Hosiya
11 “Israyeli naakali mulombe, ndakali kumuyanda,
Alubo ndakayita mwanaangu kuti azwe mu-Ijipita.
2 Nibakayinkilila kunembo kubayita,*
Mpimpawo mpubakali kuya kule ambabo.
Bakayinkilila kunembo kupa zipayizyo kuzikozyano zyaBbaala
Alubo bakali kupa zipayizyo kuzikozyano zibezedwe.
3 Pesi ndime ndakayiisya Efremu kweenda, kandibanyampula mumaboko aangu,
Pesi teebakaziba kuti ndime ndakabasilika.
4 Ndakali kubakwela antambo zyabantu, antambo zyaluyando,
Kulimbabo ndakali mbuli muntu uugwisya jokwe munsingo zyabo.
Ndakeetela umwi awumwi chakulya kabotu-kabotu.
5 Tabazoobweedi pe kunyika ya-Ijipita, pesi Asiriya uzooba mwaami wabo,
Nkaambo bakakaka kuboola kulindime.
6 Alubo panga lizoonyonyoona myuunzi yabo,
Akunyonyoona minkulwa yakwe* akubanyonyoona akaambo kamakanze aabo.
7 Bantu bangu bakanzide kutasyomeka kulindime.
Nikuba kuti bakabayita aajulu,* taakwe wakanyampuka pe.
8 Iwe O Efremu, nga ndilakutakata na?
Iwe O Israyeli, nga ndilakubikka mumaboko aabasinkondonyokwe na?
Nga ndilakujata mbuli Adima na?
Nga ndilakuchita mbuli Zebboyimu na?
Ndachincha mizeezo yangu,
Alubo ndaba aalweetelelo lupati.
9 Tandizoomuvutukili pe abukali bwangu,
Tandizoomunyonyooni lubo pe Efremu,
Nkaambo ndime Leza, tandili muntu pe,
Ooyo uusalala ulaakati kanu.
Tandizoosiki kulindinywe kandinyemede pe.
10 Bazootobela Jehova alubo uzoovuluma mbuli mulavu,
Natazoovulume, bana bakwe bazooza kabazazama kabazwa kububbila.
11 Bazoozazama mbuli kayuni, chiindi nibazoozwa mu-Ijipita,
Mbuli nziba nibazoozwa munyika ya-Asiriya,
Alubo ndizoopa kuti bakkale mumaanda aabo,” mbaamba Jehova.
12 “Efremu wandizyunguluka aamanwa,
Ang’anda ya-Israyeli yandizyunguluka aalweeno.
Pesi Juda uliswini kweenda aaLeza,
Alubo ulasyomeka kuli Ooyo Uusalalisya.”