Baalu Mbubakonzya Kugwasya Aabo Bakagwisigwa Mumbungano

1-2. (a) Jehova ubabona biyeni bantu bachita chibi chipati kabatayandi kusanduka? (b) Niinzi Jehova nzyalangilila kuti basizibi bachite?

JEHOVA tayiyandi pe michito yoonse, ulachizonda chibi. (Int. 5:​4-6) Jehova uyanda kuti tupone kweendelana azyeelelo zyakwe ziluleme zili muJwi lyakwe. Talangilili kuti bantu batamaninide bachite zintu munzila iimaninide. (Int. 130:​3, 4) Alubo Jehova tayandi pe kuti bantu batamuyoowi ‘bachinche luzyalo lwakwe lupati kuti bajane kaambo kapa kuti bachite michito iitondwa.’ (Jud. 4) Nichoonzyo, Bbayibbili lyaambuula atala ‘akunyonyoonwa kwabantu batayoowi’ Leza munkondo ya-Amagedoni.—2 Pet. 3:7; Chi. 16:16.

² Nikuba oobo, Jehova taakwe ngwayanda kuti anyonyoonwe. Mbuli mbutwakayiya muzyiiyo zyakayinda zili mumagazini eeyi, Bbayibbili litondeezya kuti Jehova “uyanda kuti boonse basanduke.” (2 Pet. 3:9) Baalu batondeezya moyo mulamfu mbuli Jehova chiindi nibagwasya sikubisya kuti asanduke akuti abe aabweenzinyina lubo aJehova. (Is. 6:9) Pesi bamwi basikubisya nga bayinkilila kunembo kabachita michito mibi nikuba kuti baalu nga beezya kwaziindi zyiingi kuti babagwasye kuti basanduke. Niinzi zyeelede kuchitwa muchiimo chili oobo?

“AMUMUGWISYE MUNTU MUBI”

3. (a) Bbayibbili lityeni atala abasizibi batasanduki? (b) Nkamboonzi nitukonzya kwaamba kuti sizibi uutasanduki nga walisalila kuti agwisigwe mumbungano?

³ Kuti sizibi katasanduki, baalu beelede kutobelezya malayilile aali muli 1 Bakkorinte 5:13 aatii: “Amumugwisye muntu mubi aakati kanu.” Mulaamwi majwi, sikubisya ooyo nga wakatebula nzyaakabyala. (Gal. 6:7) Nkamboonzi nitukonzya kwaamba oobo? Nkaambo taakwe naakabaswiilila pe baalu kwaziindi zyiingi nibakali kweezya kumugwasya kuti asanduke. (2 Ba. 17:​12-15) Michito yakwe nga itondeezya kuti wakasala kutaswiilila milawu yaJehova.—Dt. 30:​19, 20.

4. Nkamboonzi nikupegwa chizibisyo kuti sikubisya uutasanduki wagwisigwa mumbungano?

⁴ Kuti sizibi uutasanduki wagwisigwa mumbungano, kulapegwa chizibisyo chakuti muntu ooyo tachili Kamboni waJehova pe. Makanze aachizibisyo eecho, taakupa kuti sikubisya abe aabweeme pe. Chizibisyo eecho nchakugwasya bamumbungano kuti baswiilile malayilile aamuMagwalo aatii, “muleke kuliswaanizya” aamuntu ooyo alubo tamweelede ‘kulyaawe’ pe. (1 Kor. 5:​9-11) Malayilile aaya akwabilila mbungano. Mwaapostoli Pawulu wakati: “Bumena buche bupa kuti fulawa yoonse iikandidwe ifufumuke.” (1 Kor. 5:6) Sikubisya uutasanduki ulakonzya kupa kuti aabo balikubeleka changuzu kuti bapone kweendelana azyeelelo zyaJehova ziluleme batobelezye michito yakwe iitali kabotu.—Tus. 13:20; 1 Kor. 15:33.

5. Tweelede kumubona biyeni muntu wakagwisigwa mumbungano alubo nkamboonzi?

⁵ Tweelede kumubona biyeni muntu wakagwisigwa mumbungano? Nikuba kuti tatweelede kuliswaanizya pe anguwe pesi tweelede kumubona mbuli mbelele yakasweeka kutali kuti tachigwasiki pe. Mbelele yakapampala ilakonzya kuboola lubo mutanga. Tutalubi kuti mbelele eeyo yakalipeda kuli Jehova. Pesi chuusisya nchakuti muKkristu ooyo tachiponi kweendelana pe akulipeda kwakwe, eezi nzizyo zipede kuti atabi aabweenzinyina bulikabotu aLeza. (Ezk. 18:31) Nikuba oobo, muntu ooyo ulakonzya kuzoochincha akaambo kakuti Jehova ulaaluzyalo. Niinzi nzibeelede kuchita baalu kuti bagwasye sikubisya wakagwisigwa mumbungano?

BAALU MBUBAGWASYA BAKAGWISIGWA MUMBUNGANO

6. Nziizili ntaamu baalu nzibeelede kubweza kuti bagwasye muntu uunga wagwisigwa mumbungano?

⁶ Baalu nga bamulekelezya na muntu wakagwisigwa mumbungano kuti azooboole kuli Jehova alikke? Peepe. Bamukkomiti yabaalu nibabuzya sikubisya kuti uyanda kugwisigwa mumbungano, nga bamupandulwida ntaamu nzyayelede kubweza kuti azooboole lubo mumbungano. Pesi kuli zyiingi nzibachita. Chiindi chiingi, nga babuzya sikubisya kuti bazoomuswaya lubo nikwayinda myeezi miche kuti bazoobone kuti wakachincha na. Kuti sikubisya wazumina kuti baalu bazoomuswaye lubo, buzuba nibamuswaya balamusungwaazya kuti asanduke akuti abweede lubo kuli Jehova. Nikuba kachili aamoyo muyumu sikubisya, baalu banoomuswaya aawo awaawo.

7. Baalu batondeezya biyeni kuti bali aalweetelelo mbuli Jehova chiindi nibagwasya muntu wakagwisigwa mumbungano? (Jeremiya 3:12)

⁷ Baalu baleezya kuba aalweetelelo mbuli Jehova chiindi nibagwasya muntu wakagwisigwa mumbungano. Muchikozyano, chiindi ma-Israyeli nibakapapila Jehova, Jehova taakalindila kuti ma-Israyeli babweze ntaamu yakuti baboole kulinguwe, pesi nguwe wakasaanguna kubweza ntaamu kabatanatondeezya biya pe kuti basanduka. Mbuli mbutwakabona muchiiyo chachibili chili mumagazini eeyi, Jehova wakatondeezya kuti ulaalweetelelo chiindi naakabuzya mupolofita Hosiya kuti abweedululane lubo amwanakazaakwe wakachili kubisya. (Hos. 3:1; Malk. 3:7) Kabatobelezya Jehova, baalu bayanda kuti sikubisya abweede lubo kuli Jehova, pesi tabapi kuti sikubisya kumuyumine pe kubweeda.—Bala Jeremiya 3:12.

8. Chikozyano chaJesu chamwana mulombe wakasweekede chitondeezya biyeni kuti Jehova ulaalweetelelo aluzyalo? (Lukka 15:7)

⁸ Muchiiyo chachibili chili mumagazini eeyi, twakayiya atala achikozyano chaJesu chamwana mulombe wakasweekede. Wisi naakamubona mwanaakwe kali kuboola kung’anda, “wakamuchijaanina, waakumumbundila akumumyonta.” (Lk. 15:20) Wisi taakalindila mwanaakwe pe kuti amukumbile lulekelelo. Pesi wisi nguwe wakasaanguna kubweza ntaamu nkaambo wakali kumuyanda mwanaakwe. Baalu baleezya kutobelezya moyo uuli oobo kubantu banga bagwisigwa mumbungano. Bayanda kuti mbelele eezyo zisweekede ziboole kuli Jehova. (Lk. 15:​22-24, 32) Kuba kukondwa kujulu chiindi sizibi nasanduka alubo bamumbungano boonse nga babotelwa!—Bala Lukka 15:7.

9. Jehova ubasungwaazya kuti bachiteenzi basizibi?

⁹ Kuzwa kuzintu nzitwalanga-langa, twabona kuti Jehova tabalangi aameso kupela pe basikubisya batasanduki. Nikuba oobo, tabalekelezyi pe. Uyanda kuti baboole lubo kulinguwe. Nzila Jehova njalimvwaayo atala abasizibi basanduka ilembedwe muli Hosea 14:4 itii: “Ndiyoobaponya kubulwazi bwabo bwakutasyomeka. Ndiyoobayanda cakuliyandila, nkaambo ndagusya bukali bwangu kulinguwe.” Nkinkaako, baalu beelede kumugwasya sizibi kuti babona kuti ulikuchincha. Ambabo bakagwisigwa mumbungano, beelede kufwambaana kuboola kuli Jehova.

10-11. Baalu beezya biyeni kugwasya bantu baba aaminyaka myiingi kabagwisidwe mumbungano?

¹⁰ Kutegwani abaabo baba aachiindi kabagwisidwe mumbungano, amwi baba aaminyaka biya? Kulakonzeka kuti bantu aabo tabachichiti zibi nzibakagwisigilwa mumbungano. Muli zimwi zyiimo, bamwi nga tabachizi pe kuti niinzi chakapa kuti bagwisigwe mumbungano. Kazitakwe ndaba kuti baba aachiindi chilamfu biyeni kabagwisidwe, baalu beelede kubayanduula akubaswaya. Chiindi nibabaswaya, balakonzya kukombaamwi ambabo akubasungwaazya kuti baboole lubo mumbunga. Nikuba oobo, kuti muntu ooyo kali waba aaminyaka myiingi katanjili miswaangano, zilaantanganana kuti nga wakatontola mubukombi. Nkinkaako, kuti waamba kuti uyanda kuboola mumbungano, baalu balakonzya kuchita mabambe aakuti umwi ayiyaawe Bbayibbili nikuba katanaboozegwa mumbungano. Muzyiimo zili oobu, baalu mbabo beelede kuchita mabambe aakuti muntu ooyo ayiye Bbayibbili.

¹¹ Kabatobelezya lweetelelo Jehova ndwalaalo, baalu balabayanduula bantu bakagwisigwa mumbungano akubagwasya kuti baboole kuli Jehova. Kuti sikubisya watondeezya kuti wasanduka akusiya michito yakwe iitali kabotu, ulakonzya kuboozegwa mumbungano chakufwambaana.—2 Kor. 2:​6-8.

12. (a) Muuzyiimo zili biyeni baalu mubeelede kubelesya bupampu? (b) Nkamboonzi nituteelede kubonaanga bamwi basizibi Jehova takonzyi pe kubafwida luzyalo? (Alubo langa makani aamunsi.)

¹² Muli zimwi zyiimo, baalu beelede kubelesya bupampu kabatanaboozya sikubisya mumbungano. Muchikozyano, kuti muntu ooyo wakali aamulandu wakujata mwana munzila yalunya naakuti wakali siluleyo naakuti wakakanzide kumwaya lukwatano, baalu beelede kuba aachoonzyo chakuti muntu ooyo wasanduka chachoonzyo. (Malk. 2:14; 2 Tim. 3:6) Baalu beelede kukwabilila butanga. Pesi tatweelede kuluba kuti Jehova ulamutambula lubo sizibi uusanduka chachoonzyo alubo uusiya michito yakwe mibi. Nikuba oobo, chiindi baalu nibagwasya bantu bakachitila bamwi chibi chipati, tabeelede kubonaanga Jehova taakwe nazoobalekelela pe basizibi bali mbuli aaba.a—1 Pet. 2:10.

NZIBAKONZYA KUCHITA BAMUMBUNGANO

13. Nguuli musiyano uuliwo aakati kanzila njitweelede kumujataayo muntu uunga walulamikwa amuntu uunga wagwisigwa mumbungano?

¹³ Mbuli mbutwakayiya muchiiyo chayinda, kuti kwapegwa chizibisyo chakuti umwi mukwesu naakuti muchizi walulamikwa, tulakonzya kwiinkilila kunembo kuliswaanizya aamuntu ooyo nkaambo nga wakasanduka akusiya michito yakwe mibi. (1 Tim. 5:20) Nga uchili mukombima alubo nga uyanda kusungwaazigwa kwiinda mukuswaanizigwa aamwi abamwi bakombima. (Heb. 10:​24, 25) Nikuba oobo, chiimo chakwe chilisiyene achamuntu wagwisigwa mumbungano. Nga ‘twaleka kuliswaanizya’ aamuntu ooyo uunga wagwisigwa alubo ngatwaleka ‘kulyaamwi amuntu uuli boobo.’—1 Kor. 5:11.

14. Tweelede kubajata biyeni bantu bakagwisigwa mumbungano kweendelana amyoyo yesu iiyiisidwe aaBbayibbili? (Langa chifanikisyo.)

¹⁴ Zintu nzitwayiya, zyaamba kuti na tatweelede kuba aandaba amuntu uunga wagwisigwa mumbungano? Teembuzyaamba pe. Pesi tatweelede kuzuwa pe amuntu ooyo. Tulakonzya kumutamba kumiswaangano yambungano kuti kali bbululu naakuti wakali mweenzuma kweendelana anzituzumizigwa aamyoyo yesu iiyiisidwe aaBbayibbili. Niinzi nzitweelede kuchita kuti muntu ooyo wanjila miswaangano? Chiindi teetwakali kumujuzya pe muntu uuli oobo. Pesi lino muKkristu umwi awumwi weelede kubelesya moyo wakwe uuyiisidwe aaBbayibbili munkani eeyi. Bamwi balakonzya kusala kumujuzya naakuti kumutambula kumiswaangano yambungano. Nikuba oobo, tatweelede kwaambuula zintu zyiingi naakuti kuzuwa aamuntu ooyo.

15. Mbaasizibi bali biyeni bapandulwidwe muli 2 Johane 9-11? (Langa kabbokesi katii, “Johane aPawulu Bakali Kwaamba Chibi Chikozyenie Na?”)

¹⁵ Bamwi balakonzya kulibuzya kuti, ‘Bbayibbili talyaambi kuti na muKkristu uuliswaanizya aamuntu uuli boobo nga wajatikizigwa mumichito yakwe mibi?’ (Bala 2 Johane 9-11.) Majwi aazyungulukide vesi eeyi, atondeezya kuti malayilile aaya abeleka kuli basiluleyo akubantu bayunga bamwi kuti bachite chibi. (Chi. 2:20) Nkinkaako, kuti muntu kali kusumpula njiisyo zyabasiluleyo naakuti kasumpula michito mibi, baalu tabeelede kumuswaya pe muntu ooyo. Mukuya kwachiindi, kulakonzeka kuti mizeezo yakwe izooboolaamwi. Kuti katanachincha, tatweelede kumujuzya pe nikuba kumutamba kumiswaangano.

KUTOBELEZYA JEHOVA MUKUTONDEEZYA LWEETELELO ALUZYALO

16-17. (a) Jehova uyanda kuti basizibi bachiteenzi? (Ezekiele 18:32) (b) Baalu kujana batondeezya biyeni kuti mbabelesinyina aJehova chiindi nibagwasya sikubisya?

¹⁶ Twayiyaanzi muzyiiyo zili 5 zili mumagazini eeyi? Jehova taakwe ngwayanda pe kuti anyonyoonwe. (Bala Ezekiele 18:32.) Uyanda kuti basizibi bamvwanane lubo anguwe. (2 Kor. 5:20) Eezi nzizyo zyakali kupa kuti Jehova akkale kasungwaazya bakombi bakwe bakali kumupapila kuti basanduke akuti baboole lubo kulinguwe. Baalu bali aachilongezyo chakuba babelesinyina aJehova chiindi nibeezya kugwasya sizibi kuti asanduke.—Rom. 2:4; 1 Kor. 3:9.

¹⁷ Nga kwaba kukondwa kupati loko kujulu chiindi sizibi naasanduka. Taateesu wakujulu Jehova, nga wakondwa loko chiindi nabona mbelele iisweekede kayiboola mumbungano. Tulayungizya kumuyanda Jehova chiindi nituyeeyesesya atala alweetelelo aluzyalo lupati ndwalaalo.—Lk. 1:78.