisya ooyo, wakali waba aamyeezi kupela kagwisidwe mumbungano pesi lulayo lwakapa kuti asanduke. Nkinkaako, baalu bakeelede kufwambaana kumuboozya mumbungano.

MBUTUKONZYA KUTOBELEZYA JEHOVA MUKUTONDEEZYA BULULAMI ALUZYALO

14-15. Twiiyaanzi kunkani yamwaalumi wakuKkorinte? (2 Petro 3:9) (Langa chifanikisyo.)

¹⁴ Nkani ilaatala amwaalumi wakuKkorinte yakalembelwa kuti “tuyiisigwe.” (Rom. 15:4) Munkani eeyi, twiiya kuti Jehova tabalekeli pe bantu bachita chibi chipati kabatasanduki kuti bakkale mumbunga yakwe. Jehova takwe maboneno ngibalaawo bamwi kuti nga ulikumufwida luzyalo sizibi uutasanduki kwiinda mukumulekela kuti aliswaanizye aabakombi bakwe basyomeka. Jehova ulaaluzyalo, pesi talekeli bantu kuti bachite kufumbwa nzibayanda. Zyeelelo zyaJehova zili atala achibotu achibi tazichinchi pe. (Jud. 4) Kulekela sikubisya katasubulwi, teeluzyalo pe nkaambo kulakonzya kupambanisya mbungano yoonse.—Tus. 13:20; 1 Kor. 15:33.

¹⁵ Alubo, twayiya kuti Jehova taakwe muntu ngwayanda kuti anyonyoonwe pe. Jehova uyanda kuti bantu bafutuke kuti kazikonzeka. Ubatondeezya luzyalo bantu banga bayanda kuchincha akubambulula bweenzinyina mbubalaabo anguwe. (Ezk. 33:11; bala 2 Petro 3:9.) Nzizyo zyakapa kuti mwaalumi wakuKkorinte naakasanduka akuchincha nzila zyakwe zibi, Jehova abelesye Pawulu kuti apandulwide bamumbungano kuti mwaalumi ooyo bamulekelele akuti bamutambule.

16. Nkani yamwaalumi wakuKkorinte ipa kuti umvwe biyeni?

¹⁶ Kulanga-langa nkani yamwaalumi wakuKkorinte, kwatutondeezya luyando abululami bwaJehova. (Int. 33:5) Eezi tazipi kuti na tuyungizye kumutembawula Leza? Toonse tulaachibi alubo tuyanda kuti Jehova atulekelele. Umwi awumwi wesu ulaakaambo kapa kuti amulumbe Jehova akaambo kachinunuzyo nkaambo nchicho chipa kuti atulekelele. Kuziba kuti Jehova ulatuyanda choonzyo akuti uyanda kuti zintu zitweendele kabotu kulawumbulizya kaka!

17. Tuzoolanga-langaanzi muzyiiyo zitobela?

¹⁷ Nkani zyabantu babisya mazubaano, zilangwa-langwa biyeni? Niinzi nzibeelede kuchita baalu kumwi kabatobelezya Jehova kuti bagwasye sikubisya kuti asanduke? Bamumbungano beelede kuchitaanzi kuti baalu basala kugwisya naakuti kuboozya umwi mumbungano? Mibuzyo eeyi, izoosandulwa muzyiiyo zitobela.